“Sülhməramlı missiya”nın yaratdığı problem
Zaur İbrahimlinin fikrincə,
rəsmi Bakı Rusiya sülhməramlılarının öz vəzifələrini yetərincə icra etməməyinə
dözümlü yanaşmayacaq
Bir neçə gündür ki, erməni silahlı birləşmələri Şuşada, Kəlbəcərdə və
Naxçıvanda Azərbaycan Ordusunun mövqelərini atəşə tutur. Bu təxribatın nəticəsi
olaraq Azərbaycan Silahlı Qüvvələrinin bir hərbiçisi yaralandı. Azərbaycan və
Ermənistan sərhədində baş verən təxribata görə, əlbəttə ki, rəsmi İrəvan
məsuliyyət daşıyır. Lakin Rusiya sülhməramlı kontingentinin yerləşdiyi
ərazilərdən Azərbaycan mövqelərinə atəş açılması başqa məqamlardan xəbər verir.
İctimaiyyətdə fikir
formalaşır ki...
Belə ki, ötən ilin noyabrında Azərbaycan, Rusiya və Ermənistan
rəhbərləri tərəfindən imzalanmış Üçtərəfli Bəyanata əsasən, erməni silahlı
birləşmələri ərazidən çıxmalı və sabitlik təmin edilməli idi. Lakin son günlər
Azərbaycan Ordusunun mövqelərinin atəşə tutulması, məhz Rusiya
sülhməramlılarının yerləşdiyi ərazidə baş verib. Hətta bununla bağlı Azərbaycan
Müdafiə Nazirliyi rəsmi məlumat da yayıb. Üzərinə öhdəlik götürən
sülhməramlıların isə baş verən təxribatlarla bağlı dəqiq, fakta söykənən hər
hansı bəyanatı yoxdur. Deməli, sülhü təmin etmək missiyasını həyata keçirən
Rusiya tərəfi məsələnin ciddiliyini nəzərə almır, ya da görməzlikdən gəlir.
Artıq Azərbaycan ictimaiyyəti də sülhməramlıların öz missiyasını yerinə yetirə
bilmədiyi qənaəti formalaşır. Həqiqətən Rusiya sülhməramlıları öz missiyasını
yerinə yetirə bilmir?
Şuşanın atəşə tutulması...
Mövzu ilə bağlı "Kaspi” qəzetinə açıqlamasında politoloq Zaur İbrahimli bildirdi ki, Şuşa şəhərinin atıcı
silahlardan atəşə tutulması ilə bağlı Azərbaycan Müdafiə Nazirliyinin rəsmi
açıqlamasında atəş nöqtələrinin Rusiya sülhməramlılarının məsuliyyət zonasında olduğu
qeyd edildi: "Bu açıqlama ilə Azərbaycan tərəfi rəsmi şəkildə Rusiya
sülhməramlılarının məsuliyyət məsələsini gündəliyə gətirdi. Rusiya Müdafiə
Nazirliyi hazırkı məqamda bu məsələlərin üzərindən sükutla keçməyə
çalışır. Şuşanın atəşə tutulması bir daha
Azərbaycan ərazisində qeyri-qanunu fəaliyyət göstərən erməni silahlı qüvvələri
problemini də gündəliyə gətirdi. Azərbaycan, Rusiya, Ermənistan tərəfindən
imzalanan 10 noyabr Üçtərəfli Bəyanatının 4-cü bəndində qeyd edilir ki, Rusiya Federasiyasının sülhməramlı
kontingenti erməni silahlı qüvvələrinin çıxarılması ilə paralel şəkildə
yerləşdirilir.Şuşanın atəşə tutulması, erməni tərəfinin bu vaxta qədər törətdiyi
digər təxribatlar, təkzibedilməz dəlillər göstərir ki, Rusiya sülhməramlılarının
məsuliyyət bölgəsində erməni hərbi dəstələri yerləşib və fəaliyyət göstərirlər.
Həmçinin, Qarabağ bölgəsində erməni silahlı birləşmələri qalmaqdadır”.
Rəsmi Bakının səbir və
təmkini
Politoloqun sözlərinə görə, rəsmi Bakı bu vaxta qədər səbir və təmkin
nümayiş etdirərək, problemlərin tədricən həllinə nail olmağa çalışır: "Bu zaman
10 noyabr Bəyanatının zəmanətçisi kimi Rusiyanın mövqeyi, Ermənistandakı daxili
siyasi vəziyyət, humanitar məsələlər nəzərə alınır. Lakin bir ilə yaxındır ki,
bu istiqamətdə irəliləyiş müşahidə olunmur və rəsmi Bakı artıq Rusiya
sülhməramlılarının məsuliyyəti məsələsini gündəliyə gətirməyə məcburdur. Rəsmi
Moskva və İrəvan Bakının bu problemin həlli ilə bağlı səylərinə, təmkinli və
humanitar səbəbləri nəzərə alan mövqeyinə adekvat yanaşma sərgiləmir.
Azərbaycan tərəfinin mövqeyinin sərtləşməsi bu amillərlə izah olunur. Artıq
Azərbaycan Rusiya sülhməramlılarının öz missiyasını yerinə yetirmədiyini
qabartmağa başlayıb”.
Tükənən limit
Z.İbrahimli vurğuladı ki, Azərbaycan ictimai rəyində bu qənaət 10
noyabr Bəyanatının imzalanmasından az sonra formalaşmışdı: "Rusiya sülhməramlı
kontingentinin ermənilərin hamisi kimi çıxış etməsi, Azərbaycan ictimaiyyətinin
haqlı narazılığına səbəb olmuşdu. Rəsmi Bakı humanitar səbəblərdən bu
məsələlərə təmkinlə yanaşırdı. Artıq bu dözümlü münasibətin limiti tükəndi və
Rusiya sülhməramlıları ilə bağlı ilkin xəbərdarlıq edildi. Rusiya siyasi
dairələri yaranmış vəziyyətin ciddiliyini və proseslərin sonrakı inkişafının
arzuolunmaz məcrada inkişafı ilə əlaqədar öz məsuliyyətlərini dərk
etməlidirlər. Qəti şəkildə deyə bilərik ki, nə Azərbaycan ictimaiyyəti, nə
rəsmi Bakı Rusiya sülhməramlılarının öz vəzifələrini yetərincə icra etməməsinə
dözümlü yanaşmayacaq. Bu məsələlərdə Azərbaycandan dözümlü münasibət, güzəşt
gözləyənlər bir daha yanılacaqlar və ölkəmiz bu əngəlləri dəf etmək gücünü
nümayiş etdirib”.
BƏXTİYAR