Uğurlu siyasətin bəhrəsi: rəqəmlər hər şeyi deyir - Fotolar
Azərbaycanda həyata
keçirilən islahatlar, "qara qızılın” insan kapitalına çevrilməsi istiqamətində
atılan addımlar, uğurla icra edilən regional inkişaf proqramları ölkəmizin
hərtərəfli inkişafına səbəb olub. Bu inkişaf və tərəqqi, müasir dövrün
tələblərinə, xalqın rifahına və milli maraqlarımıza söykənən siyasi kurs
Azərbaycanı Cənubi Qafqazın lider dövlətinə çevirib. Fərəhli haldır ki, bu
reallıqlar yalnız yerli mütəxəssislər tərəfindən deyil, nüfuzlu beynəlxalq
təşkilatlar tərəfindən də etiraf olunur. Dünya Bankının "Doing Business”
reytinqində ölkəmizin hər il bir qədər irəliləməsi də bu qəbildən olan
hadisədir. Heç şübhəsiz, bu, Azərbaycanda Prezident İlham Əliyevin rəhbərliyi
ilə həyata keçirilən daxili və xarici siyasət kursunun uğurlarını özündə ehtiva
edən daha bir göstəricidir. Bu göstərici onu deməyə əsas verir ki, dövlət
başçısının sosial-iqtisadi siyasəti alternativsizdir.
Prezident İlham Əliyevin
rəhbərliyi ilə həyata keçirilən uğurlu siyasət, o cümlədən mühüm iqtisadi
islahatlar dünyada baş verən iqtisadi böhranlar fonunda da ölkəmizin inkişafını
təmin edib. Ötən illərdə reallaşdırılan iqtisadi islahatlar nəticəsində maliyyə
sabitliyi və iqtisadi artım bərpa olunub, bir çox sahələrdə, xüsusilə də kənd
təsərrüfatı, qeyri-neft sənayesi və digər sektorlarda mühüm irəliləyiş əldə edilib.
Şübhəsiz ki, bütün bu nailiyyətlərdə Prezident İlham Əliyevin imzası ilə həyata
vəsiqə alan regional inkişaf proqramlarının öz payı var.
2004-cü ildən indiyə
qədər reallaşdırılan 3 dövlət proqramı sayəsində Azərbaycanın bütün
regionlarının siması tamamilə dəyişib, kənd və şəhərlər, qəsəbələr arasındakı
fərqlər aradan qalxıb, iqtisadi tərəqqi əldə edilib, insanların sosial rifah
halı yaxşılaşdırılıb. Prezident İlham Əliyevin iştirakı ilə keçirilən "Azərbaycan
Respublikası regionlarının 2014-2018-ci illərdə sosial-iqtisadi inkişafı Dövlət
Proqramı”nın icrasının yekunlarına həsr olunmuş konfransa səsləndirilən
statistik göstəricilər də deyilənləri bir daha təsdiqləyir.
Misal üçün, bu dövlət
proqramlarının reallaşdırılması hesabına son 15 il ərzində Azərbaycan
iqtisadiyyatı dünya miqyasında rekord templərlə inkişaf edib, ümumi daxili
məhsul 3,3 dəfə artıb. Sənaye istehsalı 2,6, ixracımız 4,7, valyuta
ehtiyatlarımız 24 dəfə artıb. Hazırda Azərbaycanın valyuta ehtiyatı 45 milyard
dollar təşkil edir. Aparılan uğurlu siyasət ölkəmizə böyük həcmdə vəsaitin,
sərmayənin yatırılmasına da səbəb olub. 15 il ərzində Azərbaycana təxminən 250
milyard dollar sərmayə qoyulub ki, bunun da yarısı xarici investisiyadır.
Xatırladaq
ki, ilk dəfə Azərbaycan Dünya Bankının "Doing Business” hesabatında 2006-cı
ildə qeyd olunub və o vaxt Azərbaycan 98-ci yerdə qərarlaşıb. Prezident İlham
Əliyevin rəhbərliyi ilə aparılan köklü islahatlar, investisiya iqliminin
yaxşılaşdırılması nəticəsində son "Doing Business” hesabatında Azərbaycan dünya
miqyasında 25-ci yerdədir.
Bununla yanaşı, demoqrafik
göstəricinin ilbəil artdığı, indiyə qədər əhalimizin sayının 1,6 milyon nəfər
çoxaldığı ötən dövrdə Azərbaycanda ümumilikdə 2 milyon yeni iş yeri yaradılıb.
Bu iş yerlərinin böyük hissəsi bölgələrin payına düşüb. Kənd təsərrüfatı sahəsində
1,7 dəfə artımın müşahidə olunması da yeni iş yerlərinin yaranmasına təsir
edib. Təkcə keçən il 118 min yeni iş yeri yaradılıb. Artan iqtisadi imkanlar sosial
məsələlərə diqqətin artırılmasına da səbəb olub. Son 15 il ərzində maaşlar 7,
pensiyalar 9 dəfə artıb. Həyata keçirilən tədbirlər sayəsində son 15 ildə
yoxsulluq təxminən 50 faizdən 5,4 faizə düşüb, işsizlik Azərbaycanda 5 faiz
səviyyəsinə enib. Vətəndaşların sağlamlığının qorunması üçün hər il təxminən 5
milyona yaxın insan dövlət xətti ilə pulsuz tibbi müayinədən keçirilib.
