Kitab çıxarsam, bütün dünyada satılar
Müsahibimiz dinləyicilərin sevimli radio aparıcısı, Çiçək adı ilə
tanınan "Araz radiosu”nun baş redaktoru Şəhla Vakkasdır. Şəhla xanım həm də Azərbaycanda
ən çox şeir oxuyan, ədəbiyyatı sevən aparıcılardan biridir. Onunla poeziya
barədə söhbət etdik:
– Şəhla xanım, siz çox şeirlər səsləndiribsiniz. Bu şeirlərin içərisində sizin düşüncənizi, həyatınızı, yaşamınızı daha çox ifadə edən hansı şeirlər olub?
– Qənirə Paşayevanın şeirləri. Onun şeirləri mənim ruhuma daha yaxındır.
Söhbətləşdi: Fərid Hüseyn
– Şəhla xanım, siz çox şeirlər səsləndiribsiniz. Bu şeirlərin içərisində sizin düşüncənizi, həyatınızı, yaşamınızı daha çox ifadə edən hansı şeirlər olub?
– Qənirə Paşayevanın şeirləri. Onun şeirləri mənim ruhuma daha yaxındır.
– Bəs şeirin tipi olaraq?
– Sevgi, ayrılıq şeirləri. Nədənsə ayrılıq şeirini səsləndirməyi daha
çox sevirəm. Daha çox hiss etdirə bilirəm. Xoşbəxtlik, sevinc haqqındakı
şeriləri səsləndirməyi bir o qədər də sevmirəm. Bəlkə də, mən özüm dərk edə
bilmirəm. Ruhum dərk edə bilmir. Qənirə xanımın şeirlərini çox sevirəm. Qənirə
Paşayevanın şerlərini sevməyimin əsas səbəbi eşqdən yazmasıdır. Eşq... eşq...
eşq... Və ən sonda insan oğlu anlayır ki, əslində, bu dünyadakı eşq heç bir
şeydir. Yəni əsl eşq "O"na – Allaha ünvanlanan eşqdir. Qənirə
Paşayeva mənim düşüncə dünyama daha yaxın şairdir. Nədirsə bilmirəm, onun
şeirlərini çox bəyənirəm. Ruhum onun yazdıqlarını daha yaxşı, daha yaxın hiss edir.– Oxuduğunuz şeirlərin çox vaxt müəllifi bilinmir, qeyd etmirsiniz.
Buna səbəb nədir?
– Əslində, mən də arada şeir yazıram. Amma öz yazdıqlarımı heç vaxt
səsləndirməmişəm... Niyəsini bilmirəm, amma oxumamışam. Məsələn, mənə deyirlər
ki, Qənirə xanımın şeirlərini çox gözəl oxuyursunuz. Sanki bir-birinizi
tamamlayırsınız. Sona xanım Vəliyevanın da şeriləri ruhuma yaxındır. İnsan var
ki, şeir kitabını götürür, bütün şeirləri bir-bir oxuyur və deyir ki, hə,
hamısı gözəldir. Amma mən belə deyiləm. Mən bir kitabda, bəlkə, iki şeirə, və
ya üç şeirə vurğun olaram, vəssalam. Yəni mənəvi dünyama uyğun olmayan şeiri
oxumaq mənə çətindir. Bəzən xahiş edirlər ki, bir şeir yazmışam, nə olar, bunu
oxu da. Çox vaxt da tanınmış insanlar xahiş edir. Nəzər salıb deyirəm ki, oxuya
bilmirəm. Yəni o şeirin ruhuna girə bilmirəm, şeiri hiss edə bilmirəm. Xahiş
edirəm ki, başqa şeirlərini yollasın. Yəni sırf səsləndirmək xətrinə şeir
oxumaq mənlik deyil. Məsələn, son zamanlar az şeir səsləndirirəm. Niyəsini
soruşurlar. Deyirəm ki, alınmır. Nəsə qəlbdə bir şey var ki, onu tapa bilmirəm.
O ki qaldı müəllifin adını səsləndirməyə, bəzən proqramda şeiri oxuyursan,
ardınca mahnı səslənir. Şeir bitən kimi "bu şeir filankəsə aiddir” deməyin,
insanları sanki şeirin ab-havasından çıxardır. Düzü, gərək veriliş
başlamamışdan əvvəl deyim ki, şeiri oxuyanda müəllifini adını altdan yazın.
