Kin-küdurət və qisasdan qida alan ambisiyalar
"AXCP sədri Əli bəyi getdikcə dərinləşən təlaş
və narahatlıq içində görürəm. Cəmiyyətdə hər kəsin öz işində və qayğısında
olduğu vəziyyəti inqilab ərəfəsi adlandırır, xalqın
bu gün-sabah qalxaraq hər şeyi taran edəcəyini iddia edir, xəyalən bir neçə
milyon insanı küçə və meydanlarda, özünü isə bu gücün real sahibi olan qeyri-rəsmi prezident postundakı
kimi göstərməyə çalışır”.
Bu barədə siyasi şərhçi Aydın Quliyev "Facebook”
səhifəsində yazıb.
O qeyd edib ki, öz yazdıqlarına və dediklərinə, getdiyi yolun birmənalı sonluğuna tərəddüdsüz
inanan partiya rəhbəri əslində tam fərqli ampluada olmalı olduğu halda, Əli Kərimli aqressivləşir, soyuq və real mühakiməni itirir, olanlarla arzu edilənlər arasındakı fərqi, tərəfdarlarının taleyi üçün məsuliyyət
hissini itirir. A.Quliyevin qənaətində, AXCP sədrinin indiki emosional-siyasi durumunu müəyyən edən çox ciddi səbəblər var. Onun yazdığına
görə, bu səbəblər indiki vəziyətlə və tarixlə bağlı
olduğu üçün konyuktur-tarixi səciyyə daşıyır.
Əbülfəz Elçibəyin əleyhinə gizli fəaliyyətlər
Siyasi şərhçi AXCP
sədrinin narahatlığının və tövşüməsinin səbəblərini qeyd edib: "Sözsüz ki, səbəblər 1993-cü ildə hakimiyyətin itirilməsindən
bu günə qədərki 26 illik dövrdən kənarda deyil. Əli bəy bu 26 ildə siyasət meydanında nələr
itirdiyini düşündükcə havalanır, üstəlik uğur sayılacaq nəyinsə olmaması onun təlaşını
daha da artırır. Daha konkret yanaşaq. Əli bəy nələri itirdi və hara gəlib çıxdı? Əvvala, rəhmətlik Əbülfəz bəydən xalq cəbhəsinin vahid liderliyinə xeyir-dua ala bilmədiyi üçün təşkilat bir neçə yerə
parçalandı və Əli bəyin hətta bir partiyanın birliyini qoruya bilməyəcək qədər
bacarıqsız rəhbər imicinin ilk əsasları yarandı. Hələ sağlığında Elçibəyin əleyhinə bəzi gizli
fəaliyyətlər içində olmasına dair söz-söhbətlər onun öz təşkilat liderinə xəyanət
edən şəxs imicinin də yaranmasına səbəb oldu. Ötən əsrin 90-cı illərinin ortalarından
başlayaraq Heydər Əliyevin yaşlı olması üzərində qurduğu planlar puç oldu. Əli bəy o zaman ağ köynək və qara qalstuk
vurmağı bacaran nisbətən ən səliqəli müxalifət lideri kimi hakimiyyətin həndəvərində
dolaşdı, bir neçə çağırış deputat mandatları aldı, halbuki deputatlığa ondan çox layiqli müxalifət
rəhbərləri var idi, məhz
hakimiyyətin dəstəyi ilə mandata sahibləndiyini xalqdan gizlədə bildiyini xəyal
etdi. Planları bu idi ki, Heydər Əliyevin fiziki sonluğu yetişən kimi
hakimiyyətin ən loyal müxalifəti olaraq prezidentliyə hamıdan dəstək alsın”.
