Seçki, yoxsa təhqir kampaniyası?

Ermənistanda seçki prosesi (əgər buna seçki demək mümkündürsə) namizədlər arasında ən çirkin formada kompromat savaşı, qarşılıqlı təhqirlər, casus ittihamları, hətta ailə üzvləri haqqında ifşaedici materialların dərci və elanı ilə davam edir. Görünən odur ki, Rusiyanın xeyir-duası ilə seçkiyə qoşulan eks-prezident Robert Koçaryan hər vəchlə əsas rəqibi Nikol Paşinyanı üstələməyə çalışır. Artıq indidən bu qənaətə gəlmək olar ki, Kreml, nəyin bahasına olursa-olsun Koçaryanı hakimiyyətdə görmək istəyir və buna da nail ola bilər. Ola bilsin ki, koalision hökumət formalaşsın və Koçaryan da bu iqtidarda spiker postunu tutsun. Keçirilən rəy sorğularının nəticələri də bu qənaəti gücləndirir - Nikolla onu cəmi bir neçə faiz səs ayırır. Maraqlıdır ki, erməni cəmiyyətində 2018-ci ildən bəri "Qarabağ klanın”ın parlaq nümayəndəsi Koçaryana, Serj Sarkisyana qarşı nifrət pik həddə idi. İndi isə bəlli olur ki, hər iki namizədin reytinq fərqi cüzidir. Özü də Qarabağdakı fiaskodan sonra. Maraqlıdır ki, "Qallup”ın mart ayında keçirdiyi sorğuda Paşinyanın rəhbərlik etdiyi "Mənim addımım” partiyası respondentlərin 33 faiz səsini toplamışdı, Koçaryan isə dördüncü idi. Mayın son günlərində "Mənim addımım” partiyasının səsi 23 faizə düşdü, Koçaryanın rəhbərlik etdiyi "Ermənistan” blokunun səsi 17 faizə yüksəldi. Son sorğuda Paşinyan yerində sayır (23 faiz), Koçaryan isə irəliləyir (20 faiz).

Nikol Paşinyanın reytinqinin düşməsi bir sıra səbəblərlə bağlı ola bilər. Erməni diversantları qaytara bilməməyi, Laçın-Gorus sərhədində baş verən gərginlik, sərhədlərin demarkasiyası ilə bağlı yeni sənədin imzalanacağı xəbəri və s. Koçaryan da bütün bunlardan məharətlə istifadə edir. O, "Vətənin xilası” hərəkatında təmsil olunan daşnakları və keçmiş qubernator Vahe Akobyanın yaratdığı "Dirçələn Ermənistan” partiyasını ətrafına cəm edib. Bundan çıxış edərək demək olar ki, Zəngəzur, qarşıdakı günlərdə seçkilərin əsas cəbhəsi olacaq. Koçaryanın tez-tez Zəngəzura gəlməsi və seçki kampaniyasına buradan başlamaq qərarı da təsadüfi deyil. Buna baxmayaraq, Nikol da təslim olana oxşamır. İnzibati resurslarla rəqibinin kampaniyasına əngəl yaradacaq.

Artıq erməni mediası əminliklə yazır ki, seçkilərin ikinci turu qaçılmazdır. "Qraparak” qəzeti yazır ki, hakim partiya birinci turda digər partiyalar kimi, 50%+1 toplaya bilməyəcək. Seçki Məcəlləsinə görə, koalisiyanın formalaşmasına altı gün gərəkdir. Bu müddət ərzində maksimum üç qüvvə koalisiya yaratmalı və ən azı onların 54 faiz səsi olmalıdır. Əgər bu, baş verməzsə, o zaman birinci səsvermədən 28 gün sonra ikinci tur keçiriləcək. Burda blokun iki partiyası iştirak edəcək. İkinci turda qalib olana avtomatik olaraq 54 faiz veriləcək. İkinci turun keçirilməsi planı Nikol Paşinyan üçün əsas ola bilər. Sorğunun nəticələrini nəzərə alsaq, o zaman görərik ki, hakimiyyət birinci turda qalib olacağına inanmır. Koalisiyaya ümid də yoxdur. Belə ki, parlamentə düşən digər partiyalar dərhal ona qarşı birləşəcək. "Təki Nikol olmasın” ideyası hakim ideya olacaq. Çünki hazırda müxalifəti antipaşinyan xətt birləşdirir. Lakin erməni qanunvericiliyi elə qurulub ki, Paşinyan brinci tur üçün sakit ola bilər. 25 faiz səs toplasa belə, bu, fəlakət olmayacaq. Başqa ölkələrdə bu, hakim partiyanın fiaskosu ola bilərdi. Beləliklə, de-fakto Nikol Paşinyan birinci turu uduzacaq, lakin de-yure birinci turda ona qalib gəlmək mümkün olmayacaq. Beləliklə, indidən demək olar ki, "Vətəndaş müqaviləsi” ikinci turu hədəf götürüb. Bu, ilk növbədə daha güclü rəqibin müəyyən olunması və ona qarşı mübariz aparmaqdır. Bu rəqib də Koçaryanın başçılıq etdiyi ultramilətçi "Ermənistan” blokudur.

Bununla yanaşı, erməni cəmiyyətində seçkidən sonra vətəndaş müharibəsinin başlana biləcəyi ehtimalı da güclənir. Və bu xətt tərəfdarları indidən deyirlər ki, əgər Nikol Paşinyan yenidən baş nazir vəzifəsinə seçilməsə, Ermənistanda dəhşətli vətəndaş müharibəsi başlanacaq. Məsələn, Vətəndaş Partiyasının həmtəsisçisi, tanınmış erməni ekspert Artur Ambartsumyan bildirib ki, Paşinyan növbədənkənar seçkilərin başqa nəticəsi ilə razılaşmayacaq və qəbul etməyəcək: "Onu yalnız özünün seçiləcəyi nəticə qane edəcək. O, bu barədə bir neçə dəfə deyib. 2020-ci ildə xalq qarşısında çıxış edərkən bəyan etdi ki, Ermənistanda vətəndaş müharibəsi olmayacaq, yalnız ona görə ki, insanlar düzgün hökumət seçəcəklər. Bir neçə gün bundan əvvəl isə Armavirdə bildirib ki, seçkilərdə öz qələbəsindən başqa hər hansı digər nəticəsini qəbul etməyəcək”. Ambarsumyan əminliklə bildirib ki, Nikol Paşinyan yenidən seçilməsə, ən dəhşətli addımlara əl atacaq: "Ermənilər ermənilərin qanını İrəvan küçələrinə tökəcək”.