Uşaqları ovsunlayan, böyükləri “uşaqlaşdıran” Yeni il tamaşaları - Fotolar
Bayram günlərində mədəniyyət
ocaqlarımız, xüsusən də teatrlarımız bir-birindən maraqlı proqramlar
hazırlamışdılar
2020-nin ilk həftəsini geridə qoyduq. Bayram
günlərində mədəniyyət ocaqlarımızın, xüsusən də teatrlarımızın uşaqlar üçün təşkil
etdikləri əyləncə dünyasında, uşaq tamaşalarında biz də iştirak etdik. Uşaqkən Yeni
il ərəfəsində valideynlərimizin bizi teatra aparmasını böyük bayram hesab
edirdik. Səhnədə bir kukla görəndə, sevincimizin həddi-hüdudu olmazdı. Uzun
müddət baxdığımız tamaşanın təsiri ilə yaşayardıq. O zaman hər teatrda indiki
kimi Şaxta babalar, Qar qızlar, yolkalar olmaz, bayram tamaşaları
hazırlanmazdı. Yalnız Heydər Əliyev Sarayında və Bakı Dövlət Sirkində Şaxta
babalarla şəkil çəkdirmək imkanımız olurdu. Şəkilləri də fotoqraf çəkirdi və
bir neçə saatdan sonra gəlib pulunu ödəyib, şəklini ala bilirdin.
İndi isə dövr də başqadır, uşaqların
istəkləri də. Artıq nəinki Heydər Əliyev Sarayı və Bakı Dövlət Sirki, eyni zamanda
teatrlarımız da Yeni ilə xüsusi hazırlaşırlar. Belə ki, uşaqların sevimli
qəhrəmanlarını bir araya toplayıb, uşaqların maraq dairəsinə uyğun əyləncəli
tamaşalar hazırlayırlar. Adətən uşaqları nağıl dünyasına səyahətə apararaq əsil
bayram ab-havası bəxş edən tamaşalardan öncə teatrların foyesində uşaqların Şaxta
baba və Qar qızla görüşmək, onlarla bərabər əylənmək imkanı olur. Bəzən ən
maraqlı hadisələr də burda yaşanır. Şaxta babaya məktub yazan kim, şeir deyən
kim, ona arzularını çatdıran kim...
Bayram günlərində bir neçə teatrın
qonağı olduq. Uşaqların timsalında biz də onların bu rəngli dünyasına səyahət
etmiş olduq.
Dövlət Akademik Musiqili Teatrı uşaqları bayram əhval-ruhiyyəli "Şaxta baba, Bremen musiqiçiləri və Penin
nağılı” tamaşası ilə qarşıladı. Maraqlı və macəra dolu Yeni il tamaşası 27
dekabrdan yanvarın 5-nə qədər hər gün dörd seansla nümayiş olundu. Tamaşada
Yeni il bayramının rəmzləri olan Şaxta baba, Qar qız və balacaların sevimli
nağıl qəhrəmanları onları duzlu-məzəli söhbətləri ilə əyləndirdi. Rəngarəng
dekorasiyaları, işıq effektləri, şən musiqiləri və teatrın balet truppasının
rəqsləri ilə zövq oxşayan tamaşanın quruluşçu rejissorları Anar Babalı və Zaur
Əliyev idi. Tamaşanın quruluşçu baletmeysterləri Əməkdar artistlər Zakir və
Yelena Ağayevlər, quruluşçu rəssamı Afaq Bayramova, rejissoru Elməddin
Dadaşov idi.
Zaur Əliyev deyir ki, Yeni il tamaşası
hazırlayarkən daha çox hadisələrin uşaqların yaşadığı dövrlə səsləşməsinə önəm
verir: "Tamaşa hazırlayarkən uşaqlara indiki dövrdə hansı qəhrəmanların maraqlı
olduğunu nəzərə alıram. Bu işdə 60 faiz uşaqların marağı vacibdirsə, 40 faiz də
valideynlərin marağına önəm verirəm. Çünki uşaqları teatra valideyn gətirir və
teatra gəlmə mərhələsinə qədər tamaşanın adı, afişası ilk növbədə valideynin
diqqətini çəkməlidir. Əvvəllər uşaqlar rəngli tamaşalara daha çox önəm verirdi.
