AZƏRBAYCANDA KORONAVIRUSLA BAĞLI XƏBƏRLƏR

"Yeni vətəndaşlıq qanunu Rusiya-Azərbaycan münasibətlərinə müsbət təsir edəcək"

Müsahibə
20 İyun 2020, 21:00 1433
İyul ayında Rusiyada vətəndaşlığa qəbulu sadələşdirən yeni federal qanun qüvvəyə minəcək. Bu qanuna görə, əcnəbilər yerli vətəndaşlığı qəbul edərkən əvvəlki vətəndaşlıqdan imtina etməli deyillər. Yeni qanunun müsbət və mənfi cəhətlərini "Report”un yerli bürosuna Rusiya Dövlət İdarəçilik Universitetinin professoru Vladimir Volox izah edib.

- Rusiya vətəndaşlığına keçərək əvvəlki vətəndaşlıqdan imtina etməməyə yol açan bu yeni qanunun üstün və zəif cəhətləri hansılardır?
- Federal Vətəndaşlıq Qanununa düzəlişlər etməyi həyat özü şərtləndirir. Bu gün insanlar bəzən vətəndaşlıqdan imtina etmək üçün müvafiq ərizə verməklə bağlı həmin ölkəyə gedə bilmirlər. Xüsusilə hazırkı pandemiya dövründə bu məsələ daha da kəskin xarakter alıb. Şəxsən mən ikili vətəndaşlığın tərəfdarı olmasam da, bir sıra dövlətlərdə, o cümlədən Rusiyada qanunlar aidiyyəti dövlətlərlə müvafiq sazış imzalandığı təqdirdə ikili vətəndaşlığa yol verir. Bütövlükdə ikili, yaxud üçlü vətəndaşlığın nöqsanı belədir ki, vətəndaşın hərbi xidmət, borc öhdəlikləri, aliment ödənişi kimi öhdəliklərindən yayınmağa şərait yaradır.

- Yəni ikili vətəndaşlığı olan şəxs hər iki ölkədə hərbi xidmət keçməlidir?
- Bəli. Hərbi xidmətə çağırışçı olan şəxs müvafiq qaydada vətəndaşı olduğu ölkədə mükəlləfiyyəti yerinə yetirdikdən sonra vətəndaşı olduğu digər ölkənin də qanunlarına görə, təbii ki, orada da orduya çağırılmalıdır. Yəni başqa dövlətin vətəndaşlığını qəbul etməklə insan əvvəlki ölkəsi qarşısındakı öhdəliklərindən heç də azad olunmur.

- Bəs Rusiyada qəbul edilən bu yeni qanun Azərbaycanla əlaqələrə necə təsir edəcək?
- Şübhəsiz ki, bu qanun iki ölkə arasındakı münasibətləri daha da gücləndirəcək. Aramızda Dostluq Müqaviləsi, miqrasiya da daxil olmaqla müxtəlif məsələlərə dair bir sıra hökumətlərarası sazişlər imzalanıb və qüvvədədir. Yeni düzəlişlər də beynəlxalq əməkdaşlıqla bağlı qarşılıqlı münasibətlərimizə müsbət təsir göstərəcək.