Neft-qaz sənayesində yeni mühüm hadisə
Aydın Hüseynov: "Qarabağ” yatağı "Azəri”, "Çıraq”, "Günəşli”, "Şahdəniz”, "Abşeron” və digər strukturlar kimi zəngin enerji mənbəyidir
"Heydər Əliyev adına Bakı dərin özüllər zavodunda
"Qarabağ” yatağının dayaq blokunun dənizə yola salınması Azərbaycanın neft-qaz sənayesində yeni mühüm hadisədir. Dünyada pandemiayanın
geniş yayıldığı və əksər ölkələrdə neft-qaz sənayesinə investisiyaların
azaldıldığı bir dövrdə Azərbaycanın enerji sektorunda belə bir layihənin
icrasına başlanması uğurlu enerji siyasətinin nümunəsi hesab edilər bilər. Bu,
onu göstərir ki, Azərbaycanda nəhəng investisiya layihələri dayanmadan uğurla həyata
keçirilir, enerji sektorunda yeni axtarışlar və sərmayə planları əvvəlki tək
davam etdirilir”.
Bu barədə "Kaspi" qəzetinə açıqlamasında Milli Məclisin İqtisadi siyasət, sənaye və sahibkarlıq komitəsinin
üzvü Aydın Hüseynov bildirib.
O qeyd edib ki, neft sənayesində xüsusi yerə malik olan
"Qarabağ” yatağının dəniz işlərinə başlanılması neft istehsalında yeni bir mərhələyə start
verilməsi deməkdir. Deputatın fikrincə, bu yataq "Azəri”, "Çıraq”, "Günəşli”, "Şahdəniz”, "Abşeron” və digər strukturlar kimi zəngin enerji mənbəyidir.
Millət vəkili Aydın Hüseynovun sözlərinə görə, doğma yurdumuz Qarabağın adını daşıyan bu dayaq blokunun digər mühüm xüsusiyyəti ondan ibarətdir ki, Azərbaycan artıq
neftçıxarma sənayesində ən müasir texnologiyaları, avadanlıqları, dənizdə və
quruda yerləşən bütün istehsalat-quraşdırma sahələrində tətbiq edilən qurğuları
yerli istehsal hesabına təmin edir: "Respublikamız artıq neçə ildir ki, neft sənayesindəki
ən ağır dayaq blokalarını və platformaların tikintisini 100 faizi ölkə daxilində
həyata keçirir. Bu işlər beynəlxalq standartlara uyğun şəkildə tam modernləşdirilmiş
dünya səviyyəli istehsalat obyektləri olan Heydər Əliyev adına Bakı dərin özüllər
zavodunda həyata keçirilir. Bu gün "BOS Shelf” mərkəzləşmiş maddi-texniki və təchizat
bazasına malik yerli şirkət kimi ən yüksək
dünya standartlarına uyğun müasir texnologiyalardan istifadə edir, bloklar inşa
edir. Bu baxımdan "Qarabağ” dayaq blokunun
Bakı dərin özüllər zavodunda tikilməsi neft sənayemizin yüksək inkişafının göstəricisidir".
Deputat qeyd edib ki,"Qarabağ” layihəsi üzrə hazırlanan bu blok həm
ölçülərinə, həm də çəkisinə görə hazırlanan ən böyük sualtı konstruksiyadır və
neft çıxarmada ən müasir texnologiyaların tətbiqinə imkan verəcək: "Yeni dayaq blokunun
quraşdırılması "Qarabağ” yatağının dərin qatlarında neft və qaz hasilatının həyata
keçirilməsində böyük rol oynayacaq. 60 milyon tondan artıq neft ehtiyatına malik
olan bu yatağın istismara verilməsi Azərbaycanın neft strategiyasının daha
uğurla reallaşdırılmasına imkan verəcək. 2022-ci ilin sonunda ilk qaz və ilk
neft çıxarılmasə gözlənilən "Qarabağ” yatağı Azərbaycanda neft hasilatının
sabit qalması və qaz hasilatının artırılması üçün əhəmiyyət kəsb edir. Bu
yataqdan istehsal edilən ehtiyatlar Avropanın enerji təminatında mühüm rol
oaynayacaq, ölkəmizin neft gəlirlərinin artmasına böyük töhfə verəcək".
Rufik İSMAYILOV