“Nə status var, nə də Dağlıq Qarabağ”
Qarabağda cəmi 25 min erməninin yaşadığını bildirən
dövlət başçısı bu sayda insan üçün ayrıca statusun yaradılmasının məntiqsiz
olduğunu diqqətə çatdırıb
Azərbaycanda uğurla həyata keçirilən
sosial-iqtisadi siyasət müsbət nəticə verir. Pandemiyanın gətirdiyi çətinliklər,
karantin rejiminin tətbiqi, müəyyən məhdudiyyətlər fonunda belə, ölkə
iqtisadiyyatı inkişaf edir, hər hansı sosial layihə təxirə salınmır. Prezident
İlham Əliyevin iyulun 22-də Daşkəsən rayonuna səfəri çərçivəsindəAzərbaycan
Televiziyasınamüsahibəsində cari ilin altı ayının sosial-iqtisadi
yekunlarına dair səsləndirdiyi rəqəmlər də ölkə iqtisadiyyatının real mənzərəsini
əks etdirir. Belə ki, dünya ölkələrinin böyük əksəriyyəti iqtisadi tənəzzül
yaşadığı halda, Azərbaycanda ötən 6 ayda iqtisadi artım qeydə alınıb. Xüsusilə
qeyri-neft sektorunda 5 faizdən çox artım olub ki, bu, böyük göstərici olmaqla
bərabər, görülmüş işlərin əyani təzahürüdür.
Xarici ticarətdə müsbət
saldo
Həmin dövrdə sənaye istehsalı cəmi 0,3 faiz azalıb
ki, bunun da əsas səbəbi OPEC+ razılaşmasının yerinə yetirilməsidir. Bu müddətdə
qeyri-neft sənayemiz 16,6 faiz artıb və daha da artacağı proqnozlaşdırılır. Kənd
təsərrüfatında 5,6 faiz artım qeydə alınıb. Halbuki ötən il, hətta pandemiyaya
qədər kənd təsərrüfatında artım təqribən 3 - 3,5 faiz olub. Ölkədə ötən 6 ayda
inflyasiya 4,3 faiz olub, valyuta ehtiyatlarımız 1 milyard dollar həcmində
artıb. Azərbaycanda ümumilikdə valyuta ehtiyatları xarici dövlət borcundan təxminən
6 dəfə çoxdur. Qeyd olunan dövr ərzində ixrac 15 faiz, o cümlədən qeyri-neft
ixracı 27 faizdən çox artıb. Xarici ticarətimizin müsbət saldosu 3,4 milyard
dollardır. Əgər belə davam edərsə, cari ilin sonuna qədər müsbət saldo təqribən
6-7 milyard dollar olacaq. Onu da vurğulamaq yerinə düşər ki, inkişaf etmiş ölkələrdə
xarici borc o ölkələrin ümumi daxili məhsulunun 100 faizini, bəzən 120 faizini
təşkil edir, 50 faiz müsbət hal kimi sayılır. Amma Azərbaycanda bu, 19 faizdir
və daha da düşəcəyi proqnozlaşdırılır.
Quruculuğa açılan
yollar
Prezident İlham Əliyev müsahibəsində işğaldan azad
olunan ərazilərdə geniş miqyas alan quruculuq işlərinə də diqqət çəkib.
Bildirib ki, 44 günlük Vətən Müharibəsi bitəndən indiyə qədər ötən 8 ay ərzində
Bərdə-Ağdam, Zəfər, Füzuli-Şuşa, Horadiz-Ağbənd, Zəngilan-Qubadlı-Laçın,
Füzuli-Hadrut, Füzuli-Cəbrayıl yolları, Kəlbəcərə rahat çatmaq üçün Göygöldən
Ömər aşırımı üzrə yol, bunlardan başqa Kəlbəcər və Laçında ümumi uzunluğu 700
kilometrə yaxın hərbi təyinatlı yolların çəkilişinə başlanılıb. Qarabağ və Şərqi
Zəngəzurun cənnətə çevrilməsi üçün digər infrastruktur layihələrdən söhbət açan
dövlət başçısı deyib ki, azad olunmuş ərazilərdə hazırda 3 aeroport tikilir.
Ağdam, Füzuli, Cəbrayıl şəhərlərinin baş planları hazırlanıb, Zəngilan şəhərinin
isə baş planı hazırlanmaqdadır.
Dağlıq Qarabağdan
danışmaq yersizdir
Dağlıq Qarabağın statusu məsələsinə münasibət
bildirən Prezident İlham Əliyev deyib ki, nə status var, nə də Dağlıq Qarabağ.
