“Qeyri-qanuni fəaliyyət” alibisi
Aavqustun
28-də Lənkəran Şəhər Rayon Polis Şöbəsinə (ŞRPŞ) rayonun Bəliton kənd sakini
Ağayev Ələmdar Şavəli oğlunun idarə etdiyi, ona məxsus şəxsi istifadəsində olan
PAZ markalı 43-BA-455 dövlət nömrə nişanlı avtobusun yüksək dağlıq ərazidə
yolsuzluq və qapalı şəraitdə fərdi yaşayış evinin həyətinə aşması ilə bağlı
məlumat daxil olub. Daxili İşlər Nazirliyinin (DİN) Mətbuat Xidmətinin Lənkəran
regional qrupundan verilən məlumata görə, Lənkəran ŞRPŞ-nin əməkdaşları dərhal
hadisə baş vermiş dağlıq əraziyə yollanıb və sürücü Ələmdar Ağayevin hadisə
zamanı dünyasını dəyişdiyi müəyyən olunub. Şöbənin Dövlət yol polisi bölməsinin
yol patrul xidmətinin və digər polis əməkdaşlarının fəal iştirakı ilə avtobusda
olan 22 nəfər sərnişinin müayinə olunmaları üçün Lənkəran Mərkəzi Rayon
Xəstəxanasına çatdırılmaları təşkil olunub.
Dövlət
Avtomobil Nəqliyyatı Xidmətinin (DANX) mətbuat xidmətinin rəhbəri Nuridə
Allahyarova Trend-ə bildirib ki, Lənkəranda qəzaya düşən avtobus Dövlət
Avtomobil Nəqliyyatı Xidmətindən (DANX) fərqlənmə nişanı almayan, qeyri-qanuni
fəaliyyət göstərən daşıyıcı olub Onun sözlərinə görə, avtobus Lənkəran
daxilində fəaliyyət göstərib: "Qəzaya düşən avtobus müntəzəm sərnişin
daşımırdı, sadəcə ayda bir, iki dəfə xəttə çıxırdı. Avtobus fəhlələri, ya da
ona sifariş əsasında müraciət edən insanları daşıyırdı. Bizdən xəbərsiz və fərqlənmə
nişanı olmadan işləyən sürücü hadisə səbəbindən dünyasını dəyişib”.
Xatırladaq
ki, Lənkəranda baş verən yol-nəqliyyat hadisəsi nəticəsində 23 nəfər müxtəlif
xəsarətlərlə Lənkəran Mərkəzi Rayon Xəstəxanasına çatdırılıb. Səhiyyə
Nazirliyinin mətbuat xidmətindən verilən məlumata görə, qəza nəticəsində sürücü
yerindəcə dünyasını dəyişib. Xəsarət alanların 10-u xəstəxanada müalicəsini
davam etdirəcək, digərləri ambulator müalicəyə göndəriləcək. Reanimasiya
şöbəsinə yerləşdirilən 2 qadından birinin vəziyyəti kritik qiymətləndirilir.
Açıq kəllə-beyin travması alan 42 yaşlı qadın komadadır. Digər qadının diaqnozu
qapalı kəllə-beyin travması və qabırğa sınığıdır. Onun da vəziyyəti ağırdır.
Travmatologiya şöbəsində müalicə alan 8 qadının vəziyyəti orta ağır kimi
qiymətləndirilir. Onların həyatları üçün təhlükə yoxdur.
Artıq bu
cür ağır yol-qəza hadisələri demək olar ki, adi hala çevrilib. Hər dəfə də hadisədə
n sonra rəsmi qurumlar avtobusların
qeyri-qanuni fəaliyyət göstərdiyini bildirilir. "Qeyri-qanuni fəaliyyət göstərir”
ifadəsi sanki alibiyə çevrilib. Rəsmi qurumlar bu açıqlamanı verməklə, "mən
məsuliyyət daşımıram” deyir. Bəs onda kim məsuliyyət daşıyır? Qeyri-qanuni
daşıma ilə məşğul olan avtobus sürücülərinin qarşısını hansı qurum almalıdır?
Onlara qarşı hansı cəza tətbiq edilməlidir? Bu məsələ qanunvericilikdə həllini
necə tapıb.
Məsələ ilə
bağlı Dövlət Avtomobil Nəqliyyatı
Xidmətinin (DANX) mətbuat xidmətinin rəhbəri Nuridə Allahyarova ilə əlaqə
saxladıq. Qurum rəsmisi bildirdi ki, Dövlət Avtomobil Nəqliyyatı Xidməti
sərnişindaşımada istifadə olunan avtonəqliyyat vasitələri daşıyıcılarına
fərqlənmə nişanı təqdim edir: "Yəni müəyyən olunan marşrut xətti üzrə daşıyıcı
müraciət edir və tender elan olunur. Həmin daşıyıcıya xəttin həvalə olunması
təmin edilir. Əgər o daşıyıcının avtobusları uyğun kriteriyalara cavab verirsə,
onların fəaliyyətinə icazə verilir. Biz ümumilikdə bu məsələyə nəzarət edirik.
