AZƏRBAYCANDA KORONAVIRUSLA BAĞLI XƏBƏRLƏR

Pik saatlarda yalnız avtobuslarla Bakının sərnişindaşıma tələbatını ödəmək çətindir

Pik saatlarda yalnız avtobuslarla Bakının sərnişindaşıma tələbatını ödəmək çətindir

Təfsilat
11 İyul 2020, 16:45 251
Azərbaycanda yeni növ koronavirusa yoluxma sayının artması karantin rejiminin yenidən sərtləşdirilməsinə səbəb oldu. Sərtləşmə zamanı isə ilk olaraq metropolitenin fəaliyyəti dayandırıldı. Bəs bu qərar avtobus sərnişin daşımalarının yekünü nə qədər artırır?
Məsələ ilə bağlı Trend-ə açıqlama verən nəqliyyat sahəsi üzrə ekspert Hüseyn Abdullayev bildirdi ki, hazırda Bakı şəhərində ictimai nəqliyyatla bağlı verilən qərarlar Bakı Nəqliyyat Agentliyinin (BNA) qərarları deyil: "Metropolitenin fəaliyyətini dayandırması ilə bağlı qərarın ardından sərnişinlərin rahat və təhlükəsiz hərəkətini təmin etmək üçün BNA əlindən gələni edir.
Metronun bağlanmasını düzgün qərar hesab etmirəm. Çünki gediş-gəliş ehtiyacları olan böyük sayda vətəndaşlar var və onların daşınması zəruridir. Bütün sərnişinlərin isə avtobuslara yönəlməsi müəyyən sıxlıqlar yaradır ki, bu da risklidir. Bu dövrdə vətəndaşların da anlayış göstərməsi, ehtiyac olmadıqda ictimai nəqliyyatdan istifafə etməməsi önəmlidir".
Ekspert həmçinin bildirib ki, daha əvvəl nəzarət postlarının ləğv olunması ilə bağlı qərar verildi, indi isə postların yenidən bərpa olunacağı deyilir: "Məsələ burasındadır ki, pik saatlarda təkcə avtobuslarla Bakının sərnişindaşıma tələbatını ödəmək çətindir. Bunun üçün metro lazımdır, metro da bağlıdır. BNA tərəfindən xəttə buraxılan ekspres marşrutlar isə metro stansiyaları arasında daşımaları həyata keçirir və metrodan istifadə edənlərin bu xətlərə axını sıxlıqlar yaradır. Bu, sırf BNA-nın problemi deyil. Bu gün BNA-nın fəaliyyətinin əsas məqsədi hərəkəti zəruri olan insanları mənzil başına çatdırmaqdır. Buna görə də, zəruri olmadıqca ictimai nəqliyyatdan istifadə etməyən insanlar təqdir olunmalıdır".
"Düşünürəm ki, özəl daşıyıcı şirkətlərə maliyyə yardımı edilməlidir. Bir neçə ay ərzində sərnişin sayında böyük azalma var. Bu isə özəl daşıyıcı şirkətlərin gəlirlərinin əhəmiyyətli dərəcədə azalmasına səbəb olub. Lakin eyni zamanda onlar tam gücü ilə çalışır və çalışmağa məcburdur. Bu da onlara maliyyə dəstəyini zəruri edir", - deyə ekspert əlavə edib.