İndi uşaqların marağı başqadır. Hazırladığım "Şaxta baba, Bremen musiqiçiləri
və Penin nağılı” tamaşası qarışıq nağıllardan ibarət bir bayram tamaşası idi.
Piter Pen indiki dövr uşaqların tanıdığı, Bremen musiqiçiləri isə onların valideynlərinin
dövrünün qəhrəmanlarıdır. Hər iki dövrün nağıl qəhrəmanlarını bir-biri ilə
əlaqələndirib, bir tamaşa hazırladım ki, həm valideynlərə, həm də uşaqlara
maraqlı olsun. Elə də oldu, tamaşa böyük maraqla qarşılandı. Artıq tamaşanın
seansları bitsə də, uşaqlar hələ də o tamaşanın təsiri altındadır. Tamaşadan
sonra uşaqlar nağıl qəhrəmanları ilə görüşdülər. Onlar aktyorları qəhrəman kimi görürdülər və
qəhrəmanlara olan reaksiyaları möhtəşəm idi”.
Rejissor deyir ki, uşaq vaxtı Yeni il
bayramında valideynləri onu Bakı Dövlət Sirkinə və Heydər Əliyev Sarayında
keçirilən bayram şənliklərinə aparardı: "4-cü sinfə qədər Şaxta babanın və Santa
Klausun həqiqətən ayrı-ayrı ölkələrdən gəldiyini düşünürdüm. Bu yaxınlarda bilmişəm
ki, Şaxta babanın içindəki aktyor imiş. Əvvəl elə bilirdim ki, indiki uşaqlar Şaxta
babanı yalançı hesab edir. Müasir texnologiyaların onların gözünü açdığını
düşünürdük. Ancaq elə olmadığının şahidi olduq. Belə ki, tamaşa boyu uşaqlarla
sual-cavab etdikdə görürdük ki, uşaqlar sehrli sözlərin olmasına və Şaxta
babanın sehrli çubuğuna inanırlar. Onlar hər nə qədər telefonlarla,
planşetlərlə oynasalar da, içlərindəki saflıq qalır”.
Z.Əliyev deyir ki, hazırladığı tamaşa
müasir standartlara cavab verdiyi üçün uşaqların diqqətini cəlb edə bilib:
"Bizim tamaşanın əvvəlində Pəri uşaqları nağıllar aləminə aparır və o,
uşaqlarla birlikdə meşəyə doğru irəliləyir. Biz o anı 3D effekti ilə
canlandırmışıq. Daha sonra meşə fırlanıb, göl olur, burada kapitanın gəmisi
görünür və bütün bunlar effektlərlə təsvir olunur”.
Azərbaycan Dövlət Gənc Tamaşaçılar
Teatrı bu il ən maraqlı bayram tamaşası ilə yadda qaldı. Qış tətili günlərində teatrın səhnəsində 4 seans (saat 12:00, 14:00,
16:00, 18:00) olmaqla "Qrinç” tamaşası nümayiş olundu. Teatrın yaradıcı
kollektivinin iştirak etdiyi tamaşa vasitəsilə uşaqlar əyləncəli dünyaya qonaq
oldular. Tamaşanın rejissoru Elşad Rəhimzadənin quruluşunda hazırlanan tamaşada
fərqli dizayn və maraqlı nağıl dünyası uşaqlara əsil Yeni il ab-havası bəxş
etdi. Rejissor bizimlə söhbətində qeyd etdi ki, bu mövzuya 2016-cı ildə
müraciət etsə də, 2019-cu ilin son günlərində bu tamaşaya yenə müraciət etməli
olub. Çünki tamaşada gedən proses bu gün uşaqların maraq dairəsinə daha çox
uyğundur: "Tamaşa uşaqlar və valideynlər tərəfindən böyük marağa səbəb oldu.
