Radikallar özlərini ifşa edirlər - Foto
Xalqın heç bir etimadını
qazana bilməyən müxalifət təmsilçiləri zaman keçdikcə daha da aqressivləşirlər.
Onlar təkcə hakimiyyətin ünvanına deyil, guya eyni yolun yolçusu, eyni əqidənin
daşıyıcısı olan digər siyasi qüvvələrin nümayəndələrinə qarşı da kin-küdurət
püskürürlər. Müşahidələrimiz əsasında qətiyyətlə deyə bilərik ki, bu düşərgənin
müxtəlif qollarında təmsil olunanların elementar müzakirə mədəniyyəti yoxdur.
Söz azadlığından, demokratiyadan, plüralizmdən ağızdolusu danışan, yeri
gəldi-gəlmədi iqtidarı buna görə tənqdi edən bu düşüərgə təmsilçiləri öz
davranışları ilə fərqli kimliklərini ortaya qoyurlar.
Onlar sosial şəbəkələrdə
aparılan müzakirələrdə əks mövqeli insanları dərhal hədəfə alır, onların
ünvanına təhqirlər səsləndirirlər. Qarşı tərəf də az aşın duzu olmadığından,
təhqirə təhqirlə cavab verir, nəticədə, radikalların "fikir mübadiləsi”
söyüşməyə çevrilir. Əgər kimsə onların lider hesab etdikləri şəxsə qarşı
kiçicik bir tənqid yazarsa, "hurrey” deyib onun üzərinə şığıyırlar. Beləliklə
də, başqalarından dözümlülük, demokratiya, əxlaq, mədəniyyət tələb edənlər çox
ciddi dözümsüzlük sindromu yaşayırlar.
Söylədiklərimizə əyani misal olaraq, özünü müxalifyönümlü OYAN Hərəkatının təmsilçisi kimi qələmə verən Nahid Cəfərov ad-soyadlı sosial şəbəkə istifadəçisinin başına gətirilənləri
göstərmək olar. Özünü müxalifət təmsilçisi kimi qələmə verən bu şəxs bu
günlərdə "Facebook”da AXCP sədri Əli Kərimlini tənqid edən status yazıb. O,
AXCP sədrinin 25 illik uğursuz mübarizəsini qabardıb. Bildirib ki, Ə.Kərimli buna
görə günahı özündə deyil, xalqda axtarır. Sonda vurğulayıb ki, Ə.Kərimli siyasi
lider kimi tükənib. Bu status paylaşılandan dərhal sonra Ə.Kərimlinin troll
dəstəsi N.Cəfərov və onun ətrafındakıların üzərinə "səlib yürüşünə” keçib.
Cəbhəçi trollar ağına-bozuna baxmadan, ağızlarına nə gəldi yazıb, N.Cəfərovu
"yıxıb-sürüyüblər”. Hətta onu iqtidara işləyən, hakimiyyətin adamı kimi qələmə
veriblər.
Hazırda xaricdə yaşayan və
N.Cəfərovun yaxınlarından hesab olunan Rəsul Mürsəlov da bu məsələ ilə bağlı
status yazıb. O, AXCP sədrinin N.Cəfərov tərəfindən hər gün tənqid edilməsinin
yersiz olduğunu diqqətə çatdırıb. Eyni zamanda, əlavə edib ki, bu, Ə.Kərimli
tənqid oluna bilməz kimi də başa düşülməməlidir. AXCP sədrinin tərəfdarlarının lüzumsuz
ittiham və təhqirlərinə toxunan R.Mürsəlov bunun yenilik olmadığını qeyd edib.
Bildirib ki, həmin adamlar Ə.Kərimlini Allah bilir, onu tənqid etməyi günah
hesab edirlər. Təbii ki, R.Mürsəlovun da fikirlərini Ə.Kərimli "həzm edə”
bilməyib. Ona görə də dərhal cəbhəçi trollar iş başına keçib, R.Mürsəlovu "top
atəşinə” tutublar.
Qeyd edək ki, bu cür müzakirə
mədəniyyətsizliyi yalnız cəbhəçilərlə xaricə sığınan "müxalifətçilər” arasında
yaşanmır. Eyni mənzərəni AXCP-Müsavat tərəfdarları arasında da müşahidə etmək
mümkündür. Misal üçün, aktiv sosial şəbəkə istifadəçisi Rəşad Müseybzadə
Müsavat Partiyasının sədri Arif Hacılının sabiq başqan İsa Qəmbər haqqında
yazdığı statusu paylaşıb.
Həmin statusda A.Hacılı Müsavatın qurucusu
M.Ə.Rəsulzadəni Azərbaycan tarixinin ən böyük şəxsiyyəti, İ.Qəmbəri isə 50
milyonluq Azərbaycan xalqının ən böyük şəxsiyyəti kimi qələmə verməyə çalışıb.
R.Müseyibzadə A.Hacılının bu statusunu paylaşmaqla göstərmək istəyib ki,
müsavatçılar İ.Qəmbəri bütləşdirir, az qala onu Allah kimi qəbul edirlər. Bu
paylaşımın altında da cəbhəçilərlə müsavatçılar kəllə-kəlləyə gəlib,
bir-birilərinin ünvanına qarşılıqlı ittihamlar, təhqirlər səsləndiriblər.
Bütün bunlar radikal
müxalifətin əsl mahiyyətini, demokratiya və söz azadlığına gerçək münasibətini,
həmçinin onların müzakirə mədəniyyətinin hansı səviyyədə olduğunu tam
çılpaqlığı ilə ortaya qoyur.
Rufik
İSMAYILOV