“Çox qazanmaq istəyirsənsə, çox dəyiş”
"Odunçular
arasında keçirilən yarışda finala iki nəfər qalır. Sonda yarış ikisi arasında
keçirilir. İkisi də fiziki cəhətdən eyni gücdədirlər. Final günü səhər 8-də
möhtəşəm iş başlayır, meşəni odun doğramaq səsi götürür. Biri meşənin bir tərəfində
işləyir, o biri digər tərəfində. Bir-birini görmürlər. 9-a 5 dəqiqə qalmış
odunçunun biri görür ki, o biri odunçu tərəfdən səs gəlmir. Deyir ki, yəqin
istirahət edir, mən o dayandığı müddətdə işləsəm, daha çox odun doğrayaram. 5 dəqiqə
sonra artıq o biri odunçunun da səsi gəlir. 1 saat keçəndən sonra görür ki,
odunçu yenə dayandı, bu yenə dayanmır. 8 saatlıq iş günü boyunca hər saatın
başında 5 dəqiqəlik o odunçunun odun doğramağının səsi gəlmir. Yarış bitir, nəticələr
elan olunan an gəlir. Dayanmadan işləyən odunçu artıq özünü qalib bilir. Lakin
sonda qalib o biri odunçu olur. Uduzan qalibdən soruşur ki, mən səndən 40 dəqiqə
çox işləmişəm, necə olur ki, mən daha az odun doğramışam? Qalib olan odunçu
deyir ki, mən dayananda istirahət etmirdim, balta və mişarları itiləyirdim”.
KarnegiKlub Treninq Mərkəzi tərəfindən keçirilən "Uğur
Forumu"nu mərkəzin rəhbəri Nəcəf
Allahverdiyev bu ibrətamiz hekayə ilə açıq elan etdi. Bildirdi ki, balta,
mişar burda o anlam daşıyır ki, yəni təkcə işləmək kifayət deyil, həm də balta və mişarı itiləmək
lazımdır. Uğura gedən yolda isə bunları itiləməyin yolları çoxdur, onlar
sırasında təlim və treninqlərin payı önəmlidir.
"Qazanmaq istəyirsənsə, dəyiş”
Ardınca
ilk çıxışçını olan gənc sahibkar, "Panda School” şirkətinin rəhbəriElvin
Dadaşsoyu dəvət etdi. "Uğur təkcə bizneslə, çox pul
qazanmaqla ölçülmür. Bu, sadəcə, uğurun bir hissəsidir” – deyən E.Dadaşsoya görə
əslində, biznes qurmaq çox sadədir, amma insanlar onu qəlizləşdirirlər. Bunun
üçün isə o, pula olan yanaşmanın dəyişilməsini vacib hesab etdiyini bildirdi:
"Stalin zor gücünə diktatura quraraq sovetlər birliyinə daxil olan xalqlarda hər
kəsin əmlakını, biznesini dövlətin elan edirdi. Babam deyirdi ki, saxladığım inəyi
yemləmək üçün əkdiyim otun 3 tayasını dövlətə verirdim, 1 tayası bizə qalırdı.
Bu yanaşma bütün sovetlər birliyindəki xalqların geninə işlədi. Bizdə belə
deyimlər yarandı: "Pulu çox olanın dərdi çox olar”, "Varlılar rahat yatmır”,
"Az aşım, ağrımaz başım”. Bu alqoritm avtomatik beynimizə təsir etməyə başladı.
Biznes qurmaq üçün bu alqoritm dəyişməlidir. Ümumiyyətlə isə, qazanmaq istəyirsənsə,
dəyiş, tez qazanmaq istəyirsənsə, tez dəyiş. Çox qazanmaq istəyirsənsə, çox dəyiş”.
..."mən” deyəndə insanlarda qıcıq yaranır
Biznes təlimçi, yalan üzrə ekspert Təbriz Hacınski danışıqların idarə olunması məsələsinə toxundu:
"Danışıqlar üç strategiyada qurulur. Birincisi, "öz” mövqeyidir. "Mən belə
fikirləşirəm”, "Mənim düşüncələrim budur” və s. Yəni bütün danışıqları "mən” üzərində
qurur. Bu gözəldir, amma həddindən artıq "mən” deyəndə insanlarda qıcıq
yaranır. Ona görə "öz” mövqeyini düzgün qurmaq önəmlidir.
İkincisi,
"başqaları” mövqeyidir. Burada danışığın sistemi başqaları üzərində qurulur.
"Siz necə düşünürsünüz?”, "Sizin yanaşmanız necədir?”, "Sizinlə hər cür əlaqəyə
getməyə hazıram” və s. bunları çox istifadə etmək özgüvən hissinin aşağı
olduğunu göstərir. Yəni "mən” yoxdur, əsas məzmun qarşı tərəf üzərində qurulub.
Üçüncüsü,
məzmundur. Yəni qayda, məzmun nə tələb edirsə, o cür danışırsan.
Hər
üçündə danışmağı bacarmaq lazımdır. Sadəcə, harda hansı mövqedə olacağını bilmək
önəmlidir”.
