İkili standartlar, yaxud növbəti qərəzli münasibət
Nikol Paşinyan onun istefasına gətirib çıxara biləcək (erməni mediası
bu ehtimalı irəli sürür -müəl) qalmaqallı ölüm hadisəsi ilə üzləşib. "Haynews.am”
xəbər saytının rəhbəri, siyasi məhbus Mger Yegiazaryan Yerevandakı "Nubarasen”
həbsxanasında ölüb. O, eyni zamanda "Erməni Qartalları: Vahid Ermənistan” Partiyasının
sədr müavini idi. Həbsxananın mətbuat xidmətindən verilən məlumata görə,
Ermənistan Respublikası Ədliyyə Nazirliyinin adıçəkilən həbsxanasına yanvarın
26-da, saat 06.15 radələrində 1968-ci il təvəllüdlü məhbus M.Yegiazaryanın
sağlamlığının kəskin pisləşməsi səbəbindən təcili yardım çağırılıb. Saat 06.35-də
həbs edilmiş şəxsin bioloji ölümü qeydə alınıb. Faktla bağlı məhkəmə-tibbi
ekspertiza təyin olunub, araşdırma aparılır. Məlumata görə, M.Yegiazaryan 5
dekabr 2018-ci ildə aclıq aksiyası elan edibmiş. O, Milli Təhlükəsizlik
Xidmətinin əməkdaşları tərəfindən ötən ilin dekabr ayında dələduzluq və
hərbçilərdən pul qoparmaq ittihamı ilə həbs edilmişdi. İstintaq materiallarına
görə, M.Yegiazaryan 2014-cü ilin fevral ayından 2018-ci ilin oktyabrınadək olan
müddətdə hərbçilərdən, onlara iş düzəldəcəyi və digər məsələlərlə bağlı vədlər
verərək şəxsən və ya vasitəçilərin əli ilə 180 mindən 4 milyon 775 min drama
(10 min dollar) qədər rüşvət alıb.
Həbsxanadakı ölüm hadisəsindən dərhal sonra erməni mediası Paşinyana
qarşı total hücuma keçib. "1in.am” saytında dərc olunan "Nikol Paşinyanın
təhlükəli susqunluğu - cəmiyyət istefa tələb edir” başlıqlı məqalədə bildirir
ki, baş verəni sadəcə qətl adlandırmaq mümkün deyil. "Bu, dövlətin öz
vətəndaşını necə öldürməsini əks etdirən nümunədir. Özü də bu, vətəndaş həbsxanada
ola-ola baş verir”, - deyə müəllif yazır. Daha sonra əlavə edir ki, dövlət,
onun müvafiq strukturları üçün həbsxanalarda olanlar "ikinci sort” vətəndaşlar
hesab olunurlar, onların həyatları məmurlar üçün heç bir əhəmiyyət kəsb etmir:
"Elə olmasaydı, ay yarımdır ki, aclıq keçirən bir şəxslə kimsə maraqlanardı,
insan ölümünün qarşısı alınardı. Heç olmasa, məhkəmə həmin şəxsin girov
müqabilində azad olunması üçün edilən müraciəti rədd etməzdi. Ermənistanın yeni
Penitensiar Xidməti faktiki olaraq əvvəlki kriminal-oliqarxik sistemdən heç nə
ilə fərqlənmir. Bu, utancgətirən elə bir biabırçılıqdır ki, onlarla insan
məsuliyyət daşımalıdır. Tək öz vəzifələrindən məhrum edilməməli, cinayət
məsuliyyətinə cəlb edilməməlidirlər. Bu elə bir haldır ki, hakimiyyət ən yüksək
səviyyədə buna reaksiya verməlidir. Penitensiar Xidmətin fəaliyyəti isə
ikiüzlülüyün və özbaşınalığın bütün hədlərini keçir. Bu qurumun rəhbərliyi
islah-əmək müəssisələrində korrupsiya, özbaşınalıq və rüşvətxorluğun qarşısını
almaq əvəzinə, Ədliyyə Nazirliyi "Jamanak” qəzetinə qarşı iddia qaldırıb. İddia
ərizəsində islan-əmək müəssisələrində yaşanan qanunsuzluqlardan yazan qəzetin
təkzib verməsi tələb olunur. Qəzet yazmışdı ki, islan-əmək müəssisələrində tam
