İşğalçılıq siyasəti Ermənistanı regiondan təcrid edib
Bu günlərdə Bakıda Azərbaycan-Türkiyə-Gürcüstan xarici işlər
nazirlərinin 6-cı görüşü keçirildi. Qeyd edildiyi kimi, nazirlərin bu görüşündə
əvvəlki görüşlərdə nəzərdə tutulan məsələlər müzakirə edilib. Eyni zamanda toplantısı
çərçivəsində "2017-2019-cu illərdə üçtərəfli əməkdaşlıq planı” imzalanıb.
Sonda isə Azərbaycan, Türkiyə və Gürcüstanla bağlı siyasi, iqtisadi və digər
sahələrlə əhatə edən "Bakı bəyannaməsi” qəbul edilib.
Göründüyü kimi, Azərbaycan, Türkiyə və Gürcüstan tərəfindən keçirilən
üçtərəfli format Cənubi Qafqaz regionunda bir sıra böyük layihələrin həyata
keçirilməsinə artıq öz töhfəsini verməkdədir. Bu layihələr əməkdaşlıq edən hər
üç ölkənin siyasi-iqtisadi inkişafını təmin edir. Regionun digər dövləti olan
Ermənistan isə işğalçılıq siyasəti nəticəsində regional layihələrdən gələn yüz
milyonlarla dollar gəlirdən kənarda qalıb.
Mövzu ilə bağlı "Kaspi” qəzetinə açıqlamasında Milli Məclisin deputatı, politoloq Elman Nəsirov bildirdi ki, Azərbaycan
Prezidenti İlham Əliyevin müəyyən etdiyi xarici siyasət kursunun prioritet
istiqaməti ikitərəfli münasibətlər formatıdır: "Yəni ikitərəfli münasibətlər
yüksək səviyyədə olduqda, çoxtərəfli, o cümlədən üçtərəfli münasibətlərin
yaranması və inkişafı üçün unikal imkanlar yaranır. Bunun sayəsindədir ki,
Azərbaycanın həm Türkiyə, həm də Gürcüstanla yüksək səviyyədə münasibətlərinin
olması nəticə etibarı ilə bu üç dövlətin arasında üçtərəfli formatda inkişaf
edən münasibətlərin formalaşmasına gətirib çıxarıb. Eyni zamanda Azərbaycanın
Türkiyə və İran ilə, o cümlədən Türkiyə və Türkmənistan ilə üçtərəfli formatı
formalaşıb. Bu nöqteyi-nəzərdən Azərbaycan-Türkiyə-Gürcüstan üçtərəfli formatı indiki
məqamda dinamik inkişaf tempinə malikdir. Çox mühüm enerji və nəqliyyat
layihələrinin reallaşdırılmasında bu dövlətlərin xüsusi əməkdaşlığı mövcuddur.
Bu baxımdan Bakı-Tbilisi-Ceyhan, Bakı-Tbilisi-Ərzurum neft və qaz kəmərləri artıq
fəaliyyətdədir, son olaraq isə Bakı-Tbilisi-Qars dəmiryolu xətti bu ilin
sonunda istifadəyə veriləcək. Bütün bunlar onu göstərir ki, üçtərəfli formatda
münasibətlər çox sürətlə inkişaf edir”.