Özümün verilişim vardı – "Çiçəkli dəqiqələr", orda müəllif adları
yazılırdı. Rəhmətlik Bəxtiyar Vahabzadə də məni çox istəyirdi. Di gəl ki, onun
şeirlərini oxuya bilmirəm. Soruşsanız niyə, deyərəm ona görə ki, Bəxtiyar
müəllimin şeirlərin Əminə Yusifqızı oxuyub. Mən "Bir salama dəymədi” şeirini
necə oxuyum, necə səsləndirim?! Mən kiməm ki?! Əminə Yusifqızı o qiraətə elə
bir möhür qoyub ki, mən o şeirin adını belə çəkməyə qorxuram. Bilirsiniz,
əslində, bu işdə mən özümü çox zəif, həvəskar hesab edirəm. Kimlərsə məni Əminə
Yusifqızı və ya dəyərli qiraətçilərimizlə müqayisə edirsə, eləməsin. Mən
həvəskar bir qiraətçiyəm.– Sizcə, Sovet dövründəki
qiraətlərdə pafos həddən artıq deyildi ki?
– Fikir veribsinizsə, indi şeirlərin yazılış qaydası da dəyişib.
Məsələn, sizə səmimi olaraq bir şey deyim. Mən hansısa bir şairin qrammatik
cəhətdən hər şeyi yerli-yerində olan, düzgün bir şeirini oxuyuram, baxırsan ki,
o heç bəyənilmir, sevilmir. Amma adi, bir-birinə uyğun olmayan bir şeiri
oxuyuram, bu şeir insanlara daha çox xoş gəlir. Bilmirəm nədəndi bu... O ki
deyillər ki, mahnılarda bayağılaşma gedir, əslində, o bayağılaşma prosesi
şeirlərdə də gedir. Axı mahnıların da sözü şeirdi. Fikir verirəm ki, dinləyici
çətin mahnıya qulaq asmaq istəmir. Məsələn, "sən məni öldürdüm, o biri
dünyada görüşərik"... Bax, bunu istəyir dinləyici. Çox dəyərli bir şairin
şeirini oxuyanda, baxırsan ki, hər sözü yerindədir, gəl ki, insanlar onu
sevmirlər. Kimsə gecə sevgilisindən ayrılır və oturub sadə bir şeir yazır. Mən
də həmin şeiri oxuyum, camaat bəyənəcək, soruşacaqlar ki, o şeiri hardan tapıbsan?
Bax, bu məsələ də var. Bəzən bizi qınayırlar. Deyirlər ki, niyə o boyda
şairlərimiz var, sənətkarlarımız var, onların şeirlərini səsləndirmir, dünən
şeir yazmağa başlayanların şeirini oxuyursan. Məni qınamayın! Özünüzü qınayın!
Mən və yaxud da bir başqası, yaxşı şeir səsləndirəndə, mahnı oxuyanda ona
dəstək olun, sevin, bəyənin, "like” eləyin, dəstəkləyin ki, biz də yaxşı
şeiri təbliğ edək. Zaman nəyi tələb edirsə, biz sənət adamları məcburuq onun
dalınca getməyə. – Sizin üçün şeir nədir. Yəni
həyatınız üçün nə dərəcədə əhəmiyyətlidir, şeir olmasaydı həyatınızda, nə
dəyişərdi?
– Maraqlı sualdır. Şeir olmasaydı, yəqin ki, mən bu qədər
tanınmazdım. İkincisi, şeir, musiqi bir az mənim üçün ağır dünyadır. Və mən
özümü həmin dünyaya qədərindən çox salmaq istəmirəm. Əvvəllər şeirə çox
qapılırdım. Amma indi çox da qapılmaq istəmirəm. Çünki daim o ruhda yaşamaq
olmaz.– Təsəvvür edək ki, "dünyanın
əlindən” şeirləri alıblar, şeirsiz dünya necə olardı?
– Şeir olmasaydı, mahnı olardı, yaxud da rəssamlıq. Yəni hər halda,
incəsənətin bir növündə özümü tapardım. Çünki bəzi insanlar sənətlə rahatlıq
tapırlar. Məsələn, insanlar var ki, ömrü boyu bir romantik mahnıya qulaq
asmasa, teatra, kinoya getməsə, nə bilim, musiqiyə qulaq asmasa, onun
dünyasında heç bir şey dəyişməz. Amma mən belə doğulduğum, anam da sənət adamı
olduğu üçün incəsənəti sevirəm. Mənim anam müğənnidir. Atam onu oxumağa
qoymayıb. Anam da makiyaj etməyi öyrənib. O da, əslində, bir incəsənətdir. Anam
qəlbindəki boşluğu beləcə doldurmağa çalışır. Yəqin mənim də həyatımda şeir
olmasaydı, rəssam, yaxud vizajist olardım. Oğlumun doqquz yaşı var. İstəyirəm
ki, dərslərini oxusun. Oxuyur. Amma fikir verirəm ki, onun fikri-zikri
incəsənətdədir. Mənə deyir ki, icazə ver videolar çəkim, "youtube"a
yerləşdirim, onu eləyim, bunu eləyim. İstedad, incəsənət aşiqliyi insanın
canında əzəldən olur. İnsanlar var ki, müəyyən işlərdə şöbə rəisliyinə qədər
yavaş-yavaş qalxır, hansısa bir idarədə hansısa vəzifəyə qədər pillə-pillə
qalxır. Bir gün hər şeyi atıb incəsənətə gəlir. Soruşursan ki, niyə belə etdin?
