“Prinsipə düşdüm və o layihəni 13 variantda hazırlayıb təklif etdim” - FOTOLAR
Həsən Ələkbər: "Əlimdəki
stəkanı stolun üstünə qoyub tələbələrə dedim ki, mənə 5 dəqiqə vaxt verin, özümə
gəlim”
Deyir
ki, sifariş götürəndə, maksimum məlumat toplayır, ailədirsə, ailə üzvləri ilə
söhbətləşir, detallarına qədər nə istədiklərini tutmağa çalışır. Beləliklə, əksər
hallarda ilk dəfədən müştərinin nə istədiyini təqdim edə bilir. Lakin 4-5 faiz
hallarda müştəriləri ondan gördüyü işdə nə isə dəyişiklik etməyini istəyirlər,
1 faiz hallarda isə işdən imtina ediblər. Söhbət 3D dizayn sahəsi üzrə mütəxəssis Həsən
Ələkbərdən gedir.
Qeyd edək ki, H.Ələkbər Bakı Dövlət Universitetinin Tətbiqi riyaziyyat
və iqtisadi kibernetika ixtisasını bitirib. Bir çox şirkətlərdə dizayner və baş
dizayner işləyib. "Park Bulvar”, "Altes Plaza” və "Altes Park” layihələrinin təqdimat
müəllifi, "Bayraq Meydanı”nın eskiz layihəsinin, "Qala Arxeoloji-Etnoqrafik
Muzey Kompleksi”nin dizayn tərtibatçısı olub. Port-Ələt köçürmə layihəsində,
Qobustan, Xalça və Tarix Muzeylərindəki virtual tur layihələrində aparıcı mütəxəssis
olaraq iştirak edib. Hazırda özünün şəxsi dizayn studiyasında fəaliyyətini
davam etdirir.
- Həsən bəy, riyaziyyat və iqtisadi kibernetika üzrə
təhsil alıbsınız, amma 15 ildən çoxdur ki, 3D dizayn sahəsində çalışırsınız.
Riyazi sahə maraq, bilik olmadan seçilən istiqamətlərdən deyil. Bəs ali təhsil
aldığınız sahədə çalışmamağınızın səbəbi nə oldu?
- Mənim
maraqlarım hərtərəfli idi. Riyaziyyatla da maraqlanırdım, incəsənətlə də. Məktəb
və universitet vaxtı riyaziyyatda nəticələrim həmişə əla olub. Sadəcə
uşaqlıqdan daha çox dizayna maraq göstərirdim. Başqa fakültədə təhsil almağımın
səbəbi kompüter texnologiyalarını öyrənmək istəyim idi. O vaxt isə bu təhsili
sırf tətbiqi riyaziyyat və iqtisadi kibernetika fakültəsində almaq olardı. 3D
dizaynın bir hissəsi dizayna, bir hissəsi texnoloji biliklərə əsaslanır.
Düşündüm ki, dizaynı özüm öyrənim, kompüter texnologiyaları sahəsində təhsil
alım.
- Dizaynı öyrənməyə
nə vaxt başladınız?
- 3-cü
kursda oxuyanda, "Digital age” şirkətində İT sahəsində işləməyə başladım. 3D,
proqramlaşdırma, multimedia və s. işləri görməli idim. Dizaynı da elə oradakı
kompüterdə öyrəndim. Çünki o vaxt mənim evdə kompüter, internet imkanım yox
idi. Şirkətdə, az-çox o şərait olduğu üçün işlədiyim müddətdə o fürsətdən
istifadə etdim.
- Bir çox şirkətlərdə dizayner və baş dizayner işləyibsiniz.
Karyeranızın baş dizayner dönəmi nə vaxt
başladı?
- Dizaynda ən önəmli məsələ daim öz üzərində
işləməkdir. Ümumiyyətlə, insan nəyi qarşısına məqsəd qoyursa, ona çata bilir. Məqsədə
gedən yolda "istəməmək”, "tənbəllik” sözləri var, amma "bacarmıram” yox. Mənim
məqsədim məşğul olduğum sahədə daha yüksək səviyyəyə qalxmaq idi. Həmişə də
özümə deyirdim ki, cəhd edirəm, alınmasa, onsuz da indiki səviyyəmdə qalacağam,
amma alına bilər və mən bunun üçün çalışacağam. Nəticədə 2 il sonra işlədiyim
layihələrdə açar rolları oynamağa başladım.
- Sizin sahədə çalışan digər şəxslərlə müqayisədə fərqli
nələr edirdiniz?