Qeyri-qanuni daşımalara gəldikdə isə bununla bağlı aidiyyəti üzrə qurumlar var.
Yəni Dövlət Avtomobil Nəqliyyatı Xidməti cəza verən qurum deyil, bizim belə bir
səlahiyyətimiz yoxdur. Ötən il DİN ilə Nəqliyyat, Rabitə və Yüksək
Texnologiyalar Nazirliyi arasında protokol imzalandı. Protokola əsasən
qeyri-qanuni daşımalara qarşı həyata keçirilən tədbirlərdə 3 qurum birgə
iştirak etdik. Bu avtobusların kompakt yığışdığı ərazilərdə müxtəlif tədbirlər
və reydlər keçirildi. Həmin reydlərdə DANX tərəfindən qeyri-qanuni daşıyıcılar
arasında maarifləndirmə işi aparıldı. Cəza və cərimə tətbiq etmək bizim
səlahiyyətimizdə deyil”.
Nəqliyyat
məsələləri üzrə ekspert Azər Allahverənovbildirdi ki, aidiyyəti qurumlar bu məsələni
diqqətdə saxlamalı və nəzarət etməlidir: "Aidiyyəti qurumlar dedikdə yerli İcra
Hakimiyyəti orqanları, Dövlət Yol Polisi, Nəqliyyat Nazirliyi, Dövlət Avtomobil
Nəqliyyat Xidməti nəzərdə tutulur. Bu qurumlar arasında kompleks tədbirlər
həyata keçirilərsə, qeyri-qanuni fəaliyyətlə məşğul olan daşınma xidmətlərinin
qarşısı alına bilər. Amma bir məsələ var ki, sərt inzibati qərarlar vəziyyəti
düzəltmək əvəzinə, daha da pisləşdirə bilər. Bu məqam bazar iqtisadiyyatı
şəraitində yerli sahibkarların narazılığına gətirib çıxara bilər. Ona görə də,
bu məsələdə bütün tərəflərin maraqlarını nəzərə almaqla qeyri-qanuni fəaliyyətlə
məşğul olan şirkətlərə və fiziki şəxslərə nəzarət etmək lazımdır. Aydın
məsələdir ki, qeyri-qanuni sərnişin daşıma fəaliyyəti hər zaman olub və yəqin
ki, bundan sonra da olacaq. Onlarla mübarizə aparmaqla yanaşı, maarifləndirməyə
də ehtiyac var. Məsələn, qeyri-qanuni fəaliyyətlə məşğul olan şirkətlərin
xidmətindən yararlanan insanlar maarifləndirilməlidir. Bu məsələdə kompleks
yanaşma irəli sürülməlidir. Çünki qiymət ucuzdur deyə, bu fəaliyyətlə məşğul
olan daşınma xidmətlərindən istifadə edirlər. Bu istiqamətdə lazımi tədbirlər
həyata keçirilərsə, nəticə əldə etmək mümkündür”.
Nəqliyyat məsələləri üzrə ekspert Elməddin Muradlıdeyir ki, qeyri-qanuni fəaliyyətlə məşğul olan yüzlərlə, minlərlə avtobus
sürücüləri var. Bunu danmaq və ya qarşısını almaq artıq mümkünsüz hala çevrilib:
"Çünki bu işlə məşğul olan şəxslər müxtəlif bəhanələrlə məsuliyyətdən
yayınırlar. Bəzi işbazlar isə bu vəziyyətdən yararlanırlar. Nəticədə isə
neqativ halların sayı gün-gündən daha da artır. Vəziyyət o qədər qəlizləşib ki,
bunun qarşısını almaq da olmur. Ona görə də vətəndaşlara müraciət edirik ki,
qanunsuz fəaliyyət göstərən avtobus və taksi xidmətlərindən istifadə
etməsinlər. Bu məsələlər kompleks yanaşma tələb edir. Yəni problemin kökünə enmək
lazımdır. Elə bir sistem qurulmalıdır ki, kənar müdaxilələr edilməsin. Təkcə
bölgələrdə deyil, Bakı şəhərində belə fəaliyyətlə məşğul olanların sayı həddən
artıqdır. Bəzi avtobus və taksilər demək olar ki, istifadəyə yararlı vəziyyətdə
deyil. Bir çox sahibkarlar və sürücülər lisenziya alaraq qanuni fəaliyyət
göstərməkdən yayınırlar. Heç kim dövlətə vergi ödəmək istəmir. Ona görə də,
nəzarət mexanizmi gücləndirilməlidir. Dövlət bu məsələyə nəzarət etməlidir”.
Şəbnəm