Novruz gəlir, turist də gələcəkmi?
Ekspertlər deyir ki, bayram vaxtı daha çox turist
cəlb etmək üçün festivalların sayı və şaxəsi genişləndirilməlidir
Hazırda
turizm ölkəmizdə prioritet sahələrdəndir. Bu sahədə görülən işlər nəticəsində
ölkəmizə gələn turistlərin sayı ildən-ilə artır. Ancaq son vaxtlar dünyada baş
verən proseslər turizm sektoruna da təsir edir. İranla Amerika arasındakı
gərginlik, Çində yayılan koronovirus turizm sahəsinə ciddi təsir göstərir. Onu
da nəzərə alaq ki, qarşıdan Novruz bayramı gəlir. Bu bayram ərəfəsində isə
turistlərin Azərbaycana həmişə axını olub. Ancaq 30 milyona yaxın
azərbaycanlının yaşadığı İrandakı gərginliyin Novruz turizminə təsir edəcəyi də
şübhəsizdir. Təbii, turizm sektorunda fəaliyyət göstərənlər də bu durumu nəzərə
almaq məcburiyyətindədirlər. İrandan və Çindən gələcək turistlərin sayında
azalma olacağı proqnozlaşdırılır. Amma bunu kompensasiya etmək üçün başqa
variantlar da olmalıdır axı. Elə biz də bu məsələni araşdırmağa çalışdıq.
Öyrənmək istədik ki, turizmçilərin məsələ ilə bağlı hansı variantları var,
nələr təklif edirlər.
"Luna
Travel” turizm şirkətinin direktoru Rəhman Quliyevinfikrincə, turizm xidmətində ən əsas rol
otellərin üzərinə düşür: " Turizm şirkətlərinin əsas vəzifəsi isə turist cəlb
etmək və turist axınını təmin etməkdir. Lakin otellər keyfiyyət cəhətdən aşağı
xidmət göstərsələr, artıq turizm şirkət və agentliklərinin əməyi boşa getmiş
olur. Çünki ən vacib məsələ təkcə turistlərin gəlişini təmin etmək deyil,
həmçinin də onları razı salıb ölkədə daha çox qalmalarını və sonralar da
gəlmələrini təmin etməkdir. Otellərin yüksək səviyyəli xidmət göstərməsi o
qədər əhəmiyyətlidir ki, hətta ölkənin nüfuzuna belə təsir edir. Əgər ölkəmizə
gələn hər hansı bir turist otel xidmətlərindən narazı qalsa, həmin ölkədə
xidmətin zəif olduğu qənaətinə gələcək və böyük ehtimal, növbəti dəfə
gəlməyəcək. Ona görə də, otellər hər bir turistə fərdi yanaşmalıdır.
Qarşılarına qoyduqları əsas məqsəd gəlir əldə etmək yox, insanlara yaxşı xidmət
göstərmək, oteli başqa regionlara tanıtmaq və ölkənin nüfuzuna müsbət təsir
etmək olmalıdır. Belə olan halda, həmin otel və ölkələrdə olmaq turistlərə də
maraqlı gələcək və təbii ki, razı da qalacaqlar”.
Koronovirusla
bağlı da danışan ekspert bildirdi ki, ümumiyyətlə, təkcə bizim ölkə deyil, bir
çox ölkə Çin bazarından olan axını dayandırıb: "Həm də Çin vətəndaşları da
ölkədən kənara çıxmırlar. Amma bunu turist axının azalması kimi
qiymətləndirmirəm. Bu, sadəcə axını dondurmaqdır və hətta daha əlverişlidir,
çünki insan sağlamlığı ön planda olmalıdır. Axın donduğuna görə, dərhal başqa
bir bazar axtarışına çıxmaq da məsləhət deyil. Məsələ burasındadır ki, biz
virusun başqa hansı bazarlarda ola biləcəyini əvvəlcədən təxmin edə bilmərik.
Xüsusilə də, Asiya ölkələrinin çoxunda bu virusa rast gəlmək mümkündür. Ona
görə də, Asiyada və ya digər bölgələrdə yeni bazar axtarışına tələsməməliyik.
Gələn turistlərə yüksək səviyyəli xidmət göstərmək və əsası, onları razı
salmağa çalışmaq, yeni turist axını təmin etməkdən daha yaxşıdır”.
Rəhman
Quliyev həm də qarşıdan gələn Novruz bayramı müddətində də turist cəlb etmək
üçün bəzi məsləhətlər verdi: "Mənim şəxsi tövsiyəm budur ki, festivalların sayı
və şaxəsi genişləndirilsin. Məsələn bizdə nar, xurma, çay kimi festivallar
keçirilsə də, onları daha ənənəvi hala salmaq lazımdır. Turistlər gələndə bizim
milli qidalarımızla, adət və ənənələrimizlə tanış olsun deyə, bunlar vacibdir.
