Qadağan zonasında gəziş
Deməli,
ucqar dağ kəndinin ilkinliyə sadiq, səmimi olduğu qədər də sadəlövh olan əhli
illərdi ki, dünyanın işdəklərindən elə də baş çıxara bilməyən uşaqlara beş
addımlıqdakı sirli dərə haqqında dürlü nağıllar danışır. Belə bir inam var ki,
kim o sirli, müəmmalı dərəyə enmək xəyalına düşsə, ora qədəm bassa dönüb şeytan
olacaq. Bu səbəbdən də bütün kənd uşaqları üçün o şeytan dərəsinin sınırları
əbədi olaraq qapanıb, nə gedəni, nə gələni var.
Qəzavü-qədər
də elə o şeytan dərəsinin beşaddımlığında baş verir. Necə olursa ana balaca
Qəribini etmədiyi bir suçun üstündə cəzalandırır. Balaca oğlan bu ədalətsiz
tənbehi qəbul etmir, daxili etirazını Şeytan dərəsinin üstünə tökmək qərarına
gəlir və dönüb var gücüylə o sirli, qorxulu dərəyə sarı qaçır. Gözlənilmədən
verilən qərar ananı çaşdırır. Handan-hana özünü toparlayıb körpəsinin arxasınca
haray təpir ki, "Qərib hey, geri dön, getmə bala, getmə, dönüb şeytan olarsan!”
Əslində?
söhbət coğrafi bir ərazidən, maddi şəkildə mövcud olan bir dərədən getmirdi. O
dərə heç kəsin heç kəsə arzulamadığı, qıymadığı pisliklərin, xəyanələrin,
şeytanlığın simvolu idi. Əslində, o sadə, sadəlövh kənd əhli övladlarına "pisliyə,
xəyanətə, şeytanlığa meyl etməyin, dönüb özünüz də şeytan olarsınız” demək
istəmişdilər.
Aradan
upuzun aylar, illər keçəcəkdi, zaman ötüb, vaxt yetişəcəkdi... Təbii ki,
anasına ərk edib Şeytan dərəsinə sarı yan alan o uşaq da böyüyəcəkdi. Və
günlərin birində qələmi götürüb ilk əsərini yazmağa başlayacaqdı ki, indi
hərdən kimə qarşısa qeyzlənir, əsəbiləşirəmsə, ürəyimin başında gəzdirdiyim bir
arzumun gerçəkləşməsi üçün kiməsə üz tutmaq istəyirəmsə o zaman qeybdən qulaqlarıma
anamın səsi gəlir: "Qərib hey, gözlə ha, bala, birdən dönüb şeytan olarsan”.
Bu,
görkəmli yazıçı, yaxın günlərdə Yazıçılar Birliyinin Natəvan klubunda 80 illik
yubileyi qeyd edilən Qərib Mehdinin "Qərib, hey...” hekayəsində yazılanlardı.
Qərib
Mehdi öz dərin müşahidələrinin məhsulu olan iynəboylu (deməli, çox yığcam,
lakonik) hekayələri ilə kiçik janrın böyük imkanlarını yetərincə ortaya qoya
bildi. Bu iynəboyu hekayələrin özü belə onun hansı ədəbi dəyərlərə sahib
çıxması özünü apaydın ifadə edir. Bu qəbildən olan "Təklik” əsərində oxuyuruq:
"Təkləndi. Yolu haçalandı; biri özünə aparırdı, o birisi Allahlığa.
Hansı
yolu seçməli idi? Çətinliklə üzləşmişdi. Heçə dönmək qorxusu onu birinci yoldan
çəkindirirdi. Həmişə var olmaq istəyini isə həyata keçiməyə gücü çatmırdı”.
Mətləbi məhz bu cür yığcam, bitkin və lakonik şəkildə ifadə edə bilmək bacarığı
yalnız Qərib Mehdi kimi sözün yerini, qədir-qiymətini bilən, kiçik janrın böyük
imkanlarına bələd olan bir sənətkara məxsusdu. "İlan” əsərində olduğu kimi:
"İlan... öz yolu, öz amalı olan canlı. Düz yolda əyri getmək, sürünmək onun
yaşam tərzidi. Qıvrılmasa ovunun üstünə atıla bilmir. Qıvrılmırsa, rəqibini
çalıb zəhərini tökə bilmir. Qıvrılmasa şirin yuxuya gedə bilmir.