O, Dağlıq Qarabağ Muxtar Vilayətinin 1923-cü il iyulun 7-də süni qurum kimi
yaradıldığını xatırladıb. Deyib ki, o vaxt sovet hökumətində təmsil olunan ermənilər
bu qanunsuz və heç bir əsası olmayan qərarı qəbul ediblər, Sovet Azərbaycanı da
məcbur olub bununla barışıb. Bunun tamamilə əsassız və süni şəkildə yaradılmış
bir qurum olduğunu diqqətə çatdıran Prezident İlham Əliyev vurğulayıb ki, Azərbaycan
parlamenti müstəqillik bərpa olunandan bir ay sonra - 1991-ci ilin noyabrında
Dağlıq Qarabağ Muxtar Vilayətini ləğv edib. Bildirib ki, bundan sonra Dağlıq
Qarabağ sözündən yalnız münaqişəyə görə istifadə olunub. Müharibə başa
çatandan, münaqişə öz həllini tapandan sonra isə Dağlıq Qarabağdan danışmaq
yersizdir. O, Azərbaycanda Dağlıq Qarabağ adlı inzibati ərazi vahidinin
olmadığını söyləyib. Təklif edib ki, əgər bu söz kimlərinsə xoşuna gəlirsə,
getsinlər öz ölkələrində Dağlıq Qarabağ adlı bir vilayət, rayon, cümhuriyyət
yaratsınlar.
Hüquqi, siyasi,
tarixi əsası olmayan iddia
Qarabağda cəmi 25 min erməninin yaşadığını bildirən
dövlət başçısı bu sayda insan üçün ayrıca statusun yaradılmasının məntiqsiz
olduğunu diqqətə çatdırıb. Qeyd edib ki, Amerikada bir milyona yaxın, Fransada
500 mindən çox erməni yaşayır. Təkcə Marsel şəhərində və həndəvərində 100 mindən
çox erməninin yaşadığını xatırladan Azərbaycan Prezidenti həmin ərazilərə hər
hansı statusun verilmədiyini vurğulayıb. Belə olan halda Azərbaycanda 25 min
adama status verilməsinin hər hansı hüquqi, siyasi, tarixi əsasının olmadığını
söyləyib.
"Bizim yanaşmamızda
fikir ayrılığı yoxdur”
Rusiya Prezidenti Vladimir Putinlə Moskvada
keçirdiyi görüş barədə fikirlərini bölüşən Prezident İlham Əliyev səfərin nəticələrini
müsbət qiymətləndirib. Qeyd edib ki, Rusiya və Azərbaycan strateji tərəfdaşlardır:
"Bu, sadəcə olaraq, söz deyil. Real həyatda da biz strateji tərəfdaşıq, çünki
uzunmüddətli strateji əməkdaşlıq perspektivləri ilə bağlı fikir ayrılığı
yoxdur. Bizim aramızda çox möhkəm dostluq əlaqələri var və şəxsən mənim cənab
Putinlə çox yaxın əlaqələrim var, biz bir-birinə inanan siyasətçilərik. Bu, çox
önəmlidir və bu səfər zamanı ikitərəfli məsələlərin gündəliyi müzakirə olundu.
Hazırda yeddi yol xəritəsi üzərində işləyirik. Hər bir yol xəritəsi konkret sahəyə
aiddir. Hər bir sahə üzrə də yaxşı nəticələr var. Bu dəfə daha çox ticarət,
iqtisadi, nəqliyyat, humanitar məsələləri müzakirə etdik. Nəqliyyat məsələlərinə
gəldikdə, əlbəttə ki, həm əvvəlki dövrdə razılaşdırılmış məsələləri, "Şimal-Cənub”
nəqliyyat dəhlizini, perspektivlərini, eyni zamanda, müharibədən sonra yaranmış
vəziyyəti, o cümlədən Zəngəzur dəhlizini və postmünaqişə dövrünü müzakirə
etdik. Bizim yanaşmamızda fikir ayrılığı yoxdur. Biz - Rusiya və Azərbaycan
hesab edirik ki, müharibə başa çatıb, münaqişə başa çatıb. Ermənistanda heç bir
revanşist meyillərə yol verilməməlidir və bundan sonra bölgədə sülh olmalıdır.
Müharibə riskləri minimuma endirilməlidir və aradan qaldırılmalıdır. Burada
bizim aramızda heç bir fikir ayrılığı yoxdur, biz də eyni fikirdəyik”.
Rufik İSMAYILOV