“Güzgüyə baxanda özümdən səksənirdim” - Fotolar
"Musiqi ritmdir, musiqi
zövqdür, musiqi keyfiyyətdir”. Bunu bizə "Eurovision-2011” mahnı müsabiqəsinin azərbaycanlı qalibi
Eldar Qasımov deyir. "Kaspi”nin suallarını
cavablandıran ifaçı yaradıcılığındakı ən son yenilikləri bizimlə bölüşdü. Qeyd
etdi ki, beynəlxalq mahnı müsabiqəsindəki tərəfdaşı Nigar Camalla həyata
baxışları fərqli olsa da, dost münasibətləri indi də davam edir.
- Eldar bəy, yeni mövsümə
yeniliklərlə geri döndünüz. Sizin sosial şəbəkədəki hesabınızdan yay tətilini
köhnə dostlarınızla uzaq bir adada keçirdiyinizi izlədik. Hətta bu
paylaşımlarınızdan sonra sizi zadəgan adlandıranlar da tapıldı.
-
Yayı dostlarla gözəl keçirdik. İstirahət etməyə on gün qalmış planlaşdırdıq ki,
imkan daxilində həyatda bir dəfə də olsa Yunanıstanın Mykonos adasında olaq.
Ora turistik bir bölgədir. Həmin ərazilər çox abadlaşdırılıb və mükəmməl
görüntüsü var. Bütün ada ağ-göy və tünd qırmızı rənglərə boyanmışdı.
Yunanıstanın məşhur dar küçələri məhz orada yerləşir. Həqiqətən də çox maraqlı
bir yerdir. O adanı çox böyük zövqlə gəzdik.
- Bu istirahətdə tərəfdaşınız
Nigar Camal sizi tək qoymadı. Bu paylaşımlar sizin ayrılmadığınızı, hələ də dost münasibətində
olduğunuzu sübut etdi.
-
Əlbəttə ki, biz Nigarla hələ də dostuq. Kim deyir ki, biz onunla danışmırıq və
bir-birimizə qarşı kinimiz var, bu səhvdir. Bizim aramızda heç bir mübahisə
olmayıb. Ola bilər ki, Nigarla fərqli düşüncə sahibləriyik. Həyata baxışımız,
düşüncələrimiz üst-üstə düşmür. Nigarla musiqi zövqlərimiz də fərqlidir. Ancaq
bu o demək deyil ki, bir-birimizi danışdırmırıq, küsülüyük. Sənət baxımından
ayrı-ayrı yollarla gedirik. Həyat fəlsəfəmizin dostluğumuza aidiyyəti yoxdur. Aramızdan
heç bir soyuq külək əsməyib.
- Nigar Camalla yenidən
işbirliyiniz olacaqmı?
-
Bu barədə düşünürük. Hesab edirik ki, bizə uğur gətirən "Running Scared” mahnısından
daha möhtəşəm bir mahnı olmalıdır ki, tamaşaçılar bu mahnını yenidən sevsin.
Kiçik addımlarla nəsə etməyə çalışırıq. Həmin mahnıdan sonra yeni bir mahnı
oxumaq hər ikimizdən məsuliyyət tələb edir. Çünki biz yenidən birlikdə mahnı
ifa etsək, bütün Avropa mediasının diqqəti bizdə olacaq. Ola bilsin ki, nə
zamansa yeni bir mahnı oxuyaq. Əslində, yarışmadan sonra Nigarın albomunda yer alan bir-iki mahnını studiyada yazdırdıq
ki, duet kimi ifa edək.
- Çox zaman deyirlər ki, "Eurovision”
mahnı müsabiqəsində iştirak edən ifaçılarımız müsabiqədən sonra qeybə
çəkilirlər. Bəs siz bu haqda nə düşünürsünüz?
