Ölkəmizin turizm reytinqlərində ilk sıralarda olması təsadüfi deyil
Bu günlərdə
"TurStat" analitik agentliyi 2019-cu ilin may bayramlarında
turistlərin sayahəti üçün Müstəqil Dövlətlər Birliyi (MDB) ölkələrinin ən yaxşı
şəhərlərinin reytinqini hazırlayıb. Trend-in məlumatına görə, MDB şəhərlərinin
reytinqi may ayında turist səyahətlərinin təhlilinin nəticələri əsasında
hazırlanıb. Reytinq cədvəlinə əsasən, Bakı birinci yerdədir. Siyahı üzrə ilk
onluqda Minsk, Nur-Sultan (Astana), Yerevan, Alma-Ata, Daşkənd, Bişkek,
Kişinyov, Düşənbə, Aşqabad şəhərləri
qərarlaşıb. Analitik agentliyin məlumatına görə, turistlər may ayında MDB
ölkələrinə 3-5 günlük gəlirlər və gün ərazində 60-120 dollar pul xərcləyirlər.
Şopinq və alış-veriş səfərləri üçün turistlər daha çox Azərbaycanın paytaxtı
Bakını seçirlər.
Bəs görəsən agentliklər
reytinq siyahısı hazırlayarkən ən çox hansı kriteriyalara diqqət edirlər? Həmçinin
bu cədvəllər turistlərin səyahət edəcəyi ölkə seçiminə təsir edirmi?
Azərbaycan Turizm
Assosiasiyasının icraçı direktoru Əhməd Qurbanov bildirdi ki,belə reytinq cədvəlləri hazırlanarkən bir sıra məqamlar nəzərə alınır:
"Bunlardan ən başlıcası, ölkələrin turizm potensialıdır. Həmçinin mədəniyyət və
incəsənət abidələri, turizm istiqamətlərinin çoxluğu, ölkədə siyasi sabitlik
diqqətə alınır. Bütün bu məqamlar reytinq amillərinə ciddi təsir göstərir. Aydın
məsələdir ki, istənilən turist gedəcəyi ölkəni seçməzdən əvvəl müəyyən
araşdırmalar edir. Bəziləri bu zaman reytinq agentliklərinin statistik
göstəricilərinə nəzər yetirir. Yəni, reytinq cədvəllərində ön sıralarda olmaq
ölkəyə gələn turist sayına müəyyən qədər təsir göstərir. Reytinqi yüksək olan
ölkələr seçimlər arasında üstünlük təşkil edir”.
"Millenium TurizmKonqres DMC” şirkətinin rəhbəriRuslan Quliyev deyir ki, son
beş il ərzində müxtəlif məşhur reytinq agentlikləri tərəfindən verilən açıqlamalarda
ölkəmiz ön sıralarda yer alır: "Turizmin bütün istiqamətləri üzrə Azərbaycan
ilk üç sırada yer alır. Reytinq cədvəlləri tərtib edilərkən aidiyyəti qurumlar
adətən təhlükəsizlik məsələlərinə diqqət edir. Viza məsələsi, qida
təhlükəsizliyi, turizm potensialının genişliyi, infrastruktur məsələləri və
digər məqamlar mühüm əhəmiyyət kəsb edir. Bütün bu faktlar son nəticədə özünü
reytinq cədvəlində əks etdirir. Bəziləri bunun əhəmiyyətsiz olduğunu düşünsə
də, əslində heç də belə deyil. Çünki turistlərin böyük əksəriyyəti
agentliklərin açıqladığı rəsmi statistikaya etibar edir və öz seçimlərini bu
nəticələrə görə edirlər. Getməzdən əvvəl turist gedəcəyi ölkə haqqında
araşdırma edir. Düşünürəm ki, rəsmi açıqlamalarda Azərbaycanın turizmin
müxtəlif sahələri üzrə ilk sıralarda olması ölkəyə gələn turist sayına təsir
edir. Ona görə də öz mövqeyimizi daha da yaxşılaşdırmağa çalışmalıyıq. Bu
sahədə müxtəlif işlər görülə bilər. Əslində, bu, uzunmüddətli marketinq işi
tələb edir”.
"SKAL İnternational Baku” klubunun (Səyahət
vəTurizmPeşəkarları Beynəlxalq Assosiasiyası)
sədri,turizmüzrə ekspertCeyhun Aşurov qeyd
etdi ki, adətən agentliklər bu reytinq
cədvəllərini hazırlayarkən piar kampaniyalarını əsas götürürlər: "Bəzənsə,
turistlər arasında obyektiv sorğu təşkil olunur. Son illər ərzində Bakının MDB
məkanında turistlər tərəfindən daha çox tanındığı və sevildiyi aydın məsələdir.
Çünki ölkəmizin turizm potensialı kifayət qədər genişdir və son illər ərzində sözügedən
sahədə böyük nailiyyətlər əldə olunub. Hər il ölkəmizə gələn turistlərin sayında
ciddi artım müşahidə olunur. Onların əksəriyyəti ölkəmizdən razı qaldığını
bildirir. Bəzi turistlər hətta etiraf edir ki, gözləniləndən də daha yaxşı
xidmət və keyfiyyət var. Bakı müasir və tarixi şəhərdir. Burada Şərqlə Avropa
mədəniyyətinin nümunələrinə rast gəlmək olur. Bu da paytaxtımızı turistlər üçün
maraqlı edir. Son illər ərzində aparılan reklam kampaniyaları Bakını bir qədər
də populyarlaşıb. Məhz bu məqamlar özünü reytinq cədvəllərində əks etdirir.
Xəbər saytlarında, bloqlarda Bakının adının hallanması turistlərin bu şəhərə olan
marağını bir qədər də artırır. Bu mənada, reytinq cədvəlləri bizim üçün əhəmiyyət
kəsb edir və ölkənin turizm sənayesinin inkişafına müsbət təsir göstərir. May
ayının ilk günləri keçmiş MDB ölkələrində bayram günləri kimi qeyd edilir. Turistlər
öz tətilini səmərəli keçirmək üçün müxtəlif yaxın şəhərlərə getməyi üstün
tuturlar. Turizm şirkətləri həmin turistlər üçün müxtəlif tur-paketlər
hazırlaya bilər. Ölkəyə gələn hər bir turist burada olduğu müddətdə təkcə
Bakıda olmur, müxtəlif yaxın ərazilərə də getməyi üstün tuturlar. Onlar bizim
mədəniyyətimizi, milli mətbəximizi yaxından tanıyırlar. Biz çalışmalıyıq ki,
turistlərə öz ölkəmizi, mədəniyyətimizi düzgün şəkildə təbliğ edə bilək.
Əslində, bu bizim üçün yaradılan bir imkandır. Çünki hər bir turist canlı
reklam rolunu oynayır və önəmlidir. Onların paylaşdığı şəkillər, haqqımızda yazdığı
yazılar yüzlərlə, minlərlə insana təsir edə, fikir formalaşdıra bilir. Ona görə
də reytinq cədvəllərində öz mövqeyimizi daha da yaxşılaşdırmağa çalışmalıyıq”.
Şəbnəm