O,
hər saat düz vəziyyətdə gözə görünmür. Görünürsə, demək ölmüşdür. Bu da ilanın
düzlük sindiromudur...”
Elə
ilk andaca hiss olunur ki, Qərib Mehdi öz müşahidələrində dəqiq, dərin və
özünəməxsusdu. Bu deyilənlərə "gözlənilməzdi” fikrini də əlavə etsək onun yazı
üslubunu bütövlükdə əhatə etmiş olarıq.
Qərib
Mehdinin sevərək yaratdığı sadə insanların hər kəsə tanış, doğma obrazı oxucuya
təlqin edir ki, boyu vətən boyda olmayanların saatı əbədiyyətə işləmir.
Baxışları al günəşdə qovuşmayanların ömür-gün qaranlıqları tale ortağına dönüb
yaşayır. Yuxusunu axar sulara söyləməyənlər boğulub qalırlar dar quyularda. Qərib
Mehdi o söz adamlarındandı ki, yarım əsrdən çoxdur qələmi onun sözünü eşitmir,
əmrinə tabe olmur, yəni, onun əlində qələm özü göstəriş vermək
səlahiyyətindədi. Bir icraçı yazı adamı kimi o, daim qələminin, deməli, ruhunun
ardınca gedir. Qələm onu o yerlərə çağırır ki, özünün də yazdığı kimi,
"oralarda həyat bütün ziddiyyəti, çalarları, işıqlı – kölgəli tərəfləri ilə
mövcuddur, sözünü açıq deyə bilir”. Lakin bütün bu məqamların özündə belə.
Q.Mehdi bir yazıçı kimi öz fərdiyyətini hifz edə bilir, yazıçı tənhalığının
hücrəsinə çəkilmək səlahiyyətini özündə saxlayır. Necə deyərlər, təklənməkdən
qorxmur. Yaxşı bilir ki, təklənmək ilk növbədə özünə qovuşmaq, özüylə
qalmaqdır. İnsan belə vəziyyətdə özü-özünü dönüb-dönüb də yenidən ələyib
ələkdən keçirə bilir. Təklənənlərin uduzduğu və qazandığı yeri apaydın görür.
Bu prosesdə könüllü təklənənlərin qazancı daha çox olur. Q.Mehdi də hər bir
istedadlı qələm adamı kimi, ilk növbədə könüllü uduzmağının, uduza bilməyinin
xoşbəxtidi. Qərib müəllim ədəbi mətbəxin iç dünyasına yaxşı bələd olan bir söz
adamı kimi keçid dövrünün başıpozuqluğunun el ədəbiyyatını ev ədəbiyyatına,
ovqat poeziyasını lirikaya çevrilməsinin
ağrısını çəkənlərdəndi. Qərib müəllim vicdanlı bir qələm adam kimi Allahın
yaratdıqlarını bəndələrin çarmıxa çəkmələrinə qarşı üsyankar ruhunu bütün
yaradıcılığı boyu diri saxlaya, hifz edə bilənlərdəndi. Bu barədə olan
düşüncələrini o, daha çox xoş bir gülüş, incə yumor duyğusu ilə qələmə alır.
Onun gülüşünün xəmirinə bir qayda olaraq bədii təhkiyə və publisistika
komponentləri də qatılır, bəzi hallarda lirik ünsürlər, fəlsəfi çalarlar,
folklor deməcələri də qatılır. Eyni zamanda Q.Mehdini bu məqamda davamlı olaraq
bir açıqlama-giriş də özünə çəkir. Yazıçı haqlıdı ki, çox vaxt belə girişlərin
ağrısı gülüşündən betər olur. O, yazı prosesində, necə deyərlər, qadağan
olunmuş zonalarda gəzişməyi çox sevir. O, yazıçı xoşbəxtliyini sözünün
qüdrətində, sözünün ömürlü olmasında, sənətinin qət etdiyi məsafəsinin
genişliyində görə-görə 80-ni haqlıdı. Qarşıdan 90-ın, 100-ün səfası gəlir.
Bənzərsiz sənət yolunda cəfa çəkmişlərin səfa haqqı həmişə durur.
GÜLAYƏ