Həyatın bütün ağrı-acısını yaşamış ziyalı
Görkəmli ədəbiyyatşünas alim, filologiyaelmləri doktoru, professor, əməkdar müəllim,Prezident təqaüdçüsü Yavuz Axundlununanadan
olmasının 90 illiyi tamam olur.
Atam məni göydən yerə endirib, müəllimim yerdən göyə qaldırıb.
Aristotel
Ağlımız kəsəndən tanıdığımız ilk böyüklər
ata-anadır. O, adamlar ki, ömürləri boyu bizə təkcə maddi cəhətdən əl tutmağı
deyil, doğru yolu göstərməyi də özlərinə borc bilirlər. Geniş mənada, hər bir
ata, hər bir ana ağsaqqal, ağbirçəkdir, özü də bu keyfiyyət onların təbiətindən
doğur. Vay o gündən ki, eldə sayılan ağbirçək, ağsaqqal olmasın...
Tələbələr özlərini ona bənzətməyə çalışırdılar
"Ağıl yaşda deyil, başdadır” deyimin də həqiqət
olduğu hər kəsə bəllidir. Hər saqqalı ağ
olana da ağsaqqal deməzlər. Ağsaqqal- cəmiyyətin mənafeyi üçün lazım olan hər
işi görən adama deyərlər. Ağsaqqallıq, ağbirçəklik-müdrikliklə əkizdir. Ağıllı
sözün almadığı qala yoxdur. Ağla qida verən müdriklər – ağsaqqallar, ağbirçəklərdir.
Elə adamlar var ki, Allah
onlara hələ gənclik çağlarından ağsaqqallıq bəxş edir. Belə ağsaqqallardan biri
də həyatı boyu bütün ağsaqqallıq əlamətlərini özündə formalaşdırmış Yavuz
Axundludur.
Yavuz müəllimin görkəmi
ağsaqqal görkəmi olub həmişə. 50 ildən çoxdur ki, müşahidə edirəm, görkəm həmin
görkəmdir. Yerişi, davranışı, səliqə-sahmanı, danışığı, təmkini, ağırlığı ilə
başqalarını onun qabağında ehtiyatlı olmağa, artıq hərəkət etməməyə sövq
etdirib. Çox vaxt Yavuz müəllimi Süleyman Rəhimov, Əziz Şərif, Məmməd Cəfər,
Mirəli Qaşqay, Mirəli Seyidov görkəmi ilə müqayisə edib, fərəhlənmişəm. Pedaqoq
üçün xarici görkəmin nə qədər əhəmiyyətli olduğunu Yavuz müəllimin timsalında
görmüşəm. APİ-nin Naxçıvan filialında tələbə olduğumuz illərdə (1967-1971-ci
illər) Yavuz müəllimin görkəmi bizi nə qədər ondan "çəkindirirdisə”, bir o qədər
də bütün tələbələr özlərini ona oxşatmağa, bənzətməyə çalışırdılar. Bu əlamət
isə onu tələbələrə daha da yaxınlaşdırar və mehribanlaşdırardı.
Vaxtilə məclislərin birində yaxın məslək silahdaşı,
Azərbaycanın tanınmış yazıçısı və kino ssenaristi mərhum Əhmədağa Muğanlının
dediyi sözlər yaxşı yadımdadır: "Bütün tələbə dostları Yavuza hörmətlə
yanaşardı, çünki adi bir ehtiyatsızlıq, onun
gözündən düşmək kimi hörmətsizlik qazandırardı. Ona görə də hamımız həmyaşıd
olsaq da, ondan çəkinər və "pis” hərəkətlərimiz üçün hətta utanardıq”.