"Təcili ilə əhəmiyyətli arasındakı fərqi bilmək önəmlidir”
Beynəlxalq təlimçi Rəşad Bayramovun çıxışında
diqqət çəkən məqam prioritetlər mövzusu oldu. O bildirdi ki, hər kəs öz
prioritetlərini bilməli və onları öndə saxlamalıdır: "Təcili ilə əhəmiyyətli arasındakı fərqi bilmək önəmlidir. Adətən,
iş saatı 09:00-18:00 arası olur. İşdən çıxanda özümə sual verirəm ki, bu gün nə
etdim? Təbii ki, iclasa getdim, iş görüşlərim oldu, e-mail yazdım. Amma böyük
bir işin öhdəsindən gəldim, vacib bir işi yerinə yetirdim? Əgər bu suala "hə”
cavabı verə bilmirəmsə, deməli, xırda, təcili işlər əhəmiyyətlilərin vaxtını
alıb. Tutaq ki kimsə zəng edir, cavab verirəm, bu, təcilidir. Əhəmiyyətli zəng
də ola bilər, amma əksər hallarda zəng edən üçün önəmli olur. Yaxud, e-mail gəlib.
Ona cavab yazmaq təcilidir, amma əhəmiyyətliliyi səndən çox yazan üçündür. Nə qədər
təcili işlərin arxasınca qaçsanız, əhəmiyyətlilər
arxada qalacaq. Ona görə özünüz üçün prioritetləri müəyyənləşdirin və
onları önə salın”.
R.Bayramov
onu da əlavə etdi ki, prioritetləri önə salmaq, vaxtı səmərəli istifadə etmək
üçün "yox” deməyi bacarmaq lazımdır.
"Sən belə etməzdin, nə əcəb səhv etmisən?”
Nitq təlimçisi Cəlalə Nəzəroğlunun çıxışından liderlərin danışıq qabiliyyətlərinin
inkişaf etdirməsi məsələsini vurğulayaq: "Bizim nitq təlimlərimizə gələnlərin bir
qismi lider olan şəxslərdir. Onsuz da rəhbərdirlər, əməkdaşları sözlərinə qulaq
asır. Niyə onlar bu təlimi almaq, özlərini inkişaf etdirmək istəyirlər? Düzdür,
əvvəllər personalın motivasiyası məsələsinə cəfəngiyat kimi baxırdılar, amma
son vaxtlar rəhbər şəxslər bu haqda düşünməyə başlayıblar. Eyni iradı iki fərqli
formada demək mümkündür. Birində onun qürurunu qırırıq, başqalarının yanında
alçaldırıq. İkincidə siyasi gedişlər edirik. Kobud davranış görmüş əməkdaş bəlkə
də o an üçün işini itirməməkdən ötrü deyiləni əlindən gələn qədər edəcək.
İkinci halda əməkdaş əlindən gələnin artığını edəcək. Misal üçün, bir hadisə
baş verib, rəhbər şəxs olaraq əsəbiləşmisiniz. Birinci variantda "əşi, sən
onsuz da fərasətsiz birisən, ona görə belə oldu” deyirsən, ikincidə isə "Sən
belə etməzdin, nə əcəb səhv etmisən?”. Bunların nəticələri arasında böyük fərq
olur”.
"Ən böyük istəyim 11000 gənci bir yerə yığmaq idi”
"Azersun”Şirkətlər
Qrupunun Marketinq şöbəsinin müdiri Şəmsi Bayramzadə isə öz xəyalından danışdı:
"Antarktida,
çox nadir insanların kəşf etdiyi yer. Heç vaxt ora getməmişəm, çünki mənim belə
bir xəyalım olmayıb. Mənim xəyalım başqa idi. Azərbaycan gəncliyi üçün fayda
vermək kimi arzular edirdim. 2010-cu ildən gənclər istiqamətində nə isə işlər
görməyə fokuslandım. Ən böyük istəyim 11000 gənci bir yerə yığmaq idi. Bu xəyalımı
gerçəkləşdirmək üçün 11001 nəfər gənci bir araya gətirdim. Həmin tarixdə kimsə
öz arzusunu gerçəkləşdirmək üçün Antarktidaya gedirdisə, mən 11001 azərbaycanlı
gənci stadiona topladım. Niyə 11001? Çünki 11 mindən sonrakı o bir nəfər də mən
idim. Yaşım çox deyil, hələ də gəncəm və gənclər üçün nələrsə etmək üçün yenə
çalışıram. "Gənc üçün varam” aksiyasına başlamaq qərarı vermişəm. Yaxın
zamanlarda bunun təqdimatını edəcəyik. Gənc üçün varam” deyənləri bir araya
toplayacağıq”.
İki fərqli baxış
İqtisad
Universitetinin Karyera Mərkəzinin direktoru Ramil
Cabbarov uğur qazanmaq üçün baxış formasının önəmli olduğunu vurğuladı:
"Bunu dəyişmək lazımdır. Bir misal çəkim. Məşhur ayaqqabı istehsalçılarından
biri bazar araşdırması etməsi üçün Afrika ölkələrinin birinə öz əməkdaşını göndərir.
