Teatrlarımız Nəsimi ilinə necə hazırlaşır?
Hər kəsə məlumdur ki, 2019-cu il Azərbaycan
xalqının çoxəsrlik ənənələrə malik bədii və fəlsəfi fikrində dərin iz qoymuş
mütəfəkkir şair İmadəddin Nəsiminin ilidir. Bu il Nəsiminin anadan olmasının
650 ili tamam olur. Azərbaycanın ədəbi-mədəni fikir tarixinin bu əlamətdar
hadisəsinin dövlət səviyyəsində layiqincə qeyd edilməsi məqsədi ilə Azərbaycan
Respublikası Prezidentinin "Böyük Azərbaycan şairi İmadəddin Nəsiminin 650
illik yubileyinin qeyd edilməsi haqqında” 2018-ci il 15 noyabr tarixli 689
nömrəli Sərəncamı ilə Nazirlər Kabinetinə müvafiq tədbirlər planının hazırlanıb
həyata keçirilməsi tapşırılmışdı.Bu səbəbdən Nəsimi ilə əlaqədar ölkə daxilində,
eləcə də beynəlxalq arenada bir çox tədbirlər keçirilir, səhnəciklər hazırlanır,
Nəsimidən sitatlar gətirilir. Bəs görəsən Nəsimi ilinə teatrlarımız necə
hazırlaşıb? Onlar repertuar planında Nəsimi qəzəllərinə yer ayırırlarmı?
"Nəsimiyə "Nəsimi” baletini hədiyyə edəcəyik”
Azərbaycan Dövlət
Akademik Opera və Balet Teatrının mətbuat
xidmətinin rəhbəri Şükufə Ağamirzəyeva "Kaspi”-yə açıqlamasında "Nəsimi ili”
ilə əlaqədar Fikrət Əmirovun musiqisi əsasında hazırlanan "Nəsimi” baletinin hazırlıq
işlərinin tamamlandığını dedi: "Nəsimi ili” əlaqədar bir pərdəli "Nəsimi”
baletinin üzərində iş gedir. Tamaşanın quruluşunu xalq artisti, balet
truppasının bədii rəhbəri Kamilla Hüseynova həyata keçirir. Tamaşanın musiqi
rəhbəri və dirijoru isə xalq artisti Yalçın Adıgözəlovdur. Əsas rollarda balet
truppasının solistləri iştirak edəcəklər. Belə ki, gənc balet solisti Anar
Mikayılov Nəsimi rolunu, əməkdar artist Nigar İbrahimova isə Nəsiminin həyat
yoldaşı obrazını ifa edəcəklər. Tamaşada digər solistlər də iştirak edəcəklər”.
Teatrın sözçüsü deyir ki, ilin əvvəlindən tamaşa
üzərində məşqlər gedir. Tamaşanın premyerası mayın 5-ə nəzərə tutulub:
"Tamaşanın əsas hissələri hazırdır, işlər yekunlaşmaq üzrədir. Son hazırlıq
işləri gedir, belə ki, tikiş sexində geyimlər tikilir, rəssamlar səhnə
tərtibatını hazırlayır, orkestr musiqi materialının üzərində son işlərini
görürlər”.
"Nəsimi qədər böyük bir ümmana baş vurmaq cəsarət tələb edir”
Uzun müddətdir ki, Bakı Uşaq Teatrı "Bir teatrı, bir festival” layihəsi çərçivəsində
gerçəkləşəcək üçüncü "Bizim teatr festival”ına hazırlaşır. Belə ki, onlar bu
festivalı "Nəsimi ili”nə həsr ediblər. Teatrın direktoru İntiqam Soltan "Nəsimi
ili, Nəsimi dili” adlandırılacaq festivalın 2019-cu il aprelin 12-13-də Teatr
Xadimlər İttifaqında keçiriləcəyini deyir: "Festivalda Bakı Uşaq Teatrı tam
tərkibdə iştirak edəcək. Məqsədimiz yaradıcı heyətimizin fərdi yaradıcılığının
inkişafına zəmin yaratmaqdır. Aktyorlarımızın hər biri ayrı-ayrılıqda öz
üzərilərində çalışırlar. Nəsimi deyəndə hamımızın gözü önündə ilk növbədə onun
qəzəlləri və "Nəsimi” filmi canlanır. Ancaq biz bir az fərqli üsula əl atmışıq.
