Heydər Əliyevin ideyalarını yaşadan partiya - Fotolar
Yeni Azərbaycan Partiyası (YAP)
Azərbaycan tarixinin son dərəcə ağır və keşməkeşli günlərində, ölkənin ciddi
sınaqlara məruz qaldığı bir dövrdə Azərbaycan ziyalılarının təşəbbüsü və fəal
iştirakı ilə yaranıb. Azərbaycan müstəqilliyini əldə etdikdən az müddət sonra
ölkədə hakimiyyətdə olan və bir-birini əvəz edən siyasi qüvvələr respublikada vəziyyəti
ağırlaşdıraraq təhlükəli böhran vəziyyətinə çatdırıblar. Ölkəni bürümüş dərin
siyasi, iqtisadi, sosial böhran xalqın qabaqcıl hissəsi olan ziyalıları,
tanınmış insanları son dərəcə narahat edib. Bu zaman Azərbaycanın taleyini
düşünən insanlar ölkəni böhrandan çıxara biləcək yeni bir partiya yaratmaq
təşəbbüsü ilə çıxış ediblər. Bu məqsədlə xalqın sınanmış lideri və müdrik oğlu
Heydər Əliyevin şəxsiyyəti ətrafında birləşiblər. Məhz belə bir vaxtda 91 nəfər
Azərbaycan ziyalısının imzası ilə Naxçıvana, Heydər Əliyevə müraciət göndərilib.
Azərbaycanın ən yeni tarixinə "91-lər”in müraciəti kimi daxil olmuş həmin sənəd
əslində, bütün xalqın arzu və istəklərinin ifadəsi idi. Azərbaycanın görkəmli
ziyalıları, tanınmış insanları və nüfuzlu şəxsiyyətlərinin imzaladıqları bu
müraciətdə ümummilli lider Heydər Əliyevdən yeni yaradılacaq siyasi partiyaya
rəhbərlik etmək xahiş olunurdu. Xalqımızın dahi oğlu, tanınmış dövlət xadimi və
böyük təcrübəyə malik ulu öndər Heydər Əliyev o dövrdə blokada şəraitində olan
Naxçıvan Muxtar Respublikasının Ali Məclisinə sədrlik edirdi. Heydər Əliyev
xalqın müraciətini qəbul etsə də, onun Bakıya gəlməsinə o zamankı hakimiyyətin
maneələr yaratması ucbatından partiyanı yaratmaq istəyən insanların bir hissəsi
- 550 nəfərdən ibarət təşəbbüs qrupu Naxçıvana gedərək təşkilatın təsis konfransını
orada keçirməyə nail olublar.
Dinc
və firavan həyatının təmin edilməsi
Azərbaycanın bütün
regionlarından seçilmiş nümayəndələrin təmsil olunduğu konfrans 1992-ci il
noyabrın 21-də Heydər Əliyevin sədrliyi ilə keçirilib. Təsis konfransı YAP-ın yaradılması
haqqında qərar, partiyanın Proqram və Nizamnaməsini qəbul edib. Konfransda ümummilli
lider Heydər Əliyev yekdilliklə partiyanın sədri seçilib. Habelə, partiyanın
Siyasi Şurası, İdarə Heyəti və sədrin müavinləri seçilib. Beləliklə, müstəqil
Azərbaycan tarixində öz üzərində böyük tarixi missiya götürən və xalqımızın
həyatında mühüm hadisəyə çevrilən YAP yaranıb. YAP Azərbaycan Konstitusiyası və
qanunvericiliyi çərçivəsində, özünün Nizamnaməsi və Proqramı əsasında fəaliyyət
göstərən, öz sıralarında Azərbaycanda hüquqi dövlət, sabit və sosialyönümlü
iqtisadiyyat, vətəndaş cəmiyyəti qurmaq ideyalarını qəbul edən vətəndaşları
birləşdirən sağ mərkəzyönümlü siyasi partiyadır. YAP-ın Proqramında irəli
sürülmüş əsas vəzifələr dövlət müstəqilliyinin möhkəmləndirilməsi, demokratik,
hüquqi, dünyəvi dövlətin qurulması, vətəndaşların dinc və firavan həyatının
təmin edilməsidir. Partiya məfkurəsinin əsasını təşkil edən müstəqil
dövlətçilik, qanunçuluq, azərbaycançılıq, yaradıcı təkamül, vətəndaş həmrəyliyi
və sosial ədalət prinsipləri YAP-ın qarşısında duran vəzifələrin həyata
keçirilməsinin ideya təminatı olaraq mahiyyətcə Azərbaycanın siyasi gələcəyinin
də ideya bazasını şərtləndirmiş olur.
