“Rusiyanın təklifi Azərbaycanın maraqlarına cavab vermir”
Noyabrın 30-da Rusiyanın paytaxtı Moskvada Müstəqil Dövlətlər
Birliyinə (MDB) üzv dövlətlərin Müdafiə Nazirləri Şurasının 71-ci iclası
keçirilib. Tədbirdə Azərbaycanın müdafiə naziri general-polkovnikZakir Həsənov,
həmçinin Ermənistan, Belarus, Qazaxıstan, Qırğızıstan, Rusiya, Tacikistan və
Özbəkistanın hərbi idarələrinin rəhbərləri, MDB İcraiyyə Komitəsi, MDB-nin
iştirakçı ölkələrinin Müdafiə Nazirləri Şurası (MNŞ) Katibliyi, MDB-nin
Antiterror Mərkəzi və MDB-nin Sərhəd Qoşunları Komandanlığı Şurasının Əlaqələndirmə
Xidmətinin nümayəndələri də iştirak ediblər. İclas zamanı müdafiə nazirliklərinin
qarşılıqlı fəaliyyət istiqaməti üzrə müxtəlif məsələlər nəzərdən keçirilib.
Bununla yanaşı, 2016-cı ilə yekun vurulması və 2017-ci ilin birgə işi, eləcə də
MDB MNŞ-nin yaradılmasının 25-ci ildönümü ilə bağlı tədbirin keçirilməsi də
müzakirə olunub. İclas çərçivəsində Azərbaycan və Rusiya müdafiə
nazirləri arasında ayrıca görüş keçirilib. Görüşdə iki ölkə arasında hərbi və hərbi-texniki
sahədə əməkdaşlığın inkişafı müzakirə olunub. Nazirlər iki ölkənin müdafiə
nazirlikləri arasında 2017-ci il üçün əməkdaşlıq planı imzalayıblar.
Xüsusilə
diqqət çəkən məqam burasıdır ki, MDB MNŞ-nin iclası ilə eyni gündə Kremlin nəzarətindəki
"Nezavisimaya qazeta”da maraqlı məqalə yayınlanıb. Sözügedən mətbuat orqanı hərbi
mənbələrə istinadən yazıb ki, Rusiya-Suriya koalisiyası Serbiya, Çin, Misir və
bir sıra MDB ölkələri, o cümlədən Azərbaycan və Ermənistan hərbçiləri hesabına
tamamlana bilər. Yəni, Azərbaycan da daxil olmaqla bəzi MDB respublikaları
Suriyada "sülhün təmin olunması” üçün başladılacaq sülhməramlı missiyanın tərkibində
öz qoşunlarını bu ölkəyə göndərə bilərlər. Ehtimal edilir ki, bu mövzuda Sergey
Şoyqu ilə Zakir Həsənov arasında müzakirə olunub. "Nezavisimaya qazeta”nın
yazdığına görə, Rusiya Müdafiə Nazirliyi hətta Azərbaycana təklif edib ki, Suriyada
üsyançılardan azad edilmiş ərazilərdə minaların təmizlənməsində iştirak etsin.
Əgər yazılanlar reallığı əks etdirirsə, faktiki olaraq Rusiya işğala məruz
qalan Azərbaycana işğalçı Ermənistanla eyni (hərbi) koalisiyada və ya missiyada
təmsilçilik təklif edib. Belə olan halda, Azərbaycan bu sülhməramlı missiyada,
Rusiyanın Suriya planında yer ala bilərmi?
Mili Məclisin Müdafiə, Təhlükəsizlik
və Korrupsiya ilə Mübarizə Komitəsinin üzvü, politoloq Hikmət Babaoğlu mövzu
barədə qəzetimizə açıqlamasında Azərbaycanın terrordan əziyyət çəkən bir ölkə
olduğunu diqqətə çatdırıb. Bildirib ki, bu amilə görə ölkəmiz hər zaman
antiterror koalisiyalarında müəyyən dərəcədə iştirak edib. Rusiyanın təklifinə
gəlincə isə deyib ki, Azərbaycan bu təklifə bir qədər ehtiyatla yanaşmalıdır:
"Azərbaycan MDB üzvü olan digər bir dövlət - Ermənistanla müharibə vəziyyətindədir.