-
1990-2000-ci illər arasında indiki qədər öyrədici resurs yox idi. Qarşıma iş
qoyurdular, deyirdilər ki, bunu reallaşdırmaq lazımdır. Bilmirdim ki, bu işi
görə biləcəyəm, yoxsa yox. Kitab yox, "Youtube” yox. İndi proqramda hər hansı funksiya
işləməyəndə, internetdə araşdırıb tez həll edə bilirsən. Amma o vaxt belə
deyildi. "Bacarmıram”, "bilmirəm” demək əvəzinə, kompüteri qarşıma qoyurdum və
hər şeyi özüm etməyə çalışırdım. Proqramda bir funksiyanı işə salırdım və nə
baş verəcəyini gözləyirdim. Belə-belə, öyrənirdim. Kompüteri qarışdırırdım. Bəlkə
də, öyrənənə qədər kompüteri milyon dəfə format etmişdim. Hər dəfə
pozub-yazdıqca, qarışdırdıqca, yeni məlumat əldə edirdim. O vaxt 5 ilə öyrəndiyin
məlumatı indi 5 aya öyrənə bilirsən. Hazırda 20-25 yaşım olsaydı, qat-qat çox
nailiyyət əldə edə bilərdim.
- 2 illik təcrübədən sonra işlədiyiniz layihələrdə
önəmli rolları sizə həvalə etdiklərini dediniz. Son illər bu yanaşma dəyişməyə
doğru getsə də, sizin karyeranızın əvvəlinə düşən dövrdə kifayət qədər təcrübəsi
olmayan insanlara böyük layihələri həvalə etməyə risk etmirdilər. Bəs bu cəhətdən
o xəttə düşməyiniz necə oldu?
- O vaxt
tender formasında keçirilən bir neçə böyük layihəyə təklif göndərmişdim. Həmin
tenderə yerli şirkətlərlə yanaşı, Türkiyə, İtaliya və s. ölkələrin də şirkətləri
müraciət etmişdilər. Sonra həmin layihələrin rəhbərləri məni çağırıb
soruşurdular ki, sən bu işi bacaracaqsan? Şübhə ilə yanaşırdılar. Bildirirdim
ki, bacaracağam. Bu zaman layihə rəhbərləri mənə deyirdilər ki, sən aşağı məbləğ
təyin edibsən, bir az yüksək yaz. Bir az artırırdım, deyirdilər ki, bir az da
artır. Deyirdim ki, mənə bəsdir (gülür). Düşünürəm ki, ilk olaraq mənə bu layihələri
professionallıq məsələlərinə görə yox, ən münasib qiyməti təklif etdiyim üçün
verirdilər. Belədir ki, sən bir işi yaxşı görürsənsə, gələn dəfə iş olanda sənə
təklif edirlər, başqalarına məsləhət görürlər və beləcə, tanınırsan. Qorxa-qorxa
verdikləri layihələri yaxşı həyata keçirdiyim üçün, sonra da işləri olanda, mənə
müraciət edirdilər. Belə hallar da yaşanırdı ki, iştirak etdiyim tenderdə layihəni
mənə verməyiblər. Başqa şirkət həmin tenderi udub və işi görmək üçün mənə
müraciət edib.
- Qiymətləri
məqsədli şəkildə aşağı yazırdınız?
- İlk
vaxtlar özümü tanıtmaq, bu işi bacardığımı göstərmək lazım idi. Yəni mən müəyyən
işlər görməli idim ki, onlar işimin keyfiyyətinə bələd olsunlar.
- Sonra qiymətləriniz
necə dəyişdi və indi necədir?
- Müəyyən müddət sonra qiymətləri
normallaşdırdım. Çox yüksəyə də qaldırmadım, real qiymət təyin etdim. Hazırda
bir kvadratmetri 20-30 manat arasında dəyişir. Həcm, üslub və s. faktorlardan
asılıdır.
- Çalışdığınız sahə gəlirli sahələrdən hesab
olunur. Bəzən gəlirli sahədə çalışanların, maliyyələrini idarə etməkdə çətinlik
çəkdiklərini deyirlər. Maliyyəyə yanaşmanız necədir?
- Mən
90-cı illərdəki aclığı görmüşəm. Biz Şuşadan Bakıya gəlmişdik, heç nəyimiz yox
idi. Elə günlər olurdu ki, çörəyimiz olmurdu, qonşulardan yarım çörək götürürdük.
90-cı illəri görən adam nə bədxərclik edər, nə də xəsislik. O insan bədxərclik
edir ki, qazancın, zəhmətin, əziyyətin nə olduğunu, qazandığı pulun dəyərini
bilmir. Mən o günləri görmüşəm. Hələ məktəb illərinin sonunda qəzet satıb pul
qazanırdım. Universitetə yeni qəbul olduğum dönəmdə ailənin maddi durumu çətin
idi. Evdə başqa işləyən yox idi. Anam müəllim işləyirdi, amma yay aylarında
onun da gəliri olmurdu və mən işləyib pul qazanmaq məcburiyyətində idim. Səhər saat 9-dan gecə 2-yə kimi işləyib 5
"məmməd” (5 min manat) qazanırdım. Bilyard oyunu keçirilən yerdə nəzarətçi
idim. Tələbə vaxtı sosial sorğular aparan bir şirkətdə də işlədim. Ən ciddi gəlirimi
orada əldə etmişdim. Yəni mən bu yolları keçmişəm. Aradabir bədxərclik də ola
bilər. Həmişə yox, arada olması normaldır (gülür).