Əsas məqsədimiz aktyorların fərdi işini nümayiş etdirməkdir. Nəsimi qədər böyük
bir ümmana baş vurmaq cəsarət tələb edir. Demək olar ki, teatrın bütün
aktyorları bu festivalda iştirak edir. Hansı ki, mən bunu yalnız könüllülük
əsasında təklif etmişdim”.
İ.Soltan deyir ki, bu festival fərqliliyi ilə
seçilir: "O mənada ki, biz bu festivalla əruz vəznini nümayiş etdirmək
istəmirik, istəyirik ki, Nəsimi yaradıcılığına səyahət edək. Münsiflər
heyətindən də xahiş etmişik ki, qiyməti əruza deyil, Nəsimi yaradıcılığına görə
versinlər. Festivalda Bakı Uşaq Teatrının yaradıcı heyəti Nəsimi poeziyasından
nümunələrlə çıxış edəcək, müstəqil qəzəl təqdimatları və müxtəlif kompozisiyalar
nümayiş etdirəcəklər. Bundan başqa, müxtəlif teatrların və yaradıcı
kollektivlərin təmsilçiləri də festivalda Nəsimi poeziyasından nümunələrlə
çıxış etməyə dəvət olunub. Artıq Azərbaycan Dövlət Akademik Musiqili Teatrı,
Azərbaycan Dövlət Akademik Rus Dram Teatrı, Dərbənd Azərbaycan Dövlət Dram
Teatrı, Şuşa Dövlət Musiqili Dram Teatrı, Sumqayıt Dövlət Dram Teatrı,
Azərbaycan Dövlət Mədəniyyət və İncəsənət Universiteti çıxışla bağlı festivalın
təşkilat komitəsinə müraciət ediblər və proqrama salınıblar. Respublika
İncəsənət Gimnaziyasının şagirdləri də festivala qonaq qismində qatılacaqlar”.
Sumqayıt Dövlət
Dram Teatrının direktoru, əməkdar artist Mübariz Həmidov bizimlə söhbətində "Nəsimi
ili”nə xüsusi hazırlaşdıqlarını və teatrın yaradıcı heyətinin bununla bağlı
tamaşa hazırladığını vurğuladı: "Aprelin 12-də Teatr Xadimlər İttifaqında
"Nəsimi ili, Nəsimi dili” festivalında biz də iştirak edəcəyik. Orada bizim
"Şah və Sultan” adlı kompozisiyamız təqdim olunacaq. Mayın 10-15-i arası
Prezident İlham Əliyevin sərəncamına uyğun olaraq Sumqayıt Şəhər İcra
hakimiyyətinin təşkilatçılığı ilə Nəsiminin 650 illiyi ilə bağlı teatrda böyük
tədbir proqramı təşkil edəcəyik. Belə ki, burada xalq artistləri Rasim Balayev,
Alim Qasımov, dəyərli sənətkarlarımız Elnarə Abdullayeva, Şeyx Əbdül, Nəsimişünas
dilçi-alim və bir çox qonaqlarımız olacaq. Bir saat 10 dəqiqə ərzində böyük bir
tədbirimiz olacaq. Bundan başqa, Sumqayıtın yaranmasının 70 illik yubileyi ilə
bağlı özümüzün bir çox tədbirlərimiz var, teatrın yaradıcı heyəti həm də bu
yubileyə hazırlaşır”.