-
Mən də bu cür fikirləri eşidirəm. Davamlı olaraq medianı izləyirəm. Azərbaycanda
çalışan müğənnilərin ifa tərzi "Eurovision” müsabiqəsinə və Avropa musiqisinə
ziddir. Orada Avropasayağı, xarici mahnılara daha çox üstünlük verirlər. Çünki
bu daha keyfiyyətli alınır. Biz bu mahnılarla özümüzü tanıda bilərik. Burda
hələ ki dəb halını almayıb. Peşəkar Avropa mahnısının ifaçıları azdır. Bizdə müasir
Qərb musiqisi üstün deyil. Mən tam olaraq deyə bilmirəm ki, bu, yaxşıdır, bu,
pisdir. İnsanlar kimi zövqlər də müxtəlifdir və bizim məmləkətdə insanlar daha
çox etnik və milli musiqilərə üstünlük verirlər. Ancaq çox şadam ki,
izləyicilərim və dinləyicilərim var. Onlar mənim musiqimi dinləyirlər.
-
Avropaya ayaq açdıqdan sonra məşhurlaşmaq
şəraiti və imkan əldə etdiniz. İndi hansı ölkənin sənətçiləri ilə birlikdə
çalışırsınız?
-
Bilirsiniz ki, mən daha çox İsveçdə və Ukraynada çalışıram. İndi isə qazaxıstanlı
partnyorlarımız məni Asiya musiqi bazarına çıxarırlar və bundan sonra onlarla da
işləyəcəyik. Orda sistem başqadır. Prodüser, musiqiçilərlə studiyaya gedib,
10-15 mahnı yazdırırsan, sonra onu musiqi nəşriyyatlarına göndərirsən. Həmin
nəşriyyatlar da mahnını alıb qısa zamanda məşhurlaşdırırlar. Və sən ondan gəlir
əldə edirsən. Həm sən, həm də musiqi prodüserləri qazanır. Eyni zamanda,
səninlə bərabər bəstəkarlar və söz yazarları da buradan qonorar əldə edir. Əvvəlcədən
heç kim pul almır. Çünki bu, sonu görünməyən bir işdir. Burda bazar başqa cürdür.
- Avropaya gedəndə sizi
tanıyırlarmı?
-
Deyilənə görə tanıyırlar. Orda insanlar bir az komplekssizdir. Ancaq buna
baxmayaraq, gözləmirlər ki, hansısa bir tanınmış insan onlara yaxınlaşsın.
Onlar çalışırlar ki, bir az məsafə saxlasınlar. Məsafə deyilən bir şey var,
bəlkə mən istəmirəm ki, mənə yaxınlaşsınlar və söhbət etsinlər. Ancaq hərdən
yaxınlaşıb fikirlərini bildirirlər.
- Çətin ki, sizi bu imiclə
tanısınlar...
-
Bəli, bu imic mənim çoxdankı istəyim idi.
- Saçlarınızı bəyaz rəngə boyamaq
yəqin ki, cəsarət tələb edir.
-
Əslində bu mənim arzum idi. Bir ilin arzusu idi ki, saçımın rəngini dəyişim. Bu
mənim çox xoşuma gəldi. Özümü başqa cür hiss edirəm. Saçlarımı boyadıqdan sonra
ilk iki gün güzgüyə baxanda özümdən səksənirdim. Deyirdim, görəsən bu kimdir?
Ancaq indi alışmışam və bu rəngi çox bəyənirəm.
-
Sizi bu saç rənginə görə qınayanlar olubmu?
-
Siz mənə baxın. Görün heç bu mənim vecimədir? Mən həmişə öz istədiyimi
seçmişəm. Müsahibəmizi oxuyanlara demək istəyirəm ki, həyat insana bir dəfə
verilir. Bizə 60 ömür verilməyib. Əlbəttə ki, çərçivələri olan, etnik qaydalara
riayət edən həyatda yaşayırıq. Bizi xoşbəxt edən və heç kimə maneçilik
törətməyən əməlləri etməliyik, çünki bu, bizi xoşbəxt edir. Bizi nə xoşbəxt
edirsə, onu da etməliyik və həyatın bizə verdiyi fürsətdən faydalanmalıyıq. Bizə
verilən bu həyatı zövqlə yaşamaq lazımdır.
-
Adətən keçmişdə bir kişi saçına xına
qoyanda, onu qınayırdılar.
-
Desinlər. Eşitmişəm ki, bizim kişilər də saçlarını boyayıb.
- Ancaq ağ rəngə boyayana
rastlaşmamışıq.
-
(Gülürük) Ola bilər. Kimsə saçlarını rəngləyir və heç kimə demir ki, rəngləyib.
