Sürəti azalan proses
"İnsanlar söysə də, gülünc qarşılasa da, cəmiyyətin
xilası naminə vaksinasiya prosesi üçün maarifləndirmə aparmalıyıq”
Çox yox, 2 həftə öncəyə qədər Azərbaycanda sözün əsl
mənasında peyvənd izdihamı yaşanırdı. Yanvar ayından aparılan vaksinasiya
prosesi özünün pik həddini məhz o günlərdə yaşadı. Hansı klinikanın, xəstəxananın
yanından keçsək, izdihamın şahidi olurduq. Hətta növbədən bezib şüşə
sındıranlar, xəstəxanaya hücum edənlər belə vardı. Lakin bu intensivlik getdikcə
azaldı. Düşünə bilərsiniz ki, artıq hər kəs peyvəndlənib və bu da saya təsir
edib. Təəssüf ki, belə deyil. Bunu biz yox, statistika deyir. Ölkədə hələ əhalinin
yalnız 30 faizi vaksinasiya olunub. Bu rəqəm 60-70 faizə qalxmayana qədər xəstəliyə
qalib gəlməkdən söhbət gedə bilməz. Bəs intensivliyin azalmasının səbəbi nədir?
"Vaksinasiyadan yayınanlar”
Milli Məclisin Səhiyyə komitəsinin üzvü, deputat
Müşfiq Məmmədli deyir
ki, intensivliyi azaldan mühüm amil insanların əsassız səbəblər gətirərək
vaksinasiyadan yayınmalarıdır: "Son vaxtlar peyvəndləmə prosesində iştirak edən
insanların sayının azalmasını mən də müşahidə edirəm. Bu, iki amillə bağlıdır.
İlk səbəb odur ki, 2-3 ay ərzində sürətli vaksinasiya həyata keçirildi.
Potensial olaraq vaksinləmə prosesinin həyata keçirilməsi üçün hədəf müəyyənləşdirdiyimiz
insanların böyük bir hissəsi birinci dozanı aldı. İkinci dozanın vaxtı gələnə qədər
sürətin zəifləməsi təbiidir. İkinci və ən əsas səbəb isə insanların hələ də
peyvəndə barmaqarası yanaşmalarıdır. Yəni peyvəndləmə prosesində iştiraka özünü
hazır görməyən, müxtəlif əsassız səbəblər gətirərək bu prosesdən yayınan
insanlarımız var”.
Maarifləndirmə və inzibati tədbirlər
Deputat deyir ki, vaksinasiya prosesinin
intensivliyini artırmaq üçün iki iş paralel şəkildə aparılmalıdır: "Biz həm
maarifləndirmə işini, həm də inzibati tədbirləri paralel şəkildə aparmaqla
vaksinasiyanın sürətini də artırmalıyıq. Bu faktdır ki, mübarizədə aktiv
iştirak etməyimizə baxmayaraq, hələ də 70-80 faizlik rəqəmlərə çata bilməmişik.
Qarşıda görüləcək çox işlər var. Buna görə də, həm maarifləndirmə, həm də inzibati
tədbirlərin paralel şəkildə tətbiqinin mühüm əhəmiyyəti var”.
Fəal və məsuliyyətli davranış
Həmsöhbətimiz vurğulayıb ki, pandemiya ilə mübarizədə
vaksinasiya prosesinə daha sürətli qoşularaq
kütləvi immunitet qazanmış insanlarımızın sayını artırmalıyıq: "Vətəndaşlarımız
peyvəndlənmə prosesinə məsuliyyətlə yanaşmalıdır. Özümüzü və ətrafımızdakı
insanları qorumaq üçün hər birimiz bu prosesdə fəal və məsuliyyətli
davranmalıyıq”.
Təcrid, yoxsa vaksinasiya?
Vaksinasiya ilə bağlı maarifləndirmə prosesində
aktiv iştirak edən həkimlərdən biri də Vaqif Qarayevdir. Həmsöhbətimiz
deyir ki, koronavirusdan qorunmağın iki yolu var. Təcrid və vaksinasiya. Onun
sözlərinə görə, bu, qəbul olunmuş həqiqətdir və fərqli düşünmək mənasızdır: "Vaksin
bütün dünyada son bir ildir ki, aktualdır. Effektinin də olması şübhəsizdir. Qapanmaqla
bu xəstəlikdən nə qədər qorunmaq olar axı? Buna qalib gəlməyimiz üçün
vaksinasiya çox vacibdir. Azərbaycanda vaksinasiya yanvar ayından başlayıb.
İnsanlar çox laqeyd, biganə yanaşırdılar. İndi də elədir. Amma müəyyən
qadağalar tətbiq etməklə insanları seçim qarşısında qoyduqdan sonra hamı vaksin
olunmaq üçün müraciət etdi və poliklinikalarda, xəstəxanalarda sıxlıq yarandı.
Mən düşünürəm ki, insanlar vaksini özünü qorumaq üçün deyil, məhdudiyyətdən kənarda
qalmaq üçün vurdurur. Gərək biz bu məhdudiyyətləri yanvardan edərdik. İnzibati qadağa olmadıqca, insanların özlərinin sosial
məsuliyyəti, demək olar ki, yoxdur. Bu gün desələr ki, vaksinsiz hər yerə getmək
olar, yenə də heç kim peyvənd olunmayacaq”.
Axı ölümcül olsan, necə yaza bilərsən?
Həkim deyir ki, ölkə olaraq peyvənd nəticəmiz ürəkaçan
deyil: "Kimdən soruşursan, peyvənd olunduğunu deyir. Lakin insanlar anlamır ki,
2 doza alındıqdan sonra immunitet formalaşır. Birinci dozadan sonra immunitet
olmur. Hər gün status yazırlar ki, "vaksin
vurdurmuşam, ölürəm”. Axı ölümcül olsan, necə yaza bilərsən? Sorğu-sual etdikdə,
görürük ki, 1 həftə öncə 1 doza peyvənd vurdurub. Acınacaqlısı odur ki, belə
yazılara daha çox inanırlar, amma sağlamlıqlarını qorumaq üçün vaksin olunmağa
inanmırlar. Böyük adamlar uşaq kimi davranırlar. Bu xəstəlikdən qorunmağın
yeganə çıxış yolu peyvənddir. İki dozanı təxminən 3 milyon insan vurdurub. Əhalinin
yalnız 30 faizi peyvənd olunmuş sayılır. Dünya əhalisinin 60-70 faizi
vaksinasiya olunsa, kütləvi immunitet yaranacaq. Azərbaycanda 2 milyonu uşaq
kontingentinə çıxsaq, 8-9 milyonun hələ cəmi 3 milyonu vaksinasiya olunub. Həddindən
artıq azdır. Biz yenə də insanları təşviq etməliyik”.
Cəmiyyəti xilas edək!
Həmsöhbətimiz vurğuladı ki, maarifləndirmə məsələsində
əsas iş həkimlərin üzərinə düşür: "İnsanlar söysə də, gülünc qarşılasa da, cəmiyyətin
xilası naminə vaksinasiya prosesi üçün maarifləndirmə aparmalıyıq”.
Aygün ƏZİZ