"Çün Nəsimi aləmin sultanıdır”
Abdulla Şaiq adına
Dövlət Kukla Teatrının mətbuat xidmətinin rəhbəri Həmidə Rüstəmovadeyir ki, Kukla Teatrının nəzdində fəaliyyət göstərən "Oyuq” teatr studiyasında
"Çün Nəsimi aləmin sultanıdır” adlı kompozisiya hazırlanır. "Oyuq” teatr
studiyasının istedadları İmadəddin
Nəsiminin sevilən qəzəllərini səsləndirəcək, bu qəzəllər əsasında
səhnəcik nümayiş etdirəcəklər. Bundan başqa, suriyalı vokalçılarla birlikdə
"Qafil oyan” musiqisini xor şəklində ifa edəcəklər. Hər zamankı kimi, tamaşaçılar studiyanın
yaradıcı heyətinin təqdimatında maraqlı bir kompozisiya izləyə biləcəklər. Bu
da Kukla Teatrının İmadəddin Nəsiminin 650 illiyinə bir töhfəsi olacaq. Bu tamaşa-kompozisiya
noyabr ayının əvvəllərinə nəzərdə tutulub”.
İmadəddin Nəsiminin 650 illik yubileyi ilə əlaqədar
2019-cu ilin "Nəsimi ili” elan edilməsi haqqında əməkdar incəsənət xadimi,
sənətşünaslıq üzrə fəlsəfə doktoru, Azərbaycan Dövlət Musiqili Teatrının
direktoru Əliqismət Lalayev mətbuata açıqlama verərkən bu addımın Azərbaycanın
zəngin tarixi-mədəni irsinin qorunması, təbliği baxımından çox böyük töhfə
olduğunu deyib: "Hörmətli cənab Prezidentimizin 2019-cu ili "Nəsimi ili” elan
etməsi haqqında tarixi qərarı Ulu Öndər Heydər Əliyevin xalqımız üçün gördüyü
işlərin uğurlu davamı, milli mənəvi sərvətimizə verilən dəyərin, hörmət və
ehtiramın yüksək göstəricisidir. Uzun illərdən bəri elmi-ədəbi fikrin diqqət
mərkəzində olan, milli-mədəni sərvətlər xəzinəsində özünəməxsus yer tutan
Nəsimi irsi bundan sonra daha geniş şəkildə araşdırılacaq, xüsusilə,
incəsənətin bir çox janrlarında Nəsimi mövzusunda yeni-yeni əsərlərin meydana
gəlməsinə təkan verəcək. Hələ ötən ilin oktyabr ayında VI Bakı Beynəlxalq
Humanitar Forumu çərçivəsində ölkəmizdə səfərdə olan dünyanın aparıcı
simalarının Nəsimi yaradıcılığı ilə yaxından maraqlanmaları, onların Azərbaycan
Dövlət Musiqili Teatrında nümayiş olunan xalq artisti, bəstəkar Firəngiz
Əlizadənin "Nəsimiyə ithaf” adlı balet-tamaşasını heyranlıqla izləmələri
göstərdi ki, biz Nəsimini bütün dünyaya tanıtmalıyıq. Düşünürəm ki, Prezidentin
yeni Sərəncamı bütün yaradıcı kollektivlərin çiyinlərinə düşən məsuliyyəti daha
da artıracaq – mədəniyyətimiz üçün əhəmiyyətli şəxsiyyət, qüdrətli söz ustası
Nəsimi haqqında ilboyu keçiriləcək tədbirlərin gedişatında fəal iştirak etmək,
yeni səhnə əsərləri hazırlamaq, yeni layihələri reallaşdırmaq və geniş
auditoriyaya təqdim etmək ümdə vəzifəmiz olmalıdır”.
Qeyd edək ki, Akademik Musiqili Teatr da "Nəsimi
ili, Nəsimi dili” festivalında iştirak edəcək.
Xəyalə Rəis