Rusiyanın nikbinlikdən çox, narahatlıq yaradan jesti
Rusiya Federasiyasının prezidenti Vladimir Putin
ölkəsinin xarici siyasət konsepsiyasının təsdiq edilməsi haqqında Fərman
imzalayıb. Konsepsiyaya Rusiyanın postsovet məkanında münaqişələrin
siyasi-diplomatik yolla həllinə tərəfdar olması barədə bənd də daxil edilib.
Rusiyanın hüquqi informasiya portalında yerləşdirilən sənəddə qeyd edilib ki, rəsmi
Moskva Dağlıq Qarabağ probleminin mövcud çoxtərəfli danışıqlar mexanizmi çərçivəsində,
ATƏT-in Minsk qrupunun həmsədri olan digər ölkələrlə qarşılıqlı fəaliyyət,
habelə Rusiya, ABŞ və Fransa prezidentlərinin 2009-2013-cü illərdəki birgə bəyanatlarında
nəzərdə tutulmuş prinsiplər əsasında həllinə səy göstərir. Bəs, Rusiyanın Dağlıq Qarabağ münaqişəsinin həllini yeni
xarici siyasət konsepsiyasına daxil etməsi yaxın gələcəkdə münaqişənin həlli ilə
bağlı hər hansı nikbinliyə əsas verirmi?
Mövzu ilə bağlı fikirlərini "Kaspi”yə bölüşən Milli
Məclisin Beynəlxalq münasibətlər və parlamentlərarası əlaqələr komitəsinin
üzvü, Azərbaycan Sosial Demokrat Partiyasının (ASDP) sədri Araz Əlizadə Rusiya
xarici siyasət konsepsiyasında yer alan müddəaların Azərbaycanın xeyrinə heç
bir ümid yaratmadığını dilə gətirib. Millət vəkili deyib ki, Ermənistan Cənubi
Qafqazda Rusiyanın yeganə strateji müttəfiqidir: "Yeganə ərazidir ki, Rusiyanı
oradan çıxarmayıblar. Faktiki olaraq, Ermənistan Rusiyanın nəzarətindədir, hətta
rus ordusu da oradadır. Ermənistanla Rusiyanın vahid birləşmiş ordu yaratması
barədə də qərar qəbul edilib, bu istiqamətdə müvafiq sənədlər imzalanıb. Əvvəllər
də Rusiyanın ATƏT-in Minsk qrupunda həmsədr dövlət kimi iştirakı sual altında
idi. Lakin belə ehtimal edilirdi ki, əgər Ermənistan Rusiyanın dəstəyi ilə ərazilərimizi
işğal edibsə, o zaman Moskvanın təsiri ilə də geri çəkilər. Mən isə hələ
1991-ci ildə qeyd etmişdim ki, Dağlıq Qarabağ münaqişəsinin sülh yolu ilə həlli
yoxdur. Bu problem ancaq müharibə yolu ilə həll olunmalıdır. Hazırda Minsk
qrupunun həmsədr dövlətləri – ABŞ, Rusiya, Fransa iki ölkəni barışdırmaq,
problemi dinc yolla həll etmək missiyasını həyata keçirirlər. Amma Rusiya Ermənistanla
birlikdə vahid – birləşmiş ordu yaradırsa, Moskva həmsədrlik haqqını mənəvi
baxımdan itirmiş olur. Çünki, Ermənistanla vahid ordu yaradan Rusiya münaqişənin
həllində artıq açıq-aşkar tərəfə çevrilir”.
Siyasi
şərhçi Şahin Cəfərli də hesab edir ki, Rusiyanın Dağlıq Qarabağ münaqişəsinin həllini yeni
xarici siyasət konsepsiyasına daxil etməsi faktı ümid yox, narahatlıq
yaradır. Onun fikrincə, Azərbaycan ictimaiyyətində Rusiyanın münaqişənin həllində
pozitiv rol oynayacağı ilə bağlı hər hansı illüziya yoxdur: "Dağlıq Qarabağ
münaqişəsinin həlli məsələsinin Rusiyanın yeni xarici siyasət konsepsiyasına
daxil edilməsi faktını şişirtmək və ona xüsusi əhəmiyyət verməyi gərəksiz
sayıram. Bunun müsbət dəyişikliklərə səbəb olacağına, Rusiyanın nizamlanma
prosesindəki rolu və yanaşmasında prinsipial fərq yaranacağına inanmıram.
