Sərhəddə genişmiqyaslı təxribat təhlükəsi - Brüssel görüşü sual altında
"Azərbaycan ərazisinə
qanunsuz səfər edən deputatlar Ermənistanın keçmiş prezidenti, hərbi cinayətkar
Robert Köçəryanın rəhbərlik etdiyi "Ermənistan”
parlament fraksiyasının üzvləridir. Azərbaycanla Ermənistan arasında münasibətlərin
normallaşdırılması istiqamətində addımlar atıldığı, ən yüksək səviyyədə ikitərəfli
görüşün tarixinin məlum olduğu bir vaxtda belə bir qanunsuz səfərin gerçəkləşdirilməsi
pozucu addım kimi qiymətləndirilməlidir. Deməli, Rusiya və Avropa strukturlarının
ciddi səylərinə baxmayaraq, Ermənistan daxilində iki ölkə arasında münasibətlərin
yaxınlaşdırılmasına qarşı olan qüvvələr fəaliyyətə keçiblər və onlar ilk
"nailiyyətlərini” qazandılar: Azərbaycan və Ermənistan xarici işlər nazirlərinin dekabrın
3-nə nəzərdə tutulan görüşü baş tutmadı”.
Kaspi.az xəbər verir
ki, bu barədə politoloq Əlimusa İbrahimov bildirib.
O qeyd edib ki, Azərbaycanla
Ermənistan arasında Rusiyanın vasitəçiliyi ilə üçtərəfli görüş iki dövlət
başçısının Belçikanın paytaxtı Brüsseldə görüşəcəkləri haqqında məlumat
yayıldıqdan sonra - 26 noyabrda Moskvanın Ermənistan Baş naziri Nikol Paşinyana
ciddi təzyiqinin ardınca Soçidə baş tutub.
Politoloqun qənaətincə, Vladimir Putin və Rusiya hakim dairələri Nikol
Paşinyanın Avropanı Rusiyadan üstün tutaraq Brüsseldə görüşmək istəməsini birmənalı
qarşılamır.
Onun sözlərinə görə,
Kremldə Paşinyanın bu addımı Rusiyaya qarşı xəyanətlər silsiləsinin davamı kimi
qiymətləndirilir: "Soçidə keçirilən üçtərəfli görüşdə Rusiya Paşinyanla nəzərdə
tutulan məsələlərin həllində gözlədiyi nəticəni ala bilmədi. Paşinyan məcburiyyət
qarşısında qalaraq Soçiyə getmişdi və ondan ciddi addımlar gözləmək sədəlövhlük
olardı. O, həlledici məsələləri Brüsseldə müzakirə etmək və razılığa gəlmək
üçün saxlayırdı. Bu isə indiki şəraitdə, yəni Rusiya ilə Avropa Birliyi
arasında müxtəlif sahələr üzrə qarşıdurmanın ən yüksək həddə olduğu bir vaxtda Kreml
rəhbərliyi tərəfindən heç qəbuledilən deyil”.
Ə.İbrahimov deyib
ki, yaranan situasiyanı Ermənistanda Paşinyana müxalif olan qüvvələr - Robert
Köçəryan, Serj Sərkisyan və başqaları yerində dəyərləndirərərk, həm də
Moskvadan alınan siqnallar əsasında fəaliyyətə keçiblər: "Onların ilk addımı
iki ölkə xarici işlər nazirlərinin Stokholmda keçirilməsi nəzərdə tutulan görüşə
qarşı oldu. Onlar bu tapşırığın öhdəsindən "uğurla” gəldilər. "Ermənistan”
parlament fraksiyasının deputalarının qanunsuz olaraq Azərbaycan ərazisinə səfəri
xarici işlər nazirlərinin görüşünün keçirilməsinin qarşısını aldı. Bu "müvəffəqiyyətdən”
ruhlanan Qarabağ erməni klanı növbəti addımlarını həyata keçirməyə başlayıblar.
Onlar bu dəfə Azərbaycan Prezidenti İlham Əliyevlə Ermənistanın baş naziri Nikol
Paşinyan arasında dekabrın 15-də Brüsseldə keçirilməsi nəzərdə tutulan görüşün
qarşısını almaq üçün fəaliyyətə keçiblər. Bunun üçün iki ölkə arasındakı sərhəddə
genişmiqyaslı təxribatdan tutmuş Rusiya sülhməramlıəlarının nəzarəti altında
olan ərazilərdən Azərbaycan əsgərlərinə qarşı hücuma qədər müxtəlif hərəkətlər
müzakirə olunur”.
Politoloq söyləyib
ki, Rusiya tərəfi Ermənistanda olan öz proksilərinin təxribat xarakterli
hücumlarının qarşısını almaq üçün tədbirlər görmür və onları yerində oturtmur: "Görünən
budur ki, Brüsseldə nəzərdə tutulmuş yüksəksəviyyəli görüşün baş tutması və bu
görüşdə Soçidə əldə olunmuş razılaşmadan artıq hər hansı sənədin imzalanması
Rusiyanın maraqlarına cavab vermir. Rusiyada
bunu Avropa ilə qarşıdurmada uduzmaq kimi qiymətləndirirlər. Azərbaycanla
Ermənistan arasındakı münasibətlərin Avropa-Rusiya qarşıdurmasında mərkəzi yer
tutması heç kimə sirr deyil. Bu qarşıdurmanın nə ilə nəticələnəcəyi hələlik məlum
olmasa da Brüssel görüşləri müəyyən proqnozlar verməyə imkan verəcək. Azərbaycan
Ordusu, sərhədçilərimiz və müvafiq qurumlar ermənilər tərəfindən Brüsseldə
keçiriləcək ikitərəfli görüşəü pozmağa yönələn
növbəti genişmiqyaslı təxribatın ola biləcəyini nəzərdə tutaraq
sayıqlığı daha da artırmalıdırlar”.
Alpər TURAN