Qida təhlükəsizliyinin təmin olunmasında növbəti mərhələ
Prezident İlham Əliyev "Azərbaycan Respublikasında
qida təhlükəsizliyinin təmin edilməsinə dair 2019-2025-ci illər üçün Dövlət
Proqramı”nın təsdiq edilməsi haqqında sərəncam imzalayıb. Sərəncamda ölkə
əhalisinin təhlükəsiz və keyfiyyətli qida məhsulları ilə təmin edilməsi, qida
təhlükəsizliyi sisteminin səmərəliliyinin və şəffaflığının artırılması, onun
beynəlxalq tələblərə uyğunlaşdırılması məqsədilə "Azərbaycan Respublikasında
qida təhlükəsizliyinin təmin edilməsinə dair 2019–2025-ci illər üçün Dövlət
Proqramı” təsdiq edilməsi qeyd olunub. Ölkəmizdə qida təhlükəsizliyinin təmin
edilməsi istiqamətində Dövlət Proqramının qəbul olunması dövlətimizin başçısı
tərəfindən qida təhlükəsizliyinə konseptual yanaşmanın və bu istiqamətdə
strateji idarəetmənin təzahürüdür.
2018-ci ilin ilk altı ayı ərzində
agentliyin səlahiyyətlərinin icrasına başlamaq üçün bir neçə istiqamətdə
hazırlıq və quruculuq tədbirləri həyata keçirilib, qanunvericilik bazasının
təkmilləşdirilməsi, institusional inkişaf və maddi-texniki bazanın
formalaşdırılması, beynəlxalq əməkdaşlığın qurulması, sahibkarların və
istehlakçıların yeni sistem haqqında maarifləndirilməsi istiqamətində işlər
görülüb.
Dövlət proqramının növbəti
mərhələdə qida təhlükəsizliyi sahəsində hansı irəliləyişlərə şərait
yaradacağını, nə kimi effektiv nəticələrin əldə olunacağını öyrənməyə çalışdıq.
Azərbaycan
Respublikasının Qida Təhlükəsizliyi Agentliyinin sədri Qoşqar Təhməzlibildirib ki, "Azərbaycan Respublikasında qida təhlükəsizliyinin təmin
edilməsinə dair 2019-2025-ci illər üçün Dövlət Proqramı” üzrə strateji baxış əhalinin sağlam
və təhlükəsiz qida ilə tam təmin edilməsinə və bununla da qida mənşəli
xəstəliklərin nəzərəçarpacaq dərəcədə azalmasına nail olmağı nəzərdə tutur: "Eyni
zamanda Dövlət Proqramında əsas məqsədlər qida təhlükəsizliyi sahəsində norma
və standartların beynəlxalq tələblərə uyğunlaşdırılması, əhalinin təhlükəsiz və
keyfiyyətli qida ilə təminatının yaxşılaşdırılması, qida təhlükəsizliyinin və
keyfiyyətinin artırılması ilə rəqabətqabiliyyətliliyin və xarici bazarlara
ixrac potensialının artırılması, kənd təsərrüfatında istifadə olunan
aqrokimyəvi maddələrə, bitki mühafizəsi vasitələrinə və baytarlıq
preparatlarına nəzarət tədbirlərini gücləndirməsi, habelə onlardan düzgün
istifadəyə dair maarifləndirmə işlərinin aparılmasından ibarətdir”.
Q.
Təhməzlinin sözlərinə görə, sahibkarlarla əməkdaşlıq şəraitində qida
təhlükəsizliyi üzrə qanunvericiliyin tələblərinə əməl olunması, ictimai nəzarət
mexanizmlərinin səmərəli tətbiqi və istehlakçıların hüquqlarının qabaqcıl
təcrübələr əsasında təmin edilməsi Dövlət Proqramının əsas məqsədlərindəndir.
Mövzu ilə
bağlı açıqlama verən Kənd Təsərrüfatı
naziri İnam Kərimov ərzaq təhlükəsizliyində əsas meyarın keyfiyyət olduğunu
deyib. Nazir qeyd edib ki, "Azərbaycan Respublikasında qida təhlükəsizliyinin
təmin edilməsinə dair 2019-2025-ci illər üçün Dövlət Proqramı” bu məsələdə
nazirliyin üzərinə mühüm vəzifələr qoyur. Proqrama əsasən əhalinin sağlam və
təhlükəsiz qida ilə tam təmin edilməsi və bununla da qida mənşəli xəstəliklərin
nəzərəçarpacaq dərəcədə azalması, habelə kənd təsərrüfatı və qida məhsullarının
məhsuldarlığının və rəqabət qabiliyyətinin artırılması, inkişaf etmiş ölkələrin
bazarlarına ixrac həcminin artırılması hədəflənir. Kənd Təsərrüfatı Nazirliyi
bu istiqamətdə üzərinə düşən vəzifələrin uğurla yerinə yetirilməsinə səylə
çalışacaq.
Azad İstehlakçılar Birliyinin sədri Eyyub Hüseynov qəzetimizə
açıqlamasında qeyd etdi ki, bu,
proqram qidanın təhlükəsizliyinin təmin olunmasından başqa, kənd təsərrüfatı
məhsullarının xarici bazara çıxarılmasına şərait yaradır: "Qida təhlükəsizliyi
sahəsində belə bir proqramın təsdiqlənməsinə çoxdan ehtiyac vardı. Bu gün
ölkəmizdə qida sektorunun vəziyyətini əyani olaraq xəstəxanalarda olan
növbələrdən görmək olar. Yediyimiz qida bizim üçün olduqca vacibdir. Prezidentin
təsdiqlədiyi bu əsasnamə bütün insanların həyatına toxunan bir məsələni əhatə
edir. Bu proqram, qidanın təhlükəsizliyinin təmin olunmasından başqa, kənd
təsərrüfatı məhsullarının xarici bazara çıxarılmasına şərait yaradır. Qida
Təhlükəsizliyi Agentliyi bu proqramdan mükəmməl istifadə edə bilsə, post-neft
dövründə Azərbaycan məhsullarının xaricə çıxışı genişlənəcək. Lakin təəssüflər olsun ki, bu
proqram heç bir ictimai müzakirədən keçirilməyib. Azad İstehlakçılar Birliyinin
bu mövzu ilə bağlı təklifləri ola bilərdi. Amma buna baxmayaraq, proqramın həyata keçirilməsi üçün bu işdə
onlara dəstək olacağıq”.
Qeyd edək
ki, "Azərbaycan Respublikasında qida təhlükəsizliyinin təmin edilməsinə dair
2019-2025-ci illər üçün Dövlət Proqramı” hazırlandıqdan sonra bir sıra
beynəlxalq təşkilatlara, o cümlədən Dünya Bankı, Beynəlxalq Maliyyə
Korporasiyası, Avropa Birliyi, BMT-nin Ərzaq və Kənd Təsərrüfatı Təşkilatına göndərilib
və onların rəyləri nəzərə alınıb. Eyni zamanda Azərbaycanda Amerika Ticarət
Palatasının üzvlərinə göndərilib və ictimai müzakirəsi təşkil edilib.
Günel
Azadə