Bakı 24°C
Hikmət Babaoğlu: “Azərbaycanı mühüm nəqliyyat qovşağına çevrilir”
"Azərbaycan "Şimal-Cənub” nəqliyyat dəhlizi layihəsinin
mühüm həlqəsi olmaqla həm iqtisadi, həm də strateji maraqlarını həyata keçirmək
üçün dividentlər qazanır”.
Bu barədə Milli Məclisin deputatı, politoloq Hikmət
Babaoğlu "Kaspi” qəzetinə açıqlamasında bildirib.
O qeyd edib ki, "Şimal-Cənub” beynəlxalq nəqliyyat
dəhlizi olduqca strateji bir layihədir. Millət vəkilinin fikrincə, layihə Azərbaycanı
bu istiqamətdə mühüm nəqliyyat qovşağına çevirir: "Diqqət yetirsək görərik ki,
mürəkkəb regionda geostrateji qütblər arasında münasibətlərin daha da kəskinləşdiyi
bir vaxtda Azərbaycan məhz burada körpü rolunu oynamaqla özünün milli maraqlarını
təmin edir”.
Millət vəkilinin sözlərinə görə, Azərbaycan
"Şimal-Cənub” nəqliyyat dəhlizi layihəsinin mühüm həlqəsi olmaqla, özü üçün həm
iqtisadi, həm də strateji maraqlarını həyata keçirmək üçün siyasi dividentlər
qazanır: "Hindistanın Mumbai limanından İranın Bəndər-Abbas limanına qədər gələn
yolun davamı kimi Qəzvin-Rəşt-Astara yolu ilə daşınan yüklərin Rusiya
Federasiyasına, oradan Avropanın şimalındakı ölkələrə qədər ötürülməsi heç şübhəsiz
ki, nəqliyyat kommunikasiya tarixində yeni bir hadisə kimi qiymətləndiriləcək. "Şimal-Cənub”
nəqliyyat dəhlizi istiqamətində çox böyük həcmdə yük daşımaları var. Amma bu
yükdaşımaları əsas etibarilə Süveyş kanalı üzərindən realizə edildiyi üçün
45-60 gün ərzində təyinat nöqtəsinə çatdırıla bilir. Lakin "Şimal-Cənub” nəqliyyat
dəhlizi işə düşdükdən sonra bu müddət cəmisi 14-20 gün olacaq ki, bu da yeni nəqliyyat
dəhlizini olduqca cəzbedici bir dəhlizə çevirəcəkdir. Çünki bu dəhliz sadəcə
müddət baxımından deyil, həm də onun ətrafında olan siyasi-inzibati coğrafiyada
ümumi təhlükəsizliyinin təmin olunması baxımından da mühüm əhəmiyyət daşıyır”.
H.Babaoğlu bildirib ki, Azərbaycan 2005-ci ildən bu
layihəyə qoşulduqdan sonra onun çox fəal iştirakçısına çevrilib: "Qəzvin-Rəşt-Astara
avtomobil yolunun çəkilməsi ilə bağlı kredit ayrılıb. 2018-ci ildə İran
prezidenti Həsən Ruhaninin Azərbaycana səfərindən sonra bir daha Azərbaycan və
İran prezidentləri arasında bu məsələnin müzakirə olunaraq təqdir edilməsi onu
göstərir ki, layihə təkcə nəqliyyat kommunikasiya layihəsi deyil, həm də qonşu
dövlətlə ikitərəfli münasibətlərin inkişafına yeni impulslar verəcək bir layihədir”.
Millət vəkili qeyd edib ki, Ələt Beynəlxalq Dəniz
Ticarət Limanı "Şərq-Qərb” nəqliyyat dəhlizindən sonra Azərbaycanın "Şimal-Cənub”
nəqliyyat dəhlizi üzərində mühüm qovşağa çevrilməsi ölkəmizin mürəkkəb strateji
regionda nüfuzunu artırmaqla yanaşı, həm də iqtisadi maraqlarını təmin etmiş
olacaq”.
Kaspi.az