Qrinç qışı oğurlayan biri kimi uşaqların maraq dairəsindədir. Bu obrazın bu
qədər sevilməyində bəlkə də onun haqqında çəkilən filmin də böyük rolu var.
Tamaşada hadisələr müasir texnologiyalarla, sovet dönəmindən qalma bəsit formalarla
deyil, sərt və konkret şəkildə nümayiş olunur. Uşaqlar seçim qarşısında qoyulur.
Onlar düşünməyə vadar olurlar ki, nə pisdir, niyə pisdir, nə yaxşıdır, niyə
yaxşıdır və necə oldu ki, belə oldu. Artıq uydurma yalan, mifologiya, yalançı
təsvir gündəmdə deyil. Bu günün uşaqları planşetlərdən, müasir avadanlıqlardan
istifadə edirlər, onları aldatmaq çox çətindir. Onlar dəmir insanların,
betmenlərin həqiqət olduğunu görür, onları özlərinə daha yaxınlaşdırırlar.
Sadəcə olaraq, bu hekayə bir az yumşaq bir dramaturgiya olduğu üçün uşaqların
daha çox marağına səbəb oldu”.
Gənc Tamaşaçılar Teatrı bayram
günlərində nəinki maraqlı tamaşa, həm də Şaxta baba və Qar qızı ilə də diqqət
çəkdi. Belə ki, bizim teatrda olduğumuz gün teatrın istedadlı aktyoru, əməkdar
artist İlham Əsədov Şaxta baba qismində uşaqlarla şəkil çəkdirir, onların dili
ilə uşaqları danışdırırdı.
Yenicə təmir olunub tamaşaçıların
ixtiyarına verilən Şuşa Dövlət Musiqili Dram Teatrıbu il
azyaşlı tamaşaçılarını öz binasında salamladı. Əməkdar artist, teatrın direktor
müavini Azad Məmmədov deyir ki, qış tətili günlərində məktəbliləri Yeni il
şənliyi ilə sevindirmək üçün hazırladıqları bayram tamaşası böyük maraqla
qarşılanıb: "Yeni il uşaqların ən çox sevdiyi bayramdır. Şuşa Teatrı olaraq biz
də maraqlı bayram tamaşası ilə azyaşlı tamaşaçılarımızın görüşünə gəldik. Bayram
günlərində Şuşa Teatrınınsəhnəsində Ağəddin Babayevin "Nağıllar aləmində”
tamaşası göstərildi. Tamaşanın quruluşçu rejissoru əməkdar artist, teatrın baş
rejissoruLoğman Kərimov,quruluşçu rəssamı Valeh Məmmədov, musiqi
tərtibatçısı Ağasəlim Feyzullayev, rəqslərinquruluşçusu Təranə
Əliyeva idi”.
A.Məmmədov qeyd edir ki, "Nağıllar
aləmində” tamaşası, adından da göründüyü kimi, uşaqları nağıl dünyasına
səyahətə apardı: "Biz bu tamaşada yuxuya gedən uşağın nağıllar aləminə
səyahətini göstərdik. Nəinki uşaqlar, hətta valideynlər də "uşaqlaşdılar” və
uşaqlarla bərabər əyləndilər. Teatrımız yeni təmirdən çıxdığı üçün indi burda
tamaşa göstərmək üçün hər cür imkanlar yaradılıb. Əvvəllər bir tamaşa nümayiş
etdirmək üçün bina götürür, tamaşaçıları ora cəlb etməyə çalışırdıq. İndi isə
belə problemlərimiz yoxdur. Tamaşaçılar sevərək teatra gəlir, kassadan
biletləri alırlar. Uşaqlar da burada doyunca əylənirlər. O ki qaldı yeni
tamaşamıza, bu tamaşanı məhz Yeni ildə uşaqlar üçün hazırlamışıq. Bu tamaşa həm
Yeni ildə oynanıldı, həm də bundan sonra da repertuarımızda olacaq”.
Xəyalə
Rəis