Halbuki, Yavuz müəllimin
tələbə dostları Fərhad Zeynalov, Yusif Seyidov, Həsən Şirəliyev kimi respublikanın
tanınmış alim-ziyalıları olmuşdur. Azərbaycanın görkəmli alim-pedaqoqları, M.Rəfili,
M.Cəlal, A.Zamanov, Dəmirçizadə, Mirzə Feyzulla Qasımzadə, Əzizə Cəfərzadədən dərs
alan Yavuz müəllim həmişə onları yad edir və xatirələrini əziz tutur. Yavuz Axundlunun atası, babası da respublikada
nüfuz sahibinə çevrilmiş müəllimlər olmuşlar.
Yavuz müəllimin atası,
respublikamızın görkəmli maarif xadimi, əməkdar müəllim İbrahimxəlil müəllimi
görmək mənə qismət olmayıb. Ancaq eşitdiyimə görə, İbrahimxəlil müəllimin də
şagirdləri, tələbələri ona hörmətlə yanaşar "ağır adamdır” deyərmişlər.
El-obada da böyük nüfuz sahibi olub.
İbrahimxəlil Axundlu ədəbiyyatımızın,
tariximizin, mədəniyyətimizin bilicisi olmaqla, xalqımızın ictimai-siyasi
tarixində də diqqətəlayiq bir şəxsiyyət kimi tanınmışdır. Hələ 1918-ci ildə ermənilər
Naxçıvanda qanlı faciələr törədərkən, günahsız insanları öldürüb, kəndləri
yandırarkən İbrahimxəlil müəllim könüllülərdən ibarət xalq dəstəsi təşkil edərək,
düşmənə qarşı mübarizəyə qalxmış, böyük şücaət və qəhrəmanlıq göstərmişdir. Məhz
buna görə də türk ordusunun Naxçıvanı erməni təcavüzündən xilas etdiyi zaman,
ordunun Baş Komandanı Kazım Qarabəkir Paşa İbrahimxəlil Axundlunun fədakarlığını
təqdir etmiş, ona yüksək hərbi rütbə və bir sıra qiymətli mükafatlar təltif
etmişdir.
Qabil şagird ustad olar ustada
Yavuz müəllimi
tanıyanlar, onunla ünsiyyətdə olanlar (ailə üzvləri də daxil olmaqla) yanında
papiros çəkmir, içki içmirlər. Bu yaxınlarda ona yaxın bir cavan dostu
zarafatyana dedi: "Xocam, bilirsiniz bizə nə qədər siqaret borcunuz var?”
Cavabında "sağlamlıq borcunuzu hesablasaq, uduzarsınız, siz mənə borclu
qalarsınız” dedi. Yavuz müəllimin bu nüfuz və "zabitə”sindən belə bir nəticəyə
gəlmək olar ki, uzun əsrlərdən bəri üzüm yetişdirən, tütün becərən diyarda
indinin özündə də şəraba, içkibazlığa, papirosa meylin zəif olması azərbaycanlı
gəncin ağsaqqal, ağbirçək üzünə kefli, damağında papirosla çıxmasının ta qədimdən
ağır qəbahət, ədəbsizlik sayılmışdır. Deməli, qadın əxlaqının saflığına, kişi mənəviyyatının
təmizliyinə xidmət edən "yasaq”lar da kökümüzdən bəhrələnmişdir.
