Politoloq: “ABŞ Senatının qərarı Ermənistanı pis vəziyyətə salır”
İlqar Vəlizadə: "Türkiyə Ermənistana qarşı siyasətində
daha sərt addımlar ata bilər”
"ABŞ Senatının qəbul etdiyi qərar siyasi
konyukturadan irəli gəlir. Yaranmış siyasi çəkişmələr fonunda Senat Konqreslə
üz-üzə dayanmaq istəmir. Çünki, Konqres böyük səs çoxluğu ilə bir-iki ay bundan
əvvəl sözügedən qətnaməni qəbul edib. İndiki halda Senatın onu qəbul etməməsi,
iki palata arasında qarşıdurmanın yaranmasına səbəb ola bilərdi. Məhz bu qarşıdurmanı
aradan qaldırmaq üçün belə bir addım atılıb”.
Bubarədə politoloq İlqar Vəlizadə "Kaspi” qəzetinə
açıqlamasında bildirib. Qeyd edib ki, Senatın qəbul etdiyi qətnaməni sadəcə
ABŞ-Türkiyə münasibətlərində yaşanan gərginliklə əlaqələndirmək olmaz. Onun
sözlərinə görə, indiki məqamda əsas məsələlərdən biri Donald Trampın impiçmenti,
prezidentin və administrasiyasının Konqresdə, Senatda mövqeyini qoruyub
saxlamasıdır.
İ.Vəlizadə deyib ki, Senatda qəbul olunan qətnamənin
regional vəziyyətə ciddi təsiri olmayacaq: "Həmin sənədin hüquqi qüvvəsi
yoxdur. Burada yalnız Türkiyə-ABŞ münasibətlərinin fonunun mürəkkəbləşməsindən
söhbət gedə bilər. Onsuz da buna qədər də hər iki tərəfin münasibətlərində
soyuqluq, qarşılıqlı inamsızlıq özünü göstərməkdə idi. Senatın qərarı sözügedən
inamsızlığın daha da dərinləşməsinə gətirib çıxara bilər. Bu qətnamə ABŞ-dan
Türkiyəyə qarşı hansısa sanksiyaların tətbiqini, ticari əlaqələrin məhdudlaşdırılmasını,
hərbi-siyasi əməkdaşlığı və sairi əngəlləməyi nəzərdə tutmur. ABŞ Senatının qəbul
etdiyi qətnamə onsuz da dalanda olan Ermənistanı daha da pis vəziyyətə salır.
Əgər Ermənistanda düşünürlər ki, belə qətnamələrin qəbulu ilə Türkiyəyə təsir
göstərəcək, öz vəziyyətlərini yaxşılaşdıracaqlar, çox yanılırlar. Bunlar boş
ümidlərdir. Əksinə, Türkiyə Ermənistana qarşı tutduğu siyasətdə daha sərt
addımlar ata bilər. Məlum qətnamənin qəbulu Azərbaycan-Türkiyə münasibətlərini bir
qədər də yaxınlaşdırmaqla, erməni yalanlarına qarşı xarici siyasət kursunda
birgə fəaliyyət ortaya qoymağa, daha sıx koordinasiya yaratmağa, vahid mövqedən
çıxış etməyə sövq edəcək. Dünya erməniliyi qarşısında vahid platformanın həyata
keçirilməsi məsələsi aktuallaşdırır. Geosiyasi nöqteyi-nəzərdən bu qətnamə Azərbaycan-Türkiyə
münasibətlərini daha da gücləndirməyə xidmət edəcək, Ermənistanı isə növbəti dəfə
uğursuzluğa yuvarladacaq”.
Alpər TURAN