Marqvelaşvili-İvanişvili gərginliyi artır
Gürcüstan prezidenti Georgi Marqvelaşvili "Rustavi-2” telekanalında
efirə gedən "Arçevani” (Seçim) verilişində hakim "Gürcü arzusu”nun qələbəsi ilə
nəticələnən parlament seçkilərinin nəticələrinə qiymət verib. Prezident hakim
partiyanın əldə etdiyi konstitusion çoxluqla bağlı bildirib ki, burada faicəvi
bir şey yoxdur. Lakin əlavə edib ki, triumfatorların bir sıra bəyanatları onu
ciddi şəkildə narahat edir. Söhbət prezidentin parlament tərəfindən seçilməsi
təklifindən gedir. Gürcüstan prezidenti qəti şəkildə buna qarşı olduğunu bəyan
edib. Onu da qeyd edək ki, Konstitusiyaya müvafiq dəyişiklik edilməsi təşəbbüsü
ilə seçkilərdən bir gün sonra parlament çoxluğunun rəhbəri Georgi Volski çıxış
edib. Ölkənin gələcəkdə daha da demokratikləşməsi ilə bağlı məsələlərdən
danışan deputat prezidentin səlahiyyətlərinin xeyli hissəsinin
məhdudlaşdırılmasının zəruriliyini deyib. O, bəyan edib ki, prezident simvolik
bir şəxsə çevrilməlidir, yəni yaxşı olardı ki, onu parlamentdə seçsinlər.
Gürcüstan prezidenti də deputatın fikirləri ilə bağlı telekanalda
gedən müzakirədə bildirib ki, bu tip bəyanatlar yalnız "ayrı-ayrı fiqurlar”
tərəfindən səslənə bilər. O, ümidvar olduğunu bildirib ki, bu tip bəyanatlar
elə bəyanat olaraq da qalacaq: "Prezidentin seçilməsi - gürcü xalqının
seçimidir. Əgər xalqı belə bir seçimdən məhrum etmək istəyirlərsə, onda bunun fundamental izahını da verməlidirlər - yəni
ortaya hər hansı bir sualın çıxmaması üçün bu addımın hansı səbəbdən atıldığı
əsaslandırılmalıdır. Bu addımın şəxsi ədavət səbəbindən atılmadığı təəssüratı
yaradılmalıdır”. Prezident bu məsələni genişləndirmək fikrində olmadığını
bildirərək, əlavə edib ki, "onun ideyası dözümlülükdür”. Şübhəsiz ki, prezident
fikir ayrılığı deyəndə, Gürcüstanın qeyri-formal lideri Bidzina İvanişvili ilə
aralarında bir müddət əvvəl yaşanan fikir ayrılıqlarını nəzərdə tutub. Həmin
fikir ayrılıqları tərəflər arasında ciddi ixtilafa yol açmışdı. Diqqət çəkən
başqa bir məqam prezidentin bu fikirlərini eks-prezident Mixail Saakaşviliyə
yaxınlığı ilə seçilən "Rustavi-2” kanalının efirində səsləndirməsidir. Bidzina
İvanişvilinin bu kanala münasibəti bəllidir. "Boz kardinal” və ona yaxın
şəxslər dəfələrlə telekanalla bağlı məhkəmə iddiaları qaldırıb. Əksəriyyət
telekanala qarşı qaldırılan iddiaların arxasında məhz onun dayandığını iddia
edirlər. Həmin iddialar qaldırılan zaman Marqvelaşvili müxalifətçi kanalı
dəstəkləyib. Lakin bununla yanaşı, elə onun efirindən Saakaşvili və partiyasını
kəskin tənqid edib. Bu dəfə də prezident telekanala dəstək nümayiş etdirib. Seçki
prosesini aktiv şəkildə işıqlandırdığına görə, kanala təşəkkür edib. Onun
sözlərinə görə, bu, seçki prosesinin demokratik axarda keçirilməsində mühüm rol
oynayıb. Dövlət başçısı əlavə edib ki, telekompaniyanın məsələsi qanun və
obyektivlik prinsipləri ilə həllini tapacaq. Bununla yanaşı, seçkilər mövzusuna
toxunan prezident əlavə edib ki, seçki dövründə ölkədə vəziyyət sabit və sakit
olub. Lakin eks-prezident Saakaşvili həddən artıq fəallıq göstərməsi ilə
vəziyyət dəyişmək üzrədir. O bildirib ki, Saakaşvilinin bəyanatları gərginlik
fonu yaradıb: "Özünün də dediyi kimi, ölkəyə ayaq bassa vəziyyət həddən artıq
gərgin ola bilər. Belə ki, onun barəsində hüquq-mühafizə orqanlarının
qaldırdıqları cinayət işi var və Gürcüstana ayaq basan kimi həbs olunacaq.
