“Şerif” ola bilməyən “Neftçi” - TƏRS BUCAQ
3 il əvvəl
– 2018-ci ildə Azərbaycan çempionu "Qarabağ” Moldovanın "Şerif” klubunu Avropa
Liqasının fley-off mərhələsində məğlub edərək qrupa buraxmamışdı. Bir il əvvəl
– 2020-ci ilin yayında isə yenə də Azərbaycan çempionu "Qarabağ” "Şerif”i bu dəfə
Çempionlar Liqasının II təsnifat mərhələsində mübarizədən kənarlaşdırmışdı.
Azərbaycan
çempionu haradadır?
Bir ildən
sonra "Şerif” artıq Çempionlar Liqasının qrup mərhələsində idi. Və ilk iki
turda "Şaxtyor” və "Real”a qalib gəlməklə, bütün Avropanı özündən danışmağa məcbur
etmişdi. Bəs Azərbaycan çempionu haradadır? Yox, artıq Azərbaycan çempionu
"Qarabağ” deyil. "Neftçi” 7 ildən sonra bu titulu "köhlən atlar”dan ala
bilmişdi. Ona görə də "Qarabağ” Konfrans Liqasında oynamalı oldu. Və vəzifəsinin
öhdəsindən də gəldi. Ardıcıl 8-ci dəfə avrokubokların qrupuna vəsiqə qazandı.
Ən asan
yolda da yıxılırsa...
Avrokuboklarda
çıxış etmək üçün ən asan yol isə "çempionlar yolu”dur. Amma Azərbaycan çempionu
Neftçi” bu yolda da yıxıldı. Hələ mövsüm bitəndə mütəxəssislər deyirdilər ki,
"Neftçi” bu heyətlə avrokuboklarda heç nəyə nail ola bilməyəcək. Komandanın baş
məşqçisi Samir Abasov da problemləri açıq şəkildə deyir, rəhbərliyin transfer
siyasətini tənqid edirdi. Nə olsun... Məlum oldu ki, "Neftçi”də ümumiyyətlə, transfer
siyasəti yoxdur. Komanda ÇL-də məğlub oldu, Avropa Liqasında mübarizəni
dayandırdı, Konfrans Liqasının qrupuna buraxılmadı. Və bundan sonra "Neftçi”nin
"transfer siyasəti” başladı. Məlum oldu ki, rəhbərlik uzaq Avstraliyada 34
yaşlı futbolçu ilə maraqlanır.
Legioner
var, legioner var da!
"Real”ı məğlub
edən "Şerif”in heyətində kimlər var? Afrikadan gətirilmiş 21 yaşlı istedad.
"Real”a qol vuran özbək futbolçu. "Şerif”in heyəti bütünlüklə legionerlərdən
qurulub. Elə "Neftçi” də avrokubok qarşılaşmalarında meydana 8-9 legionerlə
çıxırdı. Amma legioner var, legioner var da! Moldova çempionatının səviyyəsi Azərbaycan
çempionatından üstün deyil. Heç "Şerif”in büdcəsi də "Neftçi”nin büdcəsini üstələmir.
Bəs neçə olur ki, "Şerif” səviyyəli, istedadlı legionerlər tapa bilir, amma
"Neftçi” yox? Burdan-bura Özbəkistan bazarını qoyub Avstraliyada futbolçu
axtarmaq hansı transfer siyasətinin önəmli hissəsidir? Hə, hər şey də bu sualın
cavabında gizlənib. Klublara peşəkarlar rəhbərlik etməlidir. Peşəkarlar 20
milyonluq büdcə ilə də bir milyardlıq büdcəyə sahib komandaya qalib gəlməyin yolunu tapırlar. Qeyri-peşəkarlar isə
avrokubokların bütün turnirlərindən qovulurlar.
Dövlət hər
şeyi edir ki...
"Şerif”
Moldova hökumətindən maliyyə yardımı almır. "Neftçi”nin əsas maliyyəçisi isə
dövlətdir. Dövlət üzərinə düşən hər şeyi edir. Edir ki, ölkənin ən köklü klubu
inkişaf etsin. Amma bu klub, daha doğrusu, ona rəhbərlik edənlər necə, öz üzərilərinə
düşəni edirlərmi? Onlar, ümumiyyətlə, bunu etmək bacarığına sahibdirlər?
"Şerif” özündən savayı heç kimə maliyyə hesabatı verməyə borclu deyil. "Neftçi”
isə borcludur. Çünki maliyyəni dövlətdən, deməli, xalqdan alır. Bəs hanı nəticə?
Natiq Muxtarlı