Bakı 14°C
İngilis klublarının qənimi
Arsen
Venger belə demişdi: "Sanki "PlayStation” oynayırdı. Hər bir səhvimizdən faydalandı.
Daha altı-yeddi il ən yüksək səviyyədə oynayacaq. İmkansızları da reallaşdırır”
Sentyabrın
28-də PSJ Çempionlar Liqasının qrup mərhələsinin 2-ci turunda "Mançester Siti”yə
qalib gəldi – 2:0. Paris klubunun ikinci qolunu isə Lionel Messi vurdu. Bu,
argentinalı futbolçunun yeni klubunda ilk qolu idi. "Qurban” isə yenə də İngiltərə
klubu oldu.
35 oyun,
28 qol
Leo İngiltərənin
nəhəng klublarının qapısına az qol vurmayıb. 35 oyunda adlı-sanlı klubları 28 dəfə
məyus etmək asan iş sayılmamalıdır. Təkcə bir fakta diqqət edək: Messini nəzərə
almasaq, Çempionlar Liqasında İngiltərə klublarını ən çox məyus edən
futbolçunun hesabında cəmisi 12 qol var. Hələ onu da qeyd edək ki, Leonun
hesabında 6 məhsuldar ötürmə də var. Qol+ötürməni nəzərə alsaq, hər
qarşılaşmada orta hesabla 0,94 faiz məhsuldarlıq alınır. Möhtəşəm nəticədir.
Sevimli
"qurban” və Vengerin proqnozu
Messinin
İngiltərə klubları arasında sevimli "qurban”ı da var. Bu, "Arsenal”dır.
Argentinalı "topçular”ı 9 dəfə məyus edib. Bu qollardan 4-ü 2009/2010 mövsümündə
keçirilən əfsanəvi oyunda vurulub. Leo həmin qarşılaşmada poker etmişdi. O oyundan
sonra "Arsenal”ın baş məşqçisi Arsen Venger belə demişdi: "Sanki "PlayStation”
oynayırdı. Hər bir səhvimizdən faydalandı.
Daha altı-yeddi il ən yüksək səviyyədə oynayacaq. O, müasir dövrün müjdəsi ola
bilər. İmkansızları da reallaşdırır”. Vengerin proqnozu özünü doğrultdu. Messi
artıq 10 ildir ki, yüksək səviyyədə çıxış edir və həqiqətən də müasir futbolun əfsanəsi
ola bildi.
Mançester
nəhənglərini də "sevir”
Messi
sabiq baş məşqçisi Xosep Qvardiolanın çalışdırdığı "Mançester Siti”ni də çox
"sevir”. O, "şəhərlilər”in qapısından 7 top keçirib. Özü də balansı qorumaqla –
7 oyunda. Bu qollardan 3-nü bir oyunda -
2016-cı ildə "Nou Kamp”da keçirilən qarşılaşmada vurub. "Mançester Yunayted” isə
onun əlinin "suyunu” 4 dəfə dadıb. Qollardan 2-si Çempionlar Liqasının
finalında vurulub.
"Çelsi” ha
qaçsa da...
Leonun
uzun müddət məyus edə bilmədiyi İngiltərə klubu "Çelsi” olub (2012-ci ildə
Çempionlar Liqasının yarımfinal qarşılaşmasını və qaçırılan penaltini
xatırlayaq). Amma sonda "zadəganlar” da "təslim” olublar. Messi bu komandanı 2018-ci
ildə keçirilən 2 oyunda 3 dəfə məyus edə bilib.
Hələ 90 dəqiqəsi
də var
2018/2019
mövsümündə argentinalı futbolçu "Liverpul”un da qapısından 2 top keçirib. Amma
bu qollar "Barselona”nın işinə yaramayıb. "Enfild”də keçirilən qarşılaşmada
"Liverpul”un nə pəstah çıxartdığı hər kəsə bəllidir. "Tottenehm” də Messidən
"2” alıb. 2018-ci ilin oktyabrında Leo Lorisi 2 dəfə məyus edib. Bu mövsüm onu
İngiltərə klubları ilə ən azı bir oyun da gözləyir. Noyabrın 24-də "Mançester
Siti” ilə. Bu isə o deməkdir ki, İngiltərə
nəhənglərini məyus etmək üçün Leonun 90 dəqiqəsi də var.
Kaspi.az