Qərb dövlətlərinə bəslənən çoxillik ümidlərin puç olması
A.Quliyev yazıb
ki, Prezident İlham Əliyev
2003-cü ildə AXCP sədri Əli Kərimlinin bu çoxillik xəyallarını tar-mar edib: "Fikir verirsinizsə, bəyin radikallaşması məhz bu tarixdən
başlayır. Dördüncü, İlham Əliyevin hakimiyyətinin cəmi bir neçə
il davam edəcəyinə bəslədiyi ümidlər də alt-üst oldu.Bu illər ərzində digər
müxalifət rəhbərlərini seçkidən seçkiyə qabağa verərək sonda hamını sıradan
çıxarmaq, ortada tək şanslı
lider kimi qalmaq planı daha rüsvayçı formada pozuldu. Bu gün Əli bəyin arşını ilə sıradan çıxmış
hesab olunan bəzi liderlər ondan daha çox hörmət-izzət sahibi olaraq qala
biliblər. Qərb dövlətlərinin
siyasi dəstəyinə bəslənən çoxillik ümidlərin puç olmaq əlamətləri çılpaqlığı ilə
ortadadı. Hakimiyyətin son illərdəki sosial müdafiə tədbirlırinin effektini öldürmək
çabaları nəticə vermədi. İnsanlar
sadə bir əks-üsul tapdılar. Əli
bəyin rəngarəng feysbuk statuslarını tərəzinin bir gözünə, aldığı maaş və pensiyaların artımını o biri
gözünə qoydular, real işin və sözçülüyün fırqinə vardılar. Nə qədər
artım və böyümə görüntüsü yaratmağa çalışsa da, AXCP-nin sıraları get-gedə boşalır, samballı ziyalılar ordusu ona ümumiyyətlə
yaxın getmir, perspektivin
olmaması qəti həqiqət kimi özünü təsdiqləyir, bu durumda Əli bəy heç olmasa olan-qalan tərəfdarlarını
yanında saxlamaq üçün miskin çabalara baş vurmaq halına gəlir".
Radikal trollar dəstəsi deyilən yalançı
virtual qüvvə
Siyasi şərhçi diqqətə
çatdırıb ki, AXCP sədri Ə.Kərimlinin Azərbaycandakı vəziyyəti Misirdə, Suriyada, Liviyadakı
hadisələrlə müqayisə edərək, xalqı xoflandırmaq və hakimiyyətə qarşı ən radikal çıxışlara yönəltmək
taktikasının heç əvvəldən də uğur qazanacağı gözlənilmirdi: "Cəmiyyət Azərbaycanın heç bir olkəyə tay
olmadığını ona göstərdi. Azərbaycan
elə Azərbaycandı. Əli Kərimli hakimiyyətin sosial tədbirlərinin bir-iki xırda mitinqin yaratdığı
qorxunun nəticəsi olduğuna kütləvi inam yarada bilmədi. Əksinə, insanlar daha ayıq düşüncə mövqeyinə gəldilər ki, sosial işlər yalnız ölkənin artan iqtisadi
inkişafı ilə bağlıdlr,vəssalam. Əli
bəy bütün gücünü sosial şəbəkə imkanlarına yönəltməklə bir "Facebook” inqilabı gözlədiyi halda cəmiyyətin heç bir təsirli
hissəsini sosial şəbəkə radikallığına cəlb edə bilmədi, sonda yalnız "Facebook”da radikal trollar dəstəsi deyilən yalançı virtual qüvvə "qazandı”.
Cəmiyyəti radikal ovqata kökləmək niyyətləri
A.Quliyev yazıb
ki, Ə.Kərimlinin milyon
dollarlıq saat, bir
deputatın ərköyün uşaqlarının nadan davranışı kimi konkret məsələləri ümumiləşdirərək
xalqı kütləvi etirazlara sürükləyən faktlara çevirmək taktikaları baş tutmayıb: "Onun ard-arda açılan internet televiziyalar üzərindən cəmiyyətimizi radikal ovqatda kökləmək niyyətləri
də boşa çıxdı. Cəmiyyətin
diqqətini bir-iki cəbhəçinin xuliqanlıq ittihamı ilə sorğu -suala çəkilməsinə və
Tofiq Yaqublunun prokurorluğa çağırılmasına cəlb edə bilmədi. Heç cəmiyyətin bunlardan xəbəri də olmadı. Siyahını hələlik burda dayandırıram. Bu yazdıqlarım həftə ərzində sizlərə təqdim edəcəyim yeni təhlillərin sadəcə
tezisləri idi. Azərbaycanda sosial
inqilab təhlükəsi, bunun
ərəfəsi
deyilən bir şey yoxdu. Əli
bəyin qaynayıb qıcqıran hikkə və ambisiyaları var. Bir də BİZ varıq - bu ölkəni Əli bəyin və onun kimilərin kin-küdurət və qisasdan qida alan
ambisiyalarının öhdəsinə buraxa bilmərik...”.
Alpər TURAN