"İnsanlıq vəzifəsi qəlbin
mühakiməyə uyğun fəaliyyətidir” deyib Aristotel. Yəni, ağılla qəlbin vəhdəti tənzimləyir
insanlıq vəzifəsini. Bu keyfiyyəti daşıyan adamı Aristotel "doğru adam”
adlandırmış, insan anlayışına layiq saymışdır. Eyni fikri Hegel bir qədər başqa
tərzdə anlatmışdır. "İnsan anlayışına, insanlıq vəzifəsinə uyarlı olmayan pis
adam həqiqi adam deyil” demişdir. Belə fikirlər ömrün mənasını xeyirxah əməllərdə
axtarmağa yönəldir. Xeyirxahlıq zəminində niyyətin, fikrin, əməlin bir-birini
tamamlaması sayəsində yetişir ahəngdar şəxsiyyət. Ulu Zərdüştün dediyi
yaddaşımızda yaxşı qalıb - "yaxşı niyyət, yaxşı söz, yaxşı əməl”. Bütün tərbiyə
işinin amalı bu "üçlüyün” vəhdətinə bağlıdır. Tərbiyəçinin şəxsi nümunəsi,
düşüncəsi, ünsiyyəti ön plana alınmalıdır. Müdrik atalar sözüdür: "Qabil şagird
ustad olar ustada”. Sənətinin sənətkarı, ruhu, təbiəti zəngin olan müəllim
beyinləri, qəlbləri oyatmaqda sehrli gücə malikdir. Axı onun geniş biliyindən,
nəciblik timsalı təbiətindən neçə-neçə yeni nəsil dərs alır. Əsl müəllim şəxsiyyəti
özündə böyük cazibə qüvvəsi daşıyır. Yorucu nəsihətlərdən onun şəxsi nümunəsi
daha yaxşı təsirlidir. Senekanın kəlamıdır: "Nümunənin yolu yaxın, nəsihətin
yolu uzaq”.
Yuxarıda deyilənlərin
Yavuz müəllimin pedaqoji fəaliyyətində necə yer tutması göz qabağındadır.
Ömrünün 70 ilini "ağlın maariflənməsi” işinə sərf etmiş bu müdrik ağsaqqalın təkcə
bu gün onlarca tələbəsi professor və dosent kimi respublikamızın Universitetlərində,
100-ə yaxın tələbəsi məktəb direktoru və direktor müavini, yüzlərlə tələbəsi
elmin, mədəniyyətin, təhsilin müxtəlif sahələrində çalışır.
Xoşbəxtliyə baxın, bu gün professor özünün
50-yə yaxın tələbəsi ilə birlikdə 50 il bundan öncə həmin Universitetin təməlini
qoyanlardan biri kimi Naxçıvan Dövlət Universitetində (1967-1972 - APİ-nin
Naxçıvan filialı, 1972-ci ildən isə Naxçıvan Dövlət Universiteti adlanır-F.Z)
işləyir, onlarla səmimiyyətlə, qarşılıqlı işgüzar şəkildə gənc nəslə Azərbaycanımızın
ədəbiyyatını öyrədir, əxlaqi-mənəvi sərvətlərimizin aşılanmasına xidmət edir.
Görkəmli adamlardan biri deyib: "İnsan yaxşı əməldən iki dəfə zövq alar, birincisi
onu edən zaman, ikincisi əvəzini görən zaman”. Bu mənada Yavuz müəllim çox xoşbəxt
adamdır.
Ziyalı və ziyalılıq!
Böyük Nizami Gəncəvi müəllim-şagird,
tərbiyəçi-tərbiyə olunanlar arasındakı münasibətlərə böyük əhəmiyyət vermişdir.
Nizami tərbiyəçilərdən tərbiyə olunanlara atalıq qayğısı tələb etmişdir. "Yeddi
gözəl” əsərində Mənzərin Bəhrama atalıq qayğısı göstərməsinə geniş yer verən
Nizami yazırdı:
Bəhrama atadan daha mehriban
Kəsilib tutardı
əziz canından
Nizami demişdir ki, şagirdlə müəllim, tərbiyəçi
ilə tərbiyə olunanların münasibətlərində səmimiyyət, qarşılıqlı anlaşma
olmalıdır.
Nizaminin qəhrəmanları öz müəllimlərinə
böyük hörmət etmiş, hətta şahlıq tacına sahib olandan sonra belə öz müəllimlərini
unutmamışlar. Xosrov da, Bəhram Gur da, İsgəndər də belə etmişdir. İsgəndər
alimləri öz ətrafına toplamış "alimdir gözümdə ən əziz olan” deyərək, fərman
vermişdi. Onun dövründə gənclər alimlərə rəğbət bəsləmişlər. "Elm adamlarını müəllim
yetişdirir, buna görə də müəllim daha yüksəkdə duraraq, adamları kamillik zirvəsinə
çağırır” demişdir.