- Bəlkə özünüzü daha çox inkişaf etdirməyə sizə güc
verən səbəb, elə maddi çətinliklər olub?
-
Tamamilə düzdür. Mən belə həyatı görmüşdüm və bir də onu yaşamaq istəmirdim.
- Adınız keçən layihələr biristiqamətli deyil, fərqli
işlərdir, fərqli bacarıqlar tələb edir. Bu, necə oldu?
- Mən
işi öyrəndikcə, bu sahədə başqa proqramları da araşdırmağa başlayırdım.
Videomontaj, audio, animasiyalar və s. bir çox istiqamətləri öyrəndim. 3D-nin
bütün sahələri mənə maraqlı idi. Nəticə də ona gətirdi ki, bir deyil, bir neçə
istiqamətdə böyük işlər görmək bacarığı formalaşdı. Məsələn, Azərbaycan Dövlət AkademikFilarmoniyasının baş
kameral zalının rekonstruksiyasının eskiz layihəsini mən vermişdim. Tarix,
Xalça və Qobustan muzeylərinin multimedia diskini hazırlamışam. Bunlar tam fərqli
layihələrdir. Bunlarla, paralel dizaynla məşğul olmuşam, klip çəkmişəm. Hər şey
mənə maraqlı idi. İşləyə-işləyə seçirdim ki, hansı sahə mənə daha maraqlıdır.
Bulvardakı Bakı Beynəlxalq Dəniz Ticarət
Limanının Ələtə köçürülmə layihəsinin
bütün təqdimatını mən hazırlamışdım. Prezidentə təqdim edilmişdi, imzalamışdı. "İçəri
şəhər”in bütün tarixi heykəl və abidələrinin 3D modellərini yığmışam. Fərqli
sahələrdir. Amma hamısı 3D-yə bağlıdır.
- Müəllim kimi də fəaliyyət göstərirsiniz. Nə vaxtdan
müəllim kimi çalışmaq qərarı verdiniz?
- 8-9 il
əvvəl mənim sistemimlə işləyə biləcək işçilər lazım idi, amma tapa bilmirdim.
Ona görə, bir neçə tələbə götürüb dərs keçdim və sonra işə götürdüm. 4 il öncə
isə "Code Academy”nin dizaynını etmək üçün məni dəvət etmişdilər. Dizaynı bitirəndə,
sonra oranın direktoru Ülvi Aslanov mənə akademiyada dərs deməyi təklif etdi. Dedim
ki, bu sahədə təcrübəm, insanlar qarşısında çıxış etməklə bağlı xüsusi
bacarığım yoxdur, amma yoxlamaq olar. Azərbaycanca danışığım da normal deyildi.
Birinci dərsdə başım yanırdı, gördüm ki, dayana bilmirəm. Əlimdəki çay stəkanını
stolun üstünə qoyub tələbələrə dedim ki, birinci dəfədir dərs keçirəm, çox həyəcanlıyam.
Mənə 5 dəqiqə vaxt verin, özümə gəlim. İlk dərsi deyəndən sonra həvəs yarandı,
çox xoşuma gəldi. Ən böyük zövqü isə tələbələrimin nəticələri verir.
- Tələbələrə
bütün sirləri öyrədirsiniz?
-
(Gülür) Dizaynerlərdə belə xüsusiyyət var ki, bildikləri hər şeyi tələbələrinə
öyrətmirlər. Çünki gənc vaxtımda bununla rastlaşmışdım. Dizaynerdən "Bunu necə
edirsən?” deyə soruşdum, "demirəm” cavabı aldım. Niyə belə etdiklərinə anlam
verə bilmirdim. Adam qorxurdu ki, cavanlar gəlib onun çörəyini alacaq və s. Məncə,
bu zaman problem həmin mütəxəssisin özündədir. İrəli getmir deyə, fikirləşir
ki, bildiyi nəyisə öyrədən kimi onu keçəcəklər. Mən bildiyim hər şeyi öyrədirəm. Bir neçə tələbəm var ki, bəzi sahələrdə
məni keçiblər. Məsələn, 3D-də ən çətin bölmələrdən biri olan modelləşdirmədə
güclü mütəxəssis olan tələbəm var. Onun peşəkarı olan adamın, dünyanın istənilən
yerində çox yaxşı gəliri ola bilər. Mən onu öyrətdim və o, öz üzərində çox işlədi.