Əsas
məqsəd və vəzifələr
YAP 1992-ci il dekabr
ayının 18-də Ədliyyə Nazirliyində qeydiyyata alınıb və Azərbaycanın bütün
rayonlarında qısa müddətdə rayon təşkilatları və özəkləri yaradılıb. YAP-ın
təsis konfransında qəbul etdiyi Proqram və Nizamnaməsi 1999-cu il dekabr ayının
20-21-də keçirilən I Qurultayında geniş şəkildə müzakirə olunaraq müəyyən əlavə
və dəyişikliklər edilməklə təsdiq olunub. YAP-ın Proqram və Nizamnaməsinə uyğun
olaraq təşkilatın strateji xətti təsbit edilib, Azərbaycanın dövlət
müstəqilliyinin qorunması və möhkəmləndirilməsi, onun müasir beynəlxalq sistemdə
layiqli yer tutması, ölkəmizdə hüquqi dövlət quruculuğu istiqamətində əsas
məqsəd və vəzifələr müəyyənləşdirilib.
Kütləvi
siyasi qüvvə
1993-cü ilin oktyabr ayının
3-də YAP-ın sədri, ümummilli lider Heydər Əliyevin prezident seçilməsi ilə
partiyanın həyatında yeni dövrün əsası qoyulub. Partiyanın statusu yeni şəraitə
uyğun olaraq dəyişib, ölkənin siyasi həyatında onun tutduğu mövqe möhkəmlənib,
kütləvi siyasi qüvvəyə çevrilərək ictimai həyatın bütün sahələrində tərəqqiyə
nail olmaq məqsədilə yüksək fəallıq nümayiş etdirib. 1995-ci ilin noyabr ayının
12-də keçirilən parlament seçkilərində Milli Məclisə seçilən deputatların
əksəriyyəti YAP üzvləri olub. Ulu öndər Heydər Əliyev YAP-ın I Qurultayında
yenidən partiyanın sədri seçilib. Qurultay habelə Siyasi Şuranın yeni
tərkibini, YAP sədrinin təqdimatı ilə onun müavinlərini, İdarə Heyətinin
üzvlərini, İcra katibi və onun müavinlərini seçib. YAP-ın 2001-ci ilin noyabr
ayının 21-də keçirilən II Qurultayı təşkilatın həyatında taleyüklü qərarlar
qəbul edib. Partiyanın Nizamnaməsinə dəyişikliklər edilib və yeni təsis olunan
sədrin birinci müavini vəzifəsinə yekdilliklə İlham Əliyev seçilib.
Azərbaycan
beynəlxalq arenaya çıxıb
Qeyd edək ki, 1993-2003-cü
illərdə Azərbaycanda diqqətdən kənarda qalan hər hansı sahə olmayıb. Ulu öndər
Heydər Əliyev ölkə həyatında baş verən ən xırda problemə belə həssaslıqla
yanaşıb və onun həllinə çalışıb. Bir zamanlar xəyal edilən iqtisadi layihələr
uğurla həyata keçirilib. "Əsrin müqaviləsi” imzalanıb, ümummilli lider Heydər
Əliyevin siyasi iradəsi və peşəkar diplomatik fəaliyyəti sayəsində
Bakı-Tbilisi-Ceyhan layihəsi reallaşıb. Dövlət, ordu quruculuğu sahəsində ciddi
işlər görülüb, Azərbaycan beynəlxalq arenaya çıxıb. Xarici ölkələr, beynəlxalq
təşkilatlar məhz ulu öndər Heydər Əliyevin siyasi nüfuzuna arxalanaraq müxtəlif
sahələrdə Azərbaycan ilə əməkdaşlığa başlayıblar.
