Müxalifətin marginallaşmış “dirijor”u
Azərbaycanda mütəmadi olaraq beynəlxalq tədbirlər, idman yarışları
reallaşdırılır. Hər dəfə də bu cür beynəlxalq tədbirlər ərəfəsində
anti-Azərbaycan şəbəkəsi özünün avantürist mövqeyinə "sadiq” qalaraq ölkəmizin
dünyada formalaşmış nüfuzunu hədəfə alır, şər, böhtan xarakterli çıxışlar edir.
Şəbəkənin ölkə daxilində fəaliyyət göstərən dəstəkçiləri də bu axına qoşulur. Söhbət
radikalların mütəmadi olaraq əsasız ittihamlar səsləndirən AXCP-nin "drijoru”
rolunda çıxış edən Əli Kərimli gedir. Partiya sədri olaraq fəaliyyəti ancaq
sosial şəbəkələrdə danışıb, fikirləri ilə özünü ifşa etməkdən ibarət olan bu
şəxs son günlərdə də əvvəlki ampluasındadır.
Azərbaycan Prezidentinin köməkçisi, professor Əli Həsənov da özünün məqaləsində
Əli Kərimlinin son açıqlamalarını haqlı olaraq tənqid edib: "Sən demə, dünyada
idman yarışları sırasında populyarlığına görə üçüncü sırada yerləşən Formula 1
səbəbindən avtomobillərin şəhərin mərkəzində hərəkətinin məhdudlaşdırılması
insanların "əsəbini tarıma çəkir”.
Təbii ki, bu, özünü siyasətçi adlandıran, partiya rəhbəri hesab edən
birisinə yaraşmayan, olduqca qərəzli yanaşmadır. Çox təəssüf ki, bəziləri
müxalifətçilik missiyasının əsl mahiyyətini başa düşmür və anlamırlar ki,
cəmiyyətdəki prosesləri, hadisələri yaxından izləmək imkanına malik və siyasi
cəhətdən kifayət qədər yetkin olan vətəndaşlarımız davamlı şəkildə bədbinlik
aşılayan, hər şeyi qara rəngdə, öz siyasi maraqlarına uyğun təsvir edən
insanların səmimiyyətinə inanmır”.
Bütün bunlar bir daha onu göstərir ki, radikal düşərgədə mövcud olan
müxalifətçilik anlayışı yalnız nifrət və kin üzərində qurulub. Bu insanlar hələ
də nəyə və kimə müxalif olduqlarını aydınlaşdıra bilmirlər
Mövzu ilə bağlı "Kaspi” qəzetinə açıqlamasında Milli Məclisin deputatı, politoloq Hikmət Məmmədov bildirdi ki, ölkəmizdə
keçirilən çoxsaylı beynəlxalq tədbirlərdən bəhs edərkən, heç şübhəsiz, "Formula
1”
yarışlarını da xüsusi qeyd etmək lazımdır: "Digər mühüm idman tədbirləri kimi
"Formula 1”
yarışları da Azərbaycan reallıqlarının dünyaya çatdırılması, ölkəmizin təbliği,
turist axınının güclənməsi baxımından olduqca mühüm əhəmiyyətə malikdir. Ən
əsası, bu cür beynəlxalq əhəmiyyətli və yüksək reytinqə sahib tədbirlər dinamik
inkişafa malik Azərbaycanın sabitlik adası kimi yüksək nüfuzunun
göstəricisidir. Heç şübhəsiz, Azərbaycanın parlaq nailiyyətlər qazanması,
beynəlxalq mövqeyinin möhkəmlənməsi, ölkəmizdə möhkəm əsaslara söykənən
sabitliyin, xalq-iqtidar birliyinin mövcud olması anti-Azərbaycan dairələr
tərəfindən böyük narahatlıq və qısqanclıqla qarşılanır. Ən çox narahatlıq
keçirən isə erməni lobbisi, işğalçı Ermənistan və onun havadarlarıdır.
Beynəlxalq anti-Azərbaycan şəbəkəsi son günlər yenidən fəallaşmağa başlayaraq
ölkəmiz əleyhinə qarayaxma kampaniyasına start verib. Bu, əlbəttə, təsadüfi
deyil. Erməni simpatizanı olan bu beynəlxalq şəbəkə islamofob mərkəzləri və
ölkəmizdəki "5-ci kolon” üzvlərini də səfərbər edərək Azərbaycanı gözdən
salmaq, onun beynəlxalq nüfuzuna zərbə vurmaq istəyirlər. Azərbaycandakı bəzi
radikal müxalif marginallar da ölkəmizin uğurlarının üzərinə kölgə salmaq,
ictimai şüuru manipulyasiyaya məruz qoymaq üçün müxtəlif cəhdlər edirlər”.
