Yeni və yorucu olmayan istirahət məkanı - Fotolar
"Kompas Tour”, "Millenium Tourism Azerbaijan” və "Nefer
Tours” turizm şirkətlərinin Şarm əl-Şeyxə təşkil etdikləri səfər zamanı "Nefer
Tur” şirkətinin marketinq və satış üzrə direktoru Qalina Qorelova ilə söhbət
etmək fürsəti tapdıq. Qalina xanım azərbaycanlı turistlərin Misirə daha çox
cəlb edilməsi istiqamətində görülən işlər, ümumiyyətlə, Misir turizminin özəllikləri
barədə məlumat verdi.
- Sizin şirkət indiyə qədər
Azərbaycandan olan turistlərlə işləyib, ya bu, sizin praktikanızda ilk haldır?
- Biz əvvəllər Azərbaycandan bir neçə reysləri qarşılamışıq. Adətən
həmin uçuşlar Novruz bayramı və Yeni ildə həyata keçirilirdi. Lakin mütəmadi,
böyük reyslər hələ ki, olmayıb. Bu, ilk belə reysdir və artıq gündəlik uçuş
əsasında baş verir.
- Siz necə düşünürsünüz, bu
reys özünü doğruldacaq, tələbatın
olacağını gözləyirsiniz?
- Satış həcmi yaxşıdır. Reyslər demək olar ki, tam şəkildə dolur və
biz tələbin daha da artacağını gözləyirik. Biz bilirik ki, ənənəvi olaraq
Azərbaycan turistləri daha çox Türkiyə, Birləşmiş Ərəb Əmirliklərinə uçurlar.
Misir isə yeni və kifayət qədər yorucu olmayan bir istiqamətdir. Burada zəngin
mədəniyyət, gözəl dəniz, əlavə olaraq, ilboyu davam edən çimərlik dövrü var.
Ümid edirik ki, bu proqram uzanacaq, yəni qışda da Azərbaycandan turist qəbul
edə bilərik. Həmin dövrdə Şarm əl-Şeyxdə havanın temperaturu 25-30 dərəcə olur,
suyun temperaturu 23 dərəcəyə qalxır. Komfortlu şəkildə istirahət etmək olar.
Ən əsası, bu, elə də bahalı istirahət deyil, hər bir kəs bunu reallaşdıra
bilər.
- Yəni azərbaycanlı turistlər
bura əvvəllər yalnız bayramlarda uçurdular?
- Bəli, əsasən bayramlarda olurdu.
- Türkiyə kurortlarının servislərinin komfortunu görən azərbaycanlı
turisti Şarm əl-Şeyx nə ilə təəccübləndirə bilər?
- Əlbəttə, Misir tamam başqa ölkədir. Bu, tamamilə ayrı təbiətdir,
insanların tamam başqa mentaliteti var. Burada başqa dini abidələr, öz əyləncələri
və görməli füsunkar yerlər var. Məsələn, götürək Dubayda və Misirdə safarini -
bunlar tamam başqa şeylərdir. Maldiv adalarında dayvinqlə, Şarm-əl-Şeyxdəki
dayvinq tamamilə ayrı-ayrı əyləncə növüdür. Ehramlara getmək bir nüansdır,
Türkiyə və yaxud Dubaya getmək, Xəlifə bürcünə qalxmaq isə tamam başqa nüansdır.
Yəni demək istəyirəm ki, bu, həm yeni, həm də cansıxıcı, yorucu olmayan bir
istirahətdir. Əlbəttə ki, biz servisin yeni səviyyəsini və ən əsası, türk
büdcəsindən kifayət qədər azını təklif edə bilərik. Əgər qış barədə danışsaq,
onda sual çıxır - belə bir büdcə ilə hara getmək olar? Mən sizə bizim
Qazaxıstanla olan təcrübəmizdən danışmaq istəyirəm. Biz burada işə hər on
gündən bir Almatıdan bir reyslə başlamışıq. Və 3 il ərzində həftədə 5-7 min
turist sayına yüksəlmişik. Yəni təsəvvür edin ki, aya 900 qonaqdan 20 minə
çatmışıq. Onlar üçün bu, yeni istiqamət idi. Hansısa bir müddətdə onlar yalnız
qış dövründə uçurdular. Çünki adətən yayda daha çox Türkiyəyə gedirdilər. İndi
onlarda yayda da istirahətin aktiv dövrüdür. Tək Almatıdan deyil, Nursultandan,
doqquz əlavə şəhərdən də uçuşlar mövcuddur. Yəni demək olar k, bütün Qazaxıstan
bizim reyslərlə dolub. Bu il biz Özbəkistandan da birbaşa reys təşkil etmişik.
Onların da həftəlik proqramı qazaxlardakı kimidir. Artıq iki aydır ki, uçurlar,
maraq böyükdür. Özbək turistlər daha çox ehramları, Misirdəki ilk məscidi
görməyə can atırlar. Qışda isə Qırğızıstandan gəlirlər. Tacikistandan da
reyslər var.
- Misiri turistlərin daha çox hansı
kateqoriyası seçir?
- Mən əvvəldən də dedim ki,
Misir çox maraqlı ölkədir. Burada az büdcə ilə çox şey etmək olar. Burada hər
yaş kateqoriyasından olanlar, ailə, uşaqlar, gənclər, yaşlı nəsil - necə
deyərlər "sinyor travel” üçün hər cür istirahət var. Onlar üçün burada maraqsız
olmur, komfortludur. Şarm əl-Şeyx qapalı şəhərdir. Burada hərəkət etmək çox
asandır. Faktiki olaraq, hamı rusca və ingiliscə danışır. Yəni 90 faiz hallarda
sizi anlayacaqlar. Bu səbəbdən də, burada istirahət çox maraqlı və
komfortludur.
- Belə demək olarsa, bura
Azərbaycan turisti üçün də kifayət qədər maraqlı istiqamətdir. Azərbaycan
şirkətləri ilə münasibətlər qurmaq, birbaşa reyslər təşkil etmək planlarınız
mövcuddurmu?
- Bu reys çərçivəsində biz artıq bir neçə Azərbaycan şirkətləri ilə
əməkdaşlıq edirik. Bundan əlavə reys mütəmadi olduğundan, artıq Azərbaycana "outqouinq”
variantını nəzərdən keçiririk. Misir turistlərinin bu istiqamətə marağı var.
Viza almaq elə də sadə olmasa da, biz ümid edirik ki, bu məsələ bir qədər
yüngülləşəcək. Ən əsası, tələbat və maraq olduğu üçün Azərbaycanla ikitərəfli
əməkdaşlığı da həyata keçirəcəyik.
- Qış dövrü üçün hansı
proqnozlar var?
- Biz çox ümid edirik ki, bu, bütün ili əhatə edəcək. Hələ ki, hər
şey yaxşıdır. Lakin yay dövründən sonra dəqiq nəsə söyləmək olacaq. Yuxarıda
qeyd etdiyim kimi, satış həcmi yüksəkdir və biz işlərin yaxşı gedəcəyini
gözləyirik. Sizin yadınızdadır, şirkətləriniz əvvəllər də ox atıblar, lakin elə
də uzağa gedə bilməyiblər. Azərbaycanın turist bazarının bir sıra ehtiyatlılığı
var. Lakin biz infoturlar təşkil edirik və ümid edirik k, bu şübhələr əriyib
gedəcək. İndiki tələb bizlərə oktyabra kimi nəzərdə tutulan proqramı başa
çatdırmağa imkan verəcək. Əgər hər şey yaxşı olsa, əlbəttə, bu istiqamətdə
işləməkdə davam edəcəyik.
- Oktyabra kimi bu proqram
çərçivəsində nə qədər azərbaycanlı turistin gəlməsini gözləyirsiniz?
- Hər həftəyə 235 kreslo sayının olmasını gözləyirik. Bu, bizim
plandır və "torbada pişik axtarmaq” fikrində deyilik. Sizin turist şirkətləri
hər şeyi öz gözləri ilə gördükdən sonra biz agentlər üçün seminarlar təşkil
etdik. Bazarınızda informasiyalar daha çox oldu və bu səbəbdən də tələbin
artacağını gözləyirik. Əlbəttə, əhalinin alıcılıq qabiliyyətini nəzərdən
keçirməmək olmaz. Sizin ölkə iqtisadiyyatı inkişaf edən dövlətdir. Mən Azərbaycanda
2016-cı ildə və bir də bir ay bundan əvvəl oldum. İlahi, nə qədər dəyişikliklər
baş verir? Bu, çox pozitiv dəyişikliklərdir və onlar göz önündədir. Sizin
insanlar yüksək təhsillidirlər, yaxşı qazanırlar və komfortlu istirahət etmək
istəyirlər. Necə deyirlər, işləyən dişləyər. Hər şey də qaydalara uyğundur.
Kaspi.az