İrəvanın məqsədi
Sülh müqaviləsini
imzalamamaq üçün təxribat, yoxsa...
İşğaldan azad edilmiş ərazilərdə qalan Ermənistan silahlı
birləşmələri Azərbaycan Ordusunun yerləşdiyi mövqelərə atəş açmaqda davam edir.
Hətta Naxçıvanla sərhəddə belə bu təxribatlar törədilir. Maraqlıdır ki, bu
təxribatlar son günlər daha intensiv xarakter alıb. Baxmayaraq ki, ötən ilin
noyabrında 44 günlük müharibədən sonra Rusiyanın təşəbbüsü ilə imzalanmış birgə
bəyanatda Ermənistan, silahlı birləşmələrini Azərbaycan ərazisindən çıxaracağı
ilə bərabər, həm də atəşkəsin qorunacağına dair öhdəlik götürüb.
Paşinyan tərəfindən idarə
edilir, yoxsa...
Amma görünən odur ki, Ermənistan həmişə olduğu kimi yenə də vədini yerinə yetirmək niyyətində deyil. Bəzi
ekspertlər bu təxribatları müxtəlif cür şərh edirlər. Onların bir hissəsi hesab
edir ki, təxribatlar yeni hökumət formalaşdıran Nikol Paşinyanın özü tərəfindən
idarə edilir. Məqsəd isə sülh sazişi ilə bağlı ölkə əhalisini inandırmağa
yönəlib.
Koçaryan- Sarkisyan amili?
Digər ekspertlər isə bildirir ki, əslində bu təxribatların arxasında
eks-prezidentlər Robert Koçaryan və Serj Sarkisyan dayanır. Onlar ordunun
içərisindəki tərəfdarları vasitəsilə bu addımları atırlar ki, Paşinyanla rəsmi
Moskva arasında münasibətlərə zərbə dəysin. Lakin hansı versiyanın
səslənməsindən asılı olmayaraq, mütəmadi olaraq Azərbaycan Ordusuna qarşı
təxribatlar baş verir. Bəs görəsən Ermənistanın məqsədi nədir? Rəsmi İrəvan
indiki halda bu təxribatları törətməklə nəyə nail olmaq istəyir?
Daxili auditoriya üçün
Mövzu ilə bağlı "Kaspi”
qəzetinə açıqlamasında deputat, siyasi elmlər doktoru Elşad Mirbəşirbildirdi ki, Ermənistanın hərbi təxribatlarını davam etdirməsi hər şeydən öncə
ona dəlalət edir ki, sülh müqaviləsi imzalamağa hazır deyil: "Amma bu,
Ermənistan üçün çox təhlükəli nəticələrə gətirib çıxara bilər. Ermənistanın
özündə də bəzi siyasi dairələr, siyasi fiqurlar hesab edirlər ki, bu
təxribatları onlara baha başa gələ bilər. Elə Ermənistanın sabiq prezidenti
Levon Ter-Petrosyan da buna bənzər mövqe nümayiş etdirmişdi. Bəs Ermənistanın
bu təxribatları davam etdirməsinin arxasında daha hansı məqamlar dayana bilər?
Hesab edirəm ki, hər şeydən öncə bu təxribatlar daxili auditoriyaya da
hesablanıb. Hazırkı mərhələdə hökumətin formalaşdırılması prosesi gedir. Ayrıca
olaraq da, bildiyimiz kimi, iki sabiq prezident Koçaryan və Sarkisyan
Ermənistanın Konstitusiya Məhkəməsinə seçkilərin nəticəsi ilə bağlı müraciət
ediblər və bildiriblər ki, Konstitusiya Məhkəməsi onların gözləntilərinə uyğun
olmayan qərar verəcəyi təqdirdə, insanları meydanlara çıxaracaqlar. Belə olan
halda hesab edirəm ki, Nikol Paşinyan və onun ətrafı daxili auditoriyaya
yönəlik müəyyən addımlar atırlar. Belə deyək, onlar özləri üçün, öz xəstə
təfəkkürlərinə söykənərək hesab edirlər ki, Azərbaycana qarşı təxribatlar
indiki zamanda onların mövqelərinin möhkəmlənməsinə xidmət edə bilər”.
Rusiya üçün də vacib məsələ
E.Mirbəşirin sözlərinə görə, Nikol Paşinyan və ətrafı hesab edir ki,
bu cür təxribatlar vasitəsi ilə daxili auditoriyanı loyallaşdıra bilərlər:
"Əlbəttə ki, bu, versiyalardan biridir. Bildiyimiz kimi, bir çox hallarda
Paşinyan elə özü də, komanda üzvləri də Azərbaycana münasibətdə sərt ritorikaya
üstünlük verərək bir növ cəmiyyətdə mövqelərini daha da möhkəmləndirməyə
çalışırlar.İkinci məqam ondan ibarətdir ki, Ermənistan ordusunda sabiq
prezidentlərə sədaqətli olan komandirlər hələ də mövcuddur. İndiki zamanda
Paşinyanın, belə deyək, Rusiya ilə münasibətlərinin korlanmasını şərtləndirəcək
belə təxribatları təsirli alət rolunda görürlər. Çünki Nikol Paşinyan iyul
ayının 7-də Rusiya prezidenti Vladimir Putinlə görüşən zaman da vurğulanan əsas
məqamlardan biri ondan ibarət oldu ki, ötən ilin noyabr ayında imzalanmış birgə
bəyanatın şərtlərinə əməl olunmalıdır. Bu, Rusiya üçün vacib və həm də həssas
məsələdir”.
Kremlin təşəbbüsü iflasa
uğrayarsa...
Millət vəkili deyir ki, məhz Rusiyanın vasitəçiliyi ilə birgə bəyanat
imzalanıb və Kreml regionda sülhə nail olunması prosesində özünün aparıcı rolunu təsdiq etməyə
çalışır: "Əgər Rusiyanın bu təşəbbüsü iflasa uğrayacaqsa, o zaman beynəlxalq
imicinə də ciddi zərbə dəymiş olacaq. Bu baxımdan Koçaryana və Sarkisyana bağlı
hərbi dairələr, ola bilsin ki, Azərbaycana qarşı bu təxribatları yaratmaqla Rusiyanın
sülh yaratmaq missiyasına da kölgə salmaq istəyirlər. Bunu da Paşinyanın adına
bağlamaqla, onunla Kreml arasında münasibətləri soyuqlaşdırmağa çalışırlar”.
Bəxtiyar Məmmədli