Qaz xətti kəndin kandarında ola... - PROBLEM
Astaranın
bəzi kəndlərində qazın olmamağı ciddi
problemlər yaradır. Kənd sakinləri deyirlər ki, meşədən odun gətirməyə icazə
verilmədiyi üçün elektrik enerjisindən istifadə etməli olurlar, bu da büdcələrinə
ciddi ziyan vurur.
Azərbaycanda
əhalinin sıx məskunlaşdığı ərazilərdə qazlaşdırma mütəmadi şəkildə aparılsa da,
hələ də bir sıra kəndlər mavi yanacaqla təmin edilməmiş qalır. Xüsusilə onu
vurğulamaq yerinə düşər ki, COVİD-19 pandemiyası dönəmində ucqar kəndlərdə
qazlaşdırmanın sürəti xeyli səngiyib. Bu sahəyə məsul olan qurum "Azəriqaz” İstehsalat
Birliyinin açıqladığı rəqəmlərə görə isə 2022-ci ilin yanvarın 1-nə
respublikada mənzillərin və fərdi evlərin qazlaşdırılması səviyyəsi 96,3 faizə
çatıb. Deməli, 3,7 faiz əhali hələ də qaza həsrətdir. Mavi yanacağın çəkiləcəyi
günü səbirsizliklə gözləyənlər sırasında Astara rayonunun Taxtanəkəran kəndinin
sakinləri də var.
"Biz nə edəcəyik?”
Bu günlərdə
"Kaspi” qəzetinə kənd sakinləri adından daxil olan müraciətdə qeyd edilir ki,
qaz xətti kəndin bir addımlığına qədər gəlib çıxsa da, evlərə verilməsi illərdir
mümkün deyil. Taxtanəkəran kənd sakini Aydın İsayev bizimlə söhbətində bildirdi
ki, kənd camaatı uzun illər qışda evlərini isitmək üçün odundan istifadə edib.
Onun sözlərinə görə, artıq indi yerli əhalinin bu imkanı da yoxdur: "Əvvəllər
meşədən odun gətirə bilirdik, lakin indi meşədən ağac kəsmək qadağandır. Əslində,
biz bu addımı təqdir edirik ki, meşələri qırmaq olmaz, bu, ekoloji tarazlığı
pozur. Amma biz də soyuqda qalmamalı, istilik üçün nədənsə istifadə etməliyik. Hazırda
elektrik enerjisindən istifadə edirik. Bu da bizim üçün baha başa gəlir. Həm də
elektrik xətlərində hər hansı problem səbəbindən nasazlıq baş versə, onda vəziyyətimiz
daha da çətin olur”.
"Hələ də
gözləyirik”
Şikayətçinin
sözlərinə görə, bir neçə il əvvəl Taxtanəkərana qazın çəkiləcəyi xəbəri veriləndə
sakinlər çox sevinmişdi: "Qışda əziyyət çəkməyəcəkdik və bizim də evlərimiz
isinəcəkdi. Lakin pandemiya ilə əlaqədar olaraq bu məsələ yarımçıq qaldı. Təsəvvür
edin ki, bizdən aşağıda olan Rinə kəndinə qaz çəkildi. Onların problemi həll
edildi. Lakin qaz xətti çəkilişi Taxtanəkəran kəndinin düz girişində
dayandırıldı. Hətta kəndin girəcəyində olan iki ev mavi yanacaqla təmin edilib.
Biz isə hələ də gözləyirik. Əlbəttə, biz də istəyirik ki, evlərimiz isti olsun,
uşaqlarımız, yaşlılarımız soyuqdan əziyyət çəkməsin. Heç olmasa, qaz xətti çəkilənədək
bizi odunla təmin etsinlər”.
