Şəhidlər niyə Dağüstü parkda dəfn olundular?
1990-cı
ilin yanvar ayında Azərbaycan
Respublikasının müstəqilliyi uğrunda şəhid olmuş insanların dəfn olunması üçün
yerin seçilməsi və onun rəsmiləşdirilməsi ilə bağlı çoxsaylı iddialar var.
Bəzən bu mövzuda danışanlar həqiqətləri təhrif edirlər. Əslində isə yer seçimi
aşağıda nəql etdiyim kimi olub.
Azər
Nəbiyev (hazırda Təhsil Nazirliyində çalışır) ictimaiyyət tərəfindən yaradılmış
dəfn komissiyasının adından bir sıra aidiyyatı orqanlara şəhidlər üçün dəfn
yerinin seçilməsi üçün etdiyi müraciətlərə rədd cavabı aldıqdan sonra 26 Bakı
komissarı adına (indiki Səbaıl) rayon Xalq Deputatları Soveti İcraiyyə Komitəsinin
sədri kimi mənə müraciət etdi.
Məlumat
üçün qeyd edim ki, o vaxt bizim rayonun Partiya Komitəsinin 1-ci katibi mərhum
Məmmədov Vəli Hüseyn oğlu idi.
Bu
məlumatı ona görə deyirəm ki, şəhidlərin dəfni üçün yer seçimi ilə bağlı yazılan
bəzi məqalələrdə təhrifə yol verirlər.
Biz Azər
Nəbiyevlə yer seçimi ilə bağlı qısa müzakirə apardıq. İnsanlar tərəfindən Səməd
Vurğun adına bağ, o vaxtın 26 Bakı komissarı adına bağ, Malakan bağı,
Dənizkənarı bulvar və Dağüstü park variantları təklif edilmişdi. Mənə məlumat
verildi ki, insanların çoxu Dağüstü parka üstünlük verir. Dağüstü parkın həm
keçmişini, həm də şəhərin hündür yeri olduğunu nəzərə alaraq bu təklif
məqsədəuyğun hesab edildi.
Biz Azər Nəbiyevlə birlikdə Dağüstü parka gəldik. Xeyli insan
əllərində qəbirləri qazmaq üçün lazım olan ləvazimatlarla gözləyirdilər.
Biz həmin insanlarla birlikdə Dağüstü parkda qəbirlər üçün yer
axtarmağa başladıq. Əvvəlcə Kirovun heykəlinin (o vaxt heykəl hələ dururdu)
yuxarıdan baxanda sağ tərəfində olan yerə baxış keçirdik. Lakin orada olan
yerli ağsaqqal məlumat verdi ki, vaxtilə həmin yerdə xristianlar dəfn edilib.
Oradan qayıtdıq parkın qarşısına, təkliflər oldu ki, şəhidlər parkın qarşısında
dəfn olunsun. Mən etiraz etdim və izahat verdim ki, qəbirlər yoldan müəyyən
məsafədə olmalıdır. Bu təklif iştirakçılar tərəfindən də qəbul edildi. Bundan
sonra insanlarla birlikdə getdik şəhidlərin hazırda dəfn olunduğu yerə. Bura
enli və uzun səki idi. Bir nəfər ağsaqqal qəbir üçün yeri ölçdü və aydın oldu
ki, qəbirlər bir sırada yerləşir və ikincisi səkiyə sığışmır. Bu zaman orada
olan bəzi adamlar dedilər ki, şəhidlərin sayı 2- mindən çoxdur. 19 yanvardan 20
yanvara keçən gecə mən İcraiyyə Komitəsində olan növbətçi ilə birlikdə çox
çətinliklə də olsa, bütün xəstəxanalar və morqlarla əlaqə saxlayaraq,
şəhidlərin və yaralıların sayın təxmini olaraq müəyyən etmişdik. Ona görə də
deyilən 2 min rəqəminin düzgün olmadığını bildirdim.
Bunları nəzərə alaraq, belə razılığa gəldik ki,
qəbirləri qazmağa başlasınlar və biz siyahını bir daha dəqiqləşdirək. Mən
onlara söz verdim ki, əgər həmin yer azlıq edərsə, əlavə yer məsələsi həll ediləcək.
Bundan sonra başladılar qəbirləri qazmağa. Qəbirlərin qazılmasında, dəfn üçün
hazırlanmasında rayon Kommunal Təsərrüfat və Bərpası İdarəsi (idarənin rəisi
Malik adlı şəxs idi) aktiv iştirak etdi.
Növbəti gün Ali Sovetin fövqəladə sessiyasında bəzi
deputatlar kəskin çıxışlar edərək şəhidlərin Dağüstü parkda dəfn olunmasına
icazə verilməsini sərt tənqid etmişdilər. Bir sıra vəzifəli şəxslər, o vaxtkı
rəhbərlik mənə ciddi irad tutdular və o hadisədən az müddət sonra heç bir səbəb
göstərmədən məni icranın sədri vəzifəsindən azad etdilər və uzun müddət işsiz
qaldım.
Əli Məmmədov