qanunsuzluq hökm sürür. Yeni Ermənistanda islah-əmək müəssisələri ətrafında
müxtəlif qruplaşmalar peyda olub - onlar məhbuslara narkotik, alkoqol və ərzaq
çatdırmaqla külli miqdarda pul qazanırlar. Həbsxana rəhbərliyi öz növbəsində
məhbuslarla əməkdaşlıqdan pul qazanırlar. Bizim məlumatlara görə, bir sıra
məhbuslar həbsxana rəhbərliyinə pul verirmişlər ki, kameralarının qapıları açıq
qalsın. Əgər bu proseslər davam edərsə, onda Ermənistan tək regionda deyil,
bütün dünyada ən qeyri-azad həbsxanaları olan ölkə olacaq”. Qeyd olunur ki,
müasir Ermənistanda həqiqət budur ki, ölkəni bütün sahələri köhnə düşüncəli
kadrlar idarə edir, korrupsiya, başıpozuqluq, himayəçilik və qətllər davam
edir. "Fərq odur ki, nazirlər başqadır. Görəsən, baş nazir yeni Ermənistan
barəsində nə düşünür? Bu ölkədə yaşayan insanların ölümü, bu Ermənistan onu
maraqlandırmırmı? Nikol Paşinyan, cinayət işlərinə sizin qarışmaq imkanınız nə
dərəcədədir?” - deyə məqalə müəllifi sualla çıxış edib.
Yeri gəlmişkən, məsələ ilə bağlı "The Washington Post” qəzeti "Erməni
siyasi xadim aclıq aksiyasından sonra öldü” başlıqlı məqalə dərc edib: "Ermənistanın
kiçik siyasi partiyasının lideri təxminən 2 aya yaxın davam edən aclıq
aksiyasından sonra həbsxanada ölüb”.Siyasi məhbusun ölümündən sonra oğlu
Vazqen Ermənistanın baş naziri və parlamentin bir qrup deputatına açıq məktub
ünvanlayaraq, onları atasının ölümünə bais olmaqda günahlandırıb. Vazgen,
Paşinyanın atasını siyasi səbəblərlə həbsə atdırdığını deyib:"Nikol
Paşinyan, sizin bu cinayət işinə müdaxilənizin səviyyəsini biz, yəqin ki,
sonadək tam bilməyəcəyik. Amma siz "nə olursa-olsun, bu adamı həbsə atmaq
lazımdır” prinsipi ilə çıxış edərək davranmısınızsa, onda diləyirəm ki, mənlə
qardaşımın və anamın çəkdiyi bütün əzablar sizin həyat yoldaşınız və oğlunuzun
da başına gəlsin və onlar da eyni təcrübəni yaşasınlar. Unutmayın ki, icraçılar
şəxsən sizə yox, sizin vəzifənizə, kreslonuza tabedirlər. Bu kreslo isə bu gün
sizdədir, sabah isə başqasında”.
Maraqlı olan baş verənlərə beynəlxalq təşkilatların, ən əsası Avropa
Parlamentinin susqunluğudur. Azərbaycanda məhbusun guya aclıq aksiyası
keçirməsini əlində dəstəvuz edib ölkəmizə qarşı hücuma keçən
avroparlamentarilər nədən səslərini çıxarmırlar. Azərbaycanı hədəfə götürən və
qətnamə çıxaran Avropa Parlamenti görəsən Ermənistanda baş vermiş daha ağır
hadisəyə niyə göz yumur? Bu ikili standartların səbəbi nədir? Həmin o
deputatlara sual vermək lazımdır ki onlar bununla bağlı Avropa Parlamentinə hər
hansısa bir müraciət göndərəcəklərmi? Eləcə də sual vermək lazımdır ki,
M.Hüseynovun məsələsi ilə bağlı ard-arda bəyanat verən Qərb siyasətçiləri,
beynəlxalq təşkilatların nümayəndələri, beynəlxalq QHT-lər, media niyə
Ermənistanla bağlı susurlar? Sözsüz
ki, qonşu ölkədə yaşananlar Qərbin müvafiq qurumlarının demokratiya
maskalarının növbəti dəfə cırılması üçün kifayət edir.
Azər NURİYEV