Süleymanov bu dəfə İmişliyə getdi
Yeni yaradılan
Azərbaycan Futbol İctimaiyyətinin Azad Həmkarlar İttifaqının nümayəndələri
futbol ictimaiyyəti ilə görüşləri davam
etdirirlər.
Növbəti belə
görüş İmişli rayonunda keçirilib. Bu barədə məlumatı Kaspi.az-a təşkilatın sədri
Nazim Süleymanov verib. Süleymanov bildirib ki, təşkilatın məram və məqsədi ilə
bağlı məlumat vermək üçün İmişliyə səfər ediblər:
"Bilirsiniz ki,
İmişlidə böyük futbolun ənənəsi var. Bu rayonun komandası Azərbaycan
çempionatında çıxış edib, ölkəmizi avrokuboklarda təmsil edib. İmişlidə futbol
ictimaiyyətinin geniş spektri var. Üstəlik, bu rayonda infrastruktur da
mövcuddur”.
Süleymanov
bildirdi ki, məqsədləri Azərbaycanın bütün bölgələrində görüşlər keçirməkdir:
"Məramımız təşkilatın ideya və prinsipləri ilə bağlı bütün futbol ictimaiyyətini
məlumatlandırmaqdır. Buna görə də Azərbaycanın futbol ənənəsi olan bütün bölgələrinə
səfər edəcəyik. Bizim üçün hər bir futbol veteranının, futbol ictimaiyyətinin hər
bir nümayəndəsinin fikri önəmlidir. Bu görüşlərdə onların təkliflərini dinləyir,
problemlərini öyrənirik.
Heç şübhə olmasın ki, təşkilatın fəaliyyətində bu təkliflər
mütləq nəzərə alınacaq. Bu baxımdan yanaşsaq, İmişli rayonunda da futbol
ictimaiyyətinin nümayəndələri ilə olduqca səmərəli görüş keçdi. İmişlidə futbol
təsərrüfatının durumunu öyrəndik, inkişaf perspektivlərinə bələd olduq, futbol
ictimaiyyətinin təkliflərini dinlədik, problemləri ilə tanış olduq. Belə görüşlərin
təşkilatın formalaşmasında və gələcəkdə iş keyfiyyətinin artırılmasında böyük əhəmiyyəti
var”.
Qeyd edək
ki, Azərbaycan Futbol İctimaiyyətinin
Azad Həmkarlar İttifaqının nümayəndələrinin əvvəlki görüşləri Gəncə, Masallı və
Buzovnada olmuşdu.