“Mədəni irsi qorumaq hər kəsin borcudur”
"Fantaziya” Mədəni İrs Festivalı başa çatdı. Avropa İttifaqının Azərbaycan
nümayəndəliyinin dəstəyi ilə "2018-ci il Avropa Mədəni İrs İli" çərçivəsində
həyata keçirilən festival yaddaşlarda xoş izlərlə qaldı. Belə ki, on gün ərzində
Azərbaycan ictimaiyyəti bir-birindən maraqlı, maarifləndirici və eyni zamanda, əyləncəli
tədbirlər silsiləsini - konsertlər, sərgilər, dəyirmi masalar, konfranslar,
film nümayişləri, Bakının maraqlı və aşkar olunmamış küçələrinə bələdçi
turlarını... seyr etdi. "Fantaziya” festivalı Aİ-nin Azərbaycandakı nümayəndəliyinin
təşkilatçılığı və qurumaüzv dövlətlərin, xüsusilə Almaniya, Fransa,
Yunanıstan, Polşa, Xorvatiya, Hollandiya və Macarıstan səfirlikləri ilə əməkdaşlıq
çərçivəsində baş tutub. Xatırladaq ki, festivalın adı Bakıda XIX əsrin
sonlarında inşa edilmiş və Şərqlə Qərb üslublarının vəhdətini təqdim edən, məşhur
memarlıq incisi olan "Fantaziya” hamamından götürülüb.Avropa
İttifaqının Azərbaycandakı nümayəndəliyininrəhbərinin 1-ci müşaviri Denis
Daniilidis"Kaspi”yə
müsahibəsində festivalın keçirilməsinin məqsədi ilə yanaşı, gələcəkdə
qarşılıqlı əməkdaşlıq şəraitində görüləcək işlərdən də danışıb.
Müsbət və mənfi məqamlar
- «Fantaziya» festivalı böyük
marağa səbəb oldu. Belə bir festivalın
keçirilməsində məqsəd nə idi?
- Bildiyiniz kimi, 2018-ci il Avropa İttifaqında "Mədəni
İrs İli”dir. Bu səbəbdən Aİ ölkələrində, üzv dövlətlərdə bu tip tədbirlər
keçirilir. Azərbaycan da önəmli tərəfdaş olduğundan, tədbirlərdən birinin
Bakıda keçirilməsi qərara alınıb. Fikrimiz bəzi üçüncü dünya ölkələrində kiçik
və lokal tədbirlər keçirmək idi. Amma Azərbaycan yəqin ki, Aİ-yə üzv olmayan
yeganə dövlətdir ki, biz burada belə böyük miqyaslı festival keçirdik. Açığı,
bu ideya şəhərin gələcəyi və landşaftının dəyişməsi ilə bağlı xüsusi həssaslığı
olan bir neçə insanla görüşdükdən, fotoqraf və sənətçilərə qulaq asdıqdan və mənim
üçün Bakının sevimli yerləri olan Sovetski, "Fantaziya” hamamı, qonşuluğundakı
Kubinka və Sabunçu rayonunu ziyarət etdikdən sonra ağlımıza gəldi. Məncə, bu
yerlərin hamısının öz hekayəsi var və bir çox insanlar bunları müzakirə etmək
üçün platforma istəyirdi. Yerli tərəfdaşlarla, radio və TV nümayəndələri,
fotoqraflarla, İçərişəhərdə köhnə evlərdə yaşayan insanlarla, müxtəlif
institutlardan olan adamlarla etdiyimiz fikir mübadilələrindən sonra gəldiyimiz
son nəticə bu oldu ki, bizim kiçik tədbirlərdən daha çox bir festivala
ehtiyacımız var. Ona görə də biz bu "Fantaziya” ideyasını irəli sürdük. Festival Bakının mədəni irsinə marağı artırmaq və onu
qorumaq məqsədi daşıyırdı.
- Proqrama Bakının qədim hissəsinə – İçərişəhərə
səfər də daxil edilmişdi. Qonaqların təəssüratı necə oldu?
-
Təəssüratlar belədir ki, Bakı son illərdə iqtisadi inkişaf və çoxlu insanların
buraya daha yaxşı yaşayış yeri, iş, həyat tərzi axtarışı ilə gəlməsi səbəbindən
böyük dəyişikliklərə məruz qalıb. Buna görə də şəhər çox sürətlə inkişaf etdi və
bəzən bu inkişaf Bakı kimi multikultural və zəngin tarixə malik bir şəhərin mədəni
və tarixi irsinə zərər verdi. Sadəcə, Bakıda yox, digər bütün şəhərlərdə olduğu
kimi, bir yerdə sürətli inkişaf varsa, bu, daşınmaz əmlak sahəsində də yüksəliş
olacağı anlamına gəlir. Mülkiyyət icazəsi – bu o deməkdir ki, bu icazənin
verilməsi yollarında səhvlərin ortaya çıxması riski var. Və biz böyük ehtimalla
tikilməsi məsləhət olmayan yerlərdə tikilən hündür binaları görə bilirik. Köhnə
binalara əlavə mərtəbələrin artırılması binaların estetik görünüşünü pozur.
