Bakı 22°C
Qarşıdakı işıq - İNCƏ BAXIŞ
"Məktəblər açılır...” Bu xəbər aydın
səmada şimşək çaxmasına, qaranlıq buludların arxasından qəfil parlaq günəşin
boylanmasına bənzədi. Parta arxasında ilk dəfə oturacaq birincilərdən tutmuş, tələbə
adının sevincini yaşayan məzunlar, təhsilin növbəti mərhələsinə adlayan şagird
və tələbələr, müəllimlər, valideynlər – hamı həyəcan içindədir.
Cavabsız suallar
Bu sevinclə bərabər, insanların içində
koronavirus infeksiyası ilə bağlı xof da qalmaqdadır: "Görən, məktəblər nə qədər
davam edəcək? Yenə də distant təhsilə keçiləcəkmi? Xəstə sayı artacaqmı və ya azalacaqmı...”
kimi cavabsız suallar onların düşüncəsini tərk etmir.
Pandemiya keçən ilin mart ayından
bütün dünyada təhsil sisteminə təsir edib. Orta və ali məktəblərin kütləvi
bağlanmasına səbəb olub. Şagirdlərin parta arxasına keçib əyani oxumaq
sevincini əllərindən alıb. Tələbələri gənclik illərinin ən sevimli məkanı olan
auditoriyalardan uzaq salıb. Dünyada hər 5 təhsilalandan biri məktəbə getməyib.
Distant təhsil heç də hamı üçün, xüsusən sosial həssas təbəqələr üçün əlçatan
olmayıb. Onlayn dərslərə qoşulanlar da hər hansı entuziazm olmadan iştirak ediblər.
İnsanlarda haqlı narahatlıq var: əgər yenə məktəblər bağlanarsa, uşaqlar təhsil
ala bilməyəcək. Və bunun bir neçə nəsil üçün mənfi nəticələri olacaq.
Reallığı ÜST də başa düşür
Bu reallığı ÜST də başa düşür. Daha
da qorxulu ştammların yayılması, onların mutasiya edə biləcəyi riskinə
baxmayaraq, təşkilat məktəbə qayıtmağı tövsiyə edir. Ən əhəmiyyətlisi isə ÜST-ün
əvvəlki kimi məktəbləri infeksiyanın əsas mənbəyi hesab etməməsidir. UNICEF də
dünya ölkələrinin hökumətlərindən uşaqların onlayn formatda deyil, tam əyani təhsil
almalarını xahiş edir. Xüsusən, birinci sinif şagirdlərinin məktəbdə ilk günlərinin
sevincini yaşamaları üçün mümkün olan hər şeyi etmələrini tövsiyə edir: "O gün,
illər keçsə də, hər birimizin yaddaşındadır. Bu gözəl xatirəni onlardan məhrum
etməyək”.
Şükür ki, bizdə də məktəblər açılır
Şükür ki, bizdə də məktəblərin açılacağı
qərarı səsləndi. Əlbəttə, təhsil yerlərinin daim dəyişən vəziyyətə görə müəyyən
bir müddət üçün açıldığını və sonra yerli şərtlərdən asılı olaraq yenidən
bağlanma qərarının ola biləcəyini istisna etmək olmaz. Amma bu, həm də özümüzdən
- sosial məsuliyyətimizdən asılıdır. Məktəb, təhsil ictimai işdir. Bu işə
ictimaiyyət olaraq hamılıqla dəstək verməliyik. Balalarımızın savadlanması, təhsildən
geri qalmaması, gələcəyimizin daha aydın əllərdə olması üçün məsuliyyət
hissimizi itirməməliyik. Qarşıda işıq görünür – onu sabahımız naminə sönməyə
qoymayaq...
Təranə
Məhərrəmova
