Türkiyənin qəhrəmanına çevrilən azərbaycanlı həkim
"Dünya əllərində olsaydı,
gətirib ovcuma qoyardılar”
Ötən həftə sosial şəbəkələr və türk mediası
azərbaycanlı həkimin qəhrəmanlığından danışdı. Ağacdan meyvə toplayarkən
yıxılan və ürəyinə 13 santimetrlik dəmir batan 12 yaşlı Həmzə Dağı həmyerlimiz
yerindəcə (xərəkdə) müdaxilə ilə xilas edərək həyata qaytarıb. Həmin an
xəstəxana kameralarından çəkilən görüntülər ölkədə əks-səda doğurub. Həkimin,
uşağı yaşatmaq üçün göstərdiyi səy, peşəkarlıq, ani qərar türk xalqı arasında
rəğbətlə qarşılanıb və ölkə gündəminə çevrilib. Türkiyənin qəhrəmanına çevrilən
həmyerlimiz uzman ürək-damar cərrahı
Sərxan Həsənovla söhbətləşirik...
1984-cü ildə Şəkidə dünyaya gəlib Azərbaycan Tibb
Universitetini bitirdikdən sonra Türkiyədə diplomun təsdiqi imtahanında iştirak
edib. 2008-ci ildə TUS imtahanını verərək Kartal Koşuyolu Yüksək İxtisas Təhsil
və Araşdırma xəstəxanasında ürək-damar cərrahı bölümündə oxuyub. 3 il
İstanbulda işlədikdən sonra Azərbaycana qayıdaraq Gəncə Beynəlxalq Xəstəxanasında
çalışıb. 2020-ci ildən Türkiyənin Yalova Atakənt xəstəxanasında fəaliyyət
göstərir.
- Bu gün qəhrəmana
çevrilən həkim həyat qurtarmağa ilk dəfə nə zaman qərar verib?
- Orta məktəbdə insan anatomiyası dərsi idi.
Uşaqlar dərsdə səs saldılar. Müəllim elə bildi ki, nadincliyi mən etmişəm və
mənə hirsləndi. Dedim ki, müəllim, axı mənim günahım yoxdur, niyə mənə əsəbiləşirsiniz?
Dedi ki, sənə bu fəndən yaxşı qiymət yazmayacağam. "Oxuduqdan sonra necə qiymət
yazmayacaqsınız?” dedim. Müəllim cavabında "sən oxumayacaqsan, mən də dediyimi
edəcəyəm” dedi. Növbəti dərsə qədər kitabı başdan sona əzbərlədim. Müəllim və
uşaqlar suallar verir, mən də cavablandırırdım. Çaşdığım yer olmadı, çünki
kitabın hər səhifəsini əzbərləmişdim. Yenə də müəllim mənə "5” yox, "4” verdi. O kitabı oxuduqdan
sonra insan orqanizmi mənə çox maraqlı gəldi və həkim olmağa qərar verdim. O "4” məni həkim etdi.
- İçində sevdiklərimizin olduğu orqan... Sevdiklərimiz üçün onu qorumalıyıq. Üstəlik, ürək təkdir. İki böyrəyimiz, iki ciyərimiz var, amma başqa ürəyimiz yoxdur. Ona görə də, ona yaxşı baxmalıyıq. İnsan bədənində bütün orqanların tək funksiyası beyni yaşatmaqdır. Yəni insanın içindəki "mən” beyindən qaynaqlanır və bütün orqanlar beyinə xidmət edir. Ürək də digər orqanlar kimi insanın əsas xidmətkarıdır.
- Sizi qəhrəman edən
hadisədən danışaq...
- Çox qeyri-adi gün idi. Həmişəki kimi işimlə
məşğul idim. Şükürlər olsun ki, o gün əməliyyatda deyildim. Əvvəlcə mavi kod
siqnalı verildi. Ürək-damar cərrahları mavi kod komandasına aid olmadığı üçün
təcili yardım bölməsinə getmədim. Təxminən 3-5 dəqiqə sonra telefonuma zəng
gəldi. Hər şey telefon zəngi ilə başladı. Assistent "həkim, təcili enərmisiniz” dedi və vəziyyəti
başa düşdüm. Əgər bir ürək damar cərrahı yardım servisinə təcili çağırılırsa,
orada artıq gəzərək yox, qaçaraq getmək lazımdır. İşıq sürəti ilə qaçdım. Otağa
girəndə xərəkdə uşağı gördüm. Xəstəni süni tənəffüs borusuna birləşdirmişdilər.
Kardioloq ürək yaralanmasını yoxlamaq üçün exokardio edirdi. Xəstənin yaralanma
nahiyəsinə baxdım və gördüm ki, ürək olma ehtimalı çoxdur. Kardioloq dedi ki,
ürək yaralanmasını exoda görə bilmir. Yəni ürək ətrafında çox miqdarda maye var.
O anda tibb işçilərindən birinin səsini eşitdim: "Xəstənin ürəyi dayandı”...
Artıq uşağı itirirdik. Peşəmizin verdiyi reflekslə nə etmək lazım olduğuna
qərar verdim. Çünki xəstədə ürək yaralanması yoxdursa, qısa müddət ərzində
ürəyinin dayanması ehtimalı çox azdır. Üstəlik, yaralanma döş qəfəsində idi...
- Bəli. İndi də danışanda həyəcanlanıram. Çünki
hamının övladı var. Hamının övladı ağaca çıxar, oyun oynayar və başına belə
hadisə gələ bilər. Orada da öz övladımı gördüm. Təsəvvür edin, uşaq oyun
oynayarkən ürəyi yaralanır. Mən yardım etməli idim və artıq burada dəqiqələr
yox, saniyələr önəmli idi. Xərəyin üzərinə çıxdım, ürək masajı edərək, "bizi
dərhal əməliyyatxanaya endirin” dedim.