Rusiyanın bu münaqişə ilə bağlı siyasəti və tutduğu mövqe ortadadır. Hazırda
Moskva Ermənistanla hərbi müttəfiqliyini daha da dərinləşdirmək siyasəti
aparır. Rusiya-Ermənistan birləşmiş qoşun qruplaşmasının yaradılmasının rəsmiləşməsi,
Azərbaycanın xeyrinə pozulmuş hərbi paritetin bərpası istiqamətində addımlar
atılması və Ermənistana müasir silah sistemləri verilməsi buna sübutdur. Aprel
döyüşlərində məlum oldu ki, münaqişə tərəfləri arasında güc balansı Azərbaycanın
xeyrinə pozulub. Moskva son addımları ilə bunu aradan qaldırmağa çalışır. Bütün
bunların nəticəsində son vaxtlar işğalçı ölkənin xeyli arxayınlaşdığını və
mövqeyini daha da sərtləşdirdiyini görürük”.
Ş.Cəfərli bildirib ki, Dağlıq
Qarabağ münaqişəsinin həlli məsələsinin Rusiyanın xarici siyasət prioritetləri
sırasında göstərilməsi rəsmi Moskvanın postsovet məkanına böyük önəm verməsinin
nəticəsi sayılmalıdır: "Rusiya "yaxın xaric” adlandırdığı bu zonanı öz həyati
maraqlarının olduğu bölgə kimi qiymətləndirir. Kreml bu ərazini ölkənin təhlükəsizlik
maraqları baxımından kritik əhəmiyyətə sahib bölgə kimi görür və buraya xarici
müdaxilələri aqressiv qarşılayır. Bu, o deməkdir ki, Rusiya Dağlıq Qarabağ
münaqişəsinin həlli prosesində dominant rolunu əldən vermək fikrində deyil.
Çünki əks təqdirdə, Cənubi Qafqaza ABŞ və Avropanın müdaxilə etməsi üçün əlavə
yol açılmış olur. Dağlıq Qarabağ məsələsi məhz bu səbəblə Rusiya üçün
prioritetdir. Burada bizim xeyrimizə heç nə yoxdur, əksinə, həll prosesində
Rusiyanın inhisarçı rolunun davam etməsi və ümumən regionda Moskvanın
dayaqlarının möhkəmlənməsi Azərbaycanın maraqlarına ziddir”.
Siyasi İnnovasiya və
Texnologiyalar Mərkəzinin rəhbəri, politoloq Mübariz Əhmədoğlu isə qəzetimizə açıqlamasında deyib ki, Rusiyanın Dağlıq Qarabağ münaqişəsinin həllini yeni
xarici siyasət konsepsiyasına daxil etməsi müəyyən nikbinlik yaradır: "Bu
konsepsiyada ümumi anlayış Dağlıq Qarabağ münaqişəsinin həllinə şərait yaradır.
Konsepsiyanın ümumi fəlsəfəsində ABŞ, BMT, NATO-nun tənqidi var. Konkret Dağlıq
Qarabağ münaqişəsinə yanaşmaya gəlincə, orada iki tezis var. Birincisi
siyasi-diplomatik həll yoludur. Rusiyanın siyasi-diplomatik həll yolu termini
dinc tənzimləmə terminindən fərqlənir. Dinc tənzimləmə terminini ATƏT-in Minsk
qrupu işlədir. Bunlar tamamilə fərqlidir. Dinc tənzimləmədə yalnız danışıqlar
aparılır, amma siyasi diplomatik tənzimləmədə isə müəyyən həvəsləndirmələrə, təzyiqlərə,
təsirlərə icazə verilir. Yəni, danışıqlar prosesində kim konstruktiv mövqe
nümayiş etdirirsə, Rusiya ona müəyyən yaxşılıqlar etməlidir. Dağlıq Qarabağ
münaqişəsinin tənzimlənməsi üçün daha fundamental məsələ baza prinsipləridir.
Orada da göstərilib ki, münaqişə 2009 və 2013-cü ildə həmsədr dövlətlərin
prezidentlərinin qəbul etdiyi sənədlər, bəyanatlar əsasında tənzimlənməlidir.
2009 və 2013-cü il sənədləri isə yenilənmiş Madrid prinsipləridir. Serj
Sarkisyan isə Rusiya informasiya agentliyinə müsahibəsində 2007-ci ilin sənədindən
söhbət açır. Bu, Madrid prinsipləridir. Deməli, Rusiya konsepsiyasında 2007 və
2008-ci illərdə qəbul edilən sənədləri rədd edir, yalnız 2009-cu ildə İtaliyada
imzalanan yenilənmiş Madrid prinsiplərini əsas götürür. Orada isə birinci maddə
Dağlıq Qarabağ ətrafındakı ərazilərin Azərbaycana qaytarılmasıdır”.
Rufik
İSMAYILOV