“Təhsil islahatları bu il də davam etdiriləcək”

Təhsil Nazirliyində keçirilən tədbirdə 2019-cu ilin yekunlarına nəzər salındı, 2020-ci ilin hədəfləri açıqlandı

"Təhsil Nazirliyi il ərzində bir neçə dəfə ilin yekunlarını müzakirə edir. Təqvim ili ilə tədris ili üst-üstə düşmədiyindən, təhsil sahəsində baş verən yeniliklərin il ərzində hesabatını bir neçə dəfə təqdim edirik. 2019-cu ilin yekunları, təhsil sahəsində aparılan islahatlarla bağlı da çoxsaylı tədbirlər keçirilib». Təhsil Nazirliyində keçirilən mətbuat konfransında 2019-cu ilin yekunlarına nəzər salındı, 2020-ci ilin hədəflərindən danışıldı.

Təhsil müəssisələrinin vəziyyəti, infrastrukturu, şagirdlərin təhsil alması ilə bağlı məsələlərə toxunan təhsil naziri Ceyhun Bayramov qeyd etdi ki, 2019-cu ildə təhsil sahəsində bir sıra islahatlar həyata keçirilib: "2019-cu ildə Təhsil Nazirliyinin hədəflərinə uyğun olaraq 84 yeni məktəb tikilib və ya əsaslı təmir edilib. Bu istiqamət Birinci vitse-prezident Mehriban Əliyevanın diqqət mərkəzindədir. 2019-cu ildə onlarla yeni məktəb binası Mehriban Əliyevanın birbaşa qayğısı sayəsində tikilərək istifadəyə verilib və beləliklə, 2019-cu ildə 100-dən çox məktəb binası istifadəyə verilib. Bu il də Dövlət Proqramlarında yeni məktəb binalarının tikintisi və əsaslı təmiri nəzərdə tutulub. 2020-ci ildə görüləcək işlər keçən il görülən işlərə həcmcə bərabər və ya artıq ola bilər». Nazir məktəblərdə yüksək şagird sıxlığı ilə bağlı məsələyə toxunaraq ölkə üzrə 4500-ə yaxın məktəbin olduğunu qeyd etdi: «Ölkədə əhalinin sayı hər il artır və orta hesabla, şagirdlərin sayı da hər il təxminən 50 min nəfər artır. Təbii ki, əhali artımı müxtəlif ərazilərdə eyni templə baş vermir. Əhalinin miqrasiya prosesi də baş verir. Bunun nəticəsidir ki, bir sıra yaşayış məntəqələrində yüksək şagird sıxlığı mövcuddur».

Şagirdlər üçün xüsusi avtobuslar

Tələbə yataqxanalarının mövcudluğu

Nazir qeyd etdi ki, ali məktəblərimiz üçün vacib olan faktorlardan biri əcnəbi tələbələrin cəlb edilməsi məsələsi olduğundan, tələbə yataqxanalarının mövcudluğu əsas şərtlərdən biridir: "Neft və Sənaye Akademiyasının, Lənkəran Dövlət Universitetinin tələbə yataqxanası kompleksləri istifadəyə verilib. O cümlədən, Gəncədə 800 yerlik yataqxana kompleksi növbəti aylarda başa çatacaq. Sumqayıtda məcburi köçkünlər köçürüləndən sonra yaxın vaxtlarda 250 nəfərlik yataqxananın əsaslı təmirinə start veriləcək. O cümlədən, Bakı Dövlət Universitetinin yataqxanasının təmir işləri yekunlaşmaq üzrədir. Təhsil Nazirliyi «Asiya İnkişaf Bankı» ilə tələbə yataqxanalarını daha da inkişaf etdirmək istiqamətində xüsusi layihə hazırlayıb. Məqsəd özəl sektoru cəlb etməklə yataqxanaların tikintisini həyata keçirməkdir”.

