Bakı 22°C
Pulunu ödə, amma gediş haqqın olmasın...
Bu günlərdə redaksiyamıza "Bakı Kart”-ın ödəmə terminalı
ilə bağlı şikayət daxil olub. Şikayətçi bildirir ki, dayanacaqda quraşdırılan
terminalların birinə ödəniş etdikdən sonra hesabına pul köçməyib. Buna
baxmayaraq terminal heç bir qəbz
verməyib. Şikayətçi deyir ki, işə gecikdiyinə görə, məcbur olub
yaxınlıqdakı metro stansiyadakı terminal vasitəsilə ödənişi həyata keçirib.
İstənilən halda belə halların yaşanması arzu olunan
deyil. Xüsusilə ilə işə və ya dərsə
gecikdiyimiz vaxtda vətəndaşların bu kimi neqativ hallarla rastlaşması
əlavə stress yaradır. Bəs görəsən bu məsələ necə tənzimlənməlidir? Ümumiyyətlə,
dayanacaqlarda ödəmə ilə bağlı problemlər yaşadığımız zaman kimə müraciət
etməliyik?
Nəqliyyat məsələləri
üzrə ekspert İlqar Hüseynli deyir ki, ödəmə terminallarının hər
birinin üzərində bu xidməti həyata keçirən qurumun və ya şirkətin əlaqə nömrələri
qeyd olunub. Neqativ hallar zamanı vətəndaş həmin nömrə ilə əlaqə saxlaya
bilər: "Çox zaman belə problemlər texniki məsələlərdən irəli gəlir. Parklama terminallarında
da belə hallara rast gəlinir. Yəni sən pulu ödəyirsən, amma hesabına oturmur.
Bəzən isə hətta terminal çek də vermir.
Burada məqsəd vətəndaşı aldatmaq və yaxud onun cibinə girmək deyil.
Sadəcə olaraq, ödəmə terminallarında müəyyən texniki nasazlıqlar zamanı neqativ
hallar yaşanır. Belə olan halda, qeyd olunan əlaqə nömrələrinə zəng vurmaq
olar. Təbii ki, bu, vətəndaş üçün əlavə vaxt itkisi və əziyyətdir. Yaxşı olar
ki, aidiyyəti qurumlar bu məsələni diqqətdə saxlasınlar. Vaxtlı-vaxtında ödəmə
terminallarının texniki servislərini həyata keçirmək lazımdır ki, vətəndaşlar
bu kimi hallarla rastlaşmasınlar. Bu aparatlara nəzarət də gücləndirilməlidir.
Burada söhbət böyük məbləğdən getmir. Ona görə də, hər hansı mənimsəmə
faktından söhbət gedə bilməz. Metropoliten daxilində nasazlıq yarandığı zaman
qurumun texniki servis şöbəsinə müraciət etmək olar. Dayanacaqlardakı
terminallarla bağlı isə Bakı Nəqliyyat Agentliyinə müraciət edilə bilər”.
Ekspert Elməddin
Muradlı bildirdi ki, "Bakı kart”larla bağlı uzun müddətdir
ki, müxtəlif problemlər yaranıb: "Düşünürəm ki, bu problemlər kartlarla bağlı
müəyyən təkmilləşmə işinin həyata keçirilməsi zərurətini ortaya çıxarır. Bu
barədə dəfələrlə fikir söyləmişik. Bu gün ölkəmizə böyük turist axını var.
Onlar da "Bakı kart”lardan istifadə edirlər. Ona görə də, bu məsələ ilə bağlı
ciddi düşünmək lazımdır. Metropoliten və Bakı Nəqliyyat Agentliyi islahat aparmalıdır.
Bildiyim qədəri ilə ödəmə terminalları Türkiyəyə məxsus şirkətlərin birinin
qurduğu sistemlə fəaliyyət göstərir. Təəssüflər olsun ki, həmin şirkət servis
xidmətlərini vaxtlı-vaxtında yerinə yetirmir. Bu kimi hallar indiki dövrdə heç
bir halda yaşanmamalıdır. Bütün avtobus dayanacaqları terminallarla təmin
edilməli və həmin terminallar işlək vəziyyətdə olmalıdır. Daimi olaraq bu
terminallara texniki baxış keçirilməlidir.