Üç gün sonra əməkdaş zəng vurub deyir ki, bu ölkənin bazarına girməyə dəyməz,
burada potensial yoxdur, çünki burada insanlar ayaqqabı geyinmirlər. Sonra şirkət
ora başqa əməkdaşını göndərir. O, isə zəng vuranda deyir ki, burada inanılmaz dərəcədə
potensial var, hətta biz istehsalı 3-4 dəfə artıra bilərik. Çünki burada
insanların ayağında ayaqqabı yoxdur. İki fərqli baxış”.
"İnsanın özünə inamı olmalıdır”
Həkim-implantoloq,
"Estetik Diş" klinikasının təsisçisi Xəqani Hüseynov hədəfə çatmaq mövzusunda danışdı: "Tələbə vaxtı elə
də yaxşı oxumamışam, etiraf edirəm, amma hər zaman fərqli olmağa çalışmışam. Tələbə
yoldaşlarım oxumağa gedəndə mən sənəti öyrənməyə çalışırdım, pul qazanmaq üçün
vuruşurdum. Əzm, heç zaman əlimdəki ilə barışmamaq, daha da irəli getmək istəyi
məni bugünkü yerə gətirib çıxarıb. Tibb Universitetini bitirəndən sonra Şərur
rayonunun Muğanlı kəndində öz sahəm üzrə işlədim, amma ən böyük arzum Bakı şəhərində
klinikamın olması idi. Gün gəldi, Bakıda 2 kabinetdən ibarət bir yer aça
bildim, amma bununla da kifayətlənmirdim. İlk vaxtlar 3 həkimdən ibarət bir
klinika idi, sonra böyüdü, filialımızı açdıq. Respublikamızda brend olan diş
klinikalarından biri olduq. Artıq 11 ildir fəaliyyət göstərir. Nəhayət 900 kv
metr ərazidə yerləşən bir klinikanın açılışı oldu, 4 aydır fəaliyyət göstərir.
Bu hədəfə çatmağımıza yardım olan faktorlar çoxdur. Dürüst olmalı, daim öz üzərində
çalışmalı, özünə sərmayə yatırmalı və s. Bir də insanın özünə inamı olmalıdır,
bu, irəli getməyə çox kömək edir”.
"Bu ay da 600 manat alım, gələn ay çıxaram”
deyirdim”
"15
illik iş təcrübəm var, onun cəmi 3 ilini xoşbəxt olmuşam. Çünki o müddətdə
sevdiyim işlə məşğul oldum”. "YÜZproduction”un
rəhbəri, aktyorTaleh Yüzbəyov çıxışına bu fikirlə
başladı. Bildirdi ki, o, komfort zonadan çıxmaq qorxusu üzündən uzun illər sevmədiyi
sahədə çalışıb: "Universiteti bitirəndən sonra müxtəlif işlərdə
çalışdım. Amma hər zaman bir arzum var idi, o da aktyor olmaq. Fərqli
sektorlarda işlədim və kommunikasiya sahəsinə gəlib çıxdım. Orda işə düzələndə
deyirdim ki, müvəqqətidir, 3 ay işləyib çıxacam. Teatrda 150 manat alırdımsa,
orada 600-700 manat maaş verirdilər. Bir növ həmin gəlir məni orada saxlayırdı.
"Bu ay da 600 manat alım, gələn ay çıxaram” - deyirdim. Belə-belə 6 il orada
işlədim. Düzü, çıxmağa qorxurdum, çünki komfort zonada idim. "Birdən buradan
işdən çıxaram, alınmaz” deyirdim. Bir gün o cəsarəti özümdə tapdım. Çalışdığım
şirkətdən kiçik bir şirkətə daha çox maşa işimi dəyişdim. Çünki o mənim sahəmə
daha yaxın idi. Bir il orada işlədikdən sonra gördüm ki, bu da tam istədiyim
deyil, o zövqü ala bilmirəm. O cəsarətli addımı da atdım və bəxtəbəxt işdən
çıxdım. Subay olsaydım, daha az risk edərdim, amma iki övladım var idi. Ancaq
işdən çıxıb sevdiyim işlə məşğul olmağa başladım. O zamandan sonrakı 3 ildə xoşbəxt
oldum. Özünüzə inanırsınızsa, qorxmayın. Düzdür, qərarımı bir az gec verdiyim
üçün gənc sevgililəri oynamaq şansını itirdim (Gülür). İndi daha çox ata
rollarında oynayıram, amma yenə də sevdiyim sahədəyəm. Onu da deyim ki, artıq
bu da mənə maraqsızdır, çünki növbəti mərhələyə keçmək istəyirəm. Yenə o
qorxaqlıq var, amma məqsədim böyükdür. Ona görə cəsarətli bir qərar vermək
lazımdır”.
Və "Uğur
forumu” bitdi. Amma tədbirdə uğurlu olmaqla bağlı kifayət qədər faktorlar qeyd
olundu. Forum bitsə də, yəqin ki orda səsləndirilən fikirlər kimlərinsə uğuruna
vəsilə olacaq.
Aygün
Asimqızı