Deyir ki, sənət mənim ürəyimdə qalsa, partlayaram, ölərəm. Bəyəm idarələrdə
çalışan insanların – rəislərin, nazirlərin arasında yoxdurmu incəsənətə meylli
olanlar? Var, əlbəttə! – Bəzən gündəlik tələbat malı,
yaxud hansısa material haqqında reklam mətnini də şeir kimi səsləndirirsiniz...
– Bu hal, mənim beynimlə əlaqəlidir. Məsələn, sponsoru reklam edirəm,
bir də baxıram ki, sözlər beynimdə qafiyələndi. Əslində, qəsdən belə etməyə
çalışmamışam. Sadəcə, bu, həmin anda beynimə, fikrimə gələn bir şeydir. Çox
vaxt reklam mətnini oxuyandan sonra efirdə qulaq asanda deyirəm: "Aaa, nə
qəşəng qafiyə oldu!"– Sizə şeir həsr edənlər
olubmu, olubsa nə dərəcədə uğurlu alınıb?
– Şeir də, mahnı da həsr edənlər olub. Amma onlara o qədər də
möhtəşəm əsərlər demək olmaz. Mən daha çox başqalarının hisslərini yaşatmağı
sevirəm. – Sizin oxuduğunuz şeirləri
şəxsləndirirlərmi, yəni oxuduğunuz şeirlərin sizin özünüzlə bağlı olduğunu
deyənlər olurmu?
– Olur, bəli. Mən insanları qınamıram. Təsəvvür edin ki, həyat
yoldaşım şeir üstündə mənimlə dalaşırsa və onda qısqanclıq yaranır deyə, bir müddət
şeir oxumuramsa, başqalarını, eyni fikirdə olmasına görə necə qınayım?! Bəlkə
də, şeir oxuyanda yazılan duyğunun içinə o qədər girirəm ki, dinləyicilər bu
qədər səhv anlayır. – Sizə şeir oxumağın qadağan
edildiyi bir dövr olub. Həmin vaxt hansı hissləri keçirdiniz və şeirdən ötrü
çoxmu darıxırdınız?
– Ailəm mənim üçün çox dəyərli olduğu üçün dözürdüm. Düşünürdüm ki,
bir müddət oxumasam, heç nə olmaz. Amma onda da, boş dayanmırdım, yazırdım.
Bilirsiniz nəyi sevmirəm? Harasa bir məclisə gedirsən, dost-tanış deyir ki, bir
şeir oxu da. Deyirəm ki, belə əyləndiyimiz, gülüb-danışdığımız yerdə
birdən-birə şeir oxumaq olar? İzah edirəm ki, mən gərək o havaya girəm, onu
hiss eliyəm. Əvvəllər hansısa müğənnini çağırıb deyəndə ki, oxu, bir zümzümə
elə, o da qayıdıb deyəndə ki, o abu-havada deyiləm, başa düşmürdüm. Sonralar
dost məclislərində məndən şeir oxumağı xahiş edəndə başa düşdüm ki, müğənnilər
onlardan hər vədə mahnı istəyənlərin əlindən nə çəkirmişlər.– Şeiri sevmək keçmişi
unutmamağın əlamətidir, nostaljiyə aludəliklə bağlıdır deyirlər. Bu fikirlə
razısınız?
–Şeir yazan, şeiri ürəklə səsləndirən, insanların keçmişində mütləq
nəsə var. Və o hər nədirsə, mütləq əlçatmaz olmalıdır. Leyli və Məcnun kimi.
Əgər qovuşmaq varsa, inanmıram ki, orda möhtəşəm bir şey ortaya çıxsın. Bu da
bilirsiniz necə bir şeydir?! Hər sevgi şeiri oxuyanda və ya yazanda gedib həmin
o yerdə qalmırsan. Bu, platonik duyğudur. Hamının həyatında imkansız eşq var.