C.Bayramov bildirdi ki, diaqnostik qiymətləndirmədən keçən psixoloqların əməyinin stimullaşdırılması üçün təkliflər hazırlanacaq: «Ötən ilin dekabr ayında Azərbaycanda fəaliyyətdə olan 2700-ə yaxın psixoloqun diaqnostik qiymətləndirilməsi keçirilib. Təhsil Nazirliyi tərəfindən Nazirlər Kabinetinə məktəblərdə psixoloji xidmətin təşkili ilə bağlı yeni qaydalar təqdim edilib. Psixoloqların əməkhaqqısı diaqnostik qiymətləndirmədən keçən müəllimlərdən fərqli şəkildə müəyyən edilir. Bu gün psixoloqların və bir sıra digər kateqoriyadan olan təhsil işçilərinin əməkhaqqısı müvafiq tarif cədvəli ilə tənzimlənir. 2019-cu ildə bilavasitə diaqnostik qiymətləndirmə ilə bağlantı olmadan psixoloqların maaşları 2 dəfədən bir qədər az artırılıb”.
Təhsil naziri qeyd etdi ki, diaqnostik qiymətləndirmənin nəticəsi olaraq psixoloji xidmətin təşkili ilə bağlı təhlillər aparılacaq və bu kateqoriyadan olan insanların əməyinin stimullaşdırılması, həmin xidmətin təşkil edilməsi, onların sayının müəyyən edilməsi istiqamətində təkliflər hazırlanacaq: "Bildiyiniz kimi, əməkhaqqı artımı, əlavə ştatların açılması bir sıra qurumlarla razılaşdırma formasında həyata keçirilməlidir. Təhsil Nazirliyi tərəfindən bu istiqamətdə təşəbbüslər irəli sürüləcək”.

Hərtərəfli qiymətləndirmə

Müəllimlərin sertifikasiyası ilə bağlı yeni qaydaların növbəti aylarda təsdiq olunacağını qeyd edən təhsil naziri diqqətə çatdırdı ki, qaydalar təsdiq edildikdən sonra - 2020-ci ildən etibarən müəllimlərin sertifikasiya proseduruna başlamaq mümkün olacaq: "Təbii ki, bir il ərzində sistemdə olan bütün müəllimlərin hamısının sertifikasiyadan keçməsindən söhbət getmir. Proses mərhələli şəkildə həyata keçiriləcək. Əsas məqsəd hərtərəfli qiymətləndirmə aparmaqla hər bir müəllimin fərdi inkişafını təmin etmək, onu stimullaşdırmaqdır. Sertifikatlaşdırma proseduru nəticəsində müəllimlərin karyera inkişafı və bir sıra digər imtiyazların təqdim edilməsi zamanı sertifikasiyanın nəticələri nəzərə alınacaq. Sertifikasiya nəticəsində təqdim olunan göstəricilərə çatmayan müəllimlər üçün əlavə imkanlar yaradılacaq. Onlara həmin səviyyələrə çatmaq üçün təkrar olaraq, ixtisasartırma təlimlərindən keçmək təklif olunacaq”.
Nazir məktəbli formalarının və dərs ləvazimatlarının qiymətləri ilə bağlı məsələyə də münasibət bildirdi: "Qanunvericiliyə əsasən məktəbli forması və yaxud məktəb ləvazimatlarının qiymətlərinin dövlət tərəfindən tənzimlənməsi nəzərdə tutulmayıb. Onlar tələb-təklif əsasında təyin edilir. Belə ki, qiymətlərin müəyyən edilməsi keyfiyyət və forma ilə əlaqədar olaraq, istehsalçılardan asılıdır: "Məktəbli formalarının qiymətinin yüksək olmamağı tövsiyə edilir. Bir sıra istehsalçılar buna riayət edir. Bizdə olan məlumata görə, istehsalçıların özü də qiymətlərin aşağı olmasında maraqlıdır. Çünki qiymət münasib olarsa, formalar da satılar”. Nazir qeyd etdi ki, ötən il xeyli sayda sosial paket həyata keçirilib. Eyni zamanda tələbələrin təqaüdləri artıb ki, bu da 110 min tələbəni əhatə edib. Təqaüd alan tələbələrin sayının artırılmasına da nail olunub. Türkiyədə baş verən zəlzələ ilə əlaqədar 102 azərbaycanlı tələbənin bu ölkədən avtobuslarla Naxçıvan Muxtar Respublikasına, oradan da xüsusi aviareyslə Azərbaycana gətirildiyini deyən nazir bildirdi ki, zəlzələdən sonra təxliyə edilən tələbələrimizlə bağlı məsələ dövlət başçısının xüsusi nəzarətindədir. "Hazırda geri qaytarılan tələbələr tətildədirlər. Sonrakı mərhələdə tələbələrin dərslərində hansısa fasilələrin yaranacağı ilə bağlı suallara müəyyən vaxtdan sonra dəqiq cavab veriləcək. Eyni zamanda, yenə də universitetlər tərəfindən təqdim olunan imkanlar, orada olan şərait, tələbələrin istəyi və seçimi ilə bağlı bir sıra məqamlar nəzərə alınmaqla, növbəti addımlar atılacaq”.

Mətbuat konfransında iştirak etdi
Təranə Məhərrəmova