Kukla Teatrı Lənkəranda
Bu il 90 illik yubileyini qeyd edən Abdulla Şaiq adına Azərbaycan
Dövlət Kukla Teatrının yaradıcı heyəti növbəti humanitar aksiyasını başa
çatdırıb. Belə ki, teatr mövsümünün başa çatmasına baxmayaraq, Lənkəran şəhərinə
səfər edərək Vətən müharibəsi şəhidlərinin övladları üçün təşkil olunmuş növbəti
düşərgədə tamaşa ilə çıxış ediblər.
Kuklaçılar "YAŞAT” Fondunun və "ASAN Könüllüləri” Təşkilatının
birgə təşkilatçılığı ilə şəhid övladları üçün həyata keçirilən
"YAŞAT" düşərgəsi iştirakçıları üçün teatrın repertuarındakı səhnə
nümunələrindən olan "Şəngülüm, Məngülüm” tamaşasını göstəriblər.
Məşhur Azərbaycan xalq nağılı "Şəngülüm, Şüngülüm və Məngülüm”
əsasında hazırlanan tamaşaya teatrın rejissoru Anar Məmmədovun quruluş verib.
Mono kukla tamaşasının quruluşçu rəssamı İqbal Əliyev, bəstəkarı əməkdar artist
Elza Seyidcahandır. Tamaşanın mahnı mətnləri Mikayıl Müşfiqin xalq nağılı əsasında
yazdığı «Şəngülüm, Şüngülüm və Məngülüm» mənzum nağılından seçilib. Klassik
üslubda səhnə tərtibatı verilən tamaşada müxtəlif kukla texnikaları tətbiq
olunub. Belə ki, ifaçı həm parket, həm də əlcək kuklalardan istifadə etməklə səhnədə
altı obrazda - Nağılçı, Dəmirçi, Ana keçi, Şəngülüm, Məngülüm və Canavar –
çıxış edir. Tamaşanın ifaçısı sevilən aktrisa Ülviyyə Əliyevadır.