Təbiətimiz çox füsunkardır, sadəcə, təbliğatını aparmaq lazımdır
Ekologiya və Təbii Sərvətlər Nazirliyi ölkədə ekoturizmin inkişafı üçün milli parklarla bağlı proqram hazırlayacaq. Bunu Ekologiya və Təbii Sərvətlər Nazirliyinin Bioloji Müxtəlifliyin Qorunması Departamentinin direktoru Hikmət Əlizadə "Azərbaycanın milli parklarında ekoturizm fəaliyyəti" mövzusunda keçirilən dəyirmi masada deyib. Onun sözlərinə görə, Azərbaycanın milli parklarının bioloji baxımdan potensialı çox olsa da, buraya səfər edən turistlərin sayı o qədər də qənaətbəxş deyil: "Buna görə də ölkədəki milli parkların inkişafı üzrə milli proqram hazırlanacaq. Milli parklara səfər edənlərin sayını artırmaq yollarını fikirləşmək, bu sahədəki boşluqları müəyyən etmək lazımdır. Nəzərə alaq ki, 5-10 il əvvəl bütün milli parklara il ərzində səfər edənlərin sayı təxminən 3000 nəfər olub. Bu ilin ilk 8 ayında isə milli parklara 74 217 turist səfər edib".
H.Əlizadə qeyd edib ki, bu
il milli parklara səfər edənlərin 7286-sı əcnəbi, 66 931-i yerli vətəndaşlar
olub: "Abşeron yarımadasının ən son nöqtəsi olan "qartalın
dimdiyi" adlanan ərazi Abşeron Milli Parkının da son nöqtəsidir. Bu
ərazini turistlər üçün daha maraqlıvə yaddaqalan bir məkana çevirmək,
rəmzi guşə ilə daim xatırlatmaq olar. Çünki Abşeron Milli Parkına gələn hər bir
ziyarətçi bu romantik nöqtəyə can atır".
Tədbirdə
iştirak edən Ekologiya və Təbii Sərvətlər Nazirliyinin (ETSN) nümayəndələri də
bu maraqlı ideyanı dəstəklədiklərini və artıq bütün milli parklar üçün
yaddaqalan və brendə çevrilməli olan oxşar layihələrin üzərində iş aparıldığını
bildiriblər.
Həmçinin
qeyd edilib ki, Azərbaycanın gözəl təbiəti olan bəzi ərazilərinə maşınla və ya
piyada getmək təhlükəlidir. Bu yerlərdə bir çox ölkələrdə olduğu kimi kanatlar
çəkilə bilər. Bildirilib ki, heyvanlar aləmini turistlərə yalnız fotolar
vasitəsilə göstərmək qeyri-mümkündür: "Bunun üçün xarici təcrübədən
yararlanmaq lazımdır. Xarici ölkələrdə turistlər vəhşi heyvanlar
olanyerlərə təhlükəsiz şəkildə girə bilirlər. Azərbaycanda da turistlər
üçün belə imkanlar yaradılmalıdır".
Alman İnkişaf Bankının transsərhəd
birgə katibliyi layihəsinin milli koordinatoru Ruslan Salmanov
bildirib ki, Azərbaycan milli parklarının hər birinin girişində beynəlxalq
standartlara cavab verən ekoturizm mərkəzlərinin yaradılması vacib məsələdir.
Həmin mərkəzlərdə insanları qarşılayan məsul şəxslər olmalıdır: "Təəssüf
ki, ölkənin milli parklarında bununla bağlı müəyyən boşluqlar var.Bundan
başqa, xüsusi mühafizə olunan təbiət əraziləri barədə qəbul edilən
qanunvericilik bazasına dəyişikliklər edilməlidir.Eyni zamanda, milli
parklarda iaşə obyektlərinin və ya qalma yerlərinin tikilməsi mümkündür. Amma
bu, qanunda sadəcə prinsip olaraq göstərilib. Belə obyektlərin inşası üçün
lazımi prosedurlar normativ aktlarda öz əksini tapmayıb. Bu gün ölkədə 11 milli
parkın əksəriyyətində belə obyektlər yoxdur".
Maraqlıdır,
Milli parklarımızın potensialından necə yararlana bilərik, bu istiqamətdə hansı
işlər görülə bilər?
AzTA-nın icraçı direktoru Əhməd Qurbanov qeyd edir ki, ilk
olaraq milli parkların infrastrukturu yenidən qurulmalıdır: "Biz də mili
parklarımıza Assosiasiya olaraq infotur etmişik. Amma ora gedənə qədər yol
infrastrukturu, iaşə obyektləri, sanitar qovşaqlar bunların hamısı
genişləndirilməlidir ki, uzaq yolu getməyə maraq olsun. Daha sonra turizm
şirkətləri bu istiqamətdə bəzi işlər görməlidirlər. Şirkətlər özləri bu işdə
maraqlı olmalıdırlar. Belə ki, əyləncəli
turlar təşkil etsinlər. Xaricdən turist gətirən şirkətlər onların marağını cəlb
etmək üçün yeni ideyalar düşünməlidirlər. Qeyd edim ki bizim milli parklar
dünya ölkələrindən fərqlidir. Bu isə bizim yerləşdiyimiz coğrafi ərazidən,
iqlim qurşağından asılıdır. Əslində, təbiətimiz çox füsunkardır, sadəcə,
təbliğatını aparmaq lazımdır”.
Turizm üzrə ekspert Müzəffər
Ağakərimov deyir ki, milli parklarımızın tanıdılması üçün təbliğat işləri görülməlidir: "İlk
olaraq bunu qeyd edim ki, turizm şirkətləri ölkəmizdə fəaliyyət göstərən turizm
qurumları ilə sıx əlaqədə olmalı, əməkdaşlıq etməlidirlər. Turları birlikdə
təşkil edib, turistlərin marağını cəlb etməlidirlər. Bunun üçün isə turistlər
arasında sorğu keçirdib daha çox hansı ölkədən gələnlər üçün milli
parklarımızın, təbiətimizin maraqlı olduğunu öyrənməlidirlər. Digər tərəfdən
məsləhət görərdim ki, milli parklarımızın tanıdılması üçün təbliğat işləri
görülsün. Məsələn, xarici ölkələrə gedəndə necə ki, yeməklərimizi və digər
turizm obyektlərimizi tanıtdığımız kimi milli qoruqlarımızı, parklarımızı da
tanıtmalıyıq. Bunun üçün isə təbliğat işi aparılmalıdır. Turizm qurumları
media, xüsusilə də televiziya kanalları ilə sıx əlaqədə olmalıdırlar ki, onlar
gedib həmin yerlərdən reportajlar hazırlasınlar”.
Günel
Azadə