Kaş, Yavuz müəllim kimi simalı müəllimlərimizin
sayı bu gün azalmayaydı. Onda tələbələrin də öz müəllimlərinə hörməti və sədaqəti
azalmaqdansa, artardı. Böyük Nizaminin vəsiyyəti kimi.
"Professor Yavuz Axundlu əsl
ziyalıdır!” ifadəsində böyük məna vardır. Ziyalı və ziyalılıq problemi tarixən
xalqı düşündürən əsas problemlərdən biridir. Bu problem ətrafında çox söhbətlər
gedir və getməlidir. Ziyalı kimdir? Ziyalılıq nədir? Tarixən Azərbaycan xalqının özünün ziyalıları ilə fəxr etməyə
tam haqqı olub. M.F.Axundovun, A.Bakıxanovun, M.Kazımbəylinin,
M.C.Topçubaşovun, M.Ş.Vazehin, S.Ə.Şirvaninin, M.Ə.Sabirin, A.Səhhətin, H.Zərdabinin,
M.Hadinin, Ə.Hüseynzadənin, M.Ə.Rəsulzadənin, C.Məmmədquluzadənin,
Ə.Haqverdiyevin, A.Şaiqin, M.S.Ordubadinin, M.Şaxtaxtinskinin, N.Nərimanovun və
bir çox ziyalılarımızın Azərbaycan ziyalılığının yaranmasında oynadıqları rol
tariximizin səhifələrinə qızıl hərflərlə həkk olunmuşdur. Ömürlərini xalqın səadəti
uğrunda fəda etmiş bu ziyalıları xalqımız bu gün də böyük hörmətlə yad edir.
Həyatın bir çox nemətlərindən özünü məhrum
etmiş M.F.Axundov xalqını ziyalandırmaq üçün yeni əlifba yaratmış, dram əsərləri
yazmış, fəlsəfi traktatını qələmə almış, həmişə maddi ehtiyac içində yaşayan H.Zərdabi "Əkinçi” qəzetini öz pulu hesabına
buraxmış, özü mətbəədə mürəttiblik etmiş, həmin çətinliklərlə rastlaşan C.Məmmədquluzadə heç bir hədə-qorxudan çəkinmədən
"Molla Nəsrəddin” jurnalını nəşr etdirmiş, Ü.Hacıbəyov pulsuz-parasız operalar
yazmış, onları tamaşaya hazırlamış, özü orkestrdə skripka çalmış, məslək dostu
Ə.Haqverdiyevi tamaşaya dirijorluq üçün dəvət etmişdir.
İnqilabdan sonra
H.Z.Tağıyevin həbs olunması haqqında orderi imza atmaq üçün N.Nərimanova
vermişdilər. O, bu orderə qol çəkməmiş və səbəbini belə izah etmişdir: "Mən
onun pulu ilə oxumuşam və təhsil pulunun çoxunu hələ qaytara bilməmişəm. Həbs
orderinə qol çəksəm, xalq məni düzgün başa düşməz”.
Bax, budur əsl ziyalılıq! Bu gün hörmətli
müəllimimiz, professor Yavuz Axundlu atası İbrahimxəlil Axundovla birlikdə
ömürlərinin bir əsrdən çoxunu gənc nəslin tərbiyəsinə, onun maariflənməsinə sərf
ediblərsə, bu, ziyalılıq timsalı deyilmi?!
Atasının bütün mənəvi-əxlaqi məziyyətlərini yeni nəslə
çatdırmaq, onun xatirəsini əbədiləşdirmək üçün əlindən gələni etməklə, gənc nəslə
nümunə göstərmək ziyalılıq ifadəsi
deyilmi?!
Yavuz müəllim
xoşbəxtdir ki...
Yavuz Axundlunun elmi fəaliyyəti və yaradıcılığı çox geniş və əhatəlidir.