Son 15
ildə 3 min 200-dən çox məktəb, 640 tibb müəssisəsi tikilib və ya əsaslı şəkildə
yenidən qurulub, bölgələrdə 44 olimpiya mərkəzi yaradılıb. Son illərdə dörd
böyük su anbarı tikilib. Bunlar Taxtakörpü, Şəmkirçay, Göytəpə, Tovuzçay su
anbarlarıdır. Onların tutumu 470 milyon kubmetrdir. Bununla yanaşı, hər il
dövlət vəsaiti ilə minimum 300 subartezian quyusu qazılıb. Ötən 15 ildə 15 min
kilometr avtomobil yolu çəkilib və bu proses davam etdirilir. Builki Dövlət
İnvestisiya Proqramına əsasən yüzlərlə kəndin yolları abadlaşdırılacaq, o
cümlədən magistral yolların tikintisi təmin ediləcək. Davos Ümumdünya İqtisadi
Forumunun hesablamalarına əsasən, avtomobil yollarının keyfiyyətinə görə
Azərbaycan dünyada 34-cü yerdədir. Bütün bunlar əldə edilən nailiyyətlərə gözəl
nümunədir.
Xatırladaq ki, Azərbaycan
bu nailiyyətlərə ərazisinin 20 faizi Ermənistan tərəfindən işğal olunmuş halda
imza atıb. Məhz bu işğal nəticəsində Azərbaycan iqtisadiyyatına böyük ziyan
vurulub, 1 milyondan artıq azərbaycanlı qaçqın və məcburi köçkünə çevrilib.
Lakin ulu öndər Heydər Əliyevin Azərbaycanda siyasi hakimiyyətə gətirilməsindən
sonra ölkəmiz qısa müddətdə bütün çətinliklərin öhdəsindən gələ bilib. Ulu
öndərin əsasını qoyduğu siyasi kursu uğurla davam etdirən Prezident İlham
Əliyev iqtisadi-siyasi böhrandan çıxan Azərbaycanı daha da inkişaf etdirib. Bu
inkişaf çərçivəsində qaçqın və məcburi köçkünlərin, müharibə əlillərinin, şəhid
ailələrinin sosial problemləri də öz həllini tapıb.
Misal üçün, son illər
ərzində 102 yeni qəsəbə salınıb, bu kateqoriyadan olan üç yüz minədək
vətəndaşın mənzil şəraiti əsaslı şəkildə yaxşılaşdırılıb. Qarabağ müharibəsi,
20 Yanvar əlillərinə, şəhid ailələrinə ötən dövrdə 6654 mənzil təqdim edilib.
Yalnız 2018-ci ildə şəhid ailələrinə və müharibə əlillərinə nəzərdə
tutulduğundan 3 dəfə çox olmaqla, yəni 626 mənzil verilib. 2019-cu ildə də bu
kateqoriyadan olan vətəndaşlara azı 800 mənzilin təqdim olunması nəzərdə
tutulub. Bu vaxta qədər müharibə əlillərinə 6144 minik avtomobil verilib.
Hazırda da bu proses davam etdirilir. Prezident İlham Əliyevin imzaladığı
fərmanlarla Azərbaycanın ərazi bütövlüyü uğrunda həlak olmuş hərbi
qulluqçuların vərəsələrinə birdəfəlik ödəmənin verilməsi prosesinə də
başlanılıb. Ümumilikdə 12268 şəhidin vərəsələrinə birdəfəlik 11 min manat
ödəmənin verilməsi üçün 135 milyon manat vəsait ayrılıb.
Sadalanan faktlardan da
göründüyü kimi, dövlət başçısı İlham Əliyevin rəhbərliyi ilə Azərbaycan
regionlarının inkişafı ölkədə uğurla həyata keçirilən davamlı sosial-iqtisadi
inkişaf strategiyasının mühüm tərkib hissəsinə çevrilib. Məhz regionların
inkişafı sahəsində qəbul edilmiş və uğurla həyata keçirilmiş dövlət
proqramlarında, habelə regionların sosial-iqtisadi inkişafına dair əlavə tədbirlərlə
bağlı sərəncamlarda nəzərdə tutulmuş vəzifələrin icrası ölkədə qeyri-neft
sektorunun davamlı inkişafına, regionlarda kommunal xidmətlərin və sosial
infrastruktur təminatının keyfiyyətinin yüksəldilməsinə, sahibkarlıq mühitinin
daha da yaxşılaşdırılmasına, investisiya qoyuluşunun artmasına, yeni
müəssisələrin, iş yerlərinin açılmasına və nəticədə, əhalinin məşğulluğunun
artırılmasına və yoxsulluq səviyyəsinin azaldılmasına təkan verib. Bu inkişaf
və tərəqqinin davamlılığını təmin etmək üçün Prezident İlham Əliyev "Azərbaycan
Respublikası regionlarının 2019-2023-cü illərdə sosial-iqtisadi inkişafı Dövlət
Proqramı”nın təsdiq edilməsi haqqında fərman imzalayıb. Şübhə etmirik ki, bu
fərmandan irəli gələn vəzifələrin uğurla icra edilməsi Azərbaycanı dünyanın inkişaf
etmiş ölkələri ilə eyni səviyyəyə qaldıracaq.
Alpər
TURAN