Buna baxmayaraq, deməliyik ki, Azərbaycan və Bakının bu sürətli inkişafı özü ilə
birgə pozitiv cəhətlər də gətirdi. Məsələn, bir çox binalar yenidən bərpa
edildi. Belə binalardan biri Maqsud İbrahimbəyovun malikanəsidir ki, bütün
detalları Heydər Əliyev Fondu tərəfindən bərpa edilib. Biz burada bir tədbir
keçirmək şərəfinə nail olduq. Məncə, bu, mədəni irsi qorumaq və bərpadan sonra
bu tikililərdən düzgün istifadə etməyin şəhər və onun sakinlərinə nə qədər
faydalı ola biləcəyinin nümunəsidir. Hesab edirəm ki, hər Avropa şəhəri kimi,
Bakının da yaxşı və pis təcrübələri var. Yəni qeydlərimizi mübadilə etmək çox əhəmiyyətlidir.
Biz Bakıdan çox şey öyrənə bilərik. Bakı da ola bilsin ki, bizim səhvlərimizdən
nəsə öyrənsin.
- Bu gün Bakı bir Avropa şəhəridir.
Eyni zamanda, biz şəhərin qədim ruhunu qoruyub saxlamağa çalışırıq. Ümumiyyətlə,
qədim şəhərin arxitekturasını bütövlükdə necə qorumaq olar?
-
Mən insanların unutmağa meyilli olduğu bir məqamı diqqətinizə çatdıracağam:
birincisi, irsi qorumaq hər kəsin borcudur. Ən vacib nöqtə budur ki, insanlar
bunun sadəcə, dövlət və bələdiyyələrin işi olduğunu düşünürlər. Əlbəttə ki, dövlət,
bələdiyyə və digər orqanların rolu var. Amma bu, eyni zamanda bizim də vəzifəmizdir.
Çünki siz görürsünüz ki, bu illərdə İçərişəhərdəki binalara balkonlar əlavə
ediblər – bu, tamamilə qanunsuzdur. Bunu edən bələdiyyə, yaxud hökumət deyil,
insanlardır. Bələdiyyələr indi durub, "bilirsiniz nə var? Siz qanunu pozdunuz,
bu düzgün deyil, bu, binaların estetikasını pozur, bunu etməməlisiniz” - deyə
bilər. Çünki İçərişəhər YUNESCO mirasıdır, buna görə də belə hallara icazə verilmir.
Bəziləri "hökumət belə etməməli idi" və s. kimi sözlər deyir, amma
estetikanı pozan vətəndaşlardır. Etməli olduğumuz birinci şey bunun hamımızın vəzifəsi
olduğunu başa düşməkdir. Mədəni irsi qorumaq hər birimizin borcudur. Biz bu
irsi qorumalıyıq, çünki o bizim kollektiv yaddaşımızı canlı saxlayır. Yoxsa biz
bütün bunları məhv etsək, tarixin müxtəlif dövrlərini özündə əks etdirən bu gözəl
şəhər ruhsuz və qəlbsiz bir yerə çevriləcək.
Bakıdan kənarda da bir tədbir
- Facebook səhifənizdə yaydığınız
fotoda növbəti "Fantaziya” festivalının keçirilməsi üçün yer axtarışında
olduğunuzu gördüm. Festival üçün yeni məkan hara ola bilər?
-
Biz bunu mədəniyyət naziri və digər orqanlarla müzakirə etdik. Çünki biz
Bakıdakı bütün fəaliyyətlərə çox diqqət verildiyini düşünürük. Bu, əlbəttə, çox
yaxşıdır, amma Azərbaycan sadəcə Bakıdan ibarət deyil və paytaxtdan kənarda da
çoxlu mədəni irs nümunələri və binalar var ki, onlara da diqqət yetirilməlidir.
Biz, əlbəttə, hər il Bakıda tədbirlər keçiririk, amma Bakıdan kənarda da bir tədbir
keçirməyə çalışırıq.
- Siz tez-tez Azərbaycanın regionlarına səfər edirsiniz. Bu günlərdə
Lerik və Lənkəran rayonlarında oldunuz. Eyni zamanda, Lənkəranda keçirilən "Çay, çəltik, sitrus festivalı”nda iştirak etdiniz.