Onun "Tarixi-roman və müasirlik” (1975), "Azərbaycan Sovet tarixi romanı”
(1979), "Tarix və roman” (1988), "Naxçıvan yurdum mənim” (1988), M.S.Ordubadi
(1997), "Mənim əbədi dünyam” (1998), "İstiqlal şairləri” (1998), "Əbədi mühit və
sənətkar” (2002), "Əlimdədir hələ qələm” (2003), "Əbədi portretlər” (2004) kimi
qiymətli monoqrafiya və kitabları ilə birlikdə yüzlərlə elmi jurnal və qəzet məqalələri,
tədris-metodik vəsaitləri uzun illərin elmi axtarışlarının bəhrəsidir.
Türkiyədə nəşr olunan "İstiqlalın azarlı yolu”
(türk dilində) və İranda nəşr olunan "Qarabağ harayı” (ərəb əlifbası ilə)
kitabları ona böyük şöhrət qazandırmışdır.
Təkcə son illərdə 2 kitabı Azərbaycanda,
1 kitabı və 3 elmi məqaləsi Türkiyədə, bir kitabı isə İranda çap olunub, geniş
oxucu kütləsinin müzakirəsinə verilmişdir.
Hazırkı dövrdə Azərbaycan ziyalılarının
böyük bir dəstəsi yetişir. İndiki şəraitdə onların qarşısında böyük, hüdudsuz
imkanlar açılmışdır. Çünki bugünkü ziyalılar Azərbaycanımızın ziyalılaşması
üçün çox işlər görə bilərlər. Fikrimcə, birinci növbədə keçmiş ziyalılıqla
indiki ziyalılıq arasında dağılmış mənəvi körpüləri əsaslı sürətdə bərpa etmək
lazımdır. Bu gün yetişməkdə olan yeni ziyalı nəsli keçmişin və bu günün ziyalı ənənələrinə
sədaqətdən, hörmətdən bəhrələnməli, onları daha da inkişaf etdirmək yollarını
axtarmalı və tapmalıdır.
Çünki, bu gün yeni yaranan ziyalı nəslində
daxili azadlıq, sərbəstlik ruhu, inamı vardır. Bu nəsil keçmişdən fərqli olaraq,
öz yüksək amallarını həyata keçirmək üçün heç bir şeydən çəkinmir, qorxmur. Axı
ziyalı nəslin öz fikri, öz əqidəsi, öz yolu olmalıdır. Ziyalı hər oxuduğu
kitabın əsiri olmamalı, özgə fikirləri tutuquşu kimi təkrar etməməlidir. Bu ən
azı mənəviyyatsızlıqdır. Gənc ziyalı nəsli özündə xalq, cəmiyyət qarşısında məsuliyyət
hissini, bəşəri duyğuları daha çox tərbiyə etməlidir.
Ziyalılığın geniş ənənələrini bərpa və
inkişaf etdirməkdə, onların klassik obrazını yaratmaqda ədəbiyyat daha çox iş
görə bilər. Bu baxımdan Yavuz müəllim xoşbəxtdir ki, ömrünün yarım əsrdən
çoxunu ədəbiyyat fənninin tədrisinə həsr edib, ədəbiyyatı məfkurə üçün ən qiymətli
vasitə, insanda lətif, incə, kövrək hisslər formalaşdırmağın yeganə nümunəsi
hesab edib, ədəbiyyatın tərbiyəvi qüvvəsindən istifadə gündəlik işinin mayasını
təşkil edib.
Bu gün 90 yaşlı professor yenə də mütaliə
edir, çalışır. Görünür ki, A.Bakıxanovun "elm və kamal təhsilinə hər şeydən çox
çalış, çünki hər şey onların köməyi ilə əldə edilir” nəsihəti onun həyat qayəsinə
çevrilib.
İndiki narahat dünyamızda az adam tapılar
ki, bu yaşda mütaliə etsin, yazıb-yaratsın. Bir necə il bundan öncə bərk xəstələnmişdi.