Nəticədə bizlər Ukrayna səfirliyinin nümayəndələrini dəvət etməli olacaqdıq və
diplomatik nümayəndəyə Odessa qubernatorunun ölkəmizin seçki prosesinə qarışmaq
hüququnun olmadığını başa salacaqdıq”. Ekspertlər bu fikirlərlə Marqvelaşvilinin
həm də "Rustavi-2” telekanalının fəaliyyətinə eyham vurduğunu deyirlər. Marqvelaşvili kanala eyham edib ki, eks-prezidentə
həddən artıq efir vaxtı verməklə, gərginliyin artırılmasına nail olublar.
Gürcüstan prezidenti müsahibəsində gürcü hakimiyyət orqanları
qarşısında duran aktual məsələləri də qeyd edib. Bu sırada isə əsas problem
kimi ölkənin iqtisadi vəziyyətini və ordudakı problemləri göstərib. Onun
sözlərinə görə, əmək bazarı çox ciddi problem kimi qarşıda durub. Əlavə edib
ki, vətəndaşlar iş axtarmaq məqsədilə ölkəni tərk edib, xaricə gedirlər.
Prezident hesab edir ki, vəziyyəti gərginləşdirən digər hal ölkənin milli valyutası
olan larinin dəyərdən düşməsidir: "Kiçik və orta biznesin inkişafında hər hansı
irəliləyiş nəzərə çarpmır. Makroiqtisadi göstəricilərin heç bir əhəmiyyəti
yoxdur. Belə ki, hamını düşündürən məsələ - iş axtarıb tapmaq, məsrəfləri
qarşılaşmaqdır”. O, problemlərin artmasında, larinin zəifləməsində təkcə
Mərkəzi Bankı günahlandırmağın əleyhinə olduğunu vurğulayıb: "Yalnız
iqtisadiyyat larinin sabitliyini müəyyən edir, Mərkəzi Bank yox. İqtisadiyyatı
isə hökumət müəyyən edir. Və mən də onun iqtisadi vəziyyətin yaxşılaşdırılması
üçün atdığı addımları dəstəkləyirəm”. Onun qənaətinə görə, cəmiyyət çox
tezliklə hakimiyyətin atdığı addımların bəhrəsini görəcək. Prezidenti ciddi
narahat edən məsələlərdən biri də ordudakı vəziyyətdir. Konstitusiyaya görə,
ali baş komandan statusunu saxlayan prezident həqiqi hərbi çağırışın tam
şəkildə bərpasının zəruriliyini vurğulayıb. Onun sözlərinə görə, bu məsələ
Təhlükəsizlik Şurasının iclasında müzakirə mövzusu olacaq: "Mən artıq müdafiə
naziri Levon İzoriya ilə bu barədə danışmışam. Sistemli qərarlar gərəkdir. İki
həftədən sonra baş tutacaq iclasda çağırış məsələsini müzakirə edəcəyik”. Qeyd
edək ki, bu ilin yazında, nazir Tina Xidaşeli istefaya getməzdən əvvəl orduya
payız çağırışını ləğv edib. Bununla da çağırışçıların sayı xeyli azalıb.
T.Xidaşelinin qənaətinə görə, bu, gürcü ordusunu NATO standartlarına
yaxınlaşdırmaq üçün zəruri addımdır.
Azər NURİYEV