A.İsayev
qeyd etdi ki, Taxtanəkəran kəndində 60-a yaxın ev var: "Axı bizim kəndimiz kiçik deyil? Təsəvvür edin ki, qaz xətti ilə evlərin
arası heç 100 metr olmaz. Bu xəttin çəkilişi dayandıqdan sonra müvafiq dövlət
qurumlarına müraciət etdik. Bizə bildirdilər ki, 2021-ci ildə mütləq evlərinizdə
qaz yanacaq. Amma görünən odur ki, kənddə mavi yanacaq yoxdur. Kənd camaatı
adından rəsmi qurumlara məktubla da müraciət etmişik. Lakin hələ ki, nəticə
yoxdur. İnanın, evlərimizi qızdıra bilmirik, havalar soyuq keçir. Bu qış keçdi,
heç olmasa gələn qışa qədər bu problem həll olunsun”.
Kənd
turizminin inkişafına maneə
Aydın müəllim
deyir ki, kəndləri olduqca mənzərəlidir və burada kənd turizmini inkişaf etdirmək
üçün hər cür şərait var. Amma qaz olmadığı üçün bu yöndə də ciddi problemlərlə
üzləşirlər: "Kənd turizmində infrastrukturu qurmaq üçün qazın olması vacibdir.
Təsəvvür edin ki, kəndə turist gəlir, amma evlərdə istilik sisteminin
olmadığını görür. O turist həmin kənddə qalarmı? Belə gözəl təbiətimiz var,
amma qaz olmadığı üçün infrastrukturu müasirləşdirə bilmirik. Bu da kəndin
iqtisadi inkişafına ciddi ziyan vurur. Ümid edirik ki, yaxın vaxtlarda bu
problemimiz həll ediləcək və bizim kəndimiz də prioritet sahə olan turizm
sferasının inkişafına öz töhfəsini verəcək”.
"İndi də
deyirlər ki...”
Taxtanəkəran
kənd icra nümayəndəsi Xəlil Zahirov bizimlə söhbətində mavi yanacaqla bağlı kənd
sakinlərinin haqlı narazılığının olmasını təsdiqləyib: "Bu problemlə bağlı "Azəriqaz”
İstehsalat Birliyinə məlumat verilib. Məsələ ondadır ki, kəndin qazlaşdırılması
2021-ci ildə tamamlanmalı idi. Lakin "Azəriqaz”dan bizə bildirdilər ki,
COVİD-19 pandemiyası və II Qarabağ müharibəsi ilə bağlı işlər ləngiyir. İndi də
deyirlər ki, 2023-cü ilə qədər kəndin qazlaşdırılması başa çatacaq”.
X.Zahirov
onu da qeyd etdi ki, Taxtanəkəran kəndi ilə yanaşı, Sığaloni, Marzəsə, Miki,
Vağadi kimi kəndlərdə də qaz problemi var: "Ola bilsin ki, 2022-ci ildə xətlərin
çəkilişinə başlasınlar. Hətta biz "Azəriqaz” rəhbərliyinin onlayn görüşü zamanı
da məsələni qaldırdıq. Həmin görüşdə də vurğuladılar ki, 2023-cü ilə qədər kəndlərin
qazlaşdırılması başa çatacaq”.
"Azəriqaz”:
"Növbəti mərhələdə baxılacaq”
"Azəriqaz”
İstehsalat Birliyinin mətbuat katibi Eldəniz Vəliyev "Kaspi” qəzetinə
açıqlamasında bildirdi ki, Taxtanəkəran kəndi qazlaşdırılmamış yaşayış məntəqələrinin
siyahısındadır: "Bu kənddə 60-a yaxın fərdi yaşayış evi mövcuddur. Kəndin
yaxınlığından keçən qaz kəməri Rinə kəndinə çəkilmiş daşıyıcı qaz kəməridir.
Qeyd edim ki, Rinə kəndi artıq qazdan istifadə edir. Taxtanəkəran kəndinin
qazlaşdırılması məsələsinə növbəti mərhələdə baxılacaqdır”.
Göründüyü
kimi, qurum rəsmisi konkret vaxt göstərməyib. Ümid edək ki, "növbəti mərhələ”
"uzunmüddətli mərhələ” olmayacaq və turizm kəndləri tezliklə qazla təmin
olunacaq. Bu, həm ekologiyanın qorunması, həm də vətəndaşların iqtisadi
rifahının yüksəlməsi baxımından çox vacibdir.
Bəxtiyar Məmmədli