Qazanılan
parlaq qələbələr
2003-cü ilin oktyabr ayının
15-də keçirilən prezident seçkilərində YAP sədrinin birinci müavini, İlham
Əliyev prezident seçilib. YAP-ın 2005-ci ilin mart ayının 26-da keçirilən III
Qurultayında İlham Əliyev yekdilliklə YAP-ın sədri seçilib. 2 avqust 2008-ci
ildə YAP-ın IV Qurultayı keçirilib. Qurultay tarixi qərar qəbul edərək,
partiyanın sədri İlham Əliyevin növbəti müddətdə prezidentliyə namizədliyini
irəli sürüb. 2008-ci ilin 15 oktyabrında keçirilən prezident seçkilərində
YAP-ın namizədi İlham Əliyev növbəti dəfə parlaq qələbə qazanaraq Azərbaycan
Prezidenti seçilib. 2013-cü il iyun ayının 7-də YAP-ın V Qurultayı keçirilib.
Qurultayda ölkə başçısı İlham Əliyevin növbəti müddətə Azərbaycan Prezidenti
postuna namizədliyi irəli sürülüb. V Qurultayın işində partiyanın təşkilatı
məsələlərinə baxılıb. İlham Əliyev yenidən YAP-ın sədri seçilib. 2013-cü ilin
oktyabrın 9-da keçirilən Prezident seçkilərində YAP-ın namizədi İlham Əliyev
növbəti dəfə parlaq qələbə qazanaraq Azərbaycan Prezidenti seçilib.
Vətəndaşların
mütləq əksəriyyətinin dəstəyi
2016-cı il sentyabrın 26-da
Prezident İlham Əliyevin Konstitusiyaya əlavə və dəyişikliklərin edilməsi ilə
bağlı təşəbbüsü keçirilən ümumxalq səsverməsində (referendumda) yüksək
qiymətləndirilib, ölkə vətəndaşlarının mütləq əksəriyyəti tərəfindən dəstəklənib.
2018-ci il fevral ayının 8-də YAP-ın VI Qurultayı keçirilib. Qurultayda
ölkə başçısı İlham Əliyevin növbəti müddətə Azərbaycan Prezidenti postuna
namizədliyi irəli sürülüb. 2018-ci ilin aprelin 11-də keçirilən Prezident
seçkilərində YAP-ın namizədi İlham Əliyev parlaq qələbə qazanaraq Azərbaycan Prezidenti
seçilib.
Güclü
xalq-iqtidar birliyi
Xatırladaq ki, xalqın
təkidli tələbi ilə yenidən siyasi hakimiyyətə gətirilən, 1993-2003-cü illərdə
ölkəyə rəhbərlik edən ümummilli lider Heydər Əliyev bu müddətdə Azərbaycanın
müstəqil və suveren dövlət kimi fəaliyyətini təmin edən kursu hazırlayıb və onu
həyata keçirməyin bütün incə yollarını layiqli davamçısı İlham Əliyevə miras
kimi qoyub. Bu siyasi kursun Prezident İlham Əliyev tərəfindən uğurla həyata
keçirilməsinin nəticəsidir ki, hazırda Azərbaycan regionun ən qüdrətli
dövlətidir, dünyada böyük nüfuza malikdir.
Cənubi Qafqazın lider dövlətinə
çevrilən Azərbaycanın razılığı və iştirakı olmadan regionda heç bir layihə icra
olunmur. Ölkə daxilində sabitlik, firavanlıq hökm sürür, insanların rifah halı
gündən-günə yaxşılaşır. Elə bir sahə yoxdur ki, orda öyünə biləcəyimiz
nailiyyətimiz olmasın. Bakı-Tbilisi-Qars dəmir yolu xəttinin istifadəyə
verilməsi, "Cənub Qaz Dəhlizi” layihəsinin həyata keçirilməsi, "Yeni Əsrin
Müqaviləsi”nin imzalanması iqtisadi sahədə qazanılan uğurlardandır. Əlbəttə ki,
bütün bu uğurlar güclü xalq-iqtidar birliyinin sayəsində mümkün olub. Ona görə
də tam əminliklə demək olar ki, yaranmasının 26 ilini qeyd etdiyimiz YAP ümumxalq
partiyasıdır. Bu partiyanın sıraları hər il durmadan genişlənir. İyirmi altı
illik şərəfli tarixə malik YAP bu gün də ulu öndər Heydər Əliyevin ideyaları
ilə yaşayır və inkişaf edir.
Alpər
TURAN