Onu, oyunlarla bağlı beynəlxalq şirkətlərdən birinin Türkiyə ofisinə işə
apardılar. Keçən dəfə mənə bir işini göndərmişdi, insan bədənini işləyib. Mən
onu işləsəm, 2 il vaxt sərf edərəm. Bu tələbəm modelləşdirmədə məni keçib.
Bununla fəxr edirəm, ləzzət edir. Amerika, Ukraynada, Azərbaycanda çalışan tələbələrim
var.
- Öz şəxsi dizayn studiyanızı nə zaman yaratdınız?
-
Birincisi, müştəridən başqa kiminsə qarşısında hesabat verməyi sevmirəm. Şirkətdə
işləyəndə, şirkət sənə "bunu et, onu et” deyir. Mən qərar verdiyim formada işləməyi
xoşlayırdım. İkincisi, dizayner səhər saat 9-dan axşam 6-ya kimi işləyən adam
deyil. Dizayner səhər 9-da gəlsə də, işə 2-də başlayacaq. Saatla işləyənlər də
ola bilər, amma tək-tükdür. Bir də şirkətdə işləyəndə, bütün işi sən görsən də,
sənin adın arxa planda qalır. Deməli, bir şirkətdə işləyirdim. Bütün layihəni
sıfırdan sona kimi mən aparırdım, 24 saat üzərində işləyirdim. Ya layihənin təqdimatında
adım olmurdu, ya da 5-6-cı cərgədə yazılırdı. Bu kimi səbəblərdən işdən ayrılıb
müstəqil fəaliyyət göstərdim, sonra da öz studiyamı yaratdım.
- Müştərilərin istəklərindən danışaq. Bir mütəxəssis
olaraq bu istəklərdə bəyənmədiyiniz nədir?
- Daha
çox müştəri "filankəsdə filan şey gördüm, çox xoşuma gəldi, mən də belə istəyirəm”
deyir. Qohumda, qonşuda görür, şəklini çəkib gətirir ki, bunu et. Baxıram və
görürəm ki, qəşəng deyil. Bir də, ölkədə hamının istədiyi rəng krem rəngidir.
Bu rəng mənim də xoşuma gəlir, amma başqa rənglər də var axı.
- Fərqli rəngləri
istəyənlər çox azdır?
- Bəli,
kimsə boz rəngdə nəsə istəyəndə, təəccüblənirəm. Qeyri-adi, fərqli rəngləri istəyənlər
də olur, amma bu şəxslər cavanlar deyil. Qeyri-adi rəngləri daha çox yaşlılar
istəyirlər. Demirəm ki bütün gənclər elədir, amma əksəriyyət, rəngarəng olmayan
seçimlər edirlər.
- Ən yadınızda qalan işlərinizdən də danışaq.
- Şəmkir
şəhərində Gənclər Mərkəzinin dizaynını deyə bilərəm. Birincisi, həyatımda ilk
layihə idi ki, eyni zalın 13 variantda dizaynını verdim. O layihə də tender
idi. Mən də bir dizayn hazırlayıb göndərdim. Adətən, işdən öncə tam məlumat
toplayıram və birinci variantdan hər şeyi tutmağa çalışıram. Çox vaxt ilkin
versiyada tuturam. Amma burda birincidə tutmadım, ikinci variantı verdim,
alınmadı, üçüncünü verdim, dedilər ki, bu da uyğun gəlmir. Prinsipə düşdüm və o
layihəni 13 variantda hazırlayıb təklif etdim. Sonuncu variantı qəbul etdilər və
bütün mərkəzin dizaynı mənə həvalə olundu. O işi yaddaqalan edən digər səbəb o
idi ki, layihəni həyata keçirmək üçün 3 günlük Şəmkirə getmişdim, amma 3 aydan
sonra qayıtdım. Şamaxıda "Asan Xidmət”in dizayn layihəsi də yaddaqalan olmuşdu.
Layihə üçün 8 ay Şamaxıda qaldım.
- Yoldaşınız sizin bu iş rejiminizə nə deyir?
-
Şamaxıya ailəm də mənimlə gəldi. 8 ay uşaq orda məktəbə getdi. İşlə bağlı
harasa uzunmüddətli səfərə gedəcəyəmsə, məndən əvvəl yoldaşım ora gedir, sonra
da mən. Rejimimlə bağlı hər hansı problem yoxdur. Bəzən işlə bağlı bir günlük
gedəndə də, yoldaşım mənə qoşulur. Həm gəzirik, həm də işimizi görüb qayıdırıq.
Amma bu zaman bir günlük səfər mənə 10 günə başa gəlir (gülür).
Aygün