Bakı 13°C
Meyvə tingləri nə vaxt əkilməlidir?
Payız fəsli meyvə tinglərinin əkilməsi üçün ən münasib vaxtdır. Meyvə bağı salanlar şaxtalar düşənədək bu işi başa çatdırmalıdırlar. Biz adətən meyvə tinglərini noyabr ayında əkirik. Yeni meyvə bağlarının salınmasına yarpaqlar töküləndən sonra başlamaq lazımdır. Payızda əkilən tinglərin qurumaq ehtimalı çox azdır və daha yaxşı inkişaf edir. Əlbəttə əkin prosesinin vacib şərtlərinə də əməl olunmalıdır.
Bu sözləriAZƏRTAC-ın bölgə müxbirinə müsahibəsində 40 ilə yaxındır tingçiliklə məşğul olan qubalı bağban Şirin İlyasov söyləyib.
Təcrübəli mütəxəssis ailə üzvlərinin köməyi ilə hər il minlərlə meyvə tingi yetişdirərək fermerlərə satır. Tinglər yerli fermerlərin əvvəlcədən sifarişi əsasında becərilir.
"Yazda da meyvə ağacları əkənlər var. Amma yazda əkilən tingi qoruyub saxlamaq çətindir. Əkinin düzgün dərinliyini bilmək də çox vacibdir. Dərinlik az olarsa, tingin kökləri qışda şaxtadan, yayda isə istidən məhv ola bilər. Çox dərinə əkiləndə də ağac quruyur, kökləri zəif inkişaf edir. Əkin zamanı ağacın kök və gövdəsinin bitişən hissəsi torpağın səthindən 4-5 santimetr hündürlükdə olmalıdır. Ağacı əkərkən köklərin çuxur boyu tam uzadılmasına, uclarının yuxarıya doğru əyilməməsinə diqqət etmək lazımdır. Ting çuxurun tam ortasında əkilməlidir. Çuxur doldurularkən torpağın yalnız münbit qatı istifadə olunmalıdır”, - deyə Ş.İlyasov bildirib.
Şirin İlyasov təsərrüfatında xaricidən gətirilən tinglərin artırılması ilə də məşğul olur. Amma mütəxəssis daha çox yerli sort meyvələrin becərilməsini məsləhət görür. Xarici sort meyvələri isə intensiv və ya superintensiv bağlarda əkmək daha məqsədəuyğundur.
Bağbanın bildirdiyinə görə, dekorativ ağacları ilin bütün fəsillərində əkmək olar. Amma bu ağacların şitilləri toxumdan əmələ gəlir. Yeni əkilən dekorativ ağacları şaxtalar düşənədək tez-tez suvarmaq lazımdır.