Amma sağ olsun o imkansız, o əlçatmaz. Çünki o olmasa, yazan da, oxuyan da,
dinləyən də olmaz. İnanırsınız, hətta bəzən dost-tanış olur ki, həyatında hər
şeyi - pulu, imkanı var, istədiyi yerə gedə bilir, yəni maddi cəhətdən təmin
olunub. Amma deyir, bir sevgi istəyirəm ki, məni süründürsün. Qıraqdan baxanlar
deyir ki, dəlidir bu. Amma mən onu başa düşürəm. O, həyatında stimul, həyəcan,
adrenalin istəyir.– Yazdıqlarınızı nə vaxtsa üzə
çıxarmaq fikriniz var?
–Bu yaxınlarda kitablarla bağlı, daha doğrusu, çox oxunan kitablar
haqqında araşdırma aparırdım. Maraqlıdır ki, çox oxunan kitabların müəllifləri
hər zaman "yazmayım-yazmayım" deyib, tərəddüd edən, sonda bir anın
içində qərar verərək kitablarını ortalığa çıxaranlardır. Bu yaxınlarda düşündüm
ki, bəlkə, bir kitab çap etdirim. Sonra dedim ki, yox, hələ tezdir. Səbəbi də
budur ki, qorxdum! Amma elə bir kitab çıxarsam, bütün dünyada satılar. Mən buna
əminəm. Niyə əminəm? Sadəcə, yazdıqlarımın duyğusuna çox inanıram. Amma hələ
kitab çap etdirmək üçün cəsarətimi toplaya bilmirəm, qorxuram. – Qorxmağınızın səbəbi nədir?
– Əgər kitab yazırsansa, gərək hər şeyi düz yazasan. Nöqtəsinə,
vergülünə kimi düz yazasan, səmimi yazasan. Hər bir duyğunu yazmalısan,
gizlətməməlisən. Hisslərini gizlədən müəlliflərin kitabları satılmır. Deyirlər,
qadın kitab kimi olmalıdır, ölənə qədər onun hər səhifəsini oxumalısan. Amma
qadın elə olmalıdır ki, öləndə belə son bir səhifəsini saxlasın. Onu da oxuyub
bağlayasan. Yəni qadın marağını və sehrini itirməməlidir. Tutalım ki, bunu
kitaba yazdım. İnsanlar bunu üç gündə, bir həftədə oxudular. Yəni kitabım çap
olunsa, mənə olan maraq itəcək. – Nüsrət Kəsəmənli ilə
davanızın tarixçəsinə qayıdaq...
– Nüsrət Kəsəmənli ilə tanışlığımız dava ilə başlamışdı. Mən on üç
yaşımda efirə çıxmağa başladım. O zaman Türkiyə türkcəsində danışırdım. O vaxt
üçün bu, bir yenilik idi. Nüsrət Kəsəmənlinin həmin dövrdə qəzetlərdə ardıcıl
yazıları çap olunurdu. Və bəzi yazılarında məni tənqid edirdi. Mənə də bunu
deyirdilər. O vaxt məni pisləyən, tənqid edən jurnalistlər qəzetdəki yazılarını
gətirib göstərirdilər. Cavabında deyirdim, canınız sağ olsun. O vaxtlar yaşım
az idi. Mənim həddim nə idi ki, kiməsə cavab qaytaraydım?! İkincisi də ki,
Nüsrət Kəsəmənli ilə bağlı olan söz-söhbət çıxanda, mən Bakıda nənəmlə
qalırdım. Atam-anam zəng vurub dedi ki, birdən cavab qaytararsan, bir söz deyərsən
ha! Olmaz! O səndən böyükdür. Nə yazır-yazsın! Dedim yaxşı. Heç yadımdan
çıxmaz, bir gün o vaxtlar "Sara” radiosu vardı, oranın rəhbəri məni otağına
çağırdı. Mən də uşaq idim, rəhbərlik heç vaxt da məni yanına çağırmamışdı.
Narahat oldum ki, yəqin, efirdə nəsə demişəm, nəsə baş verib ki, məni çağırırlar.
Qapını döyüb içəri girdim. Gördüm Nüsrət Kəsəmənli oturub. İçimdə bir qorxu
yarandı. Uşağam axı. Dedim, görəsən, mənə nə deyəcək. Az qalmışdı ki, məni
ağlamaq tutsun. Nüsrət müəllim baxdı mənə, əlini üzünə tutub dedi: "Sən
uşaqsanmış ki!" Beləcə, dava bitdi. Nüsrət Kəsəmənlinin də şeirlərini çox
sevirəm. Söhbətləşdi: Fərid Hüseyn