Hər bir terminalın üzərində xidmətin əlaqə nömrəsi qeyd olunmalıdır ki,
vətəndaş problem olduğu zaman harasa müraciət edə bilsin. Həmçinin onlayn qaydada
ödəniş imkanları yaradılarsa, daha yaxşı olar. Mobil telefon, plastik kartlar
vasitəsilə insanlar ödənişlərini həyata keçirməlidir. Bu sistemi qurmaq elə də
çətin bir məsələ deyil. Biz texnologiyanın inkişaf etdiyi dövrdə yaşayırıq.
Yəni texnologiyanın bu qədər inkişaf etdiyi bir zamanda belə bəsit problemlərin
yaşanması insanlarda haqlı narazılığa səbəb olur. Ona görə də, aidiyyəti
qurumlar sözügedən məsələ ilə bağlı ciddi iş ortaya qoymalıdır. Əgər şirkət
özünü doğrultmursa, onu digəri ilə əvəz etmək mümkündür. Amma təəssüflər olsun
ki, bəzən vətəndaşlar terminallara qarşı məsuliyyətsiz rəftar edirlər. Çox vaxt
terminallara kənardan müdaxilə edilir və onlar sıradan çıxır. Bir çox hallarda
siqaret kötüyü, başqa ölkənin əskinaslarını daxil edirlər. Terminallar təmir
olunduğu zaman bunun şahidi olmuşuq. Bunu edənlərin məqsədi ziyan vurmaqdan
başqa nə ola bilər ki? Ona görə də, onların üzərinə müşahidə kamerası
yerləşdirilməlidir. Müdaxilə edən, zərər vuran hər kəs tapılaraq
cəzalandırılmalıdır. Belə məsələlər ictimailəşdirilməlidir ki, neqativ hallar
yaşanmasın. Bu, Azərbaycanda ilk dəfə tətbiq olunan bir sistemdir. Müəyyən
problemlərin olması qaçılmazdır. Amma çalışıb bəsit problemlərə görə vaxtımızı
boş yerə xərcləməməliyik. Hal-hazırda bütün avtobusların nağdsız ödənişlərə
keçməsi məsələsi müzakirə edilir. Digər tərəfdən isə insanlar gediş kartına
ödəniş etməkdə çətinlik çəkirlər. Qeyd edim ki, neqativ hal zamanı BNA-nın 141
nömrəli qaynar xətti ilə əlaqə saxlamaq olar. Düşünürəm ki, bu məsələ ilə bağlı
ayrıca servis xidməti təşkil olunmalıdır ki, Bakı-kartla bağlı həmin xidmətlə
əlaqə saxlaya bilək”.
Məslə ilə bağlı Bakı Nəqliyyat Agentliyinin mətbuat katibi Mais
Ağayevlə əlaqə saxladıq. Qurum rəsmisi bildirdi
ki, Bakı metro stansiyalarında
148 ədəd ödəmə terminalı fəaliyyət göstərir. Bundan əlavə, avtobus
dayanacaqlarında "Bakı kart”a məxsus 51 ədəd ödəmə terminalı mövcuddur: "Onların
fəaliyyəti ilə bağlı, adətən, problem yaşanmır. Ödəmələrdə neqativ hallar ən
çox "Milli Ön” aparatları ilə bağlı olur. "Bakı kart” bu aparatlara inteqrasiya
edilir. "Bakı kart”ın ödəmə terminallarında hər hansı nasazlıq yaşandığı zaman
sistemdə özünü göstərir. Bu zaman həmin əraziyə texniki personal yönəldilir və
mümkün olan ən qısa müddətdə nasazlıq aradan qaldırılır. "Milli Ön”
aparatlarında yaşanan problemlərlə bağlı isə şirkətin özü ilə əlaqə saxlamaq
lazımdır. Müraciət edildiyi zaman əməkdaşlar bu problemi aradan qaldırır”.
Şəbnəm