E.Nəsirov qeyd etdi ki, üç ölkənin xarici işlər nazirlərinin sayca
6-cı görüşü keçirildi və burada əlaqələrin gələcək inkişafı ilə bağlı proqram
da qəbul edildi: "Eyni zamanda razılaşma əldə edilib ki, üçtərəfli format
çərçivəsində Azərbaycan, Gürcüstan və Türkiyə prezidentlərinin sammiti
keçirilsin. Təbii ki, Azərbaycanın beynəlxalq mövqeləri möhkəmlənməkdədir,
ikitərəfli, çoxtərəfli, eyni zamanda üçtərəfli formatda bizim nailiyyətlərimiz
daha da artmaqdadır. Bu isə özü-özlüyündə Ermənistanın təcrid vəziyyətinin daha
da dərinləşməsinə gətirib çıxarır. Ermənistanın yeritdiyi işğalçılıq siyasəti
ucbatından düşdüyü blokada vəziyyəti daha da dərinləşir. Elə bir vəziyyət
yaranıb ki, Ermənistan Azərbaycanın təşəbbüskarı olduğu bütün regional və
beynəlxalq layihələrdən kənarda qalıb. Beləliklə, Azərbaycan regionda güclənir,
Ermənistanın təcridi isə dərinləşməkdədir. Fikrimcə, Ermənistanın bügünkü
siyasi rəhbərliyi, əgər varsa, papağını qarşısına qoyub, düşünməlidir ki, belə
davam edərsə, bu ölkənin iflası son dərəcə real olacaq. İngilis ekspertləri
qeyd edirlər ki, Ermənistanın əsas problemi heç də Dağlıq Qarabağ münaqişəsi
deyil, onların bir nömrəli problemi bu ölkənin suverenliyinin, müstəqilliyinin
əlindən getməsidir”.
"Atlas” Araşdırmalar
Mərkəzinin rəhbəri, politoloq Elxan Şahinoğlu bildirdi ki, Azərbaycan
bir çox ölkələrlə üçtərəfli format çərçivəsində əməkdaşlıq edir: "Ermənistanın
bu formatlara oxşar hər hansı bir şəkildə fəaliyyəti yoxdur. Hətta yaxın
münasibətləri olan İran və asılı olduğu Rusiya belə, Ermənistanla belə bir
formatda maraqlı deyil. Ermənistanın nəyi var ki, onunla belə bir format
yaradıb, hansısa regional layihəni həyata keçirəsən? O ki qaldı
Azərbaycan-Türkiyə-Gürcüstan üçtərəfli formatına, bu çox faydalı əməkdaşlıqdır
və Ermənistanın təkləndiyini göstərir. Yekun bəyannamədə bir bənddə qeyd edilir
ki, bu ölkələr Azərbaycanın və Gürcüstanın ərazi bütövlüyünü dəstəkləyir, eləcə
də Dağlıq Qarabağla bağlı fikirlər yer alıb. Baxmayaraq ki, Gürcüstanın
Ermənistanla münasibətləri var, amma digər bütün məsələlərdə Azərbaycanı
dəstəkləyir. Azərbaycanla Gürcüstan arasında nə qədər layihələr var, dövlətimiz
bu ölkəyə milyardlarla dollar sərmayə yatırır. Ermənistan Gürcüstana bir dollar
investisiya qoyubmu? Yox, çünki buna maddi imkanı yol vermir. Faktiki olaraq,
Azərbaycanın təşəbbüskarı olduğu bütün layihələrdən Ermənistan təcrid olub.
Maraqlıdır ki, onlar niyə bu layihələrdən kənarda qaldıqlarını bir dəfə olsun
belə müzakirə etməyiblər. Əlbəttə, səbəblərini bilirlər ki, məhz işğala görə bu
layihələrdən kənarda qalıblar, bütün qazanclardan məhrum olublar. İşğal faktoru
olmasaydı, bu gün Gürcüstanın qazandıqlarını Ermənistan rahatlıqla əldə edə
bilərdi”.
E.Şahinoğlu vurğuladı ki, Ermənistanın ən böyük arzusu Rusiya ilə
İran arasında nəqliyyat xətti seçilərkən özünün bu layihədə yer alması idi:
"Amma İranla Rusiya əlavə xərcləri nəzərə almaqla Ermənistandan imtina etdilər
və bu layihədə Azərbaycana üstünlük verdilər. Məhz qeyd etdiyim Şimal-Cənub
marşrutu yaxın vaxtlarda fəaliyyətə başlayacaq. Göründüyü kimi, Ermənistan
bundan da məhrum oldu. Düşünürəm ki, Azərbaycan həm bu formatlar vasitəsi ilə,
həm də cəbhədə Ermənistana təzyiqi artırmalıdır”.
Bəxtiyar MƏMMƏDLİ