H.Məmmədov qeyd etdi ki, cəmiyyətdə heç bir nüfuza sahib olmayan,
antimilli mövqedən çıxış edən, siyasi autsayderə çevrilmiş Əli Kərimli də
anti-Azərbaycan dairələrin siyasi direktivləri əsasında ermənipərəst
mərkəzlərlə sinxron hərəkət edir, ictimai şüuru manipulyasiyaya məruz qoymaq
üçün absurd iddialar ortaya atır: "Anti-xalq və anti-dövlət xarakterli
çağırışlar səsləndirən bu marginal, antimilli şəxsin müxalifətçilik anlayışı
milli məqsədlərə xidmət edən missiya deyil, tam əksinə, milli maraqlarımıza
zərbə vuran alət kimi çıxış edir. Yəni, Əli Kərimli və onun kimi xüsusi missiya
yerinə yetirən bir qrup marginalın fəaliyyəti xalqımızın maraqlarına
hesablanmış siyasi fəaliyyət deyil, Azərbaycana qarşı cəbhə açmış mərkəzlərin
maraqlarının qorunması kimi qiymətləndirilə bilər.
Ə.Kərimlinin ictimai diqqətə çatdırmaq istədiyi fikirlər manipulyativ
xarakter daşımaqla yanaşı, elə 1990-cı illərin əvvəlində AXC-Müsavat cütlüyünün
ifadə etdiklərinin eynisidir. Bu, onun göstəricisidir ki, ötən 25 il ərzində
Azərbaycanda hər şey köklü şəkildə və müsbət istiqamətdə dəyişsə də, radikal
müxalifətin, Əli Kərimli kimilərin düşüncəsi, müxalifətçilik fəlsəfəsi
dəyişməyib. Əvvəlki illərdə olduğu kimi, marginal və dağıdıcı xarakterlidir.
Onun missiyası anti-Azərbaycan mövqedən çıxış etmək, funksiyası isə dağıdıcı
"ideya”lar vasitəsilə ictimaiyyəti manipulyasiyaya məruz qoymaqdır. ƏgərƏli Kərimli və digər marginalların müxalifətçilik anlayışı anti-xalq
və anti-dövlət mövqeyində olmasaydı, bütün dünyanın təqdir etdiyi inkişafımızı
və ölkəmizdə aparılan çoxşaxəli islahatları tənqid yox, təqdir edərdilər. Digər
tərəfdən, Əli Kərimli Azərbaycan xalqına və dövlətinə qarşı düşmən münasibətini
ört-basdır etmək üçün özünü cəmiyyətə fərqli siyasi simada, obrazda - "xalqın
maraqlarının müdafiəçisi” kimi təqdim etməyə çalışır. Azərbaycan cəmiyyəti Əli
Kərimli kimi şəxslərin hansı dairələrin direktivləri əsasında fəaliyyət
göstərdiyini, hansı məqsədlərə xidmət etdiyini yaxşı bilir”.
Millət vəkili Əflatun
Amaşov bildirdi ki, kimlərsə özünün siyasi uğursuzluğunu Formula-1-in
ölkəmizdə keçirilməsini tənqid etməklə ört-basdır edir, guya xalqın
mənafeyindən danışırmış kimi bəyanatlar verirlər: "Əlbəttə, bu sayaq
spekulyasiyalar özünü peşəkar siyasətçi adlandıran adamlar üçün yaraşmaz
haldır. Bu adamlar ötən illər ərzində müxalifətçiliyin nədən ibarət olduğunu
anlamayıblarsa, bundan sonra nəyə isə nail olmaları qeyri-mümkün görünür. Bizə
yalnız təəssüflənmək qalır”.
Ə.Amaşovun fikrincə, nəzərə almaq lazımdır ki, Azərbaycanda çoxsaylı
böyük idman tədbirləri keçirilməkdədir. Biz idman ölkəsiyik. Dünya bizi həm də
idman ölkəsi olduğumuz üçün tanıyır və dəyər verir. Gələn ay paytaxtımızda
futbol üzrə Avroliqanın finalı baş tutacaq. Azərbaycan 2020-ci ilin Avropa
çempionatının final mərhələsinin oyunlarının keçirildiyi ölkələrdən biri
olacaq. İndiyədək də çoxsaylı böyük miqyaslı idman tədbirləri
gerçəkləşdirmişik. Əlbəttə, bu tipli yarışlar istənilən halda müəyyən
diskonfort yaradır. O anlamda ki, yollar bağlanır, nəqliyyatın hərəkəti
məhdudlaşır. Biz insanlarımızın rahatlığını düşünməliyik. Ancaq zamanla bu
məhdudiyyətlərin aradan qaldırılması istiqamətində də təcrübə əldə edilir.
Tədricən zəruri infrastrukturu genişləndirir və gücləndiririk. Yaxşı yadımdadır
ki, bir vaxtlar yalnız Əl Oyunları Sarayımız var idi. Bu gün baxın, nə qədər
idman salonlarımız fəaliyyətdədir. Hər biri böyük idman tədbirlərini təşkil
etmək potensialındadır. Heç şübhəsiz, gələcəkdə Formula 1 üçün daha geniş
imkanlara malik olacağıq. Amma hesab edirəm ki, o imkanlara doğru yol bu gündən
başlanmalıdır”.
AZAD