Lənkərana ilk səfərinizin olmadığını nəzərə alsaq, təəssüratlarınıza nə əlavə
olundu?
-
Lənkəran çox maraqlı şəhərdir. Biz 2017-ci ildə "Avropa günü”nü Lənkəranda qeyd
etdik. Deyə bilərəm ki, bu, mənim üçün çox təsiredici idi, çünki biz bu tədbirləri
interaktiv şəkildə keçiririk və mən Lənkərandan gözəl təəssüratlarla ayrıldım.
Fikirləşirəm ki, bizim gələcək üçün planımız Avropa İttifaqına marağı olan
sakinlər, tələbələr, iş adamları, həm də digər insanlardan ibarət bir şəbəkə
yaratmaqdır. Fikrimiz hər il Azərbaycanın böyük şəhərlərində tədbirlər keçirməkdir.
Çünki məncə, bütün bu insanların keçirdiyimiz mədəni tədbirlərdə iştirakları
vacibdir. Bizim Bakıda çoxlu fəaliyyətlərimiz olub. Çünki burada yaxşı
ictimaiyyət var və məncə, çox insan Avropa İttifaqını mədəniyyətin təminatçısı
kimi görür. Amma biz bunu Bakıdan kənarda da etməliyik və tədricən edirik. Biz
Gəncə, Lənkəran, Şəki, Naxçıvan ilə başladıq. Gələn il daha çox yerlərə getmək
planımız var. Amma dediyim əsas fikir hər il bütün böyük şəhərlərdə ən azı bir
tədbir keçirməkdir.
Avropadan nə qədər çox turist gəlsə...
- Azərbaycan region olaraq və tərəfdaş
kimi Avropa İttifaqı üçün nə qədər maraqlıdır?
-
Məncə, birlikdə işləməli olduğumuz ən mühüm sahə insan əlaqələrinin
artırılmasıdır. Çünki siyasi və ticari sahədə əlaqələr irəliləyir. Dövlət
Turizm Agentliyinin strategiyasına görə, əsas marketlər Körfəz ölkələri, Türkiyə,
MDB ölkələridir, amma Avropa İttifaqı deyil. Amma məncə, biz bunu dəyişməliyik,
çünki fikirləşirəm ki, avropalı turistlər sonradan ölkənizə sadəcə əlavə turist
deyil, həmçinin Azərbaycanın mədəniyyəti haqqında öyrənməyə həvəsli olan
turistlər də gətirəcək. Və onlar Azərbaycanın Avropadakı elçiləri olacaq. Çünki
Azərbaycana gəlib narazı qayıdan turist görməmişəm. Onların hamısı çox razıdır.
Avropadan nə qədər çox turist gəlsə, bu, Azərbaycan üçün o qədər yaxşı reklam
olar. Bu, dünyadakı ən yaxşı turizm yarmarkalarında iştirak etmək kimi bir
şeydir. Çünki sizin çox yaxşı turizm məhsullarınız var. Əlbəttə, hər şeydə
olduğu kimi, burada da inkişaf etdirilməli məsələlər var. Biz bununla bağlı kömək
etmək üçün sizin yanınızdayıq. Amma Dövlət Turizm Agentliyinin strategiyasının
Avropanı da əsas hədəf marketlərdən birinə çevirməyə uyğunlaşması da önəmlidir.
- Aİ-nin gələn il üçün planları nədir?
-
Biz "Fantaziya”nı bitirəndən sonra gələn ilin işlərini planlaşdırmağa
başlayacağıq. Gələn il Şərqlə əməkdaşlığımızın 10-cu ilidir, biz bu yubileyə həsr
olunmuş tədbirlər keçirəcəyik. Həm də gələn il Avropa seçkiləri var. Bu seçkilər
çox önəmlidir, Çünki bu, yeni Avropa parlamenti və Avropa Komissiyasının
yaradılması demək olacaq. Gələn il Azərbaycanla yeni ikitərəfli saziş
imzalanacağına ümid edirik. Biz bu böyük hadisələrlə bağlı tədbirlər həyata
keçirəcəyik. Eləcə də Tolerantlıq festivalı təşkil edəcəyik. Mayda "Fantaziya”
festivalı, noyabrda Film festivalı nəzərdə tutulur. Sonra sizə dediyim bu böyük
hadisələr - Şərq tərəfdaşlığı, Avropa İttifaqının gələcəyi ilə bağlı debat və
böyük ehtimalla yeni sazişlə bağlı tədbirlər keçirəcəyik. Biz artıq bu məsələlərin
üzərində işləməyə başlamışıq.
Söhbətləşdi
Təranə
Məhərrəmova