Oğlanları Ədalət və Rəşadətdən, yaxın qohumlarından Yavuz müəllimi soraqladıqca,
deyinirdilər: "Oxumaqdan əl çəkmir, doymur ki, doymur. Validə müəllimə də (həyat
yoldaşı) məzəmmətləyir, xeyri yoxdur”.
Burada çox oxuyan alim haqqında eşitdiyim
bir əhvalat yadıma düşür. Alim divanxanadan evinə müəyyən bir vaxtda
qayıtmazmış. Gah tez gələrmiş, gah da yubanarmış. Bir gün arvadı ondan qəti söz
alır ki, vaxtında gəlib nahar etsin. O, söz verir və həmişə də dediyinə əməl
edib, saat dörddə evə gəlir. Lakin bir gün alim verdiyi sözə əməl etmir, evə
gec gəlir. Arvadının məzəmmətini eşitməmək üçün onu qabaqlayır: "Bu dəfə məni
bağışla, pəncşənbənin (ərəb əlifbasında pəncşənbə sözündə on nöqtə vardır) nöqtələrini
qoyurdum, ona görə yubandım.
Sözsüz ki, Yavuz müəllim də ömür-gün
yoldaşının məzəmmətlərindən yaxa qurtarmaq üçün özünəməxsus dəst-xətti ilə
zarafatyana "üzrlü səbəblər” tapır.
Yavuz müəllim səliqə-sahmanı, xüsusilə də
geyimi həmişə yerində olan bir ziyalı-alimdir. İti yeriş, ucadan danışmaq, əsəbiliyi
büruzə verib, kiminsə salamını almamaq bu adamın xarakterinə yaddır. Bütün bu
keyfiyyətlər üçün Validə xanımın "əziyyətlərini” qiymətləndirmək lazımdır. Təxminən
60-cı illərin axırlarında müdrik el ağsaqqalı, Azərbaycanın xalq yazıçısı "Dağ
qartalı” təxəllüsünü qazanmış Əli Vəliyev
Naxçıvana - pedaqoji instituta tələbələrlə görüşə gəlmişdi. Görkəmli yazıçının
o zaman "Ulduz” jurnalında yenicə çapdan çıxmış "Samovar tüstülənir” povesti
haqqında söhbət düşmüşdü. Tələbələrdən biri yazıçıya "Əli müəllim, bu yaşda bu
qədər alovlu məhəbbət sizdə hardandır? Eşitdiyimizə görə dişləriniz də
özünüzünküdür” sualını verib. Sual çoxmənalı olsa da Əli müəllim cavabı belə
olub: "Oğul, məni bu vəziyyətə salan Qumrudur” (Qumru xanım yazıçının həyat
yoldaşı olub).
Nümunəvi, qayğıkeş valideyn
M.F.Axundovun fikrincə, kamil adam olmaq üçün
yeddi vəzifəni yerinə yetirmək vacibdir;
Birinci vəzifə - insan pis əməllərdən
qaçmalıdır.
İkinci vəzifə - insan yaxşılıq etməyə
çalışmalıdır.
Üçüncü vəzifə - insan zülmü dəf etməyə
çalışmalıdır.
Dördüncü vəzifə - insan öz həmnövləri ilə
qətiyyətdə müttəfiq yaşamalıdır.
Beşinci vəzifə - insan elm ardınca getməlidir.
Altıncı vəzifə - insan hər yerdə elmi
yaymağa çalışmalıdır.
Yeddinci vəzifə - insan öz qüvvəsi və
imkanları daxilində özünə müttəfiq olan cəmiyyət, öz həmvətənləri və həməqidələri
içərisində qayda və qanunları mühafizə etmək uğrunda mübarizə aparmalıdır.
Xoşbəxtdir o adamlar ki, bu vəzifələrin bir necəsi onun şəxsiyyətində formalaşsın. Mən
belə insanların siyahısında Yavuz Axundlunun soyadını birincilər sırasında
yazardım.