Eləcə də, Novruzla bağlı tədbirlər keçirilməlidir. Məsələn, səməni və tonqal
festivallarının bir çox bölgəmizdə qeyd olunması yaxşı olardı. Təbii ki, yenə
otellərin üzərinə böyük məsuliyyət düşür, çünki turistlər üçün bu cür
tədbirlərin otel ərazilərində keçirilməsi əlverişlidir. Əlavə olaraq, daha çox
marağa səbəb olmaq üçün, şou-proqramlar və konsertlərdən ibarət tədbirlər də
keçirmək olar. Turistlər belə şeylərə çox önəm verir və qoşulmağa can atır. Son
olaraq təklifim budur ki, festivallar bir gün yox, bir neçə gün boyunca davam
etsin”.
AzərbaycanTurizmAssosiasiyasının icraçı
direktoru Əhməd Qurbanov bildirdi ki, Novruz bayramı Azərbaycanda
ənənəvi olaraq keçirilən bayram olduğundan, turizm üçün də hər zaman canlanma
yaradıb: "Hər il bu vaxtlar ölkədə turizm axını sürətlənir. Müxtəlif ölkələrdən
sırf bu bayramın keçirilməsini izləmək üçün turistlər ölkəmizə gəlir. Bu il də
turistlərin kütləvi şəkildə axınını gözləyirik. Turizm şirkətləri ilə
danışıqlarımız zamanı da bəlli olur ki, əsasən İrandan gələcək turistlərlə
bağlı sifarişlər verilir”.
Ekspert
turistləri cəlb etmək üçün lazım olan yeniliklərdən də danışdı: "Hər zaman
otellərlə danışıq zamanı onlara bildiririk ki, bayramı ərəfəsində Novruz
ab-havasını daha təntənəli şəkildə göstərmək lazımdır. Çünki turistlərin əsasən
ən çox gördüyü məkan oteldir. Burada həm Novruz atributlarının sayını artırmaq,
eyni zamanda milli folklor oyunları göstərmək olar. Otelin foyesində kosa,
keçəl, hətta milli geyimli insanların olması o ab-havanı daha da canlı şəkildə
turistlərə yaşada bilər. Bundan başqa, turizm şirkətləri ilə danışıqlarımız
zamanı turistlərə bu ab-havanı yaşadacaq məkanlar təşkil etməyə, festivallar
keçirməyə, Novruzun tarixi ilə bağlı geniş məlumat verməyə çağırırıq ki, ölkəyə
Novruza görə gəlməyən turist belə, bu bayramın möhtəşəmliyini görüb növbəti
illərdə də gəlsin. Nəinki İrandan, Avropadan və digər ölkələrdən ölkəmizə gələn
turistlərin sayını bu şəkildə artıra bilərik”.
Ə.
Qurbanovun sözlərinə görə, digər bir məsələ Novruz, ümumiyyətlə, müxtəlif
bayramlar ərəfəsində otellərin qiymətlərində artımın müşahidə edilməsi ilə
bağlıdır: "Düzdür, bu, normal bir haldır, bütün dünyada xüsusi günlərdə
otellərin qiymətində artım müşahidə edirik. Amma "kəllə-çarx” yox, normal
qiymətlərin olmasını tövsiyə edirik. İnanırıq ki, bu il keçən illərə nisbətdə
qiymətlərdə müəyyən tənzimləmələr müşahidə edəcəyik”.
Müsahibimiz
deyir ki, istər-istəməz, dünyada olan bu gərginlik ölkəmizə də təsir edəcək: "Müəyyən
qisim turistlər ümumiyyətlə, öz ölkəsindən kənara çıxmağa qorxduğu üçün
düşünürəm ki, turistlərin sayında bir az azalma olacaq. Əsasən biz növbəti
beşillikdə Çinli turistlərin ölkəmizə gəlişini prioritet olaraq sayırdıq. Amma
son dönəm baş verən hadisə bizi çox məyus etdi. Ona görə, düşünürəm ki,
ölkəmizə gələn çinli turistlərin sayı kəskin şəkildə azalacaq. Düşünürəm ki,
çinli turistlərin sayında azalma olacağı üçün ümumi turizm canlılığı da aşağı
düşəcək. Amma eyni zamanda, Avropadan gələn turistlərin sayında artım olacaq.
Bu da turizmin canlanmasına öz töhfəsini verəcək. Ümumi olaraq götürsək, keçən
ilə nisbətdə müəyyən qədər də olsa turistlərin sayında azalma müşahidə ediləcək”.
Günel
Azadə