Bakı 25°C
Poroşenko, yoxsa Saakaşvili?
Ukraynada "Saakakşvilinin işi üzrə” məhkəmə prosesi ilə bağlı son
hazırlıq işləri aparılır. Lvov məhkəməsi sabiq prezidentin Polşadan Ukraynaya
keçməsinin qanuni olub-olmamasını üzə çıxarmağa hazırlaşır. Maraqlıdır ki, ötən
həftədən bəri Saakaşvili ilə bağlı gərginlik və səslənən bəyanatların tonu bir
qədər zəifləyib. Buna səbəb də var. Prezident Petro Poroşenko Birləşmiş
Ştatlarda səfərdədir. Böyük ehtimalla hər iki tərəf mübarizəni bu səfərin
nəticələrindən sonra başlayacaqlar. Hazırda əsas məsələ Saakaşvilinin Kiyevə
gedib-getməyəcəyi ilə bağlıdır. Xatırladaq ki, Saakaşvili az əvvəl bildirmişdi
ki, sentyabrın 19-dan sonra Kiyevə köçəcək. Lakin dünən qəfildən planını
dəyişib və bəyan edib ki, Kiyevə oktyabrın sonlarında köçəcək. Saakaşvili
bildirib ki, Kiyevdə planlaşdırdığı mitinqdə hakimiyyətdə islahatlar aparılması
ilə bağlı tələblər irəli sürəcək. "Biz ictimai fəalların təşəbbüsünə qoşulmaq
və oktyabrın 17-də Kiyevdə toplaşaraq korrupsiya əleyhinə məhkəmələr
yaradılması, deputat toxunulmazlığının ləğv edilməsi və yeni seçki qanunu qəbul
edilməsini tələb etmək qərarına gəlmişik”, - deyə Saakaşvili bəyan edib. "Mən
indiyə qədər vətəndaşlığımın ləğvi ilə bağlı heç bir sənəd almamışam”, – deyə
Mixail Saakaşvili söyləyib. "Poroşenko təəccüblənir ki, Saakaşvili niyə
məhkəməyə gedib vətəndaşlığının ləğvi haqqında qərardan şikayət vermir. Mən heç
bir sənədim olmadan necə məhkəməyə gedə bilərəm?” - deyə o bildirib. Əlavə edib
ki, Poroşenko ilə heç bir konflikti yoxdur: "Mənim Poroşenko ilə heç bir
konfliktim yoxdur. Əksinə, onun mənimlə konflikti var. Ona Amerikada uğur
arzulayıram. Mən artıq orada olmuşam”. Ukraynadakı "Yeni siyasi qüvvələr”
partiyasının lideri M.Saakaşvili bundan əvvəl bildirmişdi ki, sentyabrın 19-da
Ali Radada çıxış etməyə cəhd göstərəcək. Eks-qubernator bu vədinə də əməl
etməyib. Bu arada ölkənin baş prokuroru Yuri Lutsenko deyib ki, "Ukrayna
hakimiyyəti Saakaşvilini sərhədi qanunsuz keçməyə görə həbs etmək fikrində
deyil”. O, həmçinin bildirib ki, Odessa vilayətinin keçmiş qubernatorunu heç
kim ekstradisiya etmək istəmir. Lutsenko qeyd edib ki, nə qədər ki,
Saakaşvilinin Ukraynada yaşamaq icazəsi və ya digər sənədi var, o, həbs oluna
bilməz.
Belə bir mürəkkəb vaxtda isə ABŞ hökuməti Ukraynaya yardım etmək
qərarına gəlib. "Kiyev təhlükəsizlik və müdafiə, habelə ölümcül silahlar və
hərbi avadanlıqlar üçün Vaşinqtondan 500 milyon dollar alacaq”. Bunu Ukrayna
prezidenti Petro Poroşenko bəyan edib. Prezident qeyd edib ki, ABŞ-dan alınacaq
silahlar Donbası azad edə bilər. Rusiyanın Federasiya Şurası isə hesab edir ki,
bu cür qərar Ukraynanın cənub-şərqindəki münaqişəsinin daha da yayılması,
kəskinləşməsinə səbəb ola bilər. "ABŞ Senatı 2018-ci il üçün müdafiə büdcəsini
təsdiqləyib. Büdcədə Ukraynanın təhlükəsizliyinə 500 milyon dollar vəsait
ayrılması planlaşdırılır”, - deyə Poroşenko özünün "Feysbuk” səhifəsində yazıb.
P.Poroşenko M.Saakaşvili ilə də bağlı məsələyə də toxunub və əlavə
edib ki, bununla bağlı məhkəmə prosesi olacaq.
Bir çox ukraynalı ekspertlər hesab edirlər ki, Poroşenko ilə
Saakaşvili arasında gərginliyin səngidilməsi barədə tapşırıq ABŞ-dan gəlib.
Onların qənaətincə, amerikalılar hər iki şəxs qarşısında tələb qoyublar. Amerikalılar
Poroşenko komandasını və Saakaşvilinin ətrafını münasibətlərin aydınlaşmasını
heç olmasa Ukraynanın taleyi ilə bağlı xaricdə müzakirələr başa çatana qədər bir
kənara qoymağa çağırıblar.
Siyasi ekspert Pavel Rudyakov hesab edir ki, hər şey amerikalıların
nə deyəcəyi və əmr edəcəyindən asılı olacaq. Onun sözlərinə görə, iki tərəf
arasında mübarizə hələ uzun müddət davam edəcək. "Saakaşvilinin indiyə qədər
saxlanılmamasının səbəbi odur ki, hakimiyyət hələ də ABŞ-dan müsbət cavab
almayıb. Elə Saakaşvili də istəyinə nail olmayıb. Ona ABŞ-dan hakimiyyəti
dəyişmək üçün "Kiyevə yürüş” mandatı təqdim edilməyib”. Beləliklə, çox mürəkkəb
və maraqlı bir vəziyyət yaranıb. Və kimin bur gərginlikdən qalib çıxacağını
zaman göstərəcək.
Azər