-12 yaşında ürəyi yaralanmış uşaq... "Qucağıma alıb
əməliyyat masasına qoydum” desəm, yanılmaram. Normalda xəstənin steril şəkildə
örtülməsi lazımdır. Amma burada vaxt itirə bilmirdik. Xəstənin ürək nahiyəsini
təcili olaraq açmaq qərarını verdim və onu masaya qoyduqdan sonra ürəyi açmağım
təxminən 1 dəqiqə çəkdi. Ürəyin ətrafında perikard (ürək kisəsi) deyə bir hissə
var. Ürək yaralanmalarında ürəyin içərisində olan qan perikardla ürəyin
arasında toplanır və onun funksiyasını əngəlləyir. Birbaşa perikardı açmaq
lazımdır ki, içindəki qanı boşaldıb, ürəyin funksiyasını təmin edək. Perikardı
açanda bol miqdarda qan və qan laxtası var idi. Biz buna ürək tampunadası
deyirik. Qanı boşaltdıqdan sonra ürək rahatladı. Əməliyyat masasında ciddi
problemlə qarşılaşmadıq. Ən önəmli və can alan nöqtə əməliyyatdan sonra
reanimasiya idi. Çünki ürək masajı olan müddətdə beynin nə qədər oksigenlə təmin
olunduğunu bilmirdik. Xəstənin oyanmama, beyində problem yaranma ehtimalı da
var idi. 4 gözlə xəstənin oyanmasını gözləyirdik. Səhərə yaxın xəstə gözlərini
açdı, lakin heç bir əmrə itaət etmədi. "Eşidirsənmi?” deyirik, cavab yoxdur. "Həmzə,
Həmzə” çağırırıq, reaksiya vermir. Sanki heç nə eşitmir. Düşündük ki, yəqin
uşaqda eşitmə problemi yaranıb. Xəstənin anasını çağırdım. Əsl möcüzə orada baş
verdi... Ana, "Həmzə, məni eşidirsənmi?” deyə
uşağa səsləndi. Həmzə başını hərəkət etdirdi və əli ilə işarə elədi. Artıq missiyamız müsbət
sonluqla tamamlanmışdı.
- Haqlısınız. Mən orada risk etdim. Ola bilərdi,
hər şey normal getməz, uşağın həyatını xilas edə bilməzdik. Yaxud prosedurdan
sonra başqa ağırlaşmalar olardı. Düzdür, hüquqi cəhətdən problem olacağını zənn
etmirəm, çünki "xəstəyə niyə təcili müdaxilə etdin” deməzdilər. Həmin an
veriləcək qərar bəlli idi. Tam tərsinə, yardım etməsəydim, o zaman hüquqi
baxımdan "niyə müdaxilə etmədin” deyərdilər. Amma işin, sadəcə hüquqi tərəfini
deyil, xəstə yaxınları tərəfini də düşünmək lazımdır. Müdaxilə uğursuz olanda,
xəstə yaxınları tərəfindən təzyiqlərə məruz qala bilərik. Orada bunları
düşünmək üçün zamanımız yox idi. Biz lazım olan qərarı verdik və etdik. Bunu
hesablamaq şansım yox idi. Bəlkə başqa
sahələrdə düşünmək üçün vaxt var. Amma ürək, böyük damar yaralanmalarında zaman
anlayışı yoxdur.
- Bir quşun
qanadının çırpıntısının belə təsadüf olmadığına inanıram. Uşağın həyatda
qalması, məncə, qismət, lazımi müdaxilənin olması, peşəkarlıqdır. Yəni uşağın
qismətində yaşamaq şansı var idi ki, peşəkar müdaxilə olunmaq şansı qarşısına
çıxdı.
- Dünya əllərində olsaydı, gətirib ovcuma
qoyardılar. Əslində valideynlər işin ciddiyyətini həkimlər qədər anlamırlar.
Saniyələrin əhəmiyyətini biz həkimlər bilirik. Valideynlər bu dərəcəsini bilsə,
nə edərlər, bilmirəm.
- Bəli, çox cavanlaşıb. Getdikcə də cavanlaşmağa
davam edir. Səbəblər çoxdur. Keyfiyyətsiz qidalanma, masa arxası işlər,
idmandan uzaq qalma, gərgin, stressli həyat bunların başındadır. Kiçik
faktorlar kimi görünsə də, insan həyatı üçün çox önəmlidir. Zərərli
vərdişlərdən uzaq qalmaq, hərəkətli yaşamaq lazımdır. Amma bir həqiqət də var
ki, bunların hamısını edib, gənc yaşda ürək problemləri ilə rastlaşanlar da az
deyil. Bu, genetik problemlə bağlıdır.
Genetik xəstəliklərlə bağlı belə bir deyim var: "Genetika silaha mərmini verir,
yaşam tərzi tətiyi çəkir”. Yəni genetikada varsa, xəstəlik hazır şəkildə
dayanır, gec-tez partlayacaq. Amma yaşam tərzin təhlükəlidirsə, o tətiyi tez
çəkirsən.
- Hadisə çox işıqlandırıldı. Xəstəxanamız işə lazımi dəyəri verdi. Mən xəstəxanamızın idarə heyətinə təşəkkür edirəm. Bütün dost, tanış, qohum zəng edirdi. Bu qədər səs-küy doğuracağını düşünmürdüm. Xalqımız əməyimi müsbət dəyərləndirdi. Hər kəsə təşəkkür edirəm.
Aygün ƏZİZ