Deyir ki, öz saçımdır. Mən heç kimin yanında bu kompleksi yaşamıram. Açıq-aydın
deyirəm ki, saçlarıma rəng qoymuşam.
-
Azərbaycanda ifaçılar gəlirini toylardan
əldə edir. Bir Avropa ifaçısı olaraq sizin gəliriniz hardandır?
-
Mən toylara gedirəm, ancaq diskoteka və parti olan hissələrə.
- Bu gün sosial şəbəkələri və
"Youtube” portalını bayağı mahnılar bürüyüb. Avropa musiqisinin ifaçısı kimi,
sizin o mahnılara münasibətiniz necədir?
-
Biz hazırda peşəkar musiqi sahəsində bir az axsayırıq. Çünki qarşımıza bənzərsiz
və səviyyəli mahnılar çox nadir hallarda çıxır. İstedadlı və peşəkar musiqi
zövqü yüksək olan insanlar da çox azdır. Biz hamımız bunun üzərində işləyirik.
Yəqin ki, bu mahnılar kiminsə xoşuna gəlir. Heç nə durduğu yerdə reytinq
gətirmir. Bu kiməsə lazımdır ki, dinləyir. İnsanlar bu mahnını dinləməsə, onlar
da bu qədər məşhur olmazlar. Tələbat olduqca, bu kimi mahnıların sayı daha da
artır. Düşünürəm ki, belə hallarda yüksək səviyyəli musiqiyə, mədəniyyətə cavabdeh
olan insanlar öz mahnılarını, keyfiyyətli işlərini təqdim etməlidirlər və bu
işdə siz medianın da böyük rolu var. Bir mahnını davamlı olaraq çox dinlədikdə,
istər-istəməz hitə çevrilir. Zövqün tərbiyəsi məhz medianın əlindən keçir.
Sosial şəbəkələrdə paylaşılır və məşhur olur.
- İndi məşhurlaşmaq daha asan və tez
başa gəlir. Bəlkə də onun üçün gənclər bu üsula əl atırlar.
-
Razıyam və bütün bunların səbəbkarı sosial şəbəkələrdir. Ancaq qeyd edim ki,
tez məşhurlaşan o insanlar tez də unudulurlar. Musiqi təhsili, zövqü olan və bu
sahədə özünü inkişaf etdirən musiqiçilər unudulmur və o ifaçılar heç vaxt
bir-iki günlük olmur. 10 ildən sonra belə onlar xatırlanır. Çünki onun
arxasında istək, iş, əmək dayanır.
- Avropa şou aləmini görən bir
ifaçı kimi, Azərbaycan şou aləmini necə qiymətləndirirsiniz?
-
Əslində bu çox fərqli masştablardır. Deyə bilmərəm ki, hansı şou aləmi daha
yaxşıdır. İnsanların yanaşmasından asılıdır. Avropadakı sənətçilərin şouya,
səhnəyə yanaşması tam fərqlidir və bu da məni qane edir. Avropa şou aləmində
çalışmaq mənim üçün daha rahatdır. Ancaq hansının yaxşı, hansının pis olduğunu
deyə bilmərəm.
- Hazırda yeni mahnı varmı?
-
Sonuncu mahnım mart ayında çıxdı. Həmin mahnı xarici bazarlar üçün hesablanıb.
Mən İsveçdə bu ayda bir mahnı yazdırdım. Yəqin bu yaxınlarda çıxacaq. Yeni bir
mahnı var, onu Azərbaycan dilində oxuyacağam. Bu mahnının ingilis versiyasını da
ifa etməyi düşünürəm. Avropadan mənə deyirlər ki, əgər bu mahnı ingiliscə olsa,
daha uğurlu olar, onlar mahnını sata bilərlər. Sizə eksklüziv olaraq mahnının
adını deyəcəyəm. Mahnı "Məsafələr” adlanır. Çox həzin və maraqlı bir mahnıdır.
- Maraqlıdır. Kiminlə aranızda
məsafə saxlayırsınız?
-
Ümumiyyətlə, insanların arasında olan məsafələr haqqındadır. Hansı
nöqteyi-nəzərdən oxuduğuma, siz mahnını dinlədikdən sonra qərar verə
bilərsiniz.
Xəyalə
Rəis