Sağlam həyat tərzi bütün xəstəliklərə qalib gəlir
Bütün dünyada olduğu kimi,
Azərbaycanda da 2018-ci ildə ürək-damar xəstəlikləri ölümə və əlilliyə səbəb
olan bir nömrəli xəstəlik oldu. Bu haqda Milli Məclisin Səhiyyə Komitəsinin
üzvü Rəşad Mahmudov məlumat verib. R.Mahmudovun sözlərinə görə, çox zaman
dializ olunan xəstələr belə sonda ürək-damar çatışmazlığından dünyasını
dəyişir: "Ürək-damar xəstəlikləri ilə mübarizə səhiyyə ilə bağlı nəticələrin
yaxşılaşmasına töhfə verir”. Maraqlıdır, bu kimi xəstəliklərin qarşısını almaq
üçün hansı addımlar atılmalıdır?
"Stent for life” layihəsi
Kardioloq Üzeyir Rəhimov bildirir
ki, hazırda nəinki Azərbaycanda, bir
sıra ölkələri çıxmaq şərti ilə bütün dünyada ürək-damar xəstəlikləri ölümün
birinci səbəbidir: "Lakin Şərqi Avropanın bəzi kiçik ölkələrində bu xəstəlikdən
ölümün səviyyəsi qısa müddətdə iki dəfə azalıb. Həmin ölkələrə misal olaraq
Sloveniya, Çexiya, Slovakiyanın adını çəkmək olar. Bu ölkələrdə ürək-damar
xəstəliyindən ölüm ikinci yerdədir. Buna isə dövlətin bu sahədə çox diqqətlə apardığı
siyasət nəticəsində nail olunub. Belə ki, "Stent for life” (həyat üçün stent)
deyilən bir proqram var. Bu layihə nəticəsində həmin ölkələrdə xəstəliyin
müalicəsi ilə məşğul olan, anju edib stent qoyulan mərkəzlər yaradılıb. İnfarkt
keçirən xəstələr ilk 6 saat ərzində həmin mərkəzlərə çatdırılır və damarları
açılır. Bu addım atılandan sonra o ölkələrdə ürək-damar xəstəliyindən ölənlərin
sayı azalıb. Düşünürəm ki, ölkəmizdə də infarkt diaqnozu qoyulan hər bir xəstə
damarın çox tez bir vaxtda açılacağı mərkəzə yönləndirilərsə, ürəkdə zədələnmə
az olar və həmin insanın yaşama şansı artar. Hazırda inkişaf etmiş ölkələrdə
yalnız bu üsulla irəliləyiş əldə edilib”.
Kardioloq qeyd edir ki, bu
xəstəliklə bağlı risk qrupuna daxil olan şəxslər tez-tez müayinədən
keçməlidirlər: "Bundan başqa, insanları müasir standartlara cavab verən həkim və
mərkəzlərə yönləndirmək lazımdır. Təzyiq, şəkər, xolesterin xəstəlikləri ilə
ciddi mübarizə aparılmalıdır. Xəstəliklər nəzarət altında olmalıdır. Bu kimi
xəstəliklərin daşıyıcısı olan şəxslər çəkilərinə diqqət etməlidirlər. İnsanlar
arasında dieta saxlamaq təbliğ edilməlidir. Mümkün olduğu qədər ölkədə çoxlu
piyada gəzmək, velosiped sürmək üçün yerlər yaradılmalıdır. Xəstəliyi olmayan
insanlar 6 ayda bir, risk qrupunda olanlar isə daha tez-tez yoxlamalardan
keçməlidir”.
20-30 il əvvəl xəstəlik bu səviyyədə deyildi
Tibb üzrə ekspert, professor Adil Qeybulla deyir ki, günümüzdə
ürək-damar və onkoloji xəstəliklər əhali arasında yayılma səviyyəsinə görə
birinci yerdədir: "Bu xəstəliklər həmişə ölümün, əmək qabiliyyətinin
itirilməsinin əsasını təşkil ediblər. Amma son vaxtlar statistikanın belə
artmasının bir sıra yerli və ekoloji səbəbləri var. Məsələ bundan ibarətdir ki,
bu gün insanlar çox tənbəlləşiblər. Həddən artıq qida qəbul edib, az hərəkətdə
olurlar. Yəni qəbul edilən kalori ilə xaric olan arasında balans pozulub.
Nəticə etibarı ilə də daxil olan kalori insanların bədənində yığılaraq qan-damar
sistemində problemlərin əmələ gəlməsinə şərait yaradır. 50 yaşında on nəfər
adam götürsəniz, onlardan ən azı 3-4-nün ürəyində stent olacaq. 20-30 il əvvəl
xəstəlik bu səviyyədə deyildi”.
Genofondun sağlamlığı üçün ciddi işlər görülməlidir
Həkim deyir ki, bütün
bunlar insanların həyat tərzinə bağlı olan xəstəlikdir: "Bunun qarşısını almaq
üçün televiziyalarda maarifləndirici verilişlər təşkil edilməlidir. İnsanlara
həyat tərzini dəyişməyin, sağlam həyata keçməyin yolları izah edilməlidir.
Siqaret çəkməkdən, alkoqollu içki qəbul etməkdən uzaq olmağı, gündə ən az bir
neçə kilometr gəzməyi insanlar arasında təbliğ etmək lazımdır. Bir çox
insanlarda qidalanma rejimsizdir. Axşam saatlarına qədər yeyənlər var. Təbii
ki, bu kimi ziyanlı vərdişlər insanların sağlamlıq sisteminin sıradan çıxmasına
zəmin yaradır. Məsləhət görərdim ki, kütləvi idman yerləri yaradılsın. Dövlət
bu kimi nüansları nəzərə alaraq, genofondun sağlamlığı üçün ciddi işlər
görməlidir. Çünki bu kimi xəstəliklər nəticəsində əmək qabiliyyətinin
itirilməsi çox ciddi sosial, iqtisadi problemlərin ortaya çıxmasına səbəb olur”.
Xəstəliklər irsi keçir?
Həkimlər xəstəliklərin bir
çoxunun insanların həyat tərzi ilə bağlı olduğunu qeyd edirlər. Amma bəziləri
bunu qəbul etmək istəməyib, irsiyyətlə əlaqələndirirlər. Maraqlıdır, bu
xəstəliklər irsən keçirmi? "İnsan özünün ya həkimidir, ya qənimi” deyən "Ana Təbiət”
Natural Gigiyena Mərkəzinin rəhbəri, yazıçı-jurnalist Ərşad Əzimzadə bildirir ki, bir
çoxları xəstəliyini irsiyyətlə bağlamağa çalışır: "Xəstələrdən tez-tez eşidirik
ki, "babam da, atam da, anam da bu xəstəlikdən ölüb. İrsi xəstəlikdir”. Təəssüf
ki, xəstəliyi heç kəs öz həyat tərzi ilə əlaqələndirmək istəmir. Bəla
burasındadır ki, xəstəliyin irsən keçməsi fikrini mikrobların qarşısında aciz
qalan bir çox həkimlər də qəbul edir. Xəstəliyi genlərin boynuna yıxmaq həm
xəstələri qane edir, həm də həkimləri. Əslində isə, irsi xəstəlik yoxdur!
Əlbəttə, irsi qüsur ola bilər. Əgər xəstəliklər genlərlə keçsəydi, onda gərək
dünyada tək bir xəstəlik mövcud olaydı - əcdadımız sayılan Adəmlə Həvvanın
xəstəliyi.İlk əcdadlarımızın xəstə olub-olmadığını deyə bilmərəm. Amma
hamı belə bir fakta şahididir ki, eyni ailədə bir uşaq bu xəstəlikdən, o biri
başqa xəstəlikdən, üçüncü də tamam başqa xəstəlikdən əzab çəkir. Üstəlik, gündə
təzə xəstəlik meydana çıxır. Lakin bu reallığı da inkar etmək olmaz ki, bəzən
həqiqətən də baba da, ata da, nəvə də eyni xəstəlikdən ölür. Belə hallar az
olsa da, mövcuddur və adamların şüurunda qəti fikir formalaşdırıb ki,
xəstəliklər irsən keçir. Çox təəssüf ki, belə düşünənlər xəstəliklərə qarşı
mübarizə aparmır, öz "acı taleyi” ilə barışır və dərmanların hesabına yaşayır”.
Eyni pis vərdişlərin nəsildən-nəslə
ötürülməsi
Bəs, əgər
xəstəliklər irsən keçmirsə, babanın, oğulun və nəvənin eyni xəstəlikdən ölməsi
faktını nə ilə izah etmək olar?: "Bunun çox sadə izahı var. Bütün xəstəliklərin
kökü eynidir - mühit və həyat tərzi. Əgər insan qeyri-sağlam həyat tərzi
yaşayırsa və pis vərdişlərin quludursa, o, mütləq xəstə olmalı və dünyasını tez
dəyişməlidir. Başqa cür ola bilməz. Xəstəlikləri məhz pis vərdişlər törədir.
Onlar isə həddən ziyada çoxdur. Kitablarımın birində pis vərdişlərin siyahısını
vermişəm. Siyahı çox uzun alındı - 200-ə yaxın pis vərdişi yadıma sala bildim.
Güman edirəm ki, onlar daha çoxdur.
Dünya tibb elminin banisi Hippokratın "bizi
öldürən qocalıq deyil, pis vərdişlərdi” kəlamını rəhbər tutsaq, deməliyik ki,
hər pis vərdişin özünə məxsus xəstəliyi var. Məsələn, ətbaz ailə ürək-damar
xəstəliklərinə meyilli olursa, çörək və un məmulatlarını çox sevən ailə oynaq
xəstəliklərinə, şirniyyata üstünlük verən ailə isə sümük xəstəliklərinə daha
çox meyilli olur. Burdan belə bir qənaətə gələ bilərik ki, xəstəliklərin
daşıyıcısı genlər deyil, pis vərdişlərdi. Babanın, oğulun və nəvənin eyni
xəstəlikdən ölməsinin başlıca səbəbi - həmin ailədə eyni pis vərdişlərin
nəsildən-nəslə ötürülməsidir. Deyək ki, baba da ətbaz olub, oğul da, nəvə də”.
"Dəyişən yeganə şey - həyat tərzim oldu”
Ə.Əzimzadə qeyd edir ki, kitablarını oxuyan və sağlam məntiqə inanan yüzlərlə
xəstə öz həyat tərzini dəyişərək, pis vərdişlərin üstündən qalın xətt çəkərək,
"irsən keçən” bir neçə xəstəliyin axırına davasız-dərmansız çıxa bilib: "Təkcə
bu faktın özü xəstəliklərin genlər vasitəsilə keçməsi fikrini tamam alt-üst
edir. Fikirləşin, necə olur ki, vərəm xəstəliyindən əzab çəkən ana sağlam övlad
doğur, lal-kar atanın övladları dilli-dilavər, kor kişinin uşaqları normal
olur? Əgər xəstəliklər irsən keçirsə, bəs necə oldu ki, mən ata-anamı öldürən
xəstəliklərə deyil, 8 fərqli xəstəliyə tutuldum? Necə oldu ki, pis vərdişləri
tərgidən kimi, o xəstəliklər məni tərk etdi? Genlərimmi dəyişdi? Xeyr, dəyişən
yeganə şey - həyat tərzim oldu”.
Sağlamlıq və xoşbəxtlik yolu
Mərkəzin rəhbəri bildirir
ki, sağlam həyat tərzi ilə sağalmayan xəstəlik yoxdur: "Gəlin, genləri rahat buraxaq, nadan olduğumuzu boynumuza alaq. Mən hər
yerdə deyirəm və yazıram ki, düz 60 il cahil olmuşam, sağlamlığımı
baltalamışam. Ağıllı adamların kitablarını oxuyandan sonra gözlərim açıldı və
dərk etdim ki, bizi zəka deyil, pinti "gödən” idarə edir, nəfs və tamah bizi
müti qula çevirib. Şükürlər olsun ki, "xəstəlik” adlı böyük bəladan qurtarmağın
yolu var – sağlam həyat tərzi. Bu yolu - sağlamlıq və xoşbəxtlik yolunu öz
kitablarımda ətraflı işıqlandırmışam. Oxuyanların çoxu bəhrələnib.Sağlam
və xoşbəxt olmaq üçün insana nə milyonlar, nə əzəmətli saray, nə də yüksək
vəzifə lazımdır. İnsana ikicə şey lazımdır - dərin zəka və möhkəm iradə.
Yaxşı-yaxşı düşünün, yaşadığınız həyat tərzinə kamil insanların gözü ilə baxın.
Öz təcrübəmdən dəqiq bilirəm ki, həyat tərzini dəyişmək, xəstəliklər üzərində
zəfər çalmaq və xoşbəxt olmaq heç bir yaşda gec deyil.Bu gün
çıxaracağımız nəticə belə olmalıdır: irsən keçən xəstəlik yoxdur, bütün
xəstəliklər pis vərdişlərin acı məhsuludur, elə bir xəstəlik tapa bilməzsən ki,
onu sağlam həyat tərzinin köməyi ilə sağaltmaq mümkün olmasın”.
Günel Azadə