Yavuz müəllim nümunəvi, qayğıkeş valideyndir. İki oğul, bir qız
atasıdır. Böyük oğlu Ədalət Azərbaycan Texniki Universitetinin professorudur. Kiçik
oğlu Rəşadət isə uzun müddət Azərbaycan daxili işlər orqanlarında çalışmışdır.
Qızı Nazimə həkimdir. Onlarla nəvəyə, nəticəyə babalıq edən Yavuz Axundlu nəvə
toyunun şirinliyini dadmış, ağsaqqal kimi xeyir-duasını vermiş, Allahdan onlara
xoşbəxtlik diləmişdir. Nəvə toyundan sonra Yavuz müəllimin sifəti daha da
nurlanıb. Axı atalar "dövlətdə dəvə, övladda nəvə deyiblər”. Nəticələri isə
professora yeni yaradıcılıq ruhu və həvəsi gətirib.
Həyatın bütün ağrı-acısını yaşamış çıxmış
bu müdrik ağsaqqal lap körpəliyindən üç yaşlı qardaşını itirmiş, ana və ata
yoxsulluğu hiss etmiş, qardaşı oğlunun faciəsini yaşamış, qardaş və bacı itkisi
ilə üzləşdikdən sonra 70 yaşında nəvə toyu görmüşdür. Qədim el rəvayətində
deyilir: "Padşah şikayətçilərindən yaxa qurtarmaq üçün sarayın bir tərəfinə
çoxlu daş-kəsək tökdürərək, fərman verir ki, onun yanına gələnlərinin yolunu
oradan salsınlar.
Şikayətçilərin çoxu bu yolun əzab-əziyyətli
olduğunu bilib, şikayətdən əl çəkirlər. Bu vaxt vilayətdə böyük nüfuz sahibi
olan bir müəllim bu hadisə ilə əlaqədar padşahın yanına gəlməli olur. Yolun
"işgəncəsi”ndən xilas olmaq üçün şahın əyanlarına bildirir ki, şaha çatdırın
ki, vaxtilə ona dərs vermiş bir müəllim onunla görüşmək istəyir.
Şah bu xəbəri eşitcək, səhv etdiyini başa
düşür. Əmr edir ki, təcili "işgəncəli” yolu qaydaya salsınlar, yolun kənarına
gül-çiçək düzsünlər, ən hörmətli qonaq kimi müəllimini qarşılamağa
hazırlaşsınlar.
Müəllimin saraya gəlişi böyük bayrama çevrilir.
Müəllim şahın "mədəni etirafını” başa düşüb, üzünü ona tutaraq deyir; "Padşah xəzinəsi
də altı şahılıq qıfıla möhtacdır. Padşahın da rəiyyətə işi düşər. Dolunu yeyib,
boşa təpik atma! Pis günə qalarsan”.
Müəllimin bu hikmətli sözlərindən sonra
padşah bir daha səhv etdiyini dərk edir. Tarixən bütün sarayların bağlı
qapıları müdrik insanlar- müəllimlər üçün "açıq qapı” elan edilib. Bu ənənə bu
gün də davam edir. Çünki müəllimlik peşəsi sənət olmaqla bərabər, həm də ən şərəfli
vəzifədir.
Ümummilli Liderimiz Heydər Əliyev demişdir:
"Müəllim vəzifəsi ona görə şərəflidir ki, o, cəmiyyət üçün ən dəyərli, bilikli,
zəkalı, tərbiyəli, vətəndaşlar hazırlayır”.
Hörmətli professor Yavuz Axundlu! Sizi 90
yaşınızın tamam olması münasibətilə ürəkdən təbrik edir və bu şərəfli vəzifənin
yerinə yetirilməsinə bütün həyatınızı sərf etmisiniz. Sizə daha böyük
yaradıcılıq müvəffəqiyyətləri arzulayır, Allahdan 100 illik ömür, can sağlığı və
şükranlı günlər diləyirik.
Fizuli İbrahimzadə,
Tarix üzrə fəlsəfə doktoru, dosent