Ermənistan Azərbaycanın 20 faiz ərazisini işğal edib, azərbaycanlılara qarşı
kütləvi soyqırımı, deportasiya siyasəti həyata keçirib. Bu gün də Ermənistan işğalçılıq
siyasətindən əl çəkmir, Dağlıq Qarabağ münaqişəsinin dinc yolla həll edilməsi
üçün ATƏT-in Minsk qrupunun həmsədr dövlətlərinin iştirakı ilə keçirilən
danışıqlarda qeyri-konstruktivlik nümayiş etdirir. Demək olar ki, hər gün atəşkəsi
pozan, mövqelərimizi iriçaplı silahlardan, minaatanlardan atəşə məruz qoyan Ermənistan
hərbçiləri müxtəlif vaxtlardan bir sıra təxribatlar törətməklə də məşğul
olurlar. Məhz bu kimi səbəblərdən işğal faktoru, müharibə vəziyyəti indi də
davam etməkdədir. Üstəlik, Ermənistan ordusu işğal altında saxladığı Azərbaycan
ərazilərində, o cümlədən də Dağlıq Qarabağda çoxsaylı minalar basdırıblar.
Düşünürəm ki, Azərbaycanın Rusiya ilə hərbi əməkdaşlıq etməsi, bu kontekstdə ərazilərimizin
işğaldan azad edilməsinə çalışması, həmçinin düşmən tapdağından xilas edilmiş ərazilərimizdə
minaların təmizlənməsini həyata keçirməsi daha məqsədəuyğundur. Arzu edərdik
ki, Rusiya işğalçı Ermənistanı Azərbaycan torpaqlarından çıxmağa məcbur etsin.
Bunun üçün Kremlin əlində geniş imkanlar var. Əvvəla, Rusiya 3 həmsədr dövlətdən
biridir, ikincisi isə rəsmi Moskvanın əlində Ermənistana təsir etmək üçün
çoxsaylı rıçaq var. Bu baxımdan, indiyə qədər Azərbaycanın MDB məkanındakı hər
hansı hərbi koalisiyada iştirak etmədiyini, həmçinin Azərbaycan torpaqlarının
MDB üzvü Ermənistan tərəfindən işğal altında saxlanıldığını nəzərə alaraq,
Rusiyanın Suriya ilə bağlı koalisiya təklifinin ehtiyatla qarşılanmasının,
araşdırılmasının tərəfdarıyam”.
Millət vəkili, politoloq Rasim
Musabəyov Rusiyanın təklifinin Azərbaycanın
maraqlarına cavab vermədiyini söyləyib. O, "Kaspi”yə açıqlamasında bildirib ki,
bu günə qədər antiterror koalisiyasında Azərbaycan yalnız Türkiyə ilə bərabər
iştirak edib: "Kosovada, Əfqanıstanda Azərbaycan Türkiyə ilə bərabər sülhməramlı
missiyada iştirak edib. İndiki halda düşünmürəm ki, Azərbaycan Rusiya və digər
MDB ölkələri ilə birlikdə Suriya koalisiyasında təmsil olunsun. Əgər Rusiyanın
belə bir koalisiyaya ehtiyacı varsa, o zaman Kollektiv Təhlükəsizlik Müqaviləsi
Təşkilatına üzv dövlətlərlə birlikdə bunu həyata keçirsin. Oradakı müttəfiqlər
bu koalisiyaya qoşula da bilərlər, qoşulmaya da. Bundan başqa, Azərbaycan
vaxtilə Səudiyyə Ərəbistanı tərəfindən Suriyada yaradılan koalisiyaya da
qoşulmayıb. Hesab edirəm ki, Azərbaycan belə sülhməramlı missiyalarda yalnız öz
müttəfiqi Türkiyə ilə birlikdə iştirak edə bilər”.
"Atlas” Araşdırmalar Mərkəzinin rəhbəri,
politoloq Elxan Şahinoğlu da hesab edir ki, indiki şərtlər altında Suriyaya hərbi birlik göndərilməsi
Azərbaycanın maraqlarına cavab vermir: "Birincisi, Azərbaycanın İraq, Kosovo və
Əfqanıstandakı sülhməramlıların tərkibində iştirakı ümumi koalisiyanın varlığı
ilə əlaqəli idi. Suriyada isə terrorçulara qarşı savaşan beynəlxalq koalisiya
yoxdur. İkincisi, Azərbaycanın Ermənistan hərbçiləri ilə eyni koalisiyada
iştirak mümkün deyil. Üçüncüsü, Azərbaycanın Rusiyanın rəhbərliyi altında
koalisiyada iştirakı rəsmi Bakının tərəf seçməsi anlamına gələcək. Bu baxımdan,
Rusiyanın təklifinin Azərbaycanın maraqlarına zidd olduğu qənaətindəyəm”.
Rufik
İSMAYILOV