Vahid məkan, operativ və nəzakətli xidmət - REPORTAJ

28.08.21 11:30 1193

Və ya DOST mərkəzinin nəzdində fəaliyyət göstərən Vahid Əlaqələndirmə Mərkəzindən reportaj

Salam, xoş gəlmisiniz. COVID-19 pasportunuzu təqdim edin, zəhmət olmasa.

- Oğlum, birinci doza vaksin olunmuşam, problem olmaz ki?

- Xeyr, müəllim, əgər COVID pasportunuz və ya "Əks göstəriş sertifikatı”nız varsa, xidmətlərdən istifadə edə bilərsiniz.

Maskasını taxır, əllərini dezinfeksiya edir və qəbul mərkəzinə daxil olur. Nəzakətlə vətəndaşın hansı xidmətdən yararlanmaq istəməsi öyrənilir, növbə götürməyinə yardım edilir və xidmət masasına yönəldilir.

Burada 44 günlük Vətən müharibəsi şəhidlərinin ailə üzvləri, müharibədə xəsarət almış hərbi qulluqçuların və həmin müharibə ilə əlaqədar əlilliyi müəyyən olunmuş şəxslərin problemləri "bir pəncərə” prinsipi ilə həll olunur.

Biz də bu "pəncərə”nin işləmə prinsipi ilə maraqlanmaq üçün DOST mərkəzinin nəzdində fəaliyyət göstərən Vahid Əlaqələndirmə Mərkəzindəyik (VƏM).

7 dövlət orqanı üzrə 26 istiqamət

Burada 7 dövlət orqanı üzrə 26 istiqamətdə xidmətlər vahid məkandan təqdim olunur. Mərkəzin yaradılmasında məqsəd vahid məkandan operativ, şəffaf və nəzakətli xidmət həyata keçirməkdir. Əmək və Əhalinin Sosial Müdafiə Nazirliyi, Müdafiə Nazirliyi, Səhiyyə Nazirliyi, yerli icra hakimiyyəti orqanları, İcbari Tibbi Sığorta üzrə Dövlət Agentliyi, Dövlət sığorta kommersiya xidməti, Səfərbərlik və Hərbi Xidmətə Çağırış üzrə Dövlət Xidməti şəhid ailələri üzvlərini, müharibə ilə əlaqədar xəsarət alan hərbi qulluqçuları və əlilliyi müəyyən edilən şəxsləri qarşılayır.

Süründürməçilik və vaxt itkisinə son...

Bundan öncə hər bir orqan fərqli məkanlarda yerləşdiyi üçün həssas təbəqəyə mənsub olan vətəndaşlarımız müxtəlif məlumatları toplamaqda əziyyət çəkir, vaxt itirirdilər. Vətəndaş bir ərizəyə görə bəzən 4 ünvana müraciət edirdi. Artıq buna ehtiyac yoxdur. Yuxarıda saydığımız kateqoriyaya aid olan insanlar bir mərkəzə yaxınlaşır, müxtəlif orqanlardan onlara lazım olan məlumatı toplayaraq elə burada yerləşən digər dövlət orqanına təqdim edirlər. Onlara qarşı süründürməçiliyə yol verilmir. Mövcud problem yerindəcə həll olunur.

Operativ və şəffaf xidmət

4 saylı DOST mərkəzinin direktor müavini İnqilab Fərzəliyev deyir ki, xidmətlər tam şəffaf və vətəndaş məmnunluğu çərçivəsində həyata keçirilir: "Hazırda bütün DOST mərkəzlərində Vahid Əlaqələndirmə Mərkəzi yaradılıb. VƏM-lərin təşkil edilməsində məqsəd vətəndaşlara vahid mərkəzdən şəffaf, operativ xidmətlərin göstərilməsidir. Xidmətin gedişatında vətəndaşların sualları yerindəcə cavablandırılır və sistemlər üzərindən verilən məlumatlar arayış şəklində vətəndaşlara təqdim edilir. Yaxud vətəndaşların müraciətləri qeydə alınaraq lazımi orqanlara göndərilir. Ümumilikdə, vətəndaş müraciətlərinin həm cavablandırılması, həm də yerində xidmətlərin göstərilməsi operativ şəkildə həyata keçirilir. Sonda ümumi xidmət səviyyəsi mərkəzdə quraşdırılmış müvafiq aparatlarla qiymətləndirilir”.

Birbaşa xidmət, çağrı mərkəzi, səyyar forma

Həmsöhbətimiz deyir ki, vətəndaşların müraciətlərinə 3 formada növbəlilik əsasında baxılır: "Birincisi, birbaşa müraciətlərdir. Onlar birbaşa DOST mərkəzlərinə müraciət etməklə yerində xidmətlər ala bilərlər. İkincisi, 142 çağrı mərkəzinə zəng etməklə qeyd edilən istiqamətdə müraciət edə bilərlər. Onları narahat edən suallara cavab ala, həmçinin təkliflərini bildirə bilərlər. Çağrı mərkəzi 3 dəqiqə ərzində vətəndaşa məlumat verir. Xidmətlər səyyar formada da həyata keçirilir. Mərkəzə gələ bilməyən, sağlamlıq imkanları məhdud şəxslərə səyyar xidmət göstərilir”.

23 avqustdan etibarən fəaliyyətə başlayan mərkəzdə hələ ki, sakitlikdir. Yeni xidmət olduğu üçün vətəndaşlar məlumatsızdır. Hazırda müraciətlər daha çox Müdafiə Nazirliyi və səhiyyə strukturu ilə bağlıdır.

Xilaskar könüllülər

VƏM-lə bağlı xidmətin təşkilində könüllülər də canla-başla işləyir. İlkin mərhələdə könüllülər vətəndaşları dinləyir, müraciətlərini müəyyənləşdirir və xidmətə uyğun olaraq onları yönəldir. Aparatlarda növbələrin verilməsini könüllülər həyata keçirir. Həmçinin vətəndaşların tibbi maskadan düzgün istifadə etməsinə nəzarət edirlər. Könüllülər gün ərzində 3 dəfə bütün işçilərin temperaturlarını ölçür, aidiyyəti şöbəyə məlumat verirlər. Proses vətəndaşların sağlamlığını və məmnunluğunu düşünərək həyata keçirilir.

Əvvəl bu sənədi almaq üçün 7-8 binaya gedirdiksə...

Yuxarıda da qeyd etdiyimiz kimi hələ ki, ən çox müraciət Müdafiə Nazirliyinin strukturları ilə bağlıdır. Nazirliyin əməkdaşı Nərmin Əsədullayeva deyir ki, müraciətləri səbirlə dinləyir, vətəndaşların məmnun ayrılmaları üçün əllərindən gələni edirlər: "Bizim strukturda şəhid və şəhid ailəsi statusunun əldə olunması üçün arayışlar verilir, müharibə veteranı adının verilməsi ilə bağlı vəsiqələr təqdim edilir. Orden və medallarla təltif olunma üçün xəsarət, yaralanma, kontuziya almış şəxslərin əlliliyinin müəyyən edilməsi ilə bağlı arayışları da hazırlayırıq. Bundan əlavə, sığorta ödənişləri ilə bağlı sənədlərin verilməsi üçün müraciətlər qəbul olunur”.

MN-in xidmətlərindən yararlanmaq üçün müraciət edən qazi Elnur Əliyevə yaxınlaşırıq: "İkinci Qarabağ müharibəsi iştirakçısıyam. Veteranlıq vəsiqəsinin alınmasıyla bağlı müraciət etdim. Xidmətdən çox razıyam. Əvvəl bu sənədi almağa görə 7-8 binaya gedirdiksə, indi bir pəncərədə bütün işlərimizi həll edirlər”.

"Onlar bizim fəxrimizdir”

İcbari Tibbi Sığorta Agentliyinin əməkdaşı Orxan Ağababayev də üzündə təbəssümlə ona müraciət edən vətəndaşları gözləyir: "Qazilərin və şəhid ailələrinin xəstəxanalar, əlilliklə bağlı problemlərini həll edirik. Bu təbəqədən olan insanlar məhz xəstəxanalarda xidmətlə bağlı problemlər yaşadıqda bizə müraciət edə bilərlər. Biz araşdırır və kömək edirik. Məqsədimiz qazi və şəhid ailəsinin problemlərini həll etməkdir. Onlar bizim fəxrimizdir və onlara canla-başla xidmət edirik”.

Səhiyyə sistemi ilə bağlı hansı problemləri varsa...

Lalə Qurbanova Səhiyyə Nazirliyinin əməkdaşıdır. Deyir ki, səhiyyə ilə bağlı nə problemləri varsa, VƏM-ə müraciət etsinlər: "Bizim işimiz şəhid ailələri və müharibədə xəsarət alan hərbçilərimizin sağlamlığının qeydinə qalmaqdır. Səhiyyə Nazirliyinin tabeçiliyində olan tibb müəssisələrinə müalicə və müayinə ilə bağlı göndəriş verəcəyik. Səhiyyə sistemi ilə bağlı hansı problemləri varsa, bizə müraciət edə bilərlər”.

"İşimizi çox asanlaşdırıblar”

Xidməti qiymətləndirmək üçün könüllü ilə söhbətləşən qaziyə yaxınlaşırıq: "Füzuli, Cəbrayıl, Xocavənd, Hadrut uğrunda döyüşlərdə iştirak etmişəm. Şuşaya daxil olarkən yaralandım. 3-cü qrup əlilliyə təyin olundum. İndi də vəsiqəmi almaq üçün müraciət etmişdim. Xidmət yüksək səviyyədədir. İşimizi çox asanlaşdırıblar. Gülərüz personal və bizə kömək etmək üçün çalışan insanlara təşəkkür edirik”.

"Vətəndaşa DOSTuq”

Çıxışda qəbul mərkəzinin əməkdaşı Kənan Qasımovun aqressiv vətəndaşla söhbətinə şahid oluruq. Təmkinlə, səbirlə kömək etməyə çalışır. Deyir ki, onun problemi var və aqressiv ola bilər: "Gələn vətəndaşlar cəmiyyətin ən həssas üzvləridir. İstər problem, istər isti hava şəraiti onu gərginləşdirə bilər. Biz anlayırıq və sakitləşdirməyə çalışırıq. Bizim işimiz onlara xidmətdir. Onsuz da vətəndaşa lazımi diqqəti göstərəndə o sakitləşir. Vətəndaş qapıdan giribsə, qapıdan çıxana, "sağ ol” deyənə kimi biz ona sözün əsl mənasında DOSTuq”.

Məlumat üçün bildirək ki, hazırda VƏM Bakı şəhəri üzrə 4 DOST mərkəzində fəaliyyətə başlayıb. 1 saylı DOST mərkəzində Yasamal, Səbail və Qaradağ, 2 saylı DOST mərkəzində Xəzər və Pirallahı, 3 saylı DOST mərkəzində Sabunçu, Suraxanı, Nizami, Xətai, 4 saylı DOST mərkəzində isə Binəqədi, Nərimanov, Nəsimi rayonunda qeydiyyatda olan vətəndaşlara xidmət göstəriləcək.

Aygün ƏZİZ